ରୁମିୟ 7
7
ମସାତି ହାଜୁତାୱାଟି କୁଲ୍ପା
1ଏ ଆମ୍ୱେସାଙ୍ଗା ଆଙ୍ଗିସ୍କାନାତେରି, କୁଏଞ୍ଜି ଇମ୍ୱିନ୍ ଟିକ୍ନା ନିମ୍ୱାନ୍ ମାନ୍ନେଞ୍ଜି, ଏଚି ଟିକ୍ନା ମସାତି ହାଜୁ ଏୱାଞ୍ଜିକି ଆକୁଡ଼୍ କିନ୍ନେ, ଇଦା ମିରୁ ଇନ୍ନା ପୁଞ୍ଜାହେଃଲ୍ଲେରି ? ନାନୁ ତ ମସାତି ହାଜୁ ପୁଞ୍ଜାନ୍ନି ଦାଲ୍ଲାନିକି ୱେସ୍ପିମାଃଇ । 2ତା କୁଏଞ୍ଜି ଇମ୍ୱିନ୍ ଟିକ୍ନା ନିମ୍ୱାନ୍ ମାନ୍ନେଞ୍ଜି, ଏଚ୍ଚେକ୍ ଟିକ୍ନା ତା କୁଆଲୁ ମସା ହାଜୁତି ହକତ୍ତାୱା ତା କୁଏଞ୍ଜି ଡ଼ାହି ମାଞ୍ଜିନ୍ନେ, ମତ୍ର ତା କୁଏଞ୍ଜି ହାତେସ୍ କୁଆଲୁ ମସାତି ହାଜୁତାୱାଟି କୁଲ୍ପା ପାଁଣ୍ଡିନ୍ନେ । 3ଏଦାକି କୁଏଞ୍ଜି ନିମ୍ୱାନ୍ ମାଞ୍ଜି ମାଞ୍ଜି ଜଦି ଏ କୁଆଲୁ ବିହି କୁଏଞ୍ଜିକି ପୁଁଣ୍ଡେନ୍ନେ, ଇଚ୍ଚେସି ଏଦାଡ଼ିକି ଦାରିଗାଟାଦି ଇଞ୍ଜାନ୍ ୱେସ୍ପା ଆନେ; ମତ୍ର ତା କୁଏଞ୍ଜି ଜଦି ହାନେଞ୍ଜି ଇଚ୍ଚେସି, ଏ କୁଆଲୁ ମସା ହାଜୁତି ହକତ୍ତାୱାଟି କୁଲ୍ପା ପାଁଣ୍ଡିନ୍ନେ, ଆଟେ ଜଦି ଏ କୁଆଲୁ ବିହି କୁଏଞ୍ଜ୍ ଡ଼ାହି ବିବା ଆତେସି, ଏଦି ଦାରି ଆଃଏ । 4ଏଦାକି ଏ ନା ଆମ୍ୱେସାଙ୍ଗା ଆଙ୍ଗିସ୍କାନାତେରି, ମିରୁ ୱାଡ଼େ ଏଚିଡେହେଙ୍ଗ୍ କ୍ରିସ୍ଟତି ଗାଣ୍ଡିଟି ମସାତି ହାଜୁତାୱାଟି କୁଲ୍ପା ପାଁଣ୍ଡାଞ୍ଜେରି, ଆଟେ ମୁଲାପେନୁ ବାଗାଟି କାଉ ଆଗନ୍ ବାଗା ଏମ୍ୱେନାଞ୍ଜିକି ହାଅନ୍ତାୱାଟି ନିଙ୍ଗାନ୍ନେଞ୍ଜି, ମିରୁ ଏୱାଞ୍ଜ୍ ଡ଼ାହି ଆଡ୍ଡାଟୁ । 5ଇନାକି ଏଚ୍ଚେ ଦିନା ଟିକ୍ନା ମାରୁ ଗାଣ୍ଡିତି ହକତ୍ତାୱା ମାଚ୍ଚାସୁ, ଏଚି ଦିନା ଟିକ୍ନା ମସାତି ହାଜୁତାୱାଟି ପାପ କାମା କୁଲା ହାବେ ମା ଗାଣ୍ଡି କାଜ୍ଜୁତାୱା ହାଅନ୍ତି କାଉ ଆଗି କିଅନ୍ ବାଗା କାମା କିଚ୍ଚେ । 6ମତ୍ର ଇମ୍ୱିନ୍ ହାଜୁତି ହକତ୍ତାୱା ମାଚ୍ଚାସୁ, ଏମ୍ୱାଟି ହାନାହି ହାଦାଡ଼ି ମାରୁ ମସାତି ହାଜୁଟି କୁଲ୍ପା ପାଁଣ୍ଡାନ୍ନା; ଏଦାକି ମାରୁ କାହେ ୱ୍ରିଗାଚ୍ଚି ହାଜୁତି କାମ୍ୱାରି କାମା କିଃଏଟେଃଏ ପିର୍ନି ଡିଙ୍ଗାତି ପୁନି ହାଜୁତି କାମ୍ବାରି କାମା କିନ୍ନା ।
ମସାତି ହାଜୁ ଅଟେ ପାପ
7ଏହେଙ୍ଗ୍ ଆତେସି ମାରୁ ଇନ୍ନା ୱେସ୍ନା ? ମସାତି ହାଜୁ ଇନ୍ନା ପାପ ? ଏଦି ଏଚ୍ଚେକ୍ ଆଃଆକାଦି । ମତ୍ର ପାପ ଇନ୍ନାଦି, ଏଦା ମସାତି ହାଜୁ ଆହେଃଲ୍ଲାତେସି ନାନୁ ପୁଃନ୍ନେନ୍ମା; ଇନାକି ଲୁବୁ କିଃଆଟୁ ଇଞ୍ଜାନ୍ ମସାତି ହାଜୁ ୱେସାହେଃଲ୍ଲାତେସି, ଲୁବୁ ଇନ୍ନି କୁଲା ଏଦା ନାନୁ ପୁଃନ୍ନେନ୍ମା । 8ଇ ଆଗ୍ୟାଁ ଡ଼ାହି ପାପ ପେଜୁ ପାଁଣ୍ଡାନାହି ନା ତାୱା ହାବେତ୍ କୁଲାଟ୍ତି ଲୁବୁ ପିଲ୍ତେ; ଇନାକି ମସାତି ହାଜୁ ପିହାନ୍ ପାପ ହାନ୍ନି ସମାନ୍ । 9ଦିନା ମାଚ୍ଚେ, ମସାତି ହାଜୁ ପିହାନାହି ନାନୁ ନିମ୍ୱେଏଚ୍ଚେ; ମତ୍ର ଏଚ୍ଚିକିଃଆ ନାନୁ ମସାତି ଆଗ୍ୟାଁ ପାଟେ, ପାପ ନିମ୍ୱିତେ, ଆଟେ ନାନୁ ପାପ ବାଗାଟି ଡିଙ୍ଗାଟି ହାତେ । 10ଏମ୍ବାଟି ଇମ୍ୱିନ୍ ଆଗ୍ୟାଁ ନା ବାଗାଟି ପରନ୍ ହିଅନ୍ତାଦି, ଏଦି ନା ବାଗା ହାଅନ୍ତାଦି ଆତେ । 11ଇନାକି ପାପ ପେଜୁ ପାଁଣ୍ଡାନାହି ଆଗ୍ୟାଁତାୱାଟି ନାଙ୍ଗେ ଟକ୍କି କିଆତେ, ଆଟେ ଏ ପାପ ଡ଼ାହି ନାଙ୍ଗେ ପାଗାଦାତେ । 12ମତ୍ର ଏହେଙ୍ଗ୍ ଆତେସ୍ୱାଡ଼େ ମସାତି ହାଜୁ ଅଟେ ଆଗ୍ୟାଁ ଆଇନୁ ପିର୍ନି, ନିୟେ ଅଟେ ନିଗ୍ଗା । 13ଏହେଙ୍ଗ୍ ଆତେସି, ଇମ୍ୱିନାଦି ନିଗ୍ଗା ଏଦି କି ନା ବାଗାଟି ହାଅନ୍ତାଦି ଆତେ ? ଏଦି ଏଚ୍ଚେକ୍ ଆଃଆକାଦି । ମତ୍ର ପାପ ହାଅନ୍ତାଦି ଆତେ, ଇନିସ୍କି ଇମ୍ୱିନାଦି ନିଗ୍ଗା, ଇମ୍ୱିନାଦି ନେହାଦି ଏଦାତିଦିନେଃଏ ପାପ ବେବାର୍ କିଆନାହି ନା ବାଗାଟି ହାଅନ୍ତାଦା ତାଚ୍ଚିୱାତେ, ଇନିସ୍କି ନାନୁ ପୁନ୍ବନ୍ ମୁଃଇ ପାପ ଇନାଦି ? ପାପ ଆଇନେ ଗାପ୍ଚି ଡ଼ଃଆନାଦି, ଇଦା ପୁନ୍ବି କିଅନ୍ ବାଗାଟି ଇହିଙ୍ଗିସି ଆତେ, ଆଟେ ଏ ହାଜୁ ୱାଡ଼େ ଏଦା ତସ୍ତାତେ ।
କୁଏଞ୍ଜ୍ତି ସନ୍ଦେହ
14ଏଦାକି ମସାତି ହାଜୁ ଜେ ଆତ୍ମିକ, ଇଦା ମାରୁ ପୁଞ୍ଜିନ୍ନା; ମତ୍ର ନାନୁ ଗାଣ୍ଡିଟି, ପାପ କିଅନ୍ ବାଗା କଡ୍ଡାଆନ୍ନି କାମ୍ୱାରେଏଞ୍ଜ୍ତାନୁ । 15#ଗାଲା ୫:୧୭ଇନାକି ଏଚ୍ଚିକିଃଆ ନାନୁ ଇନ୍ନା କିମାଃଇ, ଏଦା ପୁଞ୍ଜେହେଃଲ୍ଲେନୁ, ଆଟେ ନାନୁ ଇନ୍ନା ଇଚ୍ଚା କିମାଃଇ, ଏଦା କିହେଃଲ୍ଲେନୁ, ଆଟେ ଇନ୍ନା ସ୍ରିଞ୍ଜେମାଃଇ, ଏଦାନେଃଏ କିମାଃଇ । 16ଜଦି ନାନୁ ଇମ୍ୱିନାଦା କିଅନ୍ ଇଚ୍ଚା କିହେଃଲ୍ଲାନୁ, ଏଦା ଜଦି କିଃଇ ଇଚ୍ଚେସି ନାନୁ ମସାତି ହାଜୁ ନେହାଦି ଇଞ୍ଜାନ୍ ୱେସ୍ପିମାଃଇ । 17ଏଦାକି ନାନୁ ଆଟେ ଏଦା କିଏହେଃଲ୍ଲେନୁ, ମତ୍ର ନା ତାୱା ମାନ୍ନି ପାପ ଏଦା କିନ୍ନେ । 18ନାନୁ ଇଦା ପୁଞ୍ଜିମାଃଇ ନା ଗାଣ୍ଡିତାୱା ନେହାଦି ଇନ୍ବନ୍ତାଦି ହିତେ ୱାଡ଼େ ହେଃଲ୍ଲେ, ଏଦାବାଗା ନାନୁ ନେହି କାମା କିଅନ୍ ବାଗା ଇଚ୍ଚା କିତେସ୍ ୱାଡ଼େ, ଏଦା କିଅନ୍ ମୁପେହେଃଲ୍ଲେନୁ । 19ଇନାକି ଇମ୍ୱିନ୍ ନିଗ୍ଗା କାମା କିଅନ୍ ବାଗା ନାନୁ ଇଚ୍ଚା କିମାଃଇ, ଏଦା କିଅନ୍ ମୁପେହେଃଲ୍ଲେନୁ, ମତ୍ର ଇମ୍ୱିନ୍ ଡ଼ଃଆନ୍ କାମା କିଅନ୍ ବାଗା ଇଚ୍ଚା କିଏହେଃଲ୍ଲେନୁ, ଏଦା କିମାଃଇ । 20ମତ୍ର ଇମ୍ୱିନାଦା ନାନୁ ଇଚ୍ଚା କିଏହେଃଲ୍ଲାନୁ, ଏଦା ଜଦି କିମାଃଇ, ଇଚ୍ଚେସି ନାନୁ ନିଜେ ଏଦା କିଏହେଃଲ୍ଲେନୁ, ମତ୍ର ନା ତାୱା ମାଞ୍ଜିନ୍ନି ପାପ ଏଦା କିନ୍ନେ ।
21ମତ୍ର ନିଗ୍ଗା କାମା କିଅନ୍ତିକି ଇଚ୍ଚା କିତେସ୍ ୱାଡ଼େ, ନା ଟାକ୍କେ ଡ଼ଃଆନାଦି ମାନ୍ନେ, ଏ ହାଜୁ ନାନୁ ହୁଡ଼େମାଃଇ । 22ଇନାକି ନାନୁ ନା ହଡାଙ୍ଗିଃଆଟି ମୁଲାପେନୁତି ହାଜୁତାୱା ରାହାଙ୍ଗ୍ ଆଇମାଃଇ, 23ମତ୍ର ନାନୁ ନା ଗାଣ୍ଡିକାଜ୍ଜୁଟି ରଣ୍ଡା ବିହି ହାଜୁତିଦି ହୁଡ଼େମାଃଇ, ଏଦି ନା ମନତି ହାଜୁ ବିରୁଦିଆଟି ଜୁଜ୍ଜି ଆଇନେ, ଆଟେ ନା ଗାଣ୍ତିକାଜ୍ଜୁତାୱା ଇମ୍ୱିନ୍ ପାପତି ହାଜୁ ମାନ୍ନେ, ନାଙ୍ଗେ ଏଦିମ୍ୱା ଗାସ୍ପିଞ୍ଜାନେ । 24ନାନୁ ଇଚ୍ଚେ ନିଗାଡ଼୍ଗାଟି କୁଏଞ୍ଜ୍ତାନୁ ଜେ, ଇ ହାଅନ୍ତି ଗାଣ୍ଡିଟି ଏମ୍ୱେନାଞ୍ଜି ନାଙ୍ଗେ ଜ୍ଡିପ୍ତାନେଞ୍ଜି ? 25ମା ଦାର୍ମୁ ଜିସୁ କ୍ରିସ୍ଟ ତାୱାଟି ଜ୍ଡିପା ପାଁଣ୍ଡାନ୍ନି ବାଗା ମୁଲାପେନୁତି ଦନ୍ୟବାଦ ଆପାକାଦି । ଏଦାକି ନାନୁ ନା ମନଟି ମୁଲାପେନୁ ହାଜୁତି କାମ୍ୱାରେଏଞ୍ଜ୍ତାନୁ, ମତ୍ର ଗାଣ୍ଡିଟି ପାପହାଜୁତି କାମ୍ୱାରେଏଞ୍ଜି ଆମାଃଇ ।
Currently Selected:
ରୁମିୟ 7: DWK
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0