ଗାଲାତିୟ 5
5
କ୍ରିସ୍ଟତାୱା ଉଦ୍ଦା ମାନ୍ବନ୍
1ଉଦ୍ଦାଟି ନିମ୍ୱନ୍ ବାଗାଟି କ୍ରିସ୍ଟ ମାଙ୍ଗେ ଜ୍ଡିପ୍ଚାଞ୍ଜାନେଞ୍ଜି; ଏଦାକି ମିରୁ ଏମ୍ୱା ଆଣ୍ଟ ଆନ୍ ବାସାଆଦୁ ଅଟେ ରିହିକ୍ କାମ୍ୱାରେଏଞ୍ଜ୍ତି ଜୁଏଲି ଡେଃକାଟୁ ।
2ହୁଡ଼ାଟୁ, ନାନୁ ପାଉଲ ମିଙ୍ଗେ ୱେସ୍ପିଞ୍ଜା, ଜଦି ମିରୁ ସୁନତ ହାଜୁ ପାଲ୍ନି ଆଇଞ୍ଜେରି, ଇଚ୍ଚେସି କ୍ରିସ୍ଟ ତାୱାଟି ମି ଲାବା ଇନ୍ନାଦି ଆଃଏ । 3ନାନୁ ସୁନତ ଆଇନି ହାବେତାରିନିକି ରିହିକ୍ ସାକ୍ୟ ହିମାଃଇ ଜେ, ଏୱାରି ହାବେ ମସାତି ହାଜୁ ପାଲ୍ନି ଆଅନ୍ ଉଚିତ୍ । 4ମିରୁ ଏଚ୍ଚେ ଦାଲ୍ଲା ହାଜୁ ପାଲ୍ନି ଆନ୍ ମୁଲାପେନୁତି ନକେସି ଦାର୍ମିକ ଆଅନ୍ ବାଗା ଇଚ୍ଚା କିଞ୍ଜେରି, ଏୱାତାତେରି କ୍ରିସ୍ଟ ତାୱାଟି ଆଙ୍ଗେ ଆଞ୍ଜେରି, ମିରୁ ମୁଲାପେନୁତି ଅନୁଗ୍ରହ ପାଁଣ୍ଡେହେଃଲ୍ଲେରି । 5ଇନାକି ମାରୁ ପିର୍ନି ଡିଙ୍ଗା ଡ଼ାହି ମାଞ୍ଜାଡ଼ି ବାଗାଟି ଦାର୍ମିକ ଆଅନ୍ତି ଆସାଟି ରାହାପାହା ଆନ୍ କାଚାନ୍ ମାନ୍ନା । 6ଇନାକି କ୍ରିସ୍ଟ ଜିସୁତି ଆଡ୍ଡିରୁଡ୍ଡିତାୱା ସୁନତ କି ଅସୁନତତାୱା ଇନ୍ନାଦ୍ ଆଃଏ, ମତ୍ର ୱାର୍ରି ମାଞ୍ଜାଡ଼ିଟି ବାସା ଆନ୍, ଜେଡାଟି କାମା କିଅନ୍ତାଦି ଆଇନେ ବେର୍ରାନାଦି ।
7ମିରୁ ତ ନେହେନ୍ ଡେହେଚ୍ଚେରି; ଏମ୍ୱେ ମିଙ୍ଗେ ବାଦା ହିଆତେ ଜେ, ନିଜ୍ଜାତି କାତା ମାନି ଆଃଆତେରି ? 8ସାମେନେଃଏ ଇ କ୍ରଟ୍ପାଙ୍ଗୁଲା ମିଙ୍ଗେ ଆର୍ଚ୍ଚାଞ୍ଜାନ୍ନି ମୁଲାପେନୁତାୱାଟି ୱାହେଃଲ୍ଲେଏ । 9#୧କ ୫:୬ହିତେ କମିର କ୍ଡାଚ୍ଚାନ୍ନି ମୁକ୍କେଲ୍ ମଇଦା ଟଟିତିଦି ବ୍ଡେଡ୍ଗି କିନ୍ନେ । 10ମିରୁ ଜେ ବୁଲ୍ ଗ୍ରାପାତିଦି ମାନି ଆଃଏରି, ଏଦା ନାନୁ ମି କୁଲାଟି ଦାର୍ମୁ ଟାକ୍କେ ଆଣ୍ଟ ମାଞ୍ଜାଡ଼ି କିମାଃଇ; ମତ୍ର ଏମ୍ୱେନାଞ୍ଜି ମିଙ୍ଗେ କ୍ରଟ୍ପେଞ୍ଜାନେଞ୍ଜି, ଏୱାଞ୍ଜି ଏମ୍ୱେନାଞ୍ଜି ଆତେସ୍ୱାଡ଼େ, ମୁଲାପେନୁ ତାଙ୍ଗେ ସାମେନେଃଏ ଦଣ୍ଡ ହିନେଞ୍ଜି ।
11ମତ୍ର ଏ ଆମ୍ୱେସାଙ୍ଗା ଆଙ୍ଗିସ୍କାନାତେରି, ନାନୁ ଜଦି ମିଙ୍ଗେ ସୁନତ ଆଅନ୍ ମାନ୍ନେ ଇଞ୍ଜାନ୍ ପ୍ରଚାର କିଞ୍ଜା, ଇଚ୍ଚେସି ନାଙ୍ଗେ ଇନ୍ନା ବାଗା ବିହାନପୁ ୱାଇନେ ? ଏହେଙ୍ଗ୍ ଆତେସି ଜିସୁତି କ୍ରୁସ ନା ବାଗାଟି ଅସୁବିଦା ଆଃଏମା । 12ଏମ୍ବେନାରି ମିଙ୍ଗେ ସୁନତ ଆଅନ୍ ବାଗାଟି କ୍ରଟ୍ପେଞ୍ଜାନେରି, ଏୱାରି ସୁନତ ଆଅନ୍ ବାଗା ସେଣ୍ଡା ଟଡୁ କ୍ରାଃଏଟେଃଏ, ଏୱାର୍ତାଆ ଡ଼ାଙ୍ଗ୍ନା କ୍ରାଚାହିତେସି ନେହି ଆନେମା ।
13ଇନାକି ଏ ଆମ୍ୱେସାଙ୍ଗା ଆଙ୍ଗିସ୍କାନାତେରି, ମିରୁ ଉଦ୍ଦା ମାନ୍ବନ୍ତି ପରନ୍ ବାଗାଟି ଆର୍ପା ପାଁଣ୍ଡାଞ୍ଜେରି; ମତ୍ର ଏ ଉଦ୍ଦାତିଦି ୱାର୍ରି ଗାଣ୍ଡିତି ଡ଼ଃଆନ୍ ଇଚ୍ଚାଟି କାମା କିଅନ୍ତି ସୁଜଗ ଡେହେଙ୍ଗ୍ ବେବାର୍ କିଃଏଟେଃଏ, ଜେଡାଟି ରଃଅଞ୍ଜି ଆଟେ ରଃଅଞ୍ଜିକି ଆଙ୍ଗୁଲ୍ ଆପାକାଞ୍ଜି । 14ଇନାକି ମସାତି ହାବେତ୍ ହାଜୁ ଇ ରଣ୍ଡା ଆଗ୍ୟାଁ ଡ଼ାହି ଲେର୍ ଆଇନେ, “ମିରୁ ମି ହଡ଼୍ଗିନାରିନିକି ମି ଗାଣ୍ଡି ଡେହେଙ୍ଗ୍ ଜେଡା କିଦୁ ।” 15ଜଦି ମିରୁ ମିରୁ ହକିଆନ୍ ରଃଅଞ୍ଜି ଆଟେ ରଃଅଞ୍ଜିକି ଗାଜା କିଞ୍ଜେରି, ଇଚ୍ଚେସି, ମିରୁ ଇନିସ୍କି ମିରୁ ମିରୁ ନାହେଡ୍ ଆଃଏରି ଏଦାବାଗା ନେହେନ୍ ବାସାଆଦୁ ।
ପିର୍ନି ଡିଙ୍ଗାଟି ତାକନ୍
16ନା ୱେସ୍ପନ୍ତି ଉଦେସ ଇଦି, ପିର୍ନି ଡିଙ୍ଗାଟି ତାକାଟୁ, ଏହେଙ୍ଗ୍ ଆତେସି ମିରୁ ଗାଣ୍ଡିତି ଡ଼ଃଆନ୍ ଇଚ୍ଚାଟି କାମା କିଃଏରି । 17#ରୁମି ୭:୧୫–୨୩ଇନାକି ଇନିସ୍ କୁଏଞ୍ଜ୍ତି ଇଚ୍ଚା ପିର୍ନି ଡିଙ୍ଗାତି ବିରୁଦି, ଏଚିଡେହେଙ୍ଗ୍ ପିର୍ନି ଡିଙ୍ଗା ୱାଡ଼େ କୁଏଞ୍ଜ୍ତି ଇଚ୍ଚାତି ବିରୁଦି । ଇ ରିଃଆରି ତାରୁ ତାରୁ ବିରୁଦି; ଏଦାବାଗା ମିରୁ ଇମ୍ୱିନ୍ ନେହି କାମା ହାବେ ଇଚ୍ଚା କିଞ୍ଜେରି, ଏଦା କିଅନ୍ ମୁପେହେଃଲ୍ଲେରି । 18ମତ୍ର ଜଦି ମିରୁ ପିର୍ନି ଡିଙ୍ଗାଟି ତାକେଞ୍ଜେରି ଇଚ୍ଚେସି, ମିରୁ ଆଟେ ହାଜୁତି ହକତ୍ତାୱା ହେଃଲ୍ଲେରି ।
19ମିରୁ ତ ଗାଣ୍ଡିତି ଡ଼ଃଆନ୍ କାମା ହାବେ ନେହେନ୍ ପୁଞ୍ଜାଞ୍ଜେରି । ଏୱା ଆଇନୁ ଦାରି, ଅସୁଚି, ଡ଼ଃଆନ୍ ବେବାର୍, 20ମୁର୍ତି ଲାକନ୍, ହିଦେରି, ସତ୍ରୁଆଅନ୍, ହିଲାବାଦେର୍, ଅକାର, ରାଗା, ସାର୍ତପର, ବାଗା ବାଗା ଆଅନ୍, ବିହି ବିହି ମତ ଆଅନ୍, 21ବିହିତାଞ୍ଜିତି କୁଲାତିଦି ଆସା କିଅନ୍, କାଲୁ ପାଞ୍ଜନ୍, ରଙ୍ଗରସ ଇହିଙ୍ଗିସିତି ଏଚ୍ଚଡ଼୍ କାମା କୁଲାଟି; ନାନୁ କାହେ ଇନିସ୍କି ମିଙ୍ଗେ ୱେସାଞ୍ଜାତେଃଏ, ଏହେଙ୍ଗିସି କାହେନେଃଏ ୱେସ୍ପିଞ୍ଜା ଜେ, ଏମ୍ବେନାରି ଇ ହାବେତ୍ କୁଲାତି ଡ଼ଃଆନ୍ କାମା କିନ୍ନେରି, ଏୱାରି ମୁଲାପେନୁତି ରାଜିଇନ୍ଦା ହାଲ୍ବନ୍ ମୁଃଏରି ।
22ମତ୍ର ଡିଙ୍ଗାତି ପଲ ଆଇନେ ଜେଡା, ରାହାଙ୍ଗ୍, ଲତୁ, ଗାପ୍ଚି ଦର୍ଜ୍ୟ, ଦାଲ୍ଲାନିକି ପାପୁଅଲ୍ପନ୍, ବଦ୍ରତା, ବିସ୍ୱସ୍ତ, 23ଲୁଙ୍ଗୁର୍ ଆଅନ୍, ଇଚ୍ଚାତିଦି ଗାସାନ୍ ଇଟ୍ଟନ୍ ମୁପନ୍, ଇ ହାବେତ୍ କୁଲାତି ବିରୁଦିଆଟି ଇନ୍ନି ହାଜୁ ହେଃଲ୍ଲେଏ । 24ଏମ୍ୱେନାରି କ୍ରିସ୍ଟ ଜିସୁତି ଦାଲ୍ଲା, ଏୱାରି ହାବେତାରି ଗାଣ୍ଡିତି ଡ଼ଃଆନ୍ କାମା ଅଟେ ଡ଼ଃଆନ୍ ଇଚ୍ଚାତିଦି କ୍ରୁସତାୱା ପାଗାନ୍ନେରି । 25ଜଦି ମାରୁ ପିର୍ନି ଡିଙ୍ଗାଟି ପରନ୍ ପାଁଣ୍ଡାନ୍ନା, ଇଚ୍ଚେସି ପିର୍ନି ଡିଙ୍ଗା ଡ଼ାହି ନେହି ବେବାର୍ ୱାଡ଼େ ତସ୍ନା । 26ମାରୁ ବାଃଏୱାଡ଼େ ଗର୍ବ ଆନ୍ ରଃଅଞ୍ଜି ଆଟେ ରଃଅଞ୍ଜିକି ବିସ୍କି କିଃଆସୁ କି ରଃଅଞ୍ଜି ଆଟେ ରଃଅଞ୍ଜିକି ହେଃଏସ୍ ଆଃଆକାସୁ ।
Currently Selected:
ଗାଲାତିୟ 5: DWK
Highlight
Share
Compare
Copy
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
