Chibkees 30

1Tadsis Laxees tsi muaj is tug minyuas tu Yakhawj ni, has niz heed niz tuz taislawg (veb) heeb, niz ha has tu Yakhawj has tas, “Koj yiad muas minyuas tu kud lossis koj yiad ca kuas kud tuag.”

2Yakhawj chid heeb tu Laxees, niz ha tes Laxees has tas, “Kud yog Vaajtswb los? Vaajtswb yog tuz kwg tsi pus koj muaj tawz minyuas los sab.”

3Laxees has tas, “Kud tuz ntxhais qheb Npilehas nyos qhais na, koj ca ni muz nrug niz pw kuas niz muaj minyuas tu kud. Ua ni na kud ha yiad taw ua tuz tus qhai tuz nad.” 4Yog ni qhai, Laxees ha muas Npilehas tu niz tuz yiag yuab, has Yakhawj ha muz nrug niz pw. 5Npilehas txiad xees tus has yug taw is tug tus tu Yakhawj. 6Laxees has tas, “Vaajtswb txabtxid rias ni niz txuj keb ncaajnceeg. Niz hnob kud tej luz thob has pus tu kud muaj is tug tus liad”; yog ni qhai, niz ha tis tuz tus qhai npe hu ua Daas.#30.6 Daas: Lus npe na has ni Henplais lu luz kwg has tas, “txabtxid rias ni lus sas nyad.” 7Npilehas rob xees tus has yug taw is tug tus tu Yakhawj. 8Laxees has tas, “Kud taw tiadtsaad kud tuz taislawg (veb) hnyaab heeb, nizna kud ha yeej niz liad”; yog ni qhai, niz ha tis tug tus qhai npe hu ua Nathalis.#30.8 Nathalis: Lus npe na has ni Henplais lu luz kwg has tas, “sis tiadtsaad.”

9Thaws Le-as paws has tas niz tsi muaj minyuas liad, niz txiad muas niz tuz ntxhais qheb Xilepas tu Yakhawj ua nadyaw. 10Ces Xilepas txiad yug taw is tug tus tu Yakhawj. 11Le-as has tas, “Kud hmoob zoo kiag”; yog ni qhai, niz ha tis tug tus qhai npe hu ua Nkaj.#30.11 Nkaj: Lus npe na luz Henplais txhais has tas, “hmoob zoo kiag.” 12Xilepas rob yug taw is tug tus tu Yakhawj, 13has Le-as has tas, “Kud zoo sas kiag nkaws ni lawj! Nizna tej puj yiad hu kud has tas, tuz zoo sas”; yog ni qhai, niz ha tis tuz tus qhai npe hu ua Aseles.#30.13 Aseles: Lus npe na luz Henplais txhais has tas, “taw keb zoo sas.”

14Thaws txug caij hlais nplej Lunpees muz ncig ua si tod tes has niz pud is cob zaws ntug hawbpawz,#30.14 Cob zaws ntug hawbpawz: Txheej lawz thaws u ntseeg has tas, noj mas ua tu tuz yiag muaj zug has muaj tawz minyuas. niz txiad rhu taw is cob coj luz tu niz nad Le-as. Laxees has tu Le-as has tas, “Thob muas koj tuz tus cob zaws ntug hawbpawz os pes lus pus tu kud.”

15Le-as tes has tas, “Koj ted coj kud tuz yiag muz liad ne, tseed tsi taw txaws koj sas has los? Nizna koj tseed tuaj thob kud tuz tus cob zaws ntug hawbpawz has.”

Laxees tes has tas, “Yog koj muas koj tuz tus cob zaws ntug hawbpawz os pes lus tu kud, is chid tsaws ntuj kud ca Yakhawj nrug koj pw.” 16Thaws yiad tsaws ntuj Yakhawj rob tod tes luz, Le-as txiad muz toz Yakhawj has has tas, “Hmo na koj yiadtsud muz nrug kud pw, tu qhob kud ted muas kud tuz tus cob zaws ntug hawbpawz txheeb koj liad.” Yog ni qhai, hmo qhai Yakhawj ha muz nrug Le-as pw.

17Vaajtswb tes Le-as tej luz thob, niz ha rob xees tus has yug taw is tug tus tu Yakhawj yog tuz tsis. 18Le-as has tas, “Vaajtswb muas nqai zug tu kud, tu qhob kud muas kud tuz ntxhais qheb tu kud tuz yiag yuab”; yog ni qhai, niz ha tis tuz tus qhai npe hu ua Ixakhas.#30.18 Ixakhas: Lus npe na has ni Henplais lu luz kwg txhais has tas, “tuz neeg kwg lag txheeb” has “cob nqai zug.” 19Le-as rob xees tus has yug taw is tug tus tu Yakhawj yog tuz raw. 20Le-as has tas, “Vaajtswb muas taw is qhob khood pus tu kud zoo kiag nkaws ni. Mas zag na kud tuz yiag yiad hlus kud, tu qhob kud ted yug taw raw tuz tus tu niz liad”; yog ni qhai, niz ha tis tuz tus qhai npe hu ua Xenpuloos.#30.20 Xenpuloos: Lus npe na has ni Henplais lu luz kwg has tas, “txais” has “pus.” 21Ces tod qaas qhai niz yug taw is tug ntxhais, has niz tis npe tu tuz ntxhais qhai hu ua Dinas.

22Vaajtswb tseed ncu ntsoob txug Laxees; niz ha tes Laxees tej luz thob has pus kuas niz muaj tawz minyuas. 23Laxees ha xees tus has yug taw is tug tus. Niz has tas “Vaajtswb pus kud muaj tuz tus na luz tshed kud txuj keb thwstxaaj tiad. 24Thob kuas tuz Tswb pus tu kud rob muaj kua is tug tus ntxib has”; yog ni qhai, Laxees ha tis tuz tus qhai npe hu ua Yawxej.#30.24 Yawxej: Lus npe na has ni Henplais lu luz kwg has tas, “thob kuas niz muas pus ntxib kua lwd zag” has “niz coj muz liad.”

Yakhawj Thob Ncaid Lanpaas

25Tod qaas kwg Laxees yug taw Yawxej liad, Yakhawj txiad has tu Lanpaas has tas, “Thob koj tso kud rob qaas, kud yiad rob qaas muz nyos nraaz kud vaid lus tseb has lus teschias. 26Thob muas kud os tug puj has kud cob minyuas kwg kud ua zug taw tu kud, kud yiad siab keb muz. Koj yeej paws has tas kud ua txhua yaad tu koj tab luz liad.”

27Lanpaas tes tu Yakhawj has tas, “Thob ca tu kud has ni na: Rias ni kud nuad yaig mas, vid muaj koj, tuz Tswb ha food kooshmoob tu kud. 28Xaad taaznrhiab tej nqai zug kwg koj ua nuad rawg pestsiag kud yiad thed tu koj.”

29Yakhawj tes has tas, “Kud taw ua hujlwd zoo npawd nicaaz tu koj has koj tej tsaj kwg kud tu fuadvaad npawd nicaaz los koj yeej paws zoo liad. 30Ua ntej thaws kud tsi taw luz koj muaj tsaj tsiag heeb, nizna koj tej tsaj kuj fuadvaad coos heeb ni liad, has tuz Tswb ted food kooshmoob tu koj txhua yaad kwg kud ua has txhua qhob kwg kud muz.#30.30 txhua qhob kwg kud muz; lossis vid taw luz qhais kud. Ua ni yiad thaws twg kud maad ni yug tawz kud lus cuas lus yig?” 31Lanpaas ha noog has tas, “Yog ni qhai, kud yiad muas daastsi luz ua nqai zug tu koj?”

Yakhawj tes has tas, “Kud tsi yuab is yaad daastsi ni. Yog koj yeed mas kud yiad nyos tu koj cob tsaj muz ntxib, xws ni: 32Hnoos na ca kud muz ncig nuad thoos pliaz koj cob tsaj has muas txhuatuz minyuas yaaj dus#30.32 Is phaw qus txhais has tas, txhuatuz minyuas yaaj dus; phaw Henplais has tas, txhuatuz yaaj txaij, has txaij ua tej teeb, has txhuatuz yaaj dus. has tej minyuas tshis kwg txaij lossis txaij tej teeb xaib ca tu is qho. Cob tsaj na lawj, yog cob kwg ua nqai zug tu kud. 33Thaws koj tuaj nuad koj ha paws has tas kud yeej ua ncaajnceeg tag. Thaws kwg koj tuaj tshuaj nuad kud tej nqai zug, yog kud tseed muaj tej tuz minyuas tshis tsi txaij lossis tsi txaij tej teeb lossis muaj is tug minyuas yaaj tsi dus ni, ces koj ha paws has tas yog kud nyag luz nyaz.”

34Lanpaas tes has tas, “Kud pud zoo yuab ni kwg koj has ntaag.” 35Tadsis hnoos qhai Lanpaas muas cob lawz tshis kwg txaij lossis txaij tej teeb has cob mawd tshis kwg txaij lossis txaij ua tej teeb lossis dias tej teeb cais, has niz muas taaznrhiab cob yaaj dus cais tiad tu is qho. Niz tso niz cob tus ua cob nuad tej tsaj qhai, 36has muas cais muz nyos nrug kes pes hnoos ke qhais Lanpaas cob tsaj kwg tseg ca tu Yakhawj tu.

37Yakhawj muas tej ceg ceb, ceg txib duaj, has ceg ses laws tia txaij ua tej kaas kuas pud tuz txhaa ceg ntoo dias pawg. 38Niz ha muas cob ceg ntoo qhai coj muz tso tu qhais lus daas dej kwg cob tsaj luz haws dej. Niz coj cob ceg ntoo muz tso tu qhais, tu qhob cob tsaj sis phood thaws cud luz haws dej ua ke. 39Yog ni qhai, thaws cob tshis luz sis phood tu qhais cob ceg ntoo qhai, cob tshis txiad yug taw cob minyuas txaij ua tej kaas has txaij ua tej teeb.

40Yakhawj txiad muas cob minyuas yaaj has minyuas tshis kwg txaij cais tiad qhais cob mawd lawz has muas cob mawd lawz tso tig tawshaw tu tod Lanpaas cob tsaj kwg txaij has dus. Qhob kwg niz ua ni na, ted yog niz fais kuas niz muaj niz is paas tsaj ua niz tug has muas cais tiad qhais Lanpaas cob muz tu is qho.

41Thaws cob tsaj kwg zoo has khob kho sis phood, Yakhawj muas cob ceg ntoo qhai coj muz tso tu qhais lus daas dej, qhob chia kwg cob tsaj luz haws dej, kuas cob tsaj luz sis phood nyos qhais cob ceg ntoo qhai. 42Tadsis niz tsi muas cob ceg ntoo qhai tso tu qhais daas dej thaws cob tsaj kwg tsi khob luz haws dej. Txij qhai luz Lanpaas ha taw cob tsaj kwg tsi khob liad nyaz, tadsis cob tsaj kwg khob puabtsig yog Yakhawj cob. 43Ted yog vid ua ni na Yakhawj ha npluanuj. Niz muaj tsaj txhu, tusqhe, ntxhuab has neez luab coos heeb.

Currently Selected:

Chibkees 30: CQD2024

Highlight

Copy

Compare