Chibkees 18

Anplahaas tuz Tus Kwg Vaajtswb Cogluz Tseg

1Tuz Tswb luz tshwd tu Anplahaas pud qhais cob ntoo xees hub thaaj chia Maales. Hnoos qhai tshaab ntuj kug heeb niz ha tiad tuaj nyos qhais niz lus qhob rooj tseb ntaws, 2niz tsaa qhobmuag nuad pud pes tuz yiag siab nrez nreez tod. Thaws niz pud deeb cud, niz txiad siab tseez muz cuag cud. Niz txhud cawg ntua nyo ua ntsejmuag ti nkaws aab,#Hen 13.2 3niz has tas, “Kud tuz tswb, yog mej txaws sas tu kud, thob tsi xod dhaw qhais mej tuz tusqhe na muz; kud nyos qhais na yiad tu mej. 4Ca kud muz coj isntsis dej tuaj tu mej ntxuab kuatia taws, thob mej su hub qaas tsos ntoo na kuas luz sab. 5Kud tseed yiad muz coj isntsis zaws mo tuaj tu mej noj, mej ha yiad muaj zug tawgkeb muz ntxib. Mej ted tuaj txug qhais kud tseb na liad, thob ca kud tu mej taws.”

Cud tes has tas, “Koj ca ni muz ua rias ni koj has.”

6Anplahaas maaj ceeb nrooz rob muz tu hub tseb ntaws has has tu Xalas has tas, “Kizkag, koj ca ni muz muas is hnaas hmoob nplej kwg zoo tshaaj pliaz, luz puas ua ncuab has muas cus.” 7Ces Anplahaas txiad dha loo muz tu nraaz paas tsaj has ntez taw is tug minyuas nyuj tseed moz has rog rog, coj luz tu is tug tusqhe, kuas niz muas tua has ua kizkag kuas sab. 8Niz ha muas isntsis roj mi nyuj qhuab, isntsis kua mi nyuj, has cob nqaj kwg haw taw sab liad, coj muz raw kag tu qhais cob yiag qhai xusntag. Anplahaas raw zaws raw mo tu cud noj hub qaas tsos ntoo qhai.

9Ces cud noog Anplahaas has tas, “Xalas kwg yog koj tuz puj nyos qhob twg?”

Anplahaas tes has tas, “Xalas nyos hub tseb ntaws.”

10Cud cob qhai muaj is tug has tu Anplahaas has tas, “Cuaj hlis todntej na#18.10 Cuaj hlis todntej na, lossis lwd xyoo lus caij na. Kud yiad rob qaas tuaj kua, has Xalas kwg yog koj tuz puj yiad yug taw is tug mitus.”

Xalas siab saas hub lus qhob rooj tseb ntaws kwg ncaaj qhais Anplahaas nrawqawd, noog cud sis thaad.#Loo 9.9 11Anplahaas has Xalas ted lawz heeb liad, has Xalas ted tseg tsi coj khawsduag ni liad. 12Yog ni qhai, Xalas ha rus tuasyws has xaab has tas, “Nizna kud lawz heeb has ted dhaw hnoosnyood muaj minyuas liad, kud tseed yiad muaj tawgkeb zoo sas has los? Kud tuz yiag los kuj lawz liad has.”#1 Pet 3.6

13Ces tuz Tswb noog Anplahaas has tas, “Vid nicaaz Xalas rus has has tas, ‘Kud lawz npawd ni na liad, kud tseed yiad muaj tawz minyuas has los?’ 14Tuz Tswb yeej ua taw is puas tsaab yaad hubtsig, rias ni kud taw has liad, cuaj hlis todntej na kud yiad rob tuaj kua, has Xalas yeej yiad yug taw is tug mitus.”#Luk 1.37

15Xalas ntshai heeb, niz ha tsi leez has tas niz taw rus, niz has tas, “Kud tsi taw rus as.”

Tuz Tswb tes has tas, “Tsees tag, koj ted rus tuasyws hub sas liad.”

Anplahaas Thob Vaajtswb tu lus Nroog Xawdoos

16Tod qaas qhai pes tug yiag txiad siab keb muz tu qhais is qhob chia kwg ntxid cud yiad nuad pud lus nroog Xawdoos, Anplahaas txiad xaa cud siab keb has nrug cud muz. 17Has tuz Tswb xaab has tas, “Kud yiad tsi zais tej kwg kud taastod yiad ua qhai tu Anplahaas. 18Niz cob xeesntxwz yiad taw ua is yaad neeg tseedcees has muaj fwjchid heeb, has kud yiad food kooshmoob qhais niz muz tu txhua yaad neeg#18.18 qhais … txhua yaad neeg; lossis txhua yaad neeg yiad thob kud food kooshmoob tu cud is yaad ni kud food kooshmoob tu niz. kwg nyos thoos ntajtes. 19Kud taw xaib niz kuas niz yiadtsud qha niz cob tus has cob xeesntxwz kuas noog kud luz, ua zoo has ua ncaaj ua nceeg. Yog cud ua ni qhai, mas kud yiad ua txhua yaad tu niz rias ni kud taw cogluz tseg ca liad.”

20Ces tuz Tswb has tu Anplahaas has tas, “Muaj luz tsi zoo tuaj tiadtsaad lus nroog Xawdoos has lus nroog Kawmawlas, os lus nroog qhai tej keb txhud luj heeb ni. 21Kud ha luz nuad, nuad puas muaj tsees rias ni tej luz kwg kud hnob qhai.”

22Ces os tug yiag txiad siab keb muz tu hub lus nroog Xawdoos liad, tadsis tuz Tswb tseed nrug Anplahaas nyos. 23Anplahaas txaab zog muz ze tu qhais tuz Tswb has noog has tas, “Koj yiad ua kuas cob neeg tsi muaj txid nrug cob neeg muaj txid rawg keb puadtsuaj taaz hubtsig los? 24Yog muaj tsis cawg tuz kwg yog neeg ncaajnceeg nyos hub lus nroog qhai, koj puas yiad ua kuas lus nroog qhai rawg keb puadtsuaj? Koj txiad yiad tsi tseg lus nroog qhai nyos kuas tsis cawg tuz kwg ncaajnceeg qhai kig los? 25Tsees tag, koj yeej tsi muas cob neeg ncaajnceeg tua nrug cob neeg txhud is zag ni. Yog koj ua ni qhai, cob neeg ncaajnceeg yiad rawg txid nrug cob neeg txhud ua ke. Koj yeej yiad tsi ua ni qhai. Tuz kwg txabtxid tu tej neeg ntajtes taaznrhiab yeej yog tuz kwg txabtxid ncaajnceeg nyaz.”

26Tuz Tswb tes has tas, “Yog kud pud muaj txug tsis cawg tuz kwg ncaajnceeg nyos hub lus nroog Xawdoos, kud yiad tseg tsi tua cob neeg kwg nyos hub lus nroog vid tsis cawg tuz kwg ncaajnceeg qhai.”

27Anplahaas rob has ntxib tas, “Tuz Tswb, thob koj zaad txid tu kud qhob kwg kud muaj lus sas tiab rob has koj kua is zag ntxib, tuz Tswb, kud yog neeg nyaz, ted tsi tsidnyog kud has is yaad daastsi tu koj ni. 28Tadsis yog has tas muaj txug plaws cawg tsis tug kwg ncaajnceeg, yog tsi muaj txug tsis cawg tuz ne, koj yeej yiad ua kuas lus nroog qhai puadtsuaj taaz hubtsig, vid tu tsis tug qhai nyaz los?”

Tuz Tswb tes has tas, “Yog kud pud muaj plaws cawg tsis tug kwg ncaajnceeg nyos tu hub, kud yiad tsi ua kuas lus nroog qhai puadtsuaj.”

29Anplahaas rob has kua ntxib has tas, “Yog muaj txug plaws cawg tuz nyos tu hub nyaz ne?”

Tuz Tswb tes has tas, “Yog kud pud muaj plaws cawg tuz nyos tu hub, kud yiad tsi ua kuas lus nroog qhai puadtsuaj.”

30Anplahaas rob has kua tas, “Tuz Tswb, thob koj tsi xod chid, tu qhob kud xaab rob has kua. Yog has tas muaj txug pes cawg tuz nyos hub nyaz ne, koj tseed yiad ua nyaab tu?”

Tuz Tswb tes has tas, “Yog kud pud muaj pes cawg tuz nyos tu hub, kud yiad tsi ua kuas lus nroog puadtsuaj.”

31Anplahaas has tas, “Thob koj zaad txid tu kud, tu qhob kud muaj lus sas tiab rob thob koj kua is zag ntxib. Yog has tas muaj neez nkawd tuz nyos tu hub nyaz ne?”

Tuz Tswb tes has tas, “Yog kud pud muaj neez nkawd tuz nyos tu hub, kud yiad tsi ua kuas lus nroog puadtsuaj.”

32Anplahaas has tas, “Tuz Tswb, thob koj tsi xod chid lawj, kud thob has is zag ntxib nyaz. Yog has tas muaj kawd tuz nyos tu hub nyaz ne, koj tseed yiad ua nyaab tu?”

Tuz Tswb tes has tas, “Yog kud pud muaj kawd tuz nyos tu hub, kud yiad tsi ua kuas lus nroog puadtsuaj.” 33Tod qaas kwg tuz Tswb nrug Anplahaas thaad taaz liad, niz txiad siab keb muz, has Anplahaas txiad rob qaas luz tseb liad.

Currently Selected:

Chibkees 18: CQD2024

Highlight

Copy