ପିଲିପିୟ 4
4
ଉପଦେସ ଅଟେ ଉଚ୍ଚାହ
1ଏଦାବାଗା ନା ଜେଡାଗାଟି ଆମ୍ୱେସ୍ଆଙ୍ଗିସ୍କାନାତେରି ମିରୁ ନା ରାହାଙ୍ଗ୍ ଅଟେ ମୁକୁଟ୍, ଆଟେ ମିଙ୍ଗେ ହୁଡ଼ନ୍ ବାଗା ଗାପ୍ଚି ଇଚ୍ଚା କିମାଃଇ, ଏଦାକି ମିରୁ ନାନୁ ଗ୍ରାପ୍ଚାଞ୍ଜାନ୍ ଡେହେଙ୍ଗ୍ ଦାର୍ମୁ ପାଟ୍ଟି ରଞ୍ଜାନ୍ ମାଞ୍ଜୁ । 2ଦାର୍ମୁ ଟାକ୍କେ ର ମନ ଆଅନ୍ ବାଗାଟି ନାନୁ ଇୟଦିଆ ଅଟେ ସୁନ୍ତୁକିନିକି ଇ ରିଣ୍ଡାଡ଼ିକି ଜିଗେମାଃଇ । 3ଆଟେ ଏ ନା ତଡ଼ୁ କାମା କିଅନ୍ତାତି, ଇ ଆଚାସ୍କାନିକି ସାହାଜ୍ୟ କିଅନ୍ ବାଗାଟି ନିଙ୍ଗେ ୱାଡ଼େ ଜିଗେଞ୍ଜା, ଇନାକି ଇୱା କ୍ଲେମେନ୍ତ ଅଟେ ନା ବିହି ତଡ଼ୁ କାମାଗାଟାର୍ ଡ଼ାହି ସୁସମାଚାର କାମାତାୱା ନା ଡ଼ାହି କାମା କିଆନ୍ନୁ; ଏ ରିଣ୍ଡାଡ଼୍ତି ପାର୍କା ପରନ୍ ପୁତିତାୱା ୱ୍ରିଗାଆନ୍ନେ । 4ହାବେ ୱେଲା ଦାର୍ମୁ ଟାକ୍କେ ରାହାଙ୍ଗ୍ ଆଦୁ, ରିହିକ୍ ୱେସ୍ପିଞ୍ଜା, ରାହାଙ୍ଗ୍ ଆଦୁ । 5ମିରୁ ହାବେ ଦାଲ୍ଲା ନକେସି ବଦ୍ର ବେବାର୍ ତସ୍ଦୁ । ଇନାକି ଦାର୍ମୁ କାର୍ବେକ୍ ୱାଇନ୍ନେଞ୍ଜି । 6ଇନ୍ନି କୁଲା ବାଗା ଏଲୁ କିଃଆଟୁ, ମତ୍ର ହାବେତ୍ କୁଲା ବାଗା ପ୍ରାତ୍ନା ଅଟେ ଜିଗାନାହି ଦନ୍ୟବାଦ ଡ଼ାହି ମୁଲାପେନୁନିକି ମି ହାବେତ୍ କାତା ୱେସ୍ଦୁ । 7ଏହେଙ୍ଗ୍ ଆତେସି ମୁଲାପେନୁତି ଲତୁ ଇମ୍ୱିନାଦିକି ମା ପୁନ୍ବନ୍ ତାୱାଟି ୱାଡ଼େ ବେର୍ରାନାଦି, ଏଦି ମି ହଡାଙ୍ଗ୍ ଅଟେ ମନତିଦି କ୍ରିସ୍ଟ ଜିସୁତି ଆଡ୍ଡିରୁଡ୍ଡିତାୱା ରକ୍ୟା କିଆନେ । 8ୱିହାଡେଗ୍ଗା, ଏ ଆମ୍ୱେସ୍ଆଙ୍ଗିସ୍କାନାତେରି, ଇମ୍ୱିନ୍ ହାବେତ୍ କୁଲା ନିଜ୍ଜା, ସନ୍ମାନ୍ଗାଟାଦି, ଟିକ୍ କାତା, ଜାର୍ନା ଗାଟାଦି, ଆଡନି, ଜୁଙ୍ଗନ୍ ପାଁନ୍ବନ୍ତାଦି ଅଟେ ଗାପ୍ଚି ନିଗ୍ଗା, ଇହିଙ୍ଗିସି ହାବେତ୍ କୁଲା ମାନ୍ନୁ ଇଚ୍ଚେସି, ଏ କୁଲାଟି ଏଲୁ କିଦୁ । 9ଆଟେ ମିରୁ ନା ତାୱାଟି ଇନ୍ନି କୁଲା ହାବେ ଗ୍ରାମ୍ବାଞ୍ଜେରି, ପାଁଣ୍ଡାଞ୍ଜେରି, ୱେଞ୍ଜାଞ୍ଜେରି ଅଟେ ହୁଡ଼ାଞ୍ଜେରି, ଏୱା ହାବେ କିଦୁ; ଏମ୍ୱାଟି ଲତୁଗାଟି ମୁଲାପେନୁ ମି ଡ଼ାହି ବାସାଆନେଞ୍ଜି ।
ଦାନ ବାଗାଟି ପାଉଲତି ଦନ୍ୟବାଦ ହିଅନ୍
10ଡେଗ୍ଗା ମିରୁ ନା ବାଗା ଏଲୁ କିଚ୍ଚେରି, ଏଦାବାଗା ନାନୁ ଦାର୍ମୁ ଟାକ୍କେ ଏଗେଲ୍ ରାହାଙ୍ଗ୍ ଆଇମାଃଇ; ନିଜ୍ଜାନେଃଏ ନା ବାଗାଟି ମିରୁ ଏଲୁ କିଚ୍ଚେରି, ମତ୍ର ସୁଜଗ ପାଁଣ୍ଡେହେଃଲ୍ଲାତେରି । 11ଅବାବ ବାଗାଟି ନାନୁ ଜେ ଇଦା ୱେସ୍ପିଞ୍ଜା, ଏଦି ଆଃଏ, ନାନୁ ଇନିସ୍ ୱାଡ଼େ ମାଞ୍ଜାନ୍, ଏମ୍ବା ନାନୁ ସନ୍ତୁସ୍ଟ ମାନ୍ବନ୍ ବାଗା ଗ୍ରାମ୍ୱାମାଃଇ । 12ଇନ୍ନାହେଃଲ୍ଲେଟେଃଏ ମାନ୍ବନ୍ ପୁଞ୍ଜାମାଃଇ ଅଟେ ହାବେ କୁଲା ପାଁଣ୍ଡାନ୍ ଏଦା ବୁଗ କିଅନ୍ ୱାଡ଼େ ପୁଞ୍ଜାମାଃଇ; ହାବେତ୍ ଦୁଃକ କି ରାହାଙ୍ଗ୍ ଅଟେ ହାବେତ୍ କୁଲାତାୱା, କ୍ଡିପନ୍ ଅଟେ ଏଡ୍ରେ ମାନ୍ବନ୍ ଅଟେ ଏଗେଲ୍ ପାଁଣ୍ଡାନ୍ ବୁଗ କିଅନ୍ତାୱା ଅଟେ ଅବାବ ତୁକାତାୱା ରାହାଙ୍ଗିଃଆଟି ମାନ୍ବନ୍ ବାଗା ନେହେନ୍ ଗ୍ରାମ୍ୱାମାଃଇ । 13ନାଙ୍ଗେ ବଲ ହିଞ୍ଜାନ୍ନି କ୍ରିସ୍ଟତି ସାହାଜ୍ୟଟି ନାନୁ ହାବେତ୍ କୁଲା କିଅନ୍ ମୁଃଇ । 14ଆତେସ୍ୱାଡ଼େ ମିରୁ ନା ଦୁଃକତାୱା ଆଡ୍ଡିରୁଡ୍ଡି ଆନ୍ ଦୁଃକ ପାଁଣ୍ଡାନ୍ ନେହି କିଆଞ୍ଜେରି । 15ଏ ପିଲିପିୟତି ମାଞ୍ଜାଡ଼ିଗାଟାତାତେରି, ମିରୁ ୱାଡ଼େ ପୁଞ୍ଜାଞ୍ଜେରି ଜେ, ସୁସମାଚାର ପପ୍କନ୍ ମ୍ରାସ୍ତି ତୁକାତାୱା, ନାନୁ ଏଚ୍ଚିକିଃଆ ମାକିଦନିଆଟି ହାଚ୍ଚେଏ, ଏଚିତୁକାତାୱା ମିଙ୍ଗେ ପିହାନ୍, ଆଟେ ଇମ୍ୱିନ୍ ମଣ୍ଡଲି ନାଙ୍ଗେ ସାହାଜ୍ୟ କିଆହେଲ୍ଲାଦାଃଏ । 16#ପେରି ୧୭:୧#୨କ ୧୧:୯ଇନାକି ନାନୁ ତେସଲନିକି ଗାଡ଼ାନାଜୁତାୱା ମାଚ୍ଚି ତୁକାତାୱା ୱାଡ଼େ ମିରୁ ନା ଅବାବ ହୁଡ଼ାନ୍ ରଲି ଆଃଏ, ରି ରି ଅଲି, ଦାନ ପାଣ୍ଡାଞ୍ଜାତେରି । 17ଦାନ ବାଗାଟି ନାନୁ ଆସା କିଏହେଃଲ୍ଲାନୁ, ମତ୍ର ମିରୁ ଇନିସ୍କି ଦାର୍ମୁଟିଆଟି ଏମ୍ବାତି ଲାବ ଗାପ୍ଚି ପାଁଣ୍ଡୁ ଇଞ୍ଜାନ୍ ନା ଇଚ୍ଚା । 18ନାନୁ ହାବେ ପାଁଣ୍ଡାମାଃଇ, ଆଟେ ନାଙ୍ଗେ ଏଗେଲ୍ ମାନ୍ନୁ; ମିରୁ ଇମ୍ୱିନ୍ ହାବେ ଏପାପ୍ରଦିତ କାଜ୍ଜୁତାୱା ପାଣ୍ଡାଞ୍ଜାତେରି ଏୱା ପାଁଣ୍ଡାମାଃଇ, ଏୱା ହାବେ ନା ବାଗାଟି ପାଡ଼ି, ଏୱା ହାବେ ମୁଲାପେନୁନିକି ରାହାଙ୍ଗ୍ କିଅନ୍ତି ନେହିଗାନ୍ଦାତି ନଇବେଦ୍ୟ ଅଟେ ନେହି ବଲି ଡେହେଙ୍ଗ୍ । 19ଆଟେ ନା ମୁଲାପେନୁ କ୍ରିସ୍ଟ ଜିସୁ ଟାକ୍କେ ତା ଗଉରବତି ଏଚ୍ଚେକ୍ ୱିହାନ୍ ଦନତାୱା ମି ହାବେତାରିତି ଅବାବ ଦେହା କିପାକାଞ୍ଜି । 20ମା ଆବା ମୁଲାପେନୁ କାଲେଙ୍ଗ୍କାଲା ଟିକ୍ନା ଗଉରବ ପାଁନାକାଞ୍ଜି । ଆମେନ୍ ।
ୱିହାଡେଗ୍ଗାତି ଜୁହାରି
21କ୍ରିସ୍ଟ ଜିସୁ ପାରୁଟି ହାବେତ୍ ପିର୍ନି ଦାଲ୍ଲାନିକି ଜୁହାରି କିଦୁ । ନା ତଡ଼ୁ ଆମ୍ୱେସାଙ୍ଗା ମିଙ୍ଗେ ଜୁହାରି କିଞ୍ଜାନେରି । 22ପିର୍ନି ଦାଲ୍ଲା ହାବେତାରି, ଏମ୍ବେନାରିକି କାଇସର ରାଜେଞ୍ଜିତି ଇଡ୍ଡୁତାୱା ମାନ୍ନେରି, ଏୱାରି ମିଙ୍ଗେ ଜୁହାରି କିଞ୍ଜାନେରି । 23ଦାର୍ମୁ ଜିସୁ କ୍ରିସ୍ଟତି ଅନୁଗ୍ରହ ମି ଡିଙ୍ଗାତି ତଡ଼ୁହେଙ୍ଗେଡ଼୍ ଆପାକାଦି ।
Currently Selected:
ପିଲିପିୟ 4: DWK
Highlight
Share
Compare
Copy
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
