Chibkees 17

Kebcai Txab Ua Cid Cog Tseg

1Thaws Anplaas hnoosnyood muaj cuaj cawd cuaj xyoos, tuz Tswb taw rob luz tshwd tu niz pud has has tas, “Kud yog Vaajtswb Tuz Kwg Muaj Fwjchid Luj Kiag Nkawg. Koj ca ni noog kud luz has ua lus neej ncaajnceeg muz kuas taaz koj sidneej. 2Kud yiad cogluz tseg tu koj has yiad pus kuas koj muaj xeesntxwz coos heeb.” 3Anplaas txiad txhud cawg ntua nyo haw ua ntsejmuag ti nkaws aab, has Vaajtswb has tas, 4“Tej luz kwg kud cog tseg tu koj muaj ni na: Koj yiad taw ua ntaw yaad neeg tuz yiadkoos. 5Koj lus npe yiad tsi hu ua Anplaas ntxib liad, tadsis yiad hu ua Anplahaas,#17.5 Anplahaas: Lus npe na has ni Henplais lu luz kwg has tas, “yiadkoos qhais txhua yaad neeg.” tu qhob kud tsaa koj ua ntaw yaad neeg tuz yiadkoos.#Loo 4.17 6Kud yiad pus kuas koj muaj xeesntxwz fuadvaad coos heeb. Koj tej xeesntxwz yiad muz ua ntaw yaad neeg, has muaj qeetuz yiad ua vaajntxwb.

7Kud yiad ceeb kud tej luz cog tseg tu koj has koj tej xeesntxwz muz liad yaab todntej is tad dhaw tu is tad kwg yog cob luz cog tseg muz istxhis tsi kiag ni. Kud yiad yog koj tuz Vaajtswb has koj tej xeesntxwz tuz Vaajtswb.#Luk 1.55 8Kud yiad muas lus teschias kwg taadsid na koj tseed ua neeg poos teschias nyos na pus tu koj has koj tej xeesntxwz. Taaznrhiab lus teschias Kana-aas na yiad yog koj tej xeesntxwz ni muz istxhis, has kud yiad yog cud tuz Vaajtswb.”#Tez 7.5

9Vaajtswb has tu Anplahaas has tas, “Koj yiadtsud ceeb cob luz cog tseg na, tu koj has koj tej xeesntxwz is tad dhaw tu is tad muz istxhis ni. 10Koj has koj tej xeesntxwz yiadtsud ua kebcai txab tia tu txhua tuz yiag.#Tez 7.8; Loo 4.11 11-12Txij hnoos na muz liad yaab todntej koj yiadtsud muas txhua tuz minyuas tus ua kebcai txab tia thaws niz hnoosnyood muaj yid hnoos, tsi has tej tusqhe kwg yug hub mej tseb has tej tusqhe kwg mej yuab qhais lwd yaad neeg luz ua kebcai txab hubtsig. Txuj kebcai na yog lus cid tseedcees qhais lu luz cog tseg tu koj has kud. 13Txhua tuz yiadtsud taw ua kebcai txab tia, has txuj kebcai txab qhais nqaj tia na ha ua lus cid qha has tas, kud cob luz cog tseg tu mej yeej nyos muz istxhis. 14Txhua tuz yiag kwg niz tsi taw ua kebcai txab tia yiad taw muas niz rhu tiad hub kud yaad neeg, tu qhob niz tsi ceeb lu luz cog tseg qhai.”

15Vaajtswb has tu Anplahaas tas, “Koj tsi xod hu koj tuz puj ua Xalais liad, txij hnoos na muz koj yiadtsud hu niz lus npe ua Xalas#17.15Xalas: Lus npe na luz Henplais txhais has tas “ntxhais vaajntxwb.” liad nyaz. 16Kud yiad food kooshmoob tu niz has kud yiad pus niz muaj is tug tus tu koj. Kud yiad food kooshmoob tu niz has niz yiad taw ua ntaw yaad neeg tuz nad, has niz tej xeesntxwz yiad muaj qeetuz siab ua vaajntxwb.”

17Anplahaas txiad txhud cawg ntua nyo haw ua ntsejmuag ti nkaws aab, tadsis tseed rus tuasyws hub sas thaws niz xaab txug has tas, “Yiad ua nyaab tuz neeg kwg hnoosnyood muaj is puas xyoo liad tseed muaj tawz minyuas? Xalas ted muaj cuaj cawd xyoo liad, niz tseed yiad xees tawz tus has los?” 18Anplahaas has tu Vaajtswb has tas, “Thob koj ca ni food kooshmoob tu Yisamayees nyaz.”

19Ces Vaajtswb has tas, “Tsi yog ni qhai, Xalas kwg yog koj tuz puj yiad yug is tug tus tu koj has koj yiadtsud tis niz lus npe hu ua Ixaj.#17.19 Ixaj: Lus npe na luz Henplais txhais has tas, “niz rus.” Kud yiad ceeb kud tej luz cog tseg nrug niz has niz cob xeesntxwz muz istxhis. Yog lu luz cog tseg kwg nyos muz istxhis tsi kiag ni. 20Kud hnob tej luz kwg koj taw thob kud has txug Yisamayees, yog ni qhai, kud yiad food kooshmoob tu niz has pus kuas niz muaj tuski has xeesntxwz coos heeb. Niz yiad ua kawd os tug vaajntxwb yiadkoos, has kud yiad pus kuas niz tej xeesntxwz ua is yaad neeg tseedcees. 21Tadsis kud yiad ceeb kud tej luz cog tseg nrug koj tuz tus Ixaj, yog tuz kwg lwd xyoo rob txug lus caij na Xalas yiad yug tu koj.” 22Thaws Vaajtswb has taaz tu Anplahaas liad, niz txiad ncaid Anplahaas muz liad.

23Anplahaas ua rias ni Vaajtswb has, tuas hnoos qhai nyaz niz txiad ua kebcai txab tia tu niz tuz tus Yisamayees has lwd tuz yiag kwg nyos hub niz lus tseb, taaznrhiab tej tusqhe kwg yug hub niz tseb has tej tusqhe kwg muas nyaj yuab luz hubtsig. 24Anplahaas ua kebcai txab tia thaws niz muaj hnoosnyood cuaj cawd cuaj xyoos, 25has niz tuz tus Yisamayees ua thaws muaj kawd pes xyoos. 26Ostug puabtsig ua kebcai txab tu tuas hnoos qhai, 27has tuas txhij nrug Anplahaas cob tusqhe tuadtxhij hubtsig.

Currently Selected:

Chibkees 17: CQD2024

Highlight

Copy