Chibkees 20

Anplahaas has Anpimelej

1Anplahaas tsib tiad qhais thaaj chia Maales muz tu nraaz yaab qaastes Kana-aas has muz nyos tu qhais ntu nruasnraas lus nroog Kades has Sules liad. Thaws qhai niz luz nyos tu hub lus nroog Nkelas taw is ntus, 2has niz has tas, Xalas kwg yog niz tuz puj yog niz tuz muad nyaz. Yog ni qhai, Vaajntxwb Anpimelej kwg kaab lus nroog Nkelas txiad has kuas coj Xalas muz tu niz.#Chk 12.13; 26.7 3Muaj is hmos Vaajtswb taw luz tshwd tu Vaajntxwb Anpimelej pud hub nruas npaw suab has has tas, “Koj yiad rawg tua tuag, tu qhob koj taw coj tuz puj na luz, niz ted muaj yiag liad.”

4Tadsis Anpimelej yeej tsi taw txaab muz ti Xalas ni, niz ha has tas, “Tuz Tswb, kud ted tsi taw ua txhud! Koj txiad txaws sas tua cob neeg tsi muaj txid ntaag los? 5Anplahaas los yeej has tas Xalas yog niz tuz muad, has Xalas los yeej has is yaad nkaws ni qhai. Kud taw ua tej na vid kud tsi paws, has kud yeej tsi taw ua txhud ni.”

6Vaajtswb tes has tas, “Yog tag, kud yeej paws koj ua tej na vid qhob kwg koj tsi paws has koj tsi taw ua txhud daastsi, yog ni qhai, kud ha tsi pus koj muz kob Xalas has ua txhud tiadtsaad kud. 7Ca ni xaa tuz puj ko rob qaas muz tu niz tuz yiag taadsid na. Niz yog is tug cebluz, niz yiad thob Vaajtswb tu koj, koj ha yiad tsi tuag. Tadsis yog koj tsi xaa niz rob qaas, kud qha tsees tu koj has tas, koj yeej yiad tuag muz, koj has koj tsood pejxeed yiad tuag taaz hubtsig.”

8Taaskiz siab ntxub Anpimelej hu taaznrhiab niz cob nudtswb tuaj has niz qha tej kwg taw tshwdsid qhai tu cud noog, mas ua tu cud ntshai heeb ni. 9Ces Anpimelej ha hu Anplahaas tuaj has noog has tas, “Vid nicaaz koj ua tej na tu pes? Kud taw ua txhud daastsi tu koj, koj ha coj tej keb puadtsuaj na luz tu kud has kud lus teschias? Tej kwg koj ua tu kud na yeej tsi tsidnyog ua kag ni. 10Vid nicaaz koj ha ua ni na?”

11Anplahaas tes has tas, “Kud xaab has tas tsi muaj is tug neeg kwg fwd Vaajtswb nyos hub lus nroog na, nyos tsaad cud yiad tua kud laidtaa has yuab kud tuz puj. 12Niz yeej yog kud tuz muad tag ni. Niz has kud yeej kood is tug vaid, tadsis ws nyaz muaj nyaz nad, has kud yuab niz ua kud tuz puj. 13Yog ni qhai, thaws Vaajtswb has kuas kud tso kud vaid tej vaaj tse tseg tiad muz nyos tu lwd lus teschias, kud ha has tu niz tas, ‘Koj yiadtsud ua ncaajnceeg tu kud has qha txhua leej txhuatuz paws has tas kud yeej yog koj tuz nug.’ ”

14Ces Anpimelej ha tso Xalas rob qaas luz tu Anplahaas, has niz tseed muas yaaj, muas tshis, muas nyuj, muas tusqhe has ntxhais qheb pus tu Anplahaas. 15Anpimelej has tu Anplahaas has tas, “Taaznrhiab tej cheestsaad aab na puabtsig yog kud ni, koj yiad nyos qhob twg los taw taaz rias ni koj sas nyad.” 16Niz tseed has tu Xalas has tas, “Kud muas is txhas daid nyaj tu koj tuz nug, ua pobthiaj tu tuadtxhij kwg nrug koj nyos ua ke pud has tas koj tsi taw ua txhud. Kuas tuadtxhij paws has tas koj yeej tsi taw ua txhud tag.”

17-18Vid tej na taw tshwdsid luz tu Xalas kwg yog Anplahaas tuz puj, tuz Tswb ha ua tu txhuatuz puj kwg nyos hub Anpimelej lus loog xees tsi tawz tus ni. Yog ni qhai, Anplahaas ha thob Vaajtswb tu Anpimelej, Vaajtswb paas khu Anpimelej zoo has tseed khu Anpimelej tuz puj has niz tej ntxhais qheb zoo hubtsig, cud ha rob muaj tawz minyuas.

Currently Selected:

Chibkees 20: CQD2024

Highlight

Copy