ରୁମିୟ 5
5
ମାଞ୍ଜାଡ଼ି ତାୱାଟି ମୁଲାପେନୁ ଡ଼ାହି ଲତୁଟି ମାନ୍ବନ୍
1ଇଦାବାଗା ମାଞ୍ଜାଡ଼ି ତାୱାଟି ମାରୁ ଦାର୍ମିକ ଆନ୍ନା, ଏଦାକି ମାରୁ ମା ଦାର୍ମୁ ଜିସୁ କ୍ରିସ୍ଟ ତାୱାଟି ମୁଲାପେନୁ ଡ଼ାହି ଲତୁଟି ମାନ୍ନା; 2ହାଦାଡ଼ି ଜିସୁ କ୍ରିସ୍ଟ ତାୱାଟି ମାଞ୍ଜାଡ଼ିଟି ଅନୁଗ୍ରହତାୱା ମାନ୍ନା, ଇମ୍ୱିନ୍ ଅନୁଗ୍ରହତାୱା ମାରୁ ନାର୍ରା ଇଟ୍ଟାନ୍ନା । ମୁଲାପେନୁତି ଗଉରବତି ବାଗା ପାଁନ୍ବନ୍ତି ଆଣ୍ଟ ଆସା ଇଟ୍ଟାନ୍ ଗର୍ବ କିନ୍ନା । 3ୱାର୍ରି ଏଦି ଆଃଏ, ବିହାନପୁତାୱା ୱାଡ଼େ ରାହାଙ୍ଗ୍ ଆଇନା, ଇନାକି ମାରୁ ପୁଞ୍ଜାନ୍ନା ଜେ, ବିହାନପୁତାୱାଟି ଦର୍ଜ୍ୟ, ଦର୍ଜ୍ୟ ତାୱାଟି ନେହି ବେବାର୍, 4ଆଟେ ନେହି ବେବାର୍ ତାୱାଟି ନାର୍ରା ପ୍ଲିନ୍ନେ । 5ଆଟେ ଇ ନାର୍ରା ମାଙ୍ଗେ ନିରାସ କିୱିକିଆଦାଃଏ, ଇନାକି ମୁଲାପେନୁ ମାଙ୍ଗେ ତା ପିର୍ନି ଡିଙ୍ଗା ଡ଼ାହି ତା ଗାପ୍ଚି ଜେଡା ମା ହଡାଙ୍ଗିଃଆ ହିଆଞ୍ଜାନେଞ୍ଜି । 6ଇନାକି ଏଚ୍ଚିକିଃଆ ମାଙ୍ଗେ ଜ୍ଡିଅନ୍ ବାଗା ଇନ୍ନି ପାହେର୍ ହେଃଲ୍ଲାତେ, ଏଚିତୁକାତାୱା#୫:୬ ଏଚିତୁକାତାୱା ଇଚ୍ଚେସି ଇଦିମ୍ୱା ମୁଲାପେନୁତି ରଞ୍ଜି କିଆଚ୍ଚି ଟିକ୍ ତୁକାତାୱା କ୍ରିସ୍ଟ ଅଦାର୍ମିକଗାଟାର୍ ବାଗା ହାତେଞ୍ଜି । 7ରଃଅଞ୍ଜି ଦାର୍ମିକଗାଟାଞ୍ଜି ବାଗାଟି ଏମ୍ୱେନାଞ୍ଜି ହାଃଏଞ୍ଜି ଅଟେ ରଃଅଞ୍ଜି ନିଗ୍ଗା କୁଏଞ୍ଜି ବାଗାଟି ଏମ୍ୱେନାଞ୍ଜି ବରେସିଆଟି ପରନ୍ ହିଅନ୍ ମୁନେଞ୍ଜି । 8ମତ୍ର ମାରୁ ପାପତାୱା ମାଚ୍ଚି ତୁକାତାୱା କ୍ରିସ୍ଟ ମା ବାଗାଟି ହାତେଞ୍ଜି । ଏମ୍ୱାଟି ମୁଲାପେନୁ ମାଙ୍ଗେ ଏଚ୍ଚେ ଜେଡା କିଞ୍ଜାନେଞ୍ଜି, ଏଦା ଏୱାଞ୍ଜି ତସାଞ୍ଜାନେଞ୍ଜି । 9ଏଦାବାଗା, ହାଦାଡ଼ି ମାରୁ କ୍ରିସ୍ଟତି ରାକ୍କା ଡ଼ାହି ଦାର୍ମିକ ଆତାସୁ । ଏହେଙ୍ଗ୍ ଆତେସି ତ ସାମେନେଃଏ ମୁଲାପେନୁତି ତରୁଟି ଜ୍ଡିପା ପାଁନା । 10ଇନାକି ମାରୁ ମୁଲାପେନୁତି ସତ୍ରୁ ମାଚ୍ଚି ତୁକାତାୱା ଜଦି ତା ମ୍ରିଃଏଞ୍ଜି ଜିସୁ ହାତି ବାଗାଟି ମୁଲାପେନୁ ଡ଼ାହି ମାରୁ ରିହିକ୍ ଆଡ୍ଡିଆତାସୁ । ଏଦାବାଗା ହାଦାଡ଼ି କ୍ରିସ୍ଟତି ପରନ୍ ତାୱାଟି ଜ୍ଡିପା ପାଁନା । 11ମତ୍ର ମା ଦାର୍ମୁ ଜିସୁ କ୍ରିସ୍ଟ ତାୱାଟି ମାରୁ ହାଦାଡ଼ି ରିହିକ୍ ଆଡ୍ଡିଆନ୍ନା; ୱାର୍ରି ଏଦି ଆଃଏ, ମତ୍ର ଜିସୁତାୱାଟି ମାରୁ ମୁଲାପେନୁ ପାଟ୍ଟି ରାହାଙ୍ଗ୍#୫:୧୧ ରାହାଙ୍ଗ୍ “ରାହାଙ୍ଗ୍” ଇଚ୍ଚେସି ଗ୍ରିକ୍ କାତାତାୱା ଗର୍ବ ଇଞ୍ଜାନ୍ ୱ୍ରିଗାଆନ୍ନେ । ୱାଡ଼େ ଆଇନା ।
ଆଦମ ତାୱାଟି ହାଅନ୍ ଅଟେ କ୍ରିସ୍ଟ ତାୱାଟି ପରନ୍
12ଏଦାବାଗା ଇନିମିଡି ରଃଅଞ୍ଜି କୁଏଞ୍ଜ୍ତାୱାଟି ପାପ ଅଟେ ଏ ପାପତାୱାଟି ହାଅନ୍ ପୁର୍ତିତାୱା ୱାତେ, ଆଟେ ଏହେଙ୍ଗିସି ହାଅନ୍ ହାବେତାରି ବାଗା ଗଟି ଆତେ, ଇନାକି ହାବେତାରି ପାପ କିତେରି । 13ଇନାକି ପୁର୍ତିତାୱା ପାପ ମସାତି ହାଜୁ କାହେଟେଃଏ ମାଚ୍ଚେ, ମତ୍ର ମସାତି ହାଜୁ ହେଃଲ୍ଲାତ୍ ତୁକାତାୱା ପାପତି ଲେକା ଆଇହେଃଲ୍ଲାତେ; 14ଏମ୍ୱେନାରି ଆଦମ ଲାକ୍କାଟି ପାପ କିଆହେଃଲ୍ଲାତେସି ୱାଡ଼େ, ଆଦମ ଟିଆଟି ମସା ଟିକ୍ନା ଏୱାର୍ କୁଃଏଟି ୱାଡ଼େ ହାଅନ୍ ଆକୁଡ଼୍ କିଆଚ୍ଚେ; ଏମ୍ୱେନାଞ୍ଜି ୱାଅନ୍ ମାଚ୍ଚେଞ୍ଜି, ଆଦମ ଏୱାଞ୍ଜ୍ ଡେହେଙ୍ଗ୍, 15ମତ୍ର ପାପ ଇନିସ୍, ଅନୁଗ୍ରହ ଦାନ ଏହେଙ୍ଗିସି ଆଃଏ, ଇନାକି ଜଦି ରଃଅଞ୍ଜ୍ତି ପାପ#୫:୧୫ ପାପ ଡ଼ଃଆନାଦା ବାଗାଟି ଏଗେଲ୍ ଦାଲ୍ଲା ହାତେରି, ଏହେଙ୍ଗ୍ ଆତେସି ମୁଲାପେନୁତି ଅନୁଗ୍ରହତାୱା ଅଟେ ତା ଦାନ ଗାପ୍ଚି ଏଗେଲ୍ । ରଃଅଞ୍ଜି କୁଏଞ୍ଜି, ଇଚ୍ଚେସି, ଜିସୁ କ୍ରିସ୍ଟତି ଅନୁଗ୍ରହ ତାୱାଟି ଏ ଦାନ ଏଗେଲ୍ ଦାଲ୍ଲା ବାଗାଟି ଗାପ୍ଚି ଲାବା ଆତେ । 16ରଃଅଞ୍ଜ୍ତି ପାପତି ଦଣ୍ଡ ମୁଲାପେନୁତି ଇ ଅନୁଗ୍ରହ ଦାନ ଡ଼ାହି ସମାନ୍ ଆଃଏ । ରଃଅଞ୍ଜ୍ତି ପାପ ବାଗାଟି ଦଣ୍ଡତି ଆଗ୍ୟାଁ ହିୱାଆନ୍ନେ, ମତ୍ର ମା ପାଟ୍ଟି ଗାପ୍ଚି ପାପ ମାଚ୍ଚେସ୍ ୱାଡ଼େ ମୁଲାପେନୁତି ଅନୁଗ୍ରହ ଦାନ ତାୱାଟି ମାରୁ ଦାର୍ମିକ ଆଇନା । 17ଜଦି ରଃଅଞ୍ଜ୍ତି ପାପ ବାଗାଟି ଗାପ୍ଚି ଦାଲ୍ଲାନିକି ଏ କୁଏଞ୍ଜ୍ତାୱାଟି ହାଅନ୍ ଆକୁଡ଼୍ କିତେ, ଏହେଙ୍ଗ୍ ଆତେସି ଏମ୍ୱେନାରି ଅନୁଗ୍ରହ ଅଟେ ଦାର୍ମିକତାତି ଦାନ ହାରାବୁରାନ୍ ପାଁଣ୍ଡିନ୍ନେରି, ଏୱାରି ରଃଅଞ୍ଜି କୁଏଞ୍ଜି ଇଚ୍ଚେସି, ଜିସୁ କ୍ରିସ୍ଟ ଡ଼ାହି ଆଟେ ଗାପ୍ଚି ପରନ୍ତାୱା ଆକୁଡ଼୍ କିନେରି । 18ଇନିସ୍ ରଃଅଞ୍ଜ୍ତି ପାପତି ଦୁସ ବାଗାଟି ହାବେତ୍ କୁଇଙ୍ଗ୍ନିକି ଦଣ୍ଡ ଗଟି ଆତେ, ଏହେଙ୍ଗିସି ରଃଅଞ୍ଜ୍ତି ଦାର୍ମିକତାତି କାମା ବାଗା ହାବେତ୍ କୁଇଙ୍ଗ୍ନିକି ଦାର୍ମିକ କିନ୍ନେ ଅଟେ ପୁନି ପରନ୍ ହିନ୍ନେ । 19ଇନାକି ଇନିସ୍ ରଃଅଞ୍ଜି ମୁଲାପେନୁତି ଆଗ୍ୟାଁ ମାନି ଆଃଆତ୍ ବାଗା ଏଗେଲ୍ ଦାଲ୍ଲା ପାପିଗାଟାରି ଆତେରି, ଏହେଙ୍ଗିସି ରଃଅଞ୍ଜି ମୁଲାପେନୁତି ଆଗ୍ୟାଁ ମାନି ଆତି ବାଗା ଏଗେଲ୍ ଦାଲ୍ଲା ୱାଡ଼େ ଦାର୍ମିକଗାଟାର୍ ଆନେରି । 20ମସାତି ହାଜୁ ୱାତାୱିଃଆଟି ମାରୁ ଏଚ୍ଚେ ଗାପ୍ଚି ପାପିଗାଟାସୁ ଏଦା ପୁଚ୍ଚାସୁ; ମତ୍ର ଏଚ୍ଚିକିଃଆ ଦାଲ୍ଲା ଗାପ୍ଚି ପାପ କିତେରି, ମୁଲାପେନୁତି ଅନୁଗ୍ରହ ୱାଡ଼େ ଆଟେ ଏଗେଲ୍ ଗାମିତେ ଇଞ୍ଜାନ୍ ପୁଚ୍ଚାସୁ । 21ଇନିସ୍ ପାପ ହାଅନ୍ ତାୱାଟି ଆକୁଡ଼୍ କିଆଚ୍ଚେ, ଏହେଙ୍ଗିସି ମୁଲାପେନୁତି ଅନୁଗ୍ରହ ୱାଡ଼େ ମା ଦାର୍ମୁ ଜିସୁ କ୍ରିସ୍ଟ ତାୱାଟି ଟାକ୍କିଡ଼ହ୍ନା ପରନ୍ ହିଅନ୍ତି ଦାର୍ମିକତା ଦାନ ହିଆନ୍ ଆକୁଡ଼୍ କିନେ ।
© 2023 NLCI CC BY-NC-ND 4.0