Chibkees 19

Lus Nroog Xawdoos Tej Keb Txhud

1Thaws os tug tidtswb muz txug tu hub lus nroog Xawdoos ted yiad tsaws ntuj, Lawj tseed taastod nyos qhais roojvaag nroog. Thaws niz pud deeb ostug, niz txiad siab tseez muz cuag ostug. Niz muz txhud cawg ntua qhais ostug xusntag 2has has tas, “Os tug tswb, kud tuaj qhais na yog yiad tu mej. Thob mej muz su hub kud tseb. Mes luz ntxuab kuatia has pw is hmos hub kud tseb. Txus kiz pud keb mej maad ni siab ntxub muz.”

Tadsis ostug tes has tas, “Ws tsi muz, hmo na ws yiad pw qhais tshaab puad hub lus pliab nroog na nyaz.”

3Vid Lawj muaj sas hu ostug tag, ostug ha nrug Lawj muz su hub niz tseb. Lawj kuas niz cob tusqhe ci ncuab has ua zaws ua mo qaas tu os tug qhua qhai noj. Thaws ua taw sab liad ostug ha ni noj hmo.

4Thaws os tug qhua tseed tsi taw nce chia pw, taaznrhiab tej yiag kwg nyos hub lus nroog Xawdoos, tsi has lawz has hluas, puabtsig dha nroo ntwz tuaj vij nkaws Lawj lus tseb. 5Cud hu Lawj tiad tuaj has noog has tas, “Os tug yiag kwg hmo na tuaj su hub koj tseb nyos qhob twg? Ca ni coj ostug tiad tuaj tu pes, pes yiad ntxaz ostug.”

6Lawj tiad muz tusaas nraw has muas qhob rooj kia tu. 7Lawj has tu cud tas, “Cob phoojywz, thob mej tsi xod ua phed ni na lawj! 8Mej noog kud has, kud muaj os tug ntxhais tseed yog nkawjxws tsi taw thaad kua hluas nrawg ni. Thob ca kud coj ostug tuaj tu mej, has mej xaab ua nyaab tu ostug los mej ca ni ua rias ni mej sas nyad. Tadsis thob mej tsi xod ua nyaab tu os tug yiag qhai, ostug tuaj ua qhua txug hub kud tseb, kud yiadtsud tsodkwd ostug.”#Ctt 19.22-24

9Tadsis cud tes Lawj has tas, “Nyuas neeg txiab teschias ko, ca ni txaab keb tu pes! Koj yog tuz twg, koj muaj cai tuaj cheed pes ua daastsi? Ca ni txaab keb. Yog koj tsi txaab keb, pes yiad ua phed tu koj tshaaj pes ua tu ostug has.” Cud ca ni thias nta Lawj rob qaas has dha zog muz tsoo kuas qhob rooj tiaz. 10Tadsis os tug yiag kwg nyos hub tseb qhes hlo qhob rooj muz nquz kag Lawj rob qaas luz tu hub tseb has muas qhob rooj kia nkaws tu. 11Ces taadsid qhai ostug txiad ua tu cob yiag kwg nyos saas nraw xyuadtxwb taaz hubtsig, cud ha tsi pud keb nrhab lus qhob rooj.#2 Vnt 6.18

Lawj Tsib Tiad hub Lus Nroog Xawdoos

12Os tug yiag qhai has tu Lawj has tas, “Yog koj tseed tshuab tej tus, tej ntxhais, tej vawb, lossis kwbtij neejtsaa kwg nyos hub lus nroog na, kuas cud ca ni tiad tsib taadsid na muz, 13tu qhob ws taastod yiad ua kuas lus nroog na puadtsuaj muz. Tuz Tswb taw hnob has tas cob neeg hub lus nroog na ua phed ua qas kiag nkaws ni, niz ha txis ws luz rhuab lus nroog Xawdoos na kuas puadtsuaj.”

14Ces Lawj txiad muz has tu os tug tus hluas kwg qhaib niz os tug ntxhais liad has tas, “Mej ca ni tsib tiad hub lus nroog na muz, tu qhob tuz Tswb taastod yiad rhuab lus nroog na kuas puadtsuaj.” Tadsis ostug xaab has tas yog Lawj laad tso daag nyaz.

15Thaws pud keb txoog os tug tidtswb ted luz txhis kuas Lawj maaj nrooz ntaag. Ostug has tas, “Kizkag maj! Ca ni coj koj tuz puj has koj os tug ntxhais tiad taadsid na, mej ha yiad tsi tuag thaws lus nroog na rawg keb puadtsuaj.” 16Lawj tseed pheej ua xyed xaab. Txiad ni qhai los tuz Tswb tseed taasncuas Lawj heeb, yog ni qhai, os tug yiag ha tuab Lawj, Lawj tuz puj has Lawj os tug ntxhais tez has coj cud tiad hub lus nroog muz.#2 Pet 2.7 17Ces is tug tidtswb txiad has tas, “Tsib tag kuas kig! Tsi xod tig nuad rob tod qaas has tsi xod su hub lus haab na. Tsib muz kuas nto pliaz saw cob ncob roos mej ha yiad tsi tuag.”

18Tadsis Lawj tes has tas, “Tuz tswb, thob tsi xod ca pes tsib muz tu tid. 19Koj hlus kud kiag nkaws has ted ciad kud txuj sa kig luz txug txij na liad. Tadsis cob ncob roos qhai nyos kes heeb, ntshai tsaad keb tuag riad cuag kud, has kud tuag ua ntej kud muz txug tid. 20Koj puas pud lus nyuas nroog tid? Lus nroog qhai ha nyos ze kua nyaz. Thob ca kud muz tu tid, koj yeej pud has tas yog lus nroog yaw, has yiad ciad taw kud txuj sa.”

21Niz tes has tas, “Taw los mas, kud pud zoo ntaag. Kud yiad tsi ua kuas lus nroog tid puadtsuaj. 22Kizkag! Ca ni muz! Kud toz tsi ua is yaad daastsi muz txug thaws kwg koj tsib muz txug tid taws.”

Tu qhob Lawj hu lus nroog tid ua lus nroog yaw, ha muas lus nroog qhai hu ua Xaw-as.#19.22 Xaw-as: Lus npe na, has ni Henplais lu luz kwg has tas, “yaw.”

Xawdoos has Kawmawlas Rawg Puadtsuaj

23Thaws Lawj tsib muz txug ntua tid lus nroog Xaw-as taastod hnoos tiad pliaz tid npoo ntuj. 24Taadsid qhai tuz Tswb tso hluabtiaz liajfaaj poos saw ntuj luz kug lus nroog Xawdoos has lus nroog Kawmawlas, 25ha ua tu os lus nroog qhai has taaznrhiab lus taj nraag, nrug tej neeg kwg nyos tu hub has txhua yaad nroj tsuag qoosloo kwg tuaj hub thaaj tsaad qhai rawg puadtsuaj taaz.#Mat 10.15; 11.23,24; Luk 10.12; 17.29; 2 Pet 2.6; Yud 7 26Tadsis Lawj tuz puj tig nuad tod qaas, niz txiad ca ni khob kag ua is tug ncej ntseb.#Luk 17.32

27Hnoos tod qaas, thaws siab ntxub Anplahaas maaj ceeb nrooz muz tu tod qhob chia kwg niz siab tid ntsej tid muag qhais tuz Tswb. 28Niz tsaa qhobmuag nuad lus nroog Xawdoos has lus nroog Kawmawlas taaznrhiab tu lus taj nraag qhai, niz pud paa tiaz nchu awb nas hub thaaj tsaad qhai tuaj, cuag nkaws ni hliab is daid tes. 29Txiad yog Vaajtswb rhuab os lus nroog hub lus taj nraaz kwg Lawj nyos qhais puadtsuaj taaz liad los niz tseed ncu ntsoob Anplahaas tu nruas sas has tso keb tu Lawj tsib kuas kig txuj keb puadtsuaj.

Cob Maw-ad has Cob Amoos

30Vid qhob kwg Lawj ntshai nyos hub lus nroog Xaw-as, niz has niz os tug ntxhais ha tsib muz nyos hub lus qhob tsua pez cob ncob roos. 31Tuz ntxhais hlus has tu niz tuz nad hluas tas, “Ws vaid ted lawz heeb liad, has nyos thoos pliaz hub ntajtes#19.31 thoos pliaz hub ntajtes; lossis lus teschias na. na tsi muaj yiag tuaj yuab ws kuas ws muaj minyuas ni liad. 32Ca ni luz, ws muas ciab txib hmaas tu vaid haws kuas qawg, ces ws muz nrug vaid pw kuas ws muaj minyuas.” 33Hmo qhai ostug txiad muas ciab txib hmaas tu tuz vaid haws, ces tuz ntxhais hlus ha muz nrug niz vaid pw. Tuz vaid qawg ciab heeb niz ha tsi paws has tas niz tuz ntxhais luz nrug niz pw.

34Hnoos tod qaas tuz ntxhais hlus has tu niz tuz nad hluas tas, “Naag hmo kud ted muz nrug vaid pw liad, is chid tsaws ntuj ws rob muas ciab tu vaid haws kua, ces koj rob muz nrug niz pw. Ua ni qhai ws nyaz ha muaj nyaz minyuas luz qhais ws vaid.” 35Yog ni qhai, ostug rob muas ciab txib hmaas tu tuz vaid haws kua, ces tuz ntxhais yaw ha muz nrug tuz vaid pw. Tuz vaid kuj rob qawg ciab heeb niz ha tsi paws has tas niz tuz ntxhais luz nrug niz pw. 36Yog ni qhai, Lawj os tug ntxhais ha xees tus luz qhais ostug vaid. 37Lawj tuz ntxhais hlus txiad yug taw is tug tus, niz muas tis npe hu ua Maw-ad.#19.37 Maw-ad: Lus npe na, has ni Henplais lu luz kwg has tas, “Yog chib luz qhais kud vaid.” Maw-ad yog yiadkoos tu yaad neeg Maw-ad luz txug naj hnoos na. 38Lawj tuz ntxhais yaw los yug taw is tug tus has, niz muas tis npe hu ua Npee-amis.#19.38 Npee-amis: Lus npe na luz Henplais txhais has tas, “Kud tuz tus kwbtij” has lus suas has ni lu luz Henplais kwg has tas “Cob Amoos.” Niz ha yog yaad neeg Amoos tuz yiadkoos luz txug naj hnoos na.

Currently Selected:

Chibkees 19: CQD2024

Highlight

Copy