ପିଲିପିୟ 2

କ୍ରିସ୍ଟତି ଲୁଙ୍ଗୁର୍

1ଏଦାକି ଜଦି କ୍ରିସ୍ଟତି ଆଡ୍ଡିରୁଡ୍ଡିତାୱା ଇନ୍ନି ଉଚ୍ଚାହ, ଜେଡାଟି ମାତି, ଡିଙ୍ଗାଟି ଆଡ୍ଡିରୁଡ୍ଡି ଆଅନ୍‌ତାଦି, ଆଟେ ଇମ୍ୱିନ୍ ଜେଡାଟି ପାପୁଅଲ୍‌ପନ୍ ଅଟେ ଗାପ୍‌ଚି ପାପୁଅଲ୍‌ପନ୍ ମାନ୍ନେ, 2ଏହେଙ୍ଗ୍ ଆତେସି ମିରୁ ର ମନଟି ଅଟେ ର ଏଲୁଟି, ର ଡିଙ୍ଗାଟି ଅଟେ ର ଜେଡାଟି ନା ରାହାଙ୍ଗ୍‌ତାୱା ନେଞ୍ଜାଟୁ, 3ସାର୍ତଟି କି ଡ଼ଃଆନ୍ ଗର୍ବଟି ଇନ୍ନା କିଃଆଟୁ, ମତ୍ର ଲୁଙ୍ଗୁର୍ ଆନ୍ ମିରୁ ହାବେତାତେରି ବିହିତାରିନିକି ମି ତାୱାଟି ଗାମିନାଞ୍ଜି ଇଞ୍ଜାନ୍ ଏଲୁ କିଦୁ; 4ମିରୁ ହାବେତାତେରି ୱାର୍ରି ମି କୁଲାଟି ଏଲୁ କିଃଏଟେଃଏ ବିହି ଦାଲ୍ଲା ବାଗାଟି ୱାଡ଼େ ଏଲୁ କିଦୁ । 5କ୍ରିସ୍ଟ ଜିସୁତି ମନ ଇନିସ୍ ମାଚ୍ଚେ, ମି ମନ ୱାଡ଼େ ଏହେଙ୍ଗିସି ଆପାକାଦି; 6ଏୱାଞ୍ଜି ମୁଲାପେନୁ ଆଚ୍ଚେସ୍ ୱାଡ଼େ, ଏହେଙ୍ଗିସି ତାନୁ ମାନ୍‌ବନ୍ ବାଗା ଏଲୁ କିଃଆତେଞ୍ଜି, 7ମତ୍ର ତାନୁ ତା ହାବେତ୍ କୁଲା ପିହାନ୍ କୁଇ ଗାଣ୍ଡି ଆହାନ୍ କାମ୍ବାରେଏଞ୍ଜି ଡେହେଙ୍ଗ୍ ଆତେଞ୍ଜି । 8ଆଟେ ତାନୁ କୁଇ ଗାଣ୍ଡି ଆହାନାହି କ୍ରୁସତାୱା ହାତି ଟିକ୍‌ନା ତା ଗାଣ୍ଡି ଲୁଙ୍ଗୁରିଆଟି ମୁଲାପେନୁତି କାତା ମାନି ଆତେଞ୍ଜି । 9ଏଦାବାଗା ମୁଲାପେନୁ ତାଙ୍ଗେ ଏଗେଲ୍ ଗାମି କିଆନ୍ନେଞ୍ଜି, ଆଟେ ହାବେତ୍ ପାର୍‌କା ତାୱାଟି ଗାମିନ୍ ପାରୁ ତାଙ୍ଗେ ହିଆନ୍ନେଞ୍ଜି, 10ଇନିସ୍‌କି ସର୍ଗ, ପୁର୍ତି, ନିୱେଡ଼୍ କୁଟ୍ଟିତା ମାନ୍ନି ହାବେତ୍ ଦାଲ୍ଲା ଜିସୁ ପାରୁଟି ମେଣ୍ଡାଙ୍ଗୁତିନେରି । 11ଆଟେ ଆବା ମୁଲାପେନୁନିକି ଗଉରବ ହିନେରି ଅଟେ ହାବେତାରି ତା ଗୁତିଟି ଜିସୁ କ୍ରିସ୍ଟନିକି ଦାର୍ମୁ ଇଞ୍ଜାନ୍ ୱେସ୍‌ନେରି ।

ପୁର୍ତିତାୱା ଅଲା ଡେହେଙ୍ଗ୍ ଆଅନ୍

12ଏଦାକି, ଏ ନା ଜେଡାଗାଟାତାତେରି, ହାବେ ୱେଲା ମିରୁ ଇନିସ୍ ଦାର୍ମୁ କାତା ମାନ୍ନି ଆଞ୍ଜେରି, ୱାର୍ରି ନା ନକେସି କିତି ଡେହେଙ୍ଗ୍ ଆଃଏ, ମତ୍ର ହାଦାଡ଼ି ନା ହେଃଲ୍ଲାନ୍ ହୁନାତ୍ ୱାଡ଼େ ମିରୁ ଗାପ୍‌ଚି ଆଜ୍ଜାନ୍ ଅଟେ ତ୍ରେଗାନାହି ମି ବାଗାଟି ଜ୍ଡିପା କାମା କିଦୁ, 13ଇନାକି ମି ତାୱା ମୁଲାପେନୁ ତା ନେହି ଜୁଜନା ଅଟେ ତା ଇଚ୍ଚାତିଦି ସପଲ କିଅନ୍ ବାଗାଟି ମି ହଡାଙ୍ଗିଃଆ କାମା କିନ୍ନେଞ୍ଜି । 14ଇନ୍ନା ୱେସେଟେଃଏ ଅଟେ ହିଲାବାଦେର୍ ଆଃଏଟେଃଏ ହାବେତ୍ କାମା କିଦୁ, 15ଏହେଙ୍ଗ୍ ଆତେସି ମିରୁ ଇ ପାପ ପୁର୍ତିତାୱା ଦାର୍ମୁତାୱାଟି ଦେହା ଆଇନି କୁଟୁଗାଟି ପୁଣ୍ଡିତାୱା ମୁଲାପେନୁତି ପିର୍ରି ବଦାମିଡା ଲାକ୍କାଟି ଇନ୍ନି ଦୁସିହେଃଲ୍ଲାନ୍ କି ଅଡ୍ଡନ୍ ପାଃନେଟେଃଏ, ଇ ପୁର୍ତିତାୱା ମିରୁ ତା ବାକ୍ୟ ଆହାନ୍ ଅଲା ଡେହେଙ୍ଗ୍ ଆଇଞ୍ଜେରି । 16ନାନୁ ବାଃଏ ଡେହାହେଃଲ୍ଲାନ୍ କି ବାଃଏ କାମା କିଆହେଃଲ୍ଲାନୁ, ଏ ହାବେତ୍ କୁଲାତାୱା କ୍ରିସ୍ଟତି ଦିନା ୱାତେସି ନାନୁ ପରନ୍‌ତାୱା ଗର୍ବଟି ୱେସ୍‌ପନ୍ ମୁଃଇ । 17ହାଁ, ଆଟେ ଜଦି ନା ରାକ୍କା ମି ମାଞ୍ଜାଡ଼ି କୁଲାଟ୍‌ତି ଆଙ୍ଗୁଲ୍‌ତାୱା ଉନ୍‌ବା ନଇବେଦ୍ୟ ଡେହେଙ୍ଗ୍ ବପ୍‌କା ଆଇନେ, ଏହେଙ୍ଗ୍ ଆତେସି ନାନୁ ରାହାଙ୍ଗ୍ ଆଇମାଃଇ ଅଟେ ମି ଡ଼ାହି ୱାଡ଼େ ରାହାଙ୍ଗ୍ ଆଇମାଃଇ, 18ଆଟେ ଏଚିଲାକ୍କା ମିରୁ ୱାଡ଼େ ରାହାଙ୍ଗ୍ ଆଦୁ ଅଟେ ନା ଡ଼ାହି ୱାଡ଼େ ଗାପ୍‌ଚି ରାହାଙ୍ଗ୍ ଆଦାଟୁ ।

ତିମତି ଅଟେ ଏପାପ୍ରଦିତ

19ମତ୍ର ନାନୁ ମି ରେଃଏସ୍ ତିମତିନିକି କାର୍‌ବେକ୍ ପାଣ୍ଡିଦାଃଇ ଇଞ୍ଜାନ୍ ଦାର୍ମୁ ଜିସୁ ଟାକ୍କେ ଆସା କିମାଃଇ, ଇନିସ୍‌କି ନାନୁ ମି ମାନ୍‌ବନ୍‌ତି କୁଲାଟି ପୁଞ୍ଜାନ୍ ରାହାଙ୍ଗ୍ ଆଃଇ । 20ଇନାକି ଏମ୍ୱେନାଞ୍ଜି ମି କୁଲାଟି ନିଜ୍ଜାନେଃଏ ଏଲୁ କିନେଞ୍ଜି, ଏହେଙ୍ଗିସି ର ଏଲୁ କିନ୍ନାଞ୍ଜିକି ପିହାନ୍ ଆଟେ ଏମ୍ୱେ ହେଃଲ୍ଲେ । 21ଇନାକି ହାବେତାରି ଜିସୁ କ୍ରିସ୍ଟତି କୁଲାଟି ସେସ୍ଟା କିଃଏଟେଃଏ ତା ସାର୍ତ ବାଗା ସେସ୍ଟା କିନ୍ନେରି । 22ମତ୍ର ମିରୁ ଇଦା ପୁଞ୍ଜୁ ତିମତି ହାବେତ୍ ୱାହୁତି ପରିକ୍ୟାତାୱା ଜିତି ଆନ୍ନି ଗାଟାଞ୍ଜି, ଇନିସ୍‌କି ରଃଅଞ୍ଜି ମ୍ରିଃଏଞ୍ଜି ଆବାନିକି ଆଙ୍ଗୁଲ୍ ଆଇନ୍ନେଞ୍ଜି, ଏଚିଡେହେଙ୍ଗ୍ ଏୱାଞ୍ଜି ସୁସମାଚାରତି କାମାତାୱା ନା ଡ଼ାହି ଆଙ୍ଗୁଲ୍ କାମା କିଆଚ୍ଚେଞ୍ଜି । 23ନାନୁ କାର୍‌ବେକ୍ ଏୱାଞ୍ଜିକି ପାଣ୍ଡନ୍ ବାଗାଟି ଆସା କିମାଃଇ, ନା ପାଟ୍ଟି ଇନ୍ନି ଡୁଣ୍ଡେଲ୍ ଆଅନ୍ ହାଜ୍ଜିନ୍ନେ, ଏଦା ପୁନ୍ନାୱିଃଆଟି, ନାନୁ ତାଙ୍ଗେ ପାଣ୍ଡାଦାଃଇ । 24ମତ୍ର ନାନୁ ଦାର୍ମୁ ରେଃଏସ୍ ମାଞ୍ଜାଡ଼ି କିମାଃଇ ଜେ, ନାନୁ ୱାଡ଼େ କାର୍‌ବେକ୍ ୱାଃଇ । 25ମତ୍ର ତା କାହେ ନାନୁ ଆସା କିମାଃଇ, ନା ଆମ୍ୱେସ୍, ତଡ଼ୁକାମାଗାଟାଞ୍ଜି, ତଡ଼ୁସିପେଞ୍ଜି#୨:୨୫ ତଡ଼ୁସିପେଞ୍ଜି ଇଚ୍ଚେସି ନା ଡ଼ାହି ସୁସମାଚାର କାମାତାୱା ହାବେତ୍ ଦୁଃକ କସ୍ଟତାୱା ରଃଅଞ୍ଜି ସିପେଞ୍ଜି ଡେହେଙ୍ଗ୍ ସହି ଆଦାତେଞ୍ଜି । ଅଟେ ନା ଅବାବତାୱା ସାହାଜ୍ୟ କିଆଞ୍ଜାନି ମି ପେରିତ ଅଟେ ଏ ଆଙ୍ଗୁଲ୍‌ଗାଟି ଏପାପ୍ରଦିତନିକି ମି ଟାକ୍କେ ପାଣ୍ଡନ୍ ବାଗା ଏଲୁ କିମାଃଇ; 26ଇନାକି ଏୱାଞ୍ଜି ହାବେତ୍ ମିଙ୍ଗେ ହୁଡ଼ନ୍ ବାଗା ଗାପ୍‌ଚି ଇଚ୍ଚା କିଞ୍ଜାନେଞ୍ଜି, ଆଟେ ଏୱାଞ୍ଜି ରେଡ଼ମ୍ ଆନ୍ନେଞ୍ଜି ଇଞ୍ଜାନ୍ ମିରୁ ପୁଞ୍ଜାନ୍ନି ବାଗା ଏୱାଞ୍ଜି ଗାପ୍‌ଚି ଦୁଃକ କିନ୍ନେଞ୍ଜି; 27ହାଁ, ଏୱାଞ୍ଜି ହାଅନ୍ ଡେହେଙ୍ଗ୍ ରେଡ଼ମ୍ ଆଚ୍ଚେଞ୍ଜି, ମତ୍ର ମୁଲାପେନୁ ତାଙ୍ଗେ ପାପୁଅଲ୍‌ତେଞ୍ଜି, ଆଟେ ୱାର୍ରି ତାଙ୍ଗେ ଆଃଏ, ମତ୍ର ଇନିସ୍‌କି ନା ପାଟ୍ଟି ଦୁଃକ କୁଃଏଟି ଦୁଃକ ଗଟି ଆଃଏ, ଏଦାବାଗା ନାଙ୍ଗେ ୱାଡ଼େ ପାପୁଅଲ୍‌ତାତେଞ୍ଜି । 28ଏଦାକି ମିରୁ ଇନିସ୍‌କି ତାଙ୍ଗେ ରିହିକ୍ ହୁଡ଼ାନ୍ ରାହାଙ୍ଗ୍ ଆଦେରି ଅଟେ ନା ଦୁଃକ ଇନିସ୍‌କି କକ୍‌ଚି ଆନେ, ଏଦାବାଗା ନାନୁ ତାଙ୍ଗେ ପାଣ୍ଡନ୍ ବାଗାଟି ଗାପ୍‌ଚି ଇଚ୍ଚା କିତେ । 29ଏଦାକି, ଦାର୍ମୁ ପାରୁଟି ତାଙ୍ଗେ ଗାପ୍‌ଚି ରାହାଙ୍ଗିଃଆଟି ଗ୍ରହନ କିଦୁ, ଆଟେ ଇହିଙ୍ଗ୍‌ତି ଦାଲ୍ଲାନିକି ସନ୍‌ମାନ୍ ହିଦୁ; 30ଇନାକି ମିରୁ ନାଙ୍ଗେ ଇନ୍ନା ହାବେ ସାହାଜ୍ୟ କିଅନ୍ ମୁଚାହେଃଲ୍ଲାଦାଃଆତେରି, ଏଦା ହାବେ ଏୱାଞ୍ଜି ନାଙ୍ଗେ ଆଙ୍ଗୁଲ୍ ଆନ୍ କ୍ରିସ୍ଟତି କାମାତାୱା ତା ପରନ୍ ବିପଦତାୱା ତ୍ରକ୍‌ଚ୍ଚାନ୍ କସ୍ଟ ପାଁଣ୍ଡାନ୍ ହାତି ଡେହେଙ୍ଗ୍ ଆଚ୍ଚେଞ୍ଜି ।

Currently Selected:

ପିଲିପିୟ 2: DWK

Highlight

Compare

Copy