ପିଲିପିୟ 3

କ୍ରିସ୍ଟନିକି ମାଞ୍ଜାଡ଼ି କିଆନ୍ ଦାର୍ମିକତାତି ପରନ୍

1ୱିହାଡେଗ୍ଗା, ଏ ନା ଆମ୍ୱେସ୍ଆଙ୍ଗିସ୍‌କାନାତେରି, ଦାର୍ମୁତାୱା ମାଞ୍ଜାନ୍ ରାହାଙ୍ଗ୍ ଆଦୁ । କାହେ ୱେସାଞ୍ଜାତି ଏ ରଣ୍ଡା କାତାତିଦି ଲାଗ୍ଗେ ଲାଗ୍ଗେ ୱ୍ରିଗନ୍ ବାଗାଟି ୱାହେହେଃଲ୍ଲାନୁ, ଇନାକି ଇ ହାବେ ମିଙ୍ଗେ ରକ୍ୟା କିଆନେ । 2ଦୁସ୍ଟ କାମା କିନ୍ନି ଦାଲ୍ଲାଟିଆଟି, ନାହୁଡ଼୍‌କା ଲାକ୍କାଟ୍‌ତି ଦାଲ୍ଲାତାୱାଟି, ଆଟେ ସୁନତ ଆଅନ୍ ବାଗା ବାଦ୍ୟ କିନାରିଆଟି ନେହେନ୍ ମାଞ୍ଜୁ । 3ଇନାକି ମାରୁ ନିଜ୍ଜାନେଃଏ ସୁନତ ପାଁଣ୍ଡାନ୍ନିଗାଟାସୁ, ଏଦାକି ମାରୁ ମୁଲାପେନୁତି ଡିଙ୍ଗାଟି ଗାଡ଼ିହେରୁ କିନା, ଆଟେ ପୁର୍ତିତି କୁଲାଟି ନାର୍ରା ଇଟ୍ଟେଟେଃଏ କ୍ରିସ୍ଟ ଜିସୁ ଟାକ୍କେ ମାରୁ ଗର୍ବ କିନା । 4ନାନୁ ତ କାଟଟ୍‌ତି କୁଲାତାୱା ୱାଡ଼େ ନାର୍ରା ଇଟ୍ଟନ୍ ମୁଃଇମା; ଜଦି ଏମ୍ୱେନାଞ୍ଜି କାଟଟ୍‌ତି କୁଲାତାୱା ନାର୍ରା ଇଟ୍ଟନ୍ ମୁପିମାଃଇ ଇଞ୍ଜାନ୍ ଏଲୁ କିନ୍ନେଞ୍ଜି, ଇଚ୍ଚେସି ନାନୁ ଏୱାର୍‌ତାୱାଟି ଗାପ୍‌ଚି କାଟଟ୍‌ତି କୁଲାତାୱା ନାର୍ରା ଇଟ୍ଟନ୍ ମୁତେମା । 5#ରୁମି ୧୧:୧; ପେରି ୨୩:୬; ୨୬:୫ଇନାକି ନାନୁ ଆଟ୍ଟା ଦିନାଟି ସୁନତ ଆମାଃଇ, ଇସ୍ରାଏଲ ପୁଣ୍ଡିତାୱାଟି ପ୍ଲିଆମାଃଇ, ବିନ୍ୟାମିନତି କୁଟ୍ଟୁମ୍, ଏବ୍ରି ରାକ୍କା ତାୱାଟି ପ୍ଲିଆନ୍ନି ଏବ୍ରି କୁଏଞ୍ଜ୍‌ତାନୁ, ହାଜୁ ପାଲ୍‌ନି ଆଅନ୍ କୁଲାଟି ରଃଅଞ୍ଜି ପାରୁସିତାନୁ, 6#ପେରି ୮:୩; ୨୨:୪; ୨୬:୯–୧୧ଜିହୁଦି ଦର୍ମ ବାଗା ଉଜଗ କୁଲାତାୱା ନାନୁ ମଣ୍ଡଲିତି ମାଞ୍ଜାଡ଼ିଗାଟାରିକି ବିହାନପୁ ହିଅନ୍‌ତାନୁ, ଆଟେ ହାଜୁତି ଦାର୍ମିକ କୁଲାଟି ଦୁସ କିଆହେଃଲ୍ଲାତାନୁ । 7ମତ୍ର ଇନାଦି ହାବେ ନା ବାଗାଟି ଲାବା ମାଚ୍ଚେ, ଏ ହାବେ ନାନୁ କ୍ରିସ୍ଟତାୱା ନାହେଡ୍ ଆଅନ୍‌ତାଦି ଇଞ୍ଜାନ୍ ଏଲୁ କିତେଃଏ । 8ମତ୍ର ନାନୁ ନା ଦାର୍ମୁ ଜିସୁ କ୍ରିସ୍ଟନିକି ପୁଚ୍ଚାୱିଃଆଟି ଇ ହାବେତ୍ କୁଲା ନା ବାଗାଟି ନାହେଡ୍ ଆଅନ୍‌ତାଦି ଇଞ୍ଜାନ୍ ଏଲୁ କିତେଃଏ, ଏୱାଞ୍ଜ୍ ବାଗାଟି ହାବେତ୍ କୁଲା ନାହେଡ୍ ଆଅନ୍‌ତାଦା ସହି ଆତେଏ, ଆଟେ ଏ ହାବେତ୍ କୁଲାତିଦି ହିକାଡ଼୍‌ବର ଡେହେଙ୍ଗ୍ ଏଲୁ କିତେଃଏ, ଇନିସ୍‌କି ନାନୁ କ୍ରିସ୍ଟନିକି ପାଁନ୍‌ବନ୍ ମୁଃଇ । 9ଆଟେ ହାଜୁ ପାଲ୍‌ନି ଆଇନି ବାଗାଟି ଦାର୍ମିକ ଆଃଏଟେଃଏ କ୍ରିସ୍ଟନିକି ମାଞ୍ଜାଡ଼ି କିଆନ୍ ମୁଲାପେନୁ ହିଆଞ୍ଜାନି ମାଞ୍ଜାଡ଼ିତାୱା ଦାର୍ମିକ ଆଃଇ । 10ନାନୁ କ୍ରିସ୍ଟନିକି ପୁନ୍‌ବନ୍ ବାଗା ଅଟେ ତା ନିମ୍ୱାନ୍‌ନିଙ୍ଗନ୍‌ତି ବଲତାୱା ତା ଡେହେଙ୍ଗ୍ ଆନ୍ ଏୱାଞ୍ଜ୍‌ତି ହାଅନ୍‌ତି ଦୁଃକତାୱା ଆଡ୍ଡିଇ, 11ଅଟେ ଆସା କିମାଃଇ ଜେ, ନାନୁ ଇନିସ୍ ୱାଡ଼େ ନିମ୍ୱାନ୍ ନିଙ୍ଗନ୍ ମୁଃଇ ।

ଲକ୍ୟ କିଆନ୍ନି ଗର୍ରିଇନ୍ଦା ଡେହନ୍

12ନାନୁ ଜେ ହାଦାଡ଼ି ଏ ହାବେ ପାଁଣ୍ଡାନାହି ଜିତି ଆମାଃଇ ଏଦି ଆଃଏ, ମତ୍ର କ୍ରିସ୍ଟ ଜିସୁ ନାଙ୍ଗେ ଆଚି କିଆଞ୍ଜାନ୍ ବାଗା ଏଦା ପାଁନ୍‌ବନ୍ ବାଗାଟି ଡେହେମାଃଇ । 13ଏ ଆମ୍ୱେସ୍ଆଙ୍ଗିସ୍‌କାନାତେରି, ନାନୁ ହାଦାଡ଼ି ଟିକ୍‌ନା ଏ ଗର୍ରିତାୱା ଏଚ୍ଚାମାଃଇ ଇଞ୍ଜାନ୍ ଏଲୁ କିହେଃଲ୍ଲାନୁ, ମତ୍ର ରଣ୍ଡା କୁଲା ନାନୁ କିମାଃଇ, 14ପ୍ଡାଃଇ କୁଲା ହାବେ ବ୍ଡୁଜ୍ଜାନାହି ମୁଲାପେନୁ ଇଟାନ୍ନି ନକେସିତି କୁଲାତିଦି ଲକ୍ୟ ଇଟ୍ଟାନ୍ କ୍ରିସ୍ଟ ଜିସୁ ଟାକ୍କେ ସର୍ଗତି ପୁରସ୍‌କାର ପାଁନ୍‌ବନ୍ ବାଗାଟି ପରନ୍ ହିଆନ୍ ଡେହେମାଃଇ । 15ଏଦାକି ୱାଦୁ ମାରୁ ଏଚ୍ଚେ ଦାଲ୍ଲାତାସୁ ଆତ୍ମିକତାୱା ନେଞ୍ଜାନ୍ନା, ଏୱାତାସୁ ଇହିଙ୍ଗିସି ଏଲୁ କିନା, ଜଦି ଇନ୍ନି କୁଲାତାୱା ମିନ୍ଦି ବିହି ମନ ମାନ୍ନେ, ଇଚ୍ଚେସି ଏଦା ୱାଡ଼େ ମୁଲାପେନୁ ମି ନକେସି ପକ୍‌ନେଞ୍ଜି । 16ଇନାୱାଡ଼େ ଆପାକାଦି ହାଦାଡ଼ି ଏଚେ ଦାଲ୍ଲାତାସୁ ଇମ୍ୱିନ୍ ନିଜ୍ଜାତିଦି ପାଲ୍‌ନି ଆନ୍ ୱାନ୍ନା, ଏଚିଡେହେଙ୍ଗ୍ ତାକିନା । 17#୧କ ୪:୧୬; ୧୧:୧ଏ ଆମ୍ୱେସ୍ଆଙ୍ଗିସ୍‌କାନାତେରି, ମିରୁ ରପାଟ୍ଟେ ଆନ୍ ବେତଟ୍ ୱାଦୁ, ଆଟେ ଏମ୍ବେନାରି ମା ଗ୍ରାପା ଡେହେଙ୍ଗ୍ ତାକେନ୍ନେରି, ମିରୁ ଏୱାରିକି ହୁଡ଼ାନାହି ଏଚିଡେହେଙ୍ଗ୍ ତାକାଟୁ । 18ଇନାକି ଏହେଙ୍ଗିସି ଏଚ୍ଚେ ଦାଲ୍ଲା ମାନ୍ନେରି, ଇନ୍ଦାର୍‌ତି ବେବାର୍ କୁଲାଟି ନାନୁ ଲାଗ୍ଗେ ଲାଗ୍ଗେ ୱେସାଞ୍ଜା, ଆଟେ ହାଦାଡ଼ି ୱାଡ଼େ ଡ଼ି ଡ଼ି ୱେସ୍‌ପିଞ୍ଜା, ଏୱାର୍ କ୍ରିସ୍ଟ କ୍ରୁସତି ସତ୍ରୁ; 19ଏୱାରି ନାହେଡ୍‍ତି ପାହେରିଃଆ ହାଜ୍ଜିନ୍ନେରି, ଟୁଟୁ ଏୱାର୍‌ତି ପେନୁ, ଏୱାରି ତା ତା ଲେଜ୍ଜାତିଦି ନେହି କୁଲା ଇଞ୍ଜାନ୍ ଗର୍ବ ଆଇନ୍ନେରି, ଆଟେ ପୁର୍ତିତି କୁଲାଟି ଏଲୁ କିଆନ୍ ମାଞ୍ଜିନ୍ନେରି; 20ମତ୍ର ମାରୁ ତ ସର୍ଗତି ଦାଲ୍ଲାତାସୁ, ଏ ସର୍ଗଟି ମା ଜ୍ଡିପାଗାଟି ଦାର୍ମୁ ଜିସୁ କ୍ରିସ୍ଟତି ୱାଅନ୍‌ତି ଦିନା ହୁଡ଼ନ୍ ବାଗା କାଚାନ୍ନା । 21ଏୱାଞ୍ଜି ଇମ୍ୱିନ୍ ବଲ ଡ଼ାହି ହାବେତ୍ କୁଲାତିଦି ହକତ୍ କିଅନ୍ ମୁତେଞ୍ଜି, ଏ ବଲ ଡ଼ାହି ମା ନାହେଡ୍ ଆଅନ୍‌ତି ୱିର୍ରା ଗାଣ୍ଡିତିଦି ୱାଡ଼େ ତା ଗଉରବତି ଗାଣ୍ଡି ଡେହେଙ୍ଗ୍ କିନେଞ୍ଜି ।

Currently Selected:

ପିଲିପିୟ 3: DWK

Highlight

Compare

Copy