Chibkees 28

1Ixaj ha hu Yakhawj luz cuag niz, food kooshmoob tu niz, has has tu niz tas, “Mitus, koj tsi xod laad yuab cob neeg Kana-aas na tej ntxhais. 2Ca ni muz liad tid koj yiag Npethu-ees tseb kwg nyos tid teschias Padaas Alaas, has muz yuab cob ntxhais tid is tug luz ua koj puj, yuab koj yiagdaas Lanpaas cob ntxhais is tug ntaag. 3Thob Vaajtswb Tuz Kwg Muaj Fwjchid Luj Kiag Nkawg food kooshmoob tu koj has pus koj muaj tuski coos, kuas koj taw ua ntaw yaad neeg tuz yiadkoos. 4Thob kuas niz food kooshmoob tu koj has koj tej xeesntxwz is yaad ni niz food kooshmoob tu Anplahaas, has thob kuas koj taw thaaj aab kwg Vaajtswb muas pus tu Anplahaas kwg koj taw luz nyos na liad ua koj tuz.”#Chk 17.4-8 5Ixaj ha tso Yakhawj muz tu tid teschias Padaas Alaas, muz nrug Lanpaas kwg yog Npethu-ees kwg yog neeg Alamees tuz tus kwg yog Yakhawj has Exaws ostug nad Lenpekas tuz nuz hlus nyos.

Exaws Yuab Kua Is tug Nadyaw

6Exaws paws has tas Ixaj food kooshmoob tu Yakhawj has saadfwd tsi pus kuas niz yuab cob neeg Kana-aas tej ntxhais luz ua puj, has tso niz muz nrhab yuab puj tu tid teschias Padaas Alaas liad tag. 7Exaws paws has tas Yakhawj yeej noog nad noog vaid luz has niz taw muz tu tid teschias Padaas Alaas liad tag. 8Ces Exaws ha paws has tas niz vaid Ixaj tsi nyad cob puj kwg yog neeg Kana-aas. 9Yog ni qhai, niz ha muz yuab Anplahaas tuz tus Yisamayees tuz ntxhais Mahalas kwg yog Nenpayaws tuz muad luz ua puj.

Yakhawj Ua Npaw Suab

10Yakhawj siab keb qhais lus nroog Npesenpas muz tu tid lus nroog Halaas. 11Niz muz txug qhais is thaaj chia#28.11 thaaj chia; lossis thaaj chia diashub. hnoos poos qho liad, niz ha pw is hmos qhai is tog keb. Niz muas is lus poszes luz raw ncoo pw tsawg zawg. 12Niz ua npaw suab pud is tug ntaib tuad hub aab na muz nto pliaz saw ntuj, muaj cob tidtswb nce muz has nqaiz luz qhais tuz ntaib qhai.#Yhs 1.51 13Ua caaz txiad pud tuz Tswb siab nreg nreez qhais niz is saas.#28.13 qhais niz is saas; lossis saw tuz ntaib. Tuz Tswb has tas, “Kud yog tuz Tswb, kwg yog Anplahaas has Ixaj tuz Vaajtswb, kud yiad muas thaaj aab kwg koj taastod pw qhais ko pus tu koj has koj cob xeesntxwz ua mej tug.#Chk 13.14-15 14Koj cob xeesntxwz yiad coos npawd nkaws ni cob hmoob aab hub ntajtes na. Cud yiad nthuab cud lus teschias kuas kaab muz tu txhua faas, has kud yiad food kooshmoob qhais koj has koj cob xeesntxwz muz tu txhua yaad neeg#28.14 qhais koj … txhua yaad neeg; lossis txhua yaad neeg yiad thob kud food kooshmoob tu cud is yaad ni kud food kooshmoob tu koj cob xeesntxwz. kwg nyos thoos ntajtes.#Chk 12.3; 22.18 15Ncu ntsoob has tas kud yiad nrugnraid koj has tsodkwd koj txhua qhob chia kwg koj muz, has kud yiad coj koj rob luz nyos tu qhais thaaj aab na kua. Kud yiad nrugnraid koj muz txug thaws kud ua txhua yaad tab taaz rias ni kud taw cogluz tu koj liad.”

16Yakhawj tsid dheeb luz has niz has tas, “Tuz Tswb yeej nyos qhais na tag lawj! Niz yeej nyos qhais thaaj chia na, tadsis yog kud tsi paws nyaz!” 17Niz ntshai heeb has niz has tas, “Qhob chia na ua tu kud ntshai heeb! Lus chia na yeej yog Vaajtswb lus tseb has yog rooj ntug ceestsheej ntaag lawj.”

18Taaskiz pud keb Yakhawj ha muas lus poszes kwg niz muas luz raw ncoo qhai tees ua qhob chia tseedcees ncu tseg. Ces niz muas roj txibntoo laws tu saw lus poszes has muas fij tu Vaajtswb. 19Niz ha tis npe tu thaaj chia qhai hu ua Npethees#28.19 Npethees: Lus npe na luz Henplais txhais has tas, “Vaajtswb lus tseb.” (Lus nroog qhai thaws us hu ua Luxes.) 20Yakhawj txiad cogluz tu tuz Tswb has tas, “Yog koj nrugnraid kud nyos has tsodkwd kud tawgkeb muz, pus mo tu kud noj has rig tsho tu kud hnaab, 21muz txug thaws kud rob qaas luz txug tu hub kud vaid tseb kaajsas lug, mas tuz Tswb ha yog kud tuz Vaajtswb tag. 22Lus poszes kwg kud tees ua chia ncu txug na yiad yog qhob chia pehiad koj ntaag, has kud yiad muas txhua yaad kwg koj muas tu kud liad is feed kawd tu koj.”

Currently Selected:

Chibkees 28: CQD2024

Highlight

Copy

Compare