Chibkees 27

Ixaj Food Kooshmoob tu Yakhawj

1Nizna Ixaj lawz heeb has qhobmuag tsi pud keb liad. Niz tso neeg muz hu niz tuz tus hlus Exaws luz has niz has tas, “Mitus!”

Exaws tes has tas, “Vaid, kud nyos qhais na.”

2Ixaj has tas, “Koj pud has tas kud ted lawz heeb has kud yiad tuag hnoos twg los tsi paws ni. 3Coj koj raas hneebnti has cob xus, muz plos tod haab zoob has tua nqaj nruas nraag luz tu kud noj. 4Ua is pluag zaws mo qaas kwg kud nyad, has coj luz tu kud noj. Tod qaas kwg kud noj taaz liad, kud yiad food kooshmoob tu koj zag kiag ua ntej kud tuag.”

5Thaws Ixaj taastod has tu Exaws qhai, Lenpekas txiad hnob. Yog ni qhai, thaws Exaws tiad muz plos tua nqaj liad, 6Lenpekas txiad has tu Yakhawj tas, “Kud hnob koj vaid has tu Exaws tas, 7‘Koj ca ni muz plos tua nqaj has ua is pluag mo qaas luz tu kud noj. Tod qaas kwg noj npluag mo qhai taaz liad, kud yiad food kooshmoob tu koj taasmeeg tuz Tswb ua ntej kud tuag.’ 8Lenpekas has tas, ‘Taadsid na ntaag lawj, mitus, koj ca ni noog kud has has ua rias ni kud qha.’ 9Koj muz nraaz paas tsaj has ntez os tug minyuas tshis kwg rog luz tu kud, kud yiad muas os tug tshis qhai tua ua is pluag nqaj qaas qaas kwg koj vaid nyad heeb tu koj vaid noj. 10Koj coj muz tu koj vaid noj, has niz yiad food niz tej kooshmoob tu koj ua ntej niz tuag.”

11Tadsis Yakhawj has tu niz nad has tas, “Koj yeej paws has tas Exaws yog neeg tuaj plaws, tadsis kud tej tia nqaj do lug nyaz. 12Nyos tsaad kud vaid ceb tez plhw kud, ces niz paws has tas yog kud ntu niz, kud ua ni na kuas kud taw kooshmoob, tadsis ntshai kud yiad taw niz lu luz food tsi zoo nyaz.”

13Niz nad tes has tas, “Kud tus, txhua yaad kwg koj vaid food tsi zoo ca poos tu kud ris hubtsig, ca ni ua rias ni kud ted has tu koj liad, muz ntez os tug minyuas tshis luz tu kud.” 14Yog ni qhai, Yakhawj ha muz ntez taw os tug minyuas tshis caas luz tu niz nad, ces tuz nad ha muas tua ua is pluag nqaj qaas heeb kwg niz vaid nyad noj. 15Ces Lenpekas txiad muz muas Exaws kwg yog niz tuz tus hlus, ceb rig tsho zoo tshaaj pliaz kwg niz khiad ca, luz tu Yakhawj hnaab. 16Lenpekas ha muas os daid tiab minyuas tshis luz qhwb Yakhawj os txhais ncaajnpaas has qhwb Yakhawj lus kuadaas qhob tsi tuaj plaws. 17Ces Lenpekas txiad muas cob nqaj kwg qaas qhai, has cob mo kwg niz ua taw liad, tu niz tuz tus Yakhawj.

18Ces Yakhawj txiad coj muz tu niz vaid has has tas, “Vaid!”

Ixaj tes has tas, “Koj has daastsi, koj yog kud os tug tus tuz twg?”

19Yakhawj tes has tas, “Kud yog Exaws, koj tuz tus hlus ntaag, kud ted ua nqaj tab taaz rias ni koj taw has tu kud liad. Koj ca ni siab luz has noj tej nqaj kwg kud coj luz tu koj, has food koj tej kooshmoob tu kud.”

20Ixaj noog has tas, “Mitus, koj muz yos qhob twg, koj yiad tua taw nqaj luz sai ua luaj ni?”

Yakhawj tes has tas, “Tuz Tswb kwg yog Vaajtswb paas kud, kud ha muz nrhab taw sai.”

21Ixaj has tu Yakhawj has tas, “Koj ca ni txaab luz tu qhais kud na, kud yiad ceb tez plhw koj nuad koj puas yog Exaws tag los tsi yog?” 22Yakhawj ha txaab zog muz tu qhais niz vaid, Ixaj ha ceb tez tuaj plhw Yakhawj has has tas, “Koj lus suas has luz zoo ni Yakhawj lus, tadsis koj os txhais npaas zoo ni Exaws os txhais.” 23Niz tsi paws Yakhawj liad tu qhob Yakhawj os txhais npaas tuaj plaws nplwg loo zoo ni Exaws os txhais has. Niz ted yiad food kooshmoob tu Yakhawj, 24tadsis niz tseed rob noog kua ntxib has tas, “Koj yog Exaws tag los?”

Yakhawj tes has tas, “Kud yog Exaws tag.”

25Ixaj has tas, “Coj cob nqaj luz tu kud noj. Thaws kud noj taaz liad, kud maad ni food kud tej kooshmoob tu koj.” Yakhawj ha txias hlo tsud mo luz tu niz vaid noj has tseed laws ciab luz tu niz vaid haws hubtsig. 26Ces Ixaj has tu Yakhawj has tas, “Mitus, koj ca ni txaab luz ze has hna kud.” 27Thaws Yakhawj txaab zog luz hna Ixaj, Ixaj na Yakhawj lus tsho tsw Exaws tuz ntxhas, niz ha food kooshmoob tu Yakhawj. Niz has tas: “Kud tuz tus na tuz ntxhas tsw is yaad ni thaaj tes kwg tuz Tswb ted food kooshmoob tu liad tuz ntxhas ntaag. 28Thob Vaajtswb tso lwg saw ntuj luz tu koj tej tes kuas zoo qoosloo heeb! Thob niz pus tu koj tej nplej, tej txib hmaas kuas ntsu heeb! 29Thob kuas txhua yaad neeg taw luz ua koj tusqhe, has thob kuas tej pejxeed txhud cawg ntua pe koj. Thob kuas koj taw ua tuz kaab taaznrhiab koj tsood kwbtij, thob kuas koj nad cob xeesntxwz txhud cawg pe koj. Thob kuas cob kwg tsiad food koj rawg food tsi zoo, has thob kuas cob kwg food kooshmoob tu koj taw txais kooshmoob zoo.”#Hen 11.20#Chk 12.3

Exaws Thob Ixaj Food Kooshmoob tu Niz

30Ixaj food kooshmoob taaznrhiab nyaz, Yakhawj tiad pliaz liad, ces Yakhawj tuz tijlawg Exaws kwg muz plos tua nqaj, txiad luz txug ncua. 31Niz muas cob nqaj qhai ua taw nqaj qaas heeb has coj muz tu niz vaid. Niz has tas, “Vaid, koj ca ni siab luz has noj tej nqaj kwg kud muz tua taw has ua coj luz tu koj, koj yiad food koj tej kooshmoob tu kud.”

32Ixaj noog has tas, “Koj yog tuz twg?” Exaws tes has tas, “Kud yog koj tuz tus hlus, Exaws ntaag.”

33Ixaj poos sas nthaab has ua isce tshee hnyo, ces niz ha noog has tas, “Tuz puas taas tua taw nqaj luz tu kud noj taaz liad, ho yog tuz twg? Kud noj taaznrhiab ces koj txiad luz txug ncua ntaag. Kud ted food kud tej kooshmoob kwg yog zag kiag tu niz, has niz yeej taw txuj kooshmoob qhai muz istxhis ni liad.”

34Thaws Exaws hnob deeb ni qhai, niz mos sas heeb tsaa hlo suas quaj has has tas, “Vaid, koj ca ni food kooshmoob tu kud is yaad nkaws has los mas!”

35Ixaj tes has tas, “Koj tuz kwb ted luz ntu kud, mas niz ted taw koj tej kooshmoob liad.”

36Exaws has tas, “Zag na yog zag os kwg niz txhaab kud tug. Niz lus npe yeej phid hu ua Yakhawj liad tag.#27.36 Yakhawj: Lus npe na has ni Henplais lu luz kwg has tas, “nyag tuasyws liad tsi pus lag paws.” Niz ted txees kud lus meej mod kwg yog tijlawg liad, nizna niz tseed txhaab kud tej kooshmoob liad has. Koj txiad tsi tshuab kooshmoob seed tu kud ni los?”#Chk 25.29-34

37Ixaj tes has tas, “Kud ted tsaa niz luz ua hujlwd ua tswb kaab koj, has kud ted food kuas niz cob kwbtij taw luz ua niz tusqhe hubtsig liad. Kud taw food kooshmoob kuas niz muaj qoosloo has txib hmaas nplua mag. Mitus nizna kud tsi tshuab is yaad daastsi yiad food tu koj ntxib ni liad!”

38Exaws rob taij niz vaid has tas, “Vaid, koj tej luz koos luz hmoob tsuas muaj npawd qhai nyaz los? Thob food kooshmoob tu kud has los mas!” Niz rob quaj kua.#Hen 12.17

39Ces Ixaj has tu Exaws has tas,

“Koj yiad nyos lus teschias kwg tsi zoo qoos,

has tsi muaj dej naag yug koj tej qoosloo.

40Koj yiad nrhab noj nrhab haws qhais koj raas ntaaj,

has koj yiad ua koj tuz kwb qheb.

Yog thaws twg koj ntxeeb sas#27.40 ntxeeb sas; lossis luj tsi paws kiag ni.,

koj ha ni kig qhais niz keb tswjfwd.”#Hen 11.20#Chk 36.8; 2 Vnt 8.20

41Exaws txiad heed Yakhawj heeb, tu qhob niz vaid food kooshmoob tu Yakhawj liad. Niz xaab has tas, “Kud vaid hnoos tuag ted luz ze liad, thaws kua niz liad, kud yiad muas Yakhawj tua laidtaa.”

42Tadsis thaws Lenpekas hnob has tas Exaws tuab tswbyid ni qhai, niz ha muz has tu Yakhawj tas, “Koj tuz tijlawg Exaws tuab tswbyid yiad tua koj laidtaa pawj qhob kwg koj ua tu niz. 43Mitus, taadsid na koj ca ni ua ni kud has. Koj ca ni siab tsib muz nrug kud tuz nuz Lanpaas nyos tid lus nroog Halaas, 44has nrug niz nyos is ntus, kuas koj tuz tijlawg tej keb chid xaad 45has niz tsi ncu qaas txug tej kwg koj ua tu niz liad taws. Ces kud maad nrhab neeg tuaj toz koj rob qaas luz. Vid nicaaz kud yiad ua tuas hnoos pluj kud os tug tus ni?”

Ixaj Tso Yakhawj Muz nrug Lanpaas Nyos

46Lenpekas has tu Ixaj tas, “Kud khuab Exaws os tug puj kwg yog cob neeg Hitis qhai hws liad. Yog Yakhawj tseed muz yuab cob neeg Hitis na is tug ntxhais luz ua puj has, ntshai kud yeed tuag muz zoo kua.”

Currently Selected:

Chibkees 27: CQD2024

Highlight

Copy

Compare