ପିଲିପିୟ 1
1
ପାଉଲତି ଜୁହାରି
1 #
ପେରି ୧୬:୧୨
ପାଉଲ ଅଟେ ତିମତି, ଇ ରିଃଆରି କ୍ରିସ୍ଟ ଜିସୁତି କାମ୍ବାରାଙ୍ଗା, କ୍ରିସ୍ଟ ଜିସୁନିକି ମାଞ୍ଜାଡ଼ି କିନ୍ନି ପିଲିପିୟ ରାଜିତାୱା ମାନ୍ନି ହାବେତ୍ ପିର୍ନି ଦାଲ୍ଲା, ଗାମିନାରି ଅଟେ ଆଙ୍ଗୁଲ୍ଗାଟାର୍ ରେଃଏସ୍ ୱ୍ରିଗେନ୍ନେଞ୍ଜି; 2ମା ଆବା ମୁଲାପେନୁ ଅଟେ ଦାର୍ମୁ ଜିସୁ କ୍ରିସ୍ଟ ତାୱାଟି ଅନୁଗ୍ରହ ଅଟେ ଲତୁ ମି ପାଟ୍ଟି ଆପାକାଦି ।
ପିଲିପିୟତି ଦାଲ୍ଲା ବାଗାଟି ପାଉଲତି ପ୍ରାତ୍ନା
3ନାନୁ ମିଙ୍ଗେ ଏଚ୍ଚେ ଅଲି ଏଲୁ କିଞ୍ଜା, ଏଚି ଅଲି ନା ମୁଲାପେନୁନିକି ଦନ୍ୟବାଦ ହିମାଃଇ । 4ଏଦାକି ନାନୁ ମି ବାଗାଟି ହାବେ ୱେଲା ହାବେତ୍ ପ୍ରାତ୍ନାତାୱା ରାହାଙ୍ଗ୍ ଡ଼ାହି ଦାର୍ମୁନିକି ଜିଗାନାହି ପ୍ରାତ୍ନା କିମାଃଇ । 5ମିରୁ ମାଞ୍ଜାଡ଼ି କିତି ଦିନାତାୱାଟି ନିଞ୍ଜୁ ଟିକ୍ନା ସୁସମାଚାରତାୱା ଆଡ୍ଡିରୁଡ୍ଡି ଆଞ୍ଜାଦେରି । 6ଇନାକି ଏମ୍ୱେନାଞ୍ଜି ମି ହଡାଙ୍ଗ୍ତାୱା ନିଗ୍ଗା କାମା ମ୍ରାସାନ୍ନେଞ୍ଜି, ଏୱାଞ୍ଜି କ୍ରିସ୍ଟ ଜିସୁତି ଦିନା ୱାନି ଟିକ୍ନା ଏଦା କି କି ୱିହି କିନେଞ୍ଜି, ଇଞ୍ଜାନ୍ ନାନୁ ଆଣ୍ଟ ମାଞ୍ଜାଡ଼ି କିମାଃଇ; 7ନାନୁ ମିଙ୍ଗେ ନା ହଡାଙ୍ଗିଃଆ କିଟ୍ଟାଞ୍ଜା, ଏଦାକି ମି କୁଲାଟି ନାନୁ ଇହିଙ୍ଗିସି ଏଲୁ କିଅନ୍ତାଦି ନେହାଦି, ଇନାକି ନାନୁ ବନ୍ଦି ମାଚ୍ଚି ତୁକାତାୱା ଅଟେ ସୁସମାଚାର ଇନ୍ଦେଟ୍ ଆଞ୍ଜେରି ଅଟେ ନିଜ୍ଜାତିଦି ତସାନ୍ନି ବାଗା ମିରୁ ହାବେ ନା ଡ଼ାହି ମୁଲାପେନୁତି ଅନୁଗ୍ରହତି ବାଗା ପାଁଣ୍ଡାଞ୍ଜେରି । 8ଇନାକି କ୍ରିସ୍ଟ ଜିସୁତି ଜେଡା ଅଟେ ପାପୁଅଲ୍ପନ୍ତାୱା ନାନୁ ହାବେତ୍ ମିଙ୍ଗେ ଗାପ୍ଚି ଜେଡା କିଅନ୍ ବାଗା ତୁଇରୁଡ୍ଡି ଆଇମାଃଇ, ଇ କୁଲାଟି ମୁଲାପେନୁ ନା ସାକି । 9ଆଟେ ମି ଜେଡା, ଗ୍ୟାଁନ ଅଟେ ହାବେତ୍ ନେହି ବିଚାରତାୱା ଏଗେଲ୍ ଗାମାଟୁ ଇଞ୍ଜାନ୍ ନାନୁ ପ୍ରାତ୍ନା କିମାଃଇ । 10ଇନିସ୍କି ମିରୁ ହାବେତାୱାଟି ନିଗ୍ଗା କୁଲା ଆଚି କିଅନ୍ ମୁଦେରି, ଆଟେ ଜିସୁ କ୍ରିସ୍ଟ ତାୱାଟି ମି ଦାର୍ମିକତା ଅଟେ ଦୁସହେଃଲ୍ଲାନାଦା ହୁଡ଼ାନ୍, ଦାଲ୍ଲା ମୁଲାପେନୁନିକି ଗଉରବ ଅଟେ ଜୁଙ୍ଗିନେରି । 11ଏମ୍ୱାଟି କ୍ରିସ୍ଟ ଜିସୁ ୱାନି ଦିନାତାୱା ମିରୁ ପିର୍ରି ଅଟେ ଦୁସହେଃଲ୍ଲାନାତେରି ଆଦେରି; ଏହେଙ୍ଗ୍ ଆତେସି ମୁଲାପେନୁ ମହିମା ଅଟେ ଜୁଙ୍ଗନ୍ ପାଁନେଞ୍ଜି ।
ସୁସମାଚାରତି କାମା ଗାମନି
12ଏ ଆମ୍ୱେସ୍ଆଙ୍ଗିସ୍କାନାତେରି, ନାଙ୍ଗେ ଇନ୍ନି ଇନ୍ନି ଡୁଣ୍ଡେଲ୍ ଆନ୍ନେ, ଏ ହାବେ ସୁସମାଚାର ଗାମନ୍ ବାଗା ସାହାଜ୍ୟ କିଆଞ୍ଜାନେ, ଇଦା ମିରୁ ପୁଞ୍ଜୁ ଇଞ୍ଜାନ୍ ନାନୁ ଇଚ୍ଚା କିମାଃଇ; 13#ପେରି ୨୮:୩୦ଏଦାକି ନାନୁ କ୍ରିସ୍ଟ ବାଗା ବନ୍ଦି ମାଚ୍ଚି କୁଲାଟି ପ୍ରାସାଦତି ହାବେତ୍ ସିପେଙ୍ଗ୍ ଅଟେ ବିହିବିହି ହାବେ ଦାଲ୍ଲାତି ରେଃଏସ୍ ପଙ୍ଗିତେଃଏ; 14ଆଟେ ୱାଡ଼େ ଗାପ୍ଚି ମାଞ୍ଜାଡ଼ିଗାଟି ଆମ୍ୱେସାଙ୍ଗା ନା ବନ୍ଦିତାୱାଟି ଦାର୍ମୁ ରେଃଏସ୍ ନାର୍ରା ଇଟ୍ଟାନ୍ ଆଜ୍ଜେଟେଃଏ ମୁଲାପେନୁତି ବାକ୍ୟ ୱେସ୍ପନ୍ ବାଗା ବରେସ୍ ଆନ୍ନେରି ।
15ଏମ୍ୱେ ଏମ୍ୱେ ବିରୁଦି ଅଟେ ଅକାର ଟିଆଟି କ୍ରିସ୍ଟନିକି ପ୍ରଚାର କିନ୍ନେରି ଇଦି ନିଜ୍ଜା, ମତ୍ର ଏଚ୍ଚେ ଦାଲ୍ଲା ନିଜ୍ଜାଟି ଏଦା କିନ୍ନେରି; 16ଏୱାରି ନାଙ୍ଗେ ଜେଡା କିଆନ୍ ସୁସମାଚାର ପ୍ରଚାର କିନ୍ନେରି । ଇନାକି ଏୱାର୍ ପୁଞ୍ଜିନ୍ନେର୍ ଜେ, ମୁଲାପେନୁ ନାଙ୍ଗେ ସୁସମାଚାରତି ଦାଇତ୍ୱ ହିଆଞ୍ଜାନେଞ୍ଜି ଆଟେ ଏଦାବାଗା ନାନୁ ବନ୍ଦିତାୱା ମାଃଇ । 17ମତ୍ର ବିହି ଦାଲ୍ଲା ସୁସମାଚାରତିଦି ବିସ୍ୱସ୍ତ ପ୍ରଚାର କିଃଏଟେଃଏ ତା ସାର୍ତ ବାଗାଟି କ୍ରିସ୍ଟନିକି ପପ୍କିନ୍ନେରି । ଏୱାରି ନାଙ୍ଗେ ବନ୍ଦିତାୱା କସ୍ଟ ହିଅନ୍ ବାଗା ଏଲୁ କିଆନ୍ ଏହେଙ୍ଗିସି କିନ୍ନେରି ।
18ଏଦି ନା ବାଗାଟି ଇନାଦି ଆଃଏ, ଏୱାରି ନିଜ୍ଜା ଏଲୁଟି ଆପାକାଦି କି କ୍ରଟ୍ପାଙ୍ଗ୍ ଏଲୁଟି ଆପାକାଦି, ଇନିୱାହୁ ଆତେସ୍ୱାଡ଼େ କ୍ରିସ୍ଟ ପଙ୍ଗେନ୍ନେଞ୍ଜି, ଏଦାକି ନାନୁ ରାହାଙ୍ଗ୍ ଆଇମାଃଇ, ହାଁ, ରାହାଙ୍ଗ୍ ଆଃଇ । 19ଇନାକି ନା ପାଟ୍ଟି ଇମ୍ୱିନ୍ ଡୁଣ୍ଡେଲ୍ ଆନ୍ନେ, ଏଦି ମି ପ୍ରାତ୍ନା ଅଟେ ଜିସୁ କ୍ରିସ୍ଟତି ଡିଙ୍ଗାତି ସାହାଜ୍ୟ ଡ଼ାହି ଇ ହାବେ ନା ଜ୍ଡିଅନ୍ତି ମେଲା ଆନେ ଇଞ୍ଜାନ୍ ନାନୁ ପୁଞ୍ଜାମାଃଇ । 20ଇନାକି ନାନୁ ଇନ୍ନି କୁଲାଟି ୱାଡ଼େ ଲେଜ୍ଜା ଆଃଏନୁ, ମତ୍ର ହାବେ ୱେଲା ଇନିସ୍, ହାଦାଡ଼ି ୱାଡ଼େ ଏହେଙ୍ଗିସି ଗାପ୍ଚି ବରେସିଆଟି ପରନ୍ତାୱା କି ହାଅନ୍ତାୱା କ୍ରିସ୍ଟନିକି ନା ଗାଣ୍ଡିଟି ପକିଃଇ; ଏଦି ଆଇନେ ନା ରଣ୍ଡେ ଆସା ଅଟେ ନାର୍ରା । 21ଇନାକି ନାନୁ ନିମ୍ୱାମାଃଇ ତ କ୍ରିସ୍ଟ ବାଗାଟି ନିମ୍ୱାମାଃଇ ଆଟେ ହାତେସ୍ ନା ବାଗାଟି ଗାପ୍ଚି ଲାବା । 22ଜଦି ନାନୁ ପରନ୍ତାୱା ନିମ୍ବାନ୍ ମାଃଇ ଇଚ୍ଚେସି, ନାନୁ ଦାର୍ମୁ ବାଗା ଗାପ୍ଚି ନେହି କାମା କିଅନ୍ ମୁଃଇ । ଏଦାକି ନାନୁ ଇନ୍ନା ଆଚି କିଃଇ, ଏଦା ନାନୁ ପୁଞ୍ଜାହେଃଲ୍ଲାନୁ । 23ନାନୁ ଇ ରି କୁଲାଟି ଇନ୍ନା ଆଚି କିଅନ୍ ଆନେ ଏଦା ପୁନ୍ବନ୍ ମୁପେହେଃଲ୍ଲେନୁ; ଇ ପୁର୍ତି ପିହାନାହି କ୍ରିସ୍ଟ ଡ଼ାହି ମାନ୍ବନ୍ତାଦି ନା ଇଚ୍ଚା, ଇନାକି ଏଦି ହାବେତାୱାଟି ଗାପ୍ଚି ନେହାଦି । 24ମତ୍ର ନାନୁ ଗାଣ୍ଡିଟି ନିମ୍ୱାନ୍ ମାନ୍ବନ୍ତାଦି ମି ବାଗାଟି ଗାପ୍ଚି ଆବସକ । 25ଆଟେ ନାନୁ ଇଦା ନେହେନ୍ ପୁଞ୍ଜାମାଃଇ ଜେ, ନାନୁ ମି ଡ଼ାହି ବାସାଆଃଇ, ହାଁଆ, ମାଞ୍ଜାଡ଼ିତାୱା ମିଙ୍ଗେ ଗାମି କିଅନ୍ ବାଗା ଅଟେ ରାହାଙ୍ଗ୍ ହିଅନ୍ ବାଗା ହାବେତ୍ ମି ଡ଼ାହି ବାସାଆଃଇ, 26ଏହେଙ୍ଗ୍ ଆତେସି ନାନୁ ମି ଟାକ୍କେ ରିହିକ୍ ୱାନି ତୁକାତାୱା, ନା ପରନ୍ତାୱା କ୍ରିସ୍ଟ ଜିସୁ ଇନ୍ନା କିନ୍ନେଞ୍ଜି ଏଦାବାଗା ମିରୁ ତା ପାଟ୍ଟି ଗାପ୍ଚି ରାହାଙ୍ଗ୍ ଆଦେରି ।
27ନାନ୍ଦି ରଣ୍ଡେ ଇଚ୍ଚା ଜେ, ମିରୁ କ୍ରିସ୍ଟତି ସୁସମାଚାରତାୱା ଜୁଗ୍ୟ ବେବାର୍ ଆଦୁ, ଇନିସ୍କି ନାନୁ ମାଞ୍ଜାନ୍ ମିଙ୍ଗେ ହୁଡ଼ାଦାତେସି କି ନାନୁ ହେଃଲ୍ଲେଟେଃଏ ମି କୁଲାଟି ୱେଚ୍ଚେସି ପୁନ୍ବନ୍ ମୁଃଇ ଜେ, ମିରୁ ରଣ୍ଡା ଡିଙ୍ଗାତାୱାନେଃଏ ରଞ୍ଜାନ୍ ସୁସମାଚାରତିଦି ମାଞ୍ଜାଡ଼ି କିନ୍ନି ବାଗାଟି ର ମନଟି କାମା କିଞ୍ଜେରି, 28ଆଟେ ମି ସତ୍ରୁଙ୍ଗ୍ନିକି ଆଃଜ୍ଜାଟୁ, ଆଟେ ବରେସିଆଟି ରଞ୍ଜାନ୍ ବାସାଆଦୁ । ଏହେଙ୍ଗ୍ ଆତେସି ଏୱାରି ସାମେନେଃଏ ନାହେଡ୍ ଆନେରି ଅଟେ ମିରୁ ଜିତି ଆଦେରି । ଇନାକି ମୁଲାପେନୁ ମିଙ୍ଗେ ଜିତେ କିଆନେଞ୍ଜି । 29ଇନାକି ୱାର୍ରି କ୍ରିସ୍ଟନିକି ମାଞ୍ଜାଡ଼ି କିଅନ୍ ବାଗାଟି ମିଙ୍ଗେ ଅନୁଗ୍ରହ ହିୱାଆହେଃଲ୍ଲେ, ମତ୍ର ଏୱାଞ୍ଜି ବାଗାଟି ଦୁଃକ ସହି ଆଅନ୍ ବାଗା ୱାଡ଼େ ମିଙ୍ଗେ ଅନୁଗ୍ରହ ହିୱା ଆନ୍ନେ; 30#ପେରି ୧୬:୧୯–୪୦ଆଟେ ମିରୁ ନାଙ୍ଗେ ଇନିସ୍ ଜୁଜ୍ଜି ଆଅନ୍ତାଦା ହୁଡ଼ାଞ୍ଜାତେରି, ଆଟେ ହାଦାଡ଼ି ୱାଡ଼େ କିନ୍ନେଞ୍ଜି ଇଞ୍ଜାନ୍ ୱେଞ୍ଜିଞ୍ଜେରି, ମିରୁ ୱାଡ଼େ ଏହେଙ୍ଗିସି ସମାନ୍ ଜୁଜ୍ଜି ଆଇଞ୍ଜେରି ।
Currently Selected:
ପିଲିପିୟ 1: DWK
Highlight
Share
Compare
Copy
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
