Chibkees 29

Yakhawj Muz Txug hub Lanpaas Tseb

1Yakhawj txiad raw sas ntso tawgkeb muz txug tu hub cob neeg kwg nyos saas hnoostuaj lus teschias. 2Taadsid qhai, niz nuad hlo pud is lus qhobdej nyos hub daid tes, has muaj pes paas yaaj pw piag lug ncig lus qhobdej qhai. Cob yaaj qhai yeej haws dej hub lus qhobdej na, lag muas is daid txag zes luj heeb npug lus qhobdej qhai. 3Rias ni istxwd lag toz thaws cob yaaj luz txhij tu qhais lus qhobdej liad, mas cob neeg yug yaaj maad ni muas daid txaz zes qhai tshed tiad has cug dej tu cob yaaj haws. Ces cud maad ni muas daid txaz zes rob luz npug lus qhobdej kua.

4Yakhawj noog cob neeg yug yaaj has tas, “Kud cob phoojywz, mej tuaj qhob twg tuaj?” Cud tes has tas, “Pes tuaj tod lus nroog Halaas tuaj.”

5Yakhawj rob noog kua has tas, “Mej puas paws Lanpaas kwg yog Nahaws tuz tus?”

Cud tes has tas, “Pes paws niz has.”

6Yakhawj rob noog has tas, “Niz puas noj qaas nyos zoo?”

Cud tes has tas, “Niz noj qaas nyos zoo has, koj nuad tid maj, niz tuz ntxhais Laxees taastod taab niz paas yaaj tuaj txug tid.”

7Yakhawj has tas, “Taadsid na tseed ntxub heeb tsi taw txug lus caij kwg taab tej tsaj muz tseb, ua caaz mej tsi cug dej tu mej cob tsaj haws has coj rob muz noj zaws kua?”

8Cud tes has tas, “Pes tsi ua ni qhai, toz txug thaws cob tsaj luz txhij tu qhais na taws, pes maad muas daid txaz zes tshed tiad has cug dej tu cob tsaj haws.”

9Thaws Yakhawj taastod nrug cud thaad, Laxees txiad taab niz vaid paas yaaj luz txug ncua qhai has. 10Thaws Yakhawj pud Laxees coj Yakhawj yiaddaas Lanpaas paas yaaj luz txug ncua qhai liad, Yakhawj txiad muz tu qhais lus qhobdej, muas daid txaz zes tshed tiad, has ntaws dej tu cob yaaj haws. 11Niz hna kag Laxees has quaj zoo sas heeb. 12Niz has tu Laxees has tas, “Kud yog Lenpekas tuz tus, kud nad has koj vaid yog muadnuz ntaag.”

Laxees ha dha muz qha tu niz vaid, 13has thaws Lanpaas hnob has tas niz tuz muad tuz tus Yakhawj tuaj, niz txiad dha loo muz toz Yakhawj, has coj Yakhawj luz tseb. Yakhawj qha txhua yaad tu Lanpaas noog, 14Lanpaas has tu Yakhawj has tas, “Tsees tag lawj, koj yeej yog kud nqaj tia has roj ntshaab tag.” Yakhawj nrug Lanpaas nyos taw is hlis nkaws.

Yakhawj Yuab Laxees has Le-as Ua Puj

15Lanpaas has tu Yakhawj has tas, “Koj has kud ws txiad yog txhees ze los tsi tsidnyog koj yiad ua hujlwd pus dias tu kud nyaz. Koj xaab yuab nqai zug pestsiag?” 16Lanpaas muaj os tug ntxhais, tuz hlus hu ua Le-as, has tuz yaw hu ua Laxees. 17Le-as tsi tshua zoo nkawj,#29.17 tsi tshua zoo nkawj; lossis tsi ntxid nyad. tadsis Laxees zoo nkawj has txaws nyad heeb.

18Yakhawj nyad Laxees kua, yog ni qhai, niz ha has tu Lanpaas has tas, “Yog koj yeed kud yuab Laxees ua puj, kud yiad ua hujlwd tu koj xyaa xyoo.”

19Lanpaas tes has tas, “Kud zoo sas muas Laxees tu koj, zoo kua ni kud muas tu lwd tuz, koj ca ni nrug kud nyos qhais na.” 20Yakhawj ha ua hujlwd xyaa xyoo kuas taw Laxees ua puj. Txiad yog sijhiad nteb npawd ni qhai los zoo ni os pes nyuas hnoos tu Yakhawj nyaz, tu qhob niz nyad Laxees heeb.

21Ces Yakhawj has tu Lanpaas has tas, “Kud ted ua hujlwd pub xyaa xyoo liad, ca ni muas Laxees tu kud yuab.” 22Yog ni qhai, Lanpaas ha ua is rooj mo has hu tuadtxhij tuaj nrug niz noj tshoos. 23Yog tag mas yiadtsud muas Laxees tu Yakhawj, tadsis hmo qhai Lanpaas muas Le-as muz tu Yakhawj, ces Yakhawj ha nrug Le-as pw. 24(Lanpaas muas niz tuz ntxhais qheb Xilepas tu niz tuz ntxhais Le-as ua Le-as tuz ntxhais qheb.) 25Thaws pud keb Yakhawj maad ni paws has tas tuz kwg nrug niz pw qhai yog Le-as. Niz ha muz has tu Lanpaas has tas, “Vid nicaaz koj ha ua ni na tu kud? Kud ua hujlwd tu koj yog xaab yuab Laxees nyaz. Vid nicaaz koj ntu kud?”

26Lanpaas tes has tas, “Pes cob neeg nyos teschias na, tsi muaj cai xus muas tuz ntxhais yaw qua ua ntej tuz ntxhais hlus. 27Toz xyaa hnoos kuas ua tshoos dhaw taws, kud maad ni muas Laxees tu koj, yog koj yeed rob qaas ua hujlwd tu kud xyaa xyoo ntxib.”

28Yakhawj kuj pud zoo ua ni qhai, ces thaws xyaa hnoos kwg ua tshoos qhai dhaw liad, Lanpaas ha muas Laxees txis tu Yakhawj yuab ua puj. 29(Lanpaas muas niz tuz ntxhais qheb kwg hu ua Npilehas tu Laxees ua niz tuz ntxhais qheb.) 30Yakhawj nrug Laxees pw has niz hlus Laxees heeb kua ni niz hlus Le-as. Yakhawj rob ua hujlwd tu Lanpaas xyaa xyoo ntxib.

Yakhawj Cob Minyuas

31Thaws tuz Tswb pud has tas Yakhawj hlus Le-as tsi npawd ni hlus Laxees, niz ha ca Le-as muaj minyuas nyaz, tadsis tsi pus kuas Laxees muaj tawz minyuas. 32Le-as txiad xees tus has yug taw is tug tus tag. Niz ha has tas, “Tuz Tswb pud kud tej keb lwj sas, nyaj zag na kud tuz yiag yiad hlus kud”; yog ni qhai, niz ha tis tuz tus qhai npe hu ua Lunpees.#29.32 Lunpees: Lus npe na, has ni luz Henplais lu luz kwg has tas, “nuad maj, yog is tug tus” has “pud kud tej keb lwj sas.” 33Le-as rob xees tus has yug taw is tug tus. Niz has tas, “Tuz Tswb pus kud rob muaj tug tus na has, tu qhob niz hnob has tas kud tuz yiag tsi hlus kud”; yog ni qhai, niz ha tis tuz tus qhai npe hu ua Xime-oos.#29.33 Xime-oos: Lus npe na has ni Henplais lu luz kwg has tas, “hnob.” 34Le-as rob xees tus has yug taw is tug tus ntxib. Niz has tas, “Zag na kud tuz yiag yiad muas sas npuas kud, tu qhob kud ted yug taw pes tuz tus tu niz liad”; yog ni niz ha tis tuz tus qhai npe hu ua Levis.#29.34 Levis: Lus npe na has ni Henplais lu luz kwg has tas, “ziad kuas ceeb.” 35Le-as rob xees tus has yug taw is tug tus ntxib. Niz has tas, “Zag na kud yiad ua tuz Tswb tsawg”; yog ni qhai, niz ha tis npe tu tuz tus qhai hu ua Yudas.#29.35 Yudas: Lus npe na has ni Henplais lu luz kwg has tas, “ua tsawg.” Ces niz txiad tseg tsi muaj minyuas liad.

Currently Selected:

Chibkees 29: CQD2024

Highlight

Copy

Compare