ଏପିସିୟ 6
6
ଇୟାଆବା ଅଟେ ବଦାଙ୍ଗ୍ନିକି ପାଉଲତି ଗ୍ରାପନ୍
1 #
କଲ ୩:୨୦
ଏ ବଦାଙ୍ଗ୍ନାତେରି, ଦାର୍ମୁ ବାଗାଟି ମି ମି ଇୟାଆବାତି କାତା ମାନି ଆଦୁ; ଇନାକି ଏଦି ନେହାଦି । 2“ମି ଇୟାଆବାନିକି ସନ୍ମାନ୍ ହିଦୁ” ଇଦି ଆଇନେ ରଣ୍ଡି ଦିବ୍ବା ଡ଼ାହି କାହେତି ଆଦେସ୍ 3“ଇଦି ମି ବାଗା ନେହାଦି, ଇହିଙ୍ଗିସି କିତେସି ମିରୁ ଇ ପୁର୍ତିତାୱା ଏଗେଲ୍ ଦିନା ନିମ୍ୱିଦେରି ।” 4#କଲ ୩:୨୧ଆଟେ ଏ ଆବାଙ୍ଗ୍ନାତେରି, ମିରୁ ମି ବଦାଙ୍ଗିକି ବିସ୍କି କିଃଆଟୁ, ମତ୍ର ଏୱାରିକି ଦାର୍ମୁ କୁଲାଟି ୱେସାନି ଅଟେ ଗ୍ରାପ୍ଚ୍ଚାନାହି ଏୱାରିକି ଆଙ୍ଗୁଲ୍ ଆଦୁ ।
କାମ୍ବାରାଙ୍ଗାନିକି ଅଟେ ସକାରାଙ୍ଗାନିକି ପାଉଲତି ଗ୍ରାପନ୍
5 #
କଲ ୩:୨୨–୨୫
ଏ କାମ୍ବାରାଙ୍ଗାନାତେରି, ମିରୁ ଇନିସ୍ କ୍ରିସ୍ଟନିକି ମାନି ଆଇଞ୍ଜେରି, ଏଚିଡେହେଙ୍ଗ୍ ଇ ପୁର୍ତିତି ମି ସକାରାଙ୍ଗାନିକି ୱାଡ଼େ ଆଜ୍ଜାନ୍ ଅଟେ ତ୍ରେଗାନ୍ ହଡାଙ୍ଗ୍ତି ଲୁଙ୍ଗୁରିଆଟି ମାନି ଆଦୁ । 6କୁଇଙ୍ଗ୍ତାୱାଟି ଜୁଙ୍ଗନ୍ ପାଁନ୍ବନ୍ ବାଗା ମିରୁ ଏୱାର୍ କାନ୍ନୁତାୱା ଇନ୍ନି କାମା କିଃଏଟେଃଏ, କ୍ରିସ୍ଟତି କାମ୍ବାରେଏଞ୍ଜି ଡେହେଙ୍ଗ୍ ହଡାଙ୍ଗିଃଆଟି ମୁଲାପେନୁ ଇନ୍ନା ଇଚ୍ଚା କିନ୍ନେଞ୍ଜି, ଏ କାମା କିଦୁ । 7କୁଇଙ୍ଗ୍ତି କାମା କିନ୍ନି ଡେହେଙ୍ଗ୍ ଆଃଏ, ମତ୍ର ଦାର୍ମୁତି ଆଙ୍ଗୁଲ୍ କାମା କିନ୍ନି ଡେହେଙ୍ଗ୍ ରାହାଙ୍ଗ୍ ମନଟି କାମା କିଦୁ । 8ଇଦା ପୁଞ୍ଜୁ ଜେ, ଉଦ୍ଦାଗାଟାଞ୍ଜି କି କାମ୍ବାରେଏଞ୍ଜି, ଏମ୍ୱେନାଞ୍ଜି ୱାଡ଼େ ନେହି କାମା କିନ୍ନେଞ୍ଜି, ଏୱାଞ୍ଜିକି ଦାର୍ମୁ ତା କାମାତି ପୁରସ୍କାର୍ ହିନେଞ୍ଜି । 9#କଲ ୪:୧; କଲ ୩:୨୫ଏଦାକି ଏ ସକାରାଙ୍ଗାନାତେରି, ମି କାମ୍ବାରାଙ୍ଗାନିକି ୱାଡ଼େ ଏଚିଡେହେଙ୍ଗ୍ ବେବାର୍ ତସ୍ଦୁ ଅଟେ ଏୱାରିକି ଆସ୍ପି କିଃଆଟୁ । ଇନାକି ମି କାମ୍ବାରାଙ୍ଗା ଅଟେ ମି ସକାରେଏଞ୍ଜି ସର୍ଗତାୱା ମାନ୍ନେଞ୍ଜି, ଆଟେ ଏୱାଞ୍ଜି ହାବେତାରିନିକି ସମାନ୍ ବିଚାର କିନ୍ନେଞ୍ଜି । ଇଦା ମିରୁ ପୁଞ୍ଜୁ ।
ସଇତାନ ବିରୁଦିଆଟି ଜୁଜ୍ଜି ଆଅନ୍ତି ଦୁର୍ଗୁ
10ୱିହାଡେଗ୍ଗାତି କାତା ଇଦି, ମିରୁ ଦାର୍ମୁଟିଆଟି ବଲ ପାଁଣ୍ଡାନାହି, ତା ବେର୍ ବଲଟି ବଲଗାଟାତାତେରି ଆଦୁ । 11ମିରୁ ଇନିସ୍କି ସଇତାନତି ହାବେତ୍ ଡ଼ଃଆନ୍ ଜୁଜନା ବିରୁଦିଆଟି ଡିଡ୍ଡନ୍ ମୁଦେରି, ଏଦାବାଗା ମୁଲାପେନୁ ହିଆଞ୍ଜାନି ହାବେତ୍ ଜୁଜ୍ଜି ଆଅନ୍ତି ଦୁର୍ଗୁ ଡ଼ାହି ହାମ୍ୱେର୍ ଆନ୍ ବାସାଆଦୁ । 12ଇନାକି ମା ଜୁଜ୍ଜି ଆଅନ୍ତାଦି ଇ ପୁର୍ତି ବିରୁଦିଆଟି ଆଃଏ, ମତ୍ର ଇ ଆନ୍ଦେର୍ ପୁର୍ତିତାୱା ଆକୁଡ଼୍ କିଅନ୍ତାରିତି ବିରୁଦିଆଟି, ଆଟେ ଜାଗ୍ଗୁତାୱା ମାନ୍ନି ଡ଼ଃଆନ୍ ଡିଙ୍ଗା ବଲଗାଟି ହକତ୍ଗାଟାର୍ତି ବିରୁଦିଆଟି ଜୁଜ୍ଜି ଆଇନାମୁ । 13ଏଦାକି ମିରୁ ଏ ଡ଼ଃଆନ୍ ଦିନାତାୱା ଇନିସ୍କି ଜୁଜ୍ଜି ଆନ୍ ହାବେୱେଲା ଜିତି ଆନ୍ ବାସା ଆଅନ୍ ମୁଦେରି, ଏଦାବାଗା ମୁଲାପେନୁ ହିଆଞ୍ଜାନି ହାବେତ୍ ଜୁଜ୍ଜି ଆଅନ୍ତି ଦୁର୍ଗୁ ମେଦ୍ଦାଟୁ । 14ଏଦାବାଗା ଡାଡ୍ଡିତାୱା ନିଜ୍ଜା ଡେହେଙ୍ଗ୍ତି ବେଲ୍ଟୁ ଗାସ୍ଦୁ, ଆଟେ ମି ହଡାଙ୍ଗ୍ନାୱା ଦାର୍ମିକତା ଡେହେଙ୍ଗ୍ତି ଲହାଗତା ମେଦ୍ଦାଟୁ । 15ଆଟେ ଲତୁଗାଟି ସୁସମାଚାର ବାଗାଟି ମି କାଟ୍କାନାୱା ନେହି ପାଣ୍ଡେଙ୍ଗ୍ ତୁଗ୍ଜାନ୍ ମିରୁ ହାମ୍ୱେର୍ ଆନ୍ ଆଣ୍ଟଟି ଡିଡ୍ଡାନ୍ ବାସାଆଦୁ । 16ଆଟେ ଏଦା ଡ଼ାହି ହାବେ ୱେଲା ମାଞ୍ଜାଡ଼ି ଡେହେଙ୍ଗ୍ତି ଡାଲ#୬:୧୬ ଡାଲ ଇଚ୍ଚେସି ଲହା ଡ଼ାହି କ୍ଲେହାଆନ୍ନି ଜୁଦ୍ଦତାୱା କଣ୍ତାତିଦି ଆଙ୍ଗନ୍ତି ରଣ୍ଡି ଦୁର୍ଗୁ । ବେବାର୍ କିଦୁ, ଏଦା ଡ଼ାହି ମିରୁ ଦୁସ୍ଟଗାଟାର୍ତି ନାଡ଼ି ବାନଙ୍ଗ୍ତିଦି ହାବେ ଆଙ୍ଗନ୍ ମୁଦେରି । 17ଆଟେ ମୁଲାପେନୁ ହିଆଞ୍ଜାନ୍ନି ଜ୍ଡିପା ଇମ୍ୱିନାଦିକି ତ୍ଲାଉତି ଲହା ଟୁପି ଡେହେଙ୍ଗ୍ ଅଟେ ପିର୍ନି ଡିଙ୍ଗା ହିଆଞ୍ଜାନ୍ନି କଣ୍ଡା, ଇଚ୍ଚେସି ମୁଲାପେନୁତି ବାକ୍ୟ ଆହ୍ଦୁ । 18ପିର୍ନି ଡିଙ୍ଗାଟି ହାବେ ୱେଲା ହାବେତ୍ କୁଲା ବାଗାଟି ଜିଗାଟୁ ଅଟେ ପ୍ରାତ୍ନା କିଦୁ । ଆଟେ ପିର୍ନି ଦାଲ୍ଲା ବାଗା ପ୍ରାତ୍ନା କିଅନ୍ ବାଗାଟି ହାବେ ୱେଲା ହାମ୍ୱେର୍ ଆନ୍ ବାସାଆଦୁ ଅଟେ ଏଦା କିଅନ୍ ୱାଃହାଟୁ । 19ନା ବାଗାଟି ୱାଡ଼େ ପ୍ରାତ୍ନା କିଦୁ । ନାଙ୍ଗେ ମୁଲାପେନୁ ଇହିଙ୍ଗ୍ତି ବାକ୍ୟ ହିଆକାଞ୍ଜି ଜେ, ଇନିମିଡିକି ନାନୁ ସୁସମାଚାରତି ଲାଃଇତ୍ କାତା ବରେସିଆଟି ପପ୍କନ୍ ମୁଃଇ । 20ଆଟେ ନାନୁ ବନ୍ଦିତାୱା ମାଚ୍ଚେସ୍ ୱାଡ଼େ ଇନିମିଡି ଏ କୁଲାଟି ଟିକ୍ କାତା ୱେସ୍ପନ୍ ବାଗା ବରେସ୍ ଆଃଇ ।
ୱିହାଡେଗ୍ଗାତି ଜୁହାରି
21 #
ପେରି ୨୦:୪; ୨ତି ୪:୧୨ #
କଲ ୪:୭,୮ ନା କୁଲାଟି ମିରୁ ଇନିସ୍ ପୁଞ୍ଜେରି, ଏଦାବାଗା ଜେଡାଗାଟି ଅଟେ ବିସ୍ୱସ୍ତଗାଟି ଦାର୍ମୁ କାମା କିନ୍ନି ଆଙ୍ଗୁଲ୍ଗାଟି ଆମ୍ୱେସ୍ ତୁକିକ, ନାନୁ ଇଦିମ୍ୱା ଇନିସ୍ ମାଃଇ ଅଟେ ଇନ୍ନା କିମାଃଇ ଏ କୁଲାଟି ୱେସ୍ପନ୍ ବାଗାଟି ନାନୁ ଏୱାଞ୍ଜିକି ମି ଟାକ୍କେ ପାଣ୍ଡେଞ୍ଜା । 22ଏଦାକି ଇ ଉଦେସିଆଟି ନାନୁ ଏୱାଞ୍ଜିକି ମି ରେଃଏସ୍ ପାଣ୍ଡାଦାତେଃଏ, ଇନିସ୍କି ମିରୁ ମା ମାନ୍ବା କୁଲାଟି ପୁଞ୍ଜେରି ଅଟେ ମି ହଡାଙ୍ଗ୍ ଏୱାଞ୍ଜ୍ଟିଆଟି ମାତି ପାଁନୁ । 23ଆବା ମୁଲାପେନୁ ଅଟେ ଦାର୍ମୁ ଜିସୁ କ୍ରିସ୍ଟ ତାୱାଟି ଆମ୍ୱେସ୍ଆଙ୍ଗିସ୍କାନାତେରି ଜେଡାଟି ବାସାଆଦୁ ଅଟେ ଲତୁ ପାଁଣ୍ଡାନ୍ ମାଞ୍ଜାଡ଼ିଆଟି ଗାମାଟୁ । 24ଏଚ୍ଚେ ଦାଲ୍ଲା ମା ଦାର୍ମୁ ଜିସୁ କ୍ରିସ୍ଟନିକି ଏଚ୍ଚେକ୍ ୱିଃହାନ୍ ଜେଡାଟି ଜେଡା କିନ୍ନେରି, ଏୱାରିକି ଏୱାଞ୍ଜି ଅନୁଗ୍ରହ ହିପାକାଞ୍ଜି ।
Currently Selected:
ଏପିସିୟ 6: DWK
Highlight
Share
Compare
Copy
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
