ରୁମିୟ 6
6
ପାପତାୱା ହାଅନ୍ କ୍ରିସ୍ଟତାୱା ନିମ୍ୱନ୍
1ଏହେଙ୍ଗ୍ ଆତେସି, ମାରୁ ଇନ୍ନା କିନା ? ଅନୁଗ୍ରହ ଗାପ୍ଚି ଗାମାକାଦି ଇଞ୍ଜାନ୍ ମାରୁ ଇନ୍ନା ପାପ କିଏ ମାନ୍ନା ? 2ଏଦି ଏଚ୍ଚେକ୍ ଆଃଆକାଦି । ମାନ୍ଦି ତ ପାପ କିଅନ୍ତି ପ୍ଡାଃଇ ପରନ୍ ହାନ୍ନେ, ଆଟେ ଇନିମିଡି ମାରୁ ପାପ କିନା ? 3ମାରୁ ଏଚ୍ଚେ ଦାଲ୍ଲା କ୍ରିସ୍ଟ ଜିସୁତାୱା ଡୁବନ୍ ଆନ୍ନା, ଏ ହାବେତାସୁ ତା ହାଅନ୍ତାୱା ଡୁବନ୍ ଆନ୍ନା, ଇଦା ମିରୁ ଇନ୍ନା ପୁଞ୍ଜାହେଃଲ୍ଲେରିମା ? 4#କଲ ୨:୧୨ଏଦାବାଗା, ମାରୁ ଡୁବନ୍ ଆନ୍ ଜିସୁ କ୍ରିସ୍ଟତି ହାଅନ୍ତାୱା ଆଡ୍ଡିରୁଡ୍ଡି ଆନ୍ ତା ଡ଼ାହି ଗ୍ରିପାମୁସ୍ପା ଆତାସୁ; ଆଟେ କ୍ରିସ୍ଟ ଆବାତି ଗଉରବଟି ଇନିସ୍ ହାନ୍ନାର୍ତାୱାଟି ନିଙ୍ଗିତେଞ୍ଜି, ମାରୁ ୱାଡ଼େ ଏଚିଡେହେଙ୍ଗ୍ ପୁନି ପରନ୍ଟିଆଟି ନିମ୍ୱିନା ।
5ଇନାକି ଜଦି ମାରୁ ତାନୁ ହାତି ଡେହେଙ୍ଗ୍ତି ହାଅନ୍ତାୱା ହାନାହି ତା ଡ଼ାହି ରଣ୍ଡା ଆନ୍ନା; ଏହେଙ୍ଗ୍ ଆତେସି ସାମେନେଃଏ ତାନୁ ଇନିସ୍ ନିମ୍ୱାନ୍ ନିଙ୍ଗିତେଞ୍ଜି, ଏହେଙ୍ଗିସି ମାରୁ ୱାଡ଼େ ତା ଡେହେଙ୍ଗ୍ ନିମ୍ୱାନ୍ ନିଙ୍ଗାନ୍ ତା ଡ଼ାହି ରଣ୍ଡା ଆନା । 6ଇନିସ୍କି ମାରୁ ଆଟେ ପାପତି କାମ୍ୱାରେଏଞ୍ଜି ଆନ୍ ବାସା ଆଃଆକାସୁ, ଇଦାବାଗା ପାପତି ଗାଣ୍ଡି ନାହେଡ୍ ଆଅନ୍ ବାଗାଟି ମା ପ୍ଡାଃଇ ବେବାର୍ ତା ଡ଼ାହି କ୍ରୁସତାୱା ହାପ୍ଚ୍ଚାନ୍ନା, 7ଇଦା ମାରୁ ପୁଞ୍ଜାନ୍ନା, ଇନାକି ଏମ୍ୱେନାଞ୍ଜି ହାନ୍ନେଞ୍ଜି, ଏୱାଞ୍ଜି ପାପଟି କୁଲ୍ପା ପାଁଣ୍ଡାନ୍ନେଞ୍ଜି । 8ଜଦି ମାରୁ କ୍ରିସ୍ଟ ଡ଼ାହି ହାନ୍ନା, ଏହେଙ୍ଗ୍ ଆତେସି ମାରୁ ତା ଡ଼ାହି ୱାଡ଼େ ନିମ୍ୱିନା, ଇଦା ମାରୁ ମାଞ୍ଜାଡ଼ି କିନ୍ନା । 9ଇଦା ମାରୁ ପୁଞ୍ଜିନ୍ନା ଜେ, କ୍ରିସ୍ଟ ହାନ୍ନାର୍ଟିଆଟି ନିମ୍ୱାନ୍ନିଙ୍ଗାନ୍ନି ବାଗା ଆଟେ ଏଚ୍ଚେକ୍ ହାଃଏଞ୍ଜି, ଆଟେ ତା କୁଃଏଟି ହାଅନ୍ତି ବଲ ଆକୁଡ଼୍ କିଅନ୍ ମୁଃଏ । 10ଇନାକି ଏୱାଞ୍ଜି ଇମ୍ୱିନ୍ ହାଅନ୍ତାୱା ହାତେଞ୍ଜି, ରଲେନେଃଏ ମା ପାପ ବାଗାଟି ହାତେଞ୍ଜି; ମତ୍ର ଏୱାଞ୍ଜି ଇମ୍ୱିନ୍ ପରନ୍ଟିଆଟି ନିମ୍ବାନ୍ନେଞ୍ଜି, ଏ ପରନ୍ ଡ଼ାହି ଏୱାଞ୍ଜି ମୁଲାପେନୁ ବାଗା ନିମ୍ୱାନ୍ନେଞ୍ଜି । 11ଏହେଙ୍ଗିସି ମିରୁ ୱାଡ଼େ ମି ମି ପାପ ବାଗା ହାଞ୍ଜେରି, ମତ୍ର କ୍ରିସ୍ଟ ଜିସୁତି ଆଡ୍ଡିରୁଡିତାୱା ମାଞ୍ଜାନ୍ ମୁଲାପେନୁ ବାଗା ନିମ୍ୱାନ୍ନାମୁ ଇଞ୍ଜାନ୍ ପୁଞ୍ଜୁ ।
12ଇନିସ୍ ମିରୁ ପାପ ଗାଣ୍ଡିତି ଡ଼ଃଆନ୍ ଇଚ୍ଚାଟି ବାସାଆଃଏରି, ଏଦାବାଗା ଇ ନାହେଡ୍ ଆଅନ୍ତି ଗାଣ୍ଡିତାୱା ପାପ ମିଙ୍ଗେ ଆକୁଡ଼୍ କିଆଦାଃଆକାଦି । 13ଆଟେ ମି ମି ଗାଣ୍ଡିକାଜୁତିଦି ଅଦାର୍ମିକ କାମାତି ଦୁର୍ଗୁ ଡେହେଙ୍ଗ୍ ପାପତିଦି ସର୍ପି କିଃଆଟୁ, ମତ୍ର ହାନ୍ନାରିଆଟି ନିମ୍ୱାନ୍ନି ଡେହେଙ୍ଗ୍ ମିରୁ ମି ଗାଣ୍ଡି ମୁଲାପେନୁନିକି ସର୍ପି କିଦୁ, ଆଟେ ମି ମି ଗାଣ୍ଡିକାଜୁତିଦି ଦାର୍ମିକତାତି ଦୁର୍ଗୁ ଡେହେଙ୍ଗ୍ ମୁଲାପେନୁନିକି ସର୍ପି କିଦୁ । 14ଇନାକି ମିରୁ ମସାତି ହାଜୁତି ହକତ୍ତାୱା ହେଃଲ୍ଲେରି, ମତ୍ର ମୁଲାପେନୁତି ଅନୁଗ୍ରହତି ହକତ୍ତାୱା ମାଞ୍ଜେରି । ଇଦାବାଗା ପାପ ମି କୁଃଏଟି ଆକୁଡ଼୍ କିଆଦାଃଏ ।
ଦାର୍ମିକତାତି କାମ୍ୱାରେଏଞ୍ଜି
15ଏଦାବାଗା ମାରୁ ଇନ୍ନା କିନା ? ମାରୁ ମସା ହାଜୁତି ହକତ୍ତାୱା ହେଃଲ୍ଲାସୁ, ମତ୍ର ମୁଲାପେନୁତି ଅନୁଗ୍ରହତାୱା ମାନ୍ନା ଇଞ୍ଜାନ୍ ପାପ କିଏ ମାନ୍ନା ? ଏଦି ଏଚ୍ଚେକ୍ ଆଃଆକାଦି । 16ଇଦା ମିରୁ ସାମେନେଃଏ ପୁଞ୍ଜାଞ୍ଜେରି ଜେ, ଏଚ୍ଚିକିଃଆ ମିରୁ କାମ୍ବାରେଏଞ୍ଜି ଡେହେଙ୍ଗ୍ ମିରୁ ମି ଗାଣ୍ଡି ସର୍ପି କିଞ୍ଜେରି, ଏଚିତୁକାତାୱା ମିରୁ ଏ କୁଏଞ୍ଜ୍ତି କାମ୍ବାରେଏଞ୍ଜି ଆଇଞ୍ଜେରି । ଇମ୍ୱିନ୍ କୁଏଞ୍ଜିକି ମିରୁ ମାନି ଆଇଞ୍ଜେରି ଏୱାଞ୍ଜି ମି ସକାରେଏଞ୍ଜି । ମିରୁ ପାପତି କାମ୍ବାରେଏଞ୍ଜି ଆଅନ୍ ମୁଦେରି ଇମ୍ୱିନାଦିକି ମିଙ୍ଗେ ହାଅନ୍ତିଇନ୍ଦା ଅଦାନେ । ମତ୍ର ମୁଲାପେନୁନିକି ମାନି ଆତେସି ମିରୁ ତା ଟାକ୍କେ ଦାର୍ମିକ ଇଞ୍ଜାନ୍ ତଞ୍ଜିଦେରି । 17ମତ୍ର ମୁଲାପେନୁତି ଦନ୍ୟବାଦ ଆପାକାଦି, ମିରୁ କାହେ ପାପତି କାମ୍ବାରେଏଞ୍ଜି ମାଚ୍ଚେରି, ହାଦାଡ଼ି ମାମୁ ମିଙ୍ଗେ ଇମ୍ୱିନ୍ କୁଲା ଗ୍ରାପ୍ଚ୍ଚାଞ୍ଜାନାମୁ ଏଦା ମିରୁ ହଡାଙ୍ଗିଃଆଟି ମାନି ଆଇଞ୍ଜେରି, 18ଆଟେ ମିରୁ ପାପତାୱାଟି ଜ୍ଡିଆନ୍ ଦାର୍ମିକତାତି କାମ୍ୱାରେଏଞ୍ଜି ଆଞ୍ଜେରି । 19ନାନୁ ମି ଗାଣ୍ଡିତି ଦୁର୍ବଲ ବାଗାଟି କୁଏଞ୍ଜି ଡେହେଙ୍ଗ୍ ୱେସ୍ପିଞ୍ଜା; ମିରୁ ଇନିସ୍ ଅଦର୍ମ ବାଗାଟି ମି ମି ଗାଣ୍ଡିକାଜୁତିଦି ଅସୁଚି ଅଟେ ଅଦର୍ମ ଟାକ୍କେ କାମ୍ବାରେଏଞ୍ଜି ଡେହେଙ୍ଗ୍ ସର୍ପି କିଆଚ୍ଚେରି, ଏଚିଡେହେଙ୍ଗ୍ ହାଦାଡ଼ି ମି ମି ଗାଣ୍ଡିକାଜୁତିଦି ପିର୍ନି ଆଅନ୍ ବାଗାଟି ଦାର୍ମିକତାତି କାମ୍ବାରେଏଞ୍ଜି ଡେହେଙ୍ଗ୍ ସର୍ପି କିଦୁ ।
20ଇନାକି ମିରୁ ପାପତି କାମ୍ବାରେଏଞ୍ଜି ମାଚ୍ଚି ତୁକାତାୱା ଦାର୍ମିକତା କୁଲାଟି ଉଦ୍ଦା ମାଚ୍ଚେରି । 21ହାଦାଡ଼ି ମିରୁ ଇମ୍ୱିନ୍ ହାବେ କାମା କିଅନ୍ ବାଗା ଲେଜ୍ଜା ଆଇଞ୍ଜେରି, ନକି ଏ ହାବେତ୍ କାମା କିଚ୍ଚେରି । ମିରୁ ଏ ହାବେତ୍ କାମା କିଆନ୍ ଇନ୍ନା ଲାବା ପାଁଣ୍ଡିଚ୍ଚେରି ? ଇନାକି ଏ ହାବେତ୍ କାମାତି ପଲ ଆଇନେ ହାଅନ୍ । 22ମତ୍ର ହାଦାଡ଼ି ପାପଟି କୁଲ୍ପା ପାଁଣ୍ଡାନ୍ ମୁଲାପେନୁତି କାମ୍ୱାରେଏଞ୍ଜି ଆନ୍ନି ବାଗା ମିରୁ ପିର୍ନି ଆଅନ୍ତି ଲାବା ପାଁଣ୍ତିଞ୍ଜେରି, ଏମ୍ୱାତି କାଉ ଆଇନେ ଟାକ୍କିଡ଼ହ୍ନାତି ପରନ୍ । 23ଇନାକି ପାପତି କୁଲ୍ଲି ଆଇନେ ହାଅନ୍, ମତ୍ର ମୁଲାପେନୁତି ଅନୁଗ୍ରହ ଦାନ ମା ଦାର୍ମୁ କ୍ରିସ୍ଟ ଜିସୁତି ଆଡ୍ଡିରୁଡ୍ଡିତାୱା ଟାକ୍କିଡ଼ହ୍ନାତି ପରନ୍ ।
© 2023 NLCI CC BY-NC-ND 4.0