ଗାଲାତିୟ 4
4
ମ୍ରିଃଏଞ୍ଜି ଅଟେ ହକଗାଟାଞ୍ଜି
1ମତ୍ର ନାନୁ ୱେସ୍ପିଞ୍ଜା, ହକ କିଅନ୍ତାଞ୍ଜି ଡଟି ବଦାସ୍ ମାନ୍ନି ଟିକ୍ନା, ଏୱାଞ୍ଜି ହାବେତ୍ କୁଲାତି ହକଗାଟାଞ୍ଜି ଆତେସ୍ୱାଡ଼େ ଏୱାଞ୍ଜି କାମ୍ବାରେଏଞ୍ଜି ତାୱାଟି ଆଙ୍ଗେ ଆଃଏ । 2ମତ୍ର ଆବା ଆଚି କିଆନ୍ନି ତୁକା ଟିକ୍ନା ଏୱାଞ୍ଜି ବାଡ୍ଡିଉଡ୍ଡି କିନ୍ନାରି ଅଟେ ଗୁମୁସ୍ତାଙ୍ଗ୍ତି ହକତ୍ତାୱା କାମ୍ବାରେଏଞ୍ଜି ଡେହେଙ୍ଗ୍ ମାଞ୍ଜିନ୍ନେଞ୍ଜି । 3ଏଚିଡେହେଙ୍ଗ୍ ଏଚ୍ଚିକିଃଆ ମାରୁ ୱାଡ଼େ ଦର୍ମତାୱା ଡଟି ବଦାସ୍ ଲାକ୍କା ମାଚ୍ଚାସୁ, ଏଚିତୁକାତାୱା ପୁର୍ତିତି କାହେତ୍ ଡ଼ଃଇ କୁଲାତାୱା କାମ୍ୱାରାଙ୍ଗା ଆନ୍ ମାଚ୍ଚାସୁ । 4ମତ୍ର ଏ ଦିନା ଏପନେଃଏ, ମୁଲାପେନୁ ତା ମ୍ରିଃଏଞ୍ଜିକି ପାଣ୍ଡାଦାତେଞ୍ଜି; ଏୱାଞ୍ଜି ଆଚାଲୁ ଟୁଟୁଟି ପ୍ଲିଆନାହି ମସାତି ହାଜୁତିଦି ମାନି ଆତେଞ୍ଜି, 5#ରୁମି ୮:୧୫–୧୭ଇନିସ୍କି ଏୱାଞ୍ଜି ମୁଲ ହିଆନ୍ ମସାତି ହାଜୁତାୱା ମାନ୍ନି ଦାଲ୍ଲାନିକି କୁଲ୍ନେଞ୍ଜି, ଆଟେ ମାରୁ ଇନିସ୍କି ମ୍ରିଃଏଞ୍ଜିତି ହକ ପାଁନା । 6ଆଟେ ମିରୁ ଆଇଞ୍ଜେରି ମ୍ରିକାନାତେରି, ଏଦାବାଗା ମୁଲାପେନୁ ତା ମ୍ରିଃଏଞ୍ଜ୍ତି ଡିଙ୍ଗାତିଦି ମା ହଡାଙ୍ଗିଃଆ ପାଣ୍ଡିଦାତେଞ୍ଜି; ଏ ଡିଙ୍ଗା ଆବା ଇଞ୍ଜାନ୍ ଆର୍ପିନ୍ନେ । 7ଏଦାକି ନିନୁ ଆଟେ କାମ୍ବାରେଏଞ୍ଜାତି ଆଃଏ, ମତ୍ର ମୁଲାପେନୁତି ମ୍ରିଃଏଞ୍ଜାତି ଆତି, ଏଦାବାଗା ନିନୁ ମୁଲାପେନୁତି ହକଗାଟାନାତି ଆଞ୍ଜି ।
ପାଉଲ ଗାଲାତିୟ ମଣ୍ଡଲି ବାଗାଟି ଏଲୁ କିଅନ୍
8ନକି ମିରୁ ମୁଲାପେନୁନିକି ପୁନ୍ନେଟେଃଏ, ଇମ୍ୱିନ୍ ପେନ୍ଙ୍ଗା ନିଜ୍ଜା ଆଃଏ, ଏୱାଡ଼୍ତି କାମ୍ୱାରାଙ୍ଗା ଆନ୍ ମାଚ୍ଚେରି । 9ମତ୍ର ମିରୁ ହାଦାଡ଼ି ମୁଲାପେନୁନିକି ପୁଞ୍ଜାଞ୍ଜେରି; ମତ୍ର ନାନୁ ୱେସ୍ତା ଜେ, ମୁଲାପେନୁ ନିଜ୍ଜାନେଃଏ ମିଙ୍ଗେ ପୁଞ୍ଜାଞ୍ଜାନେଞ୍ଜି, ଏହେଙ୍ଗ୍ ଆତେସି ଇନିସ୍ ଆଟେ ରଲି ମିରୁ ଦୁର୍ବଲ ଅଟେ କାହେତ୍ ଡ଼ଃଇ କୁଲାଇନ୍ଦା ୱ୍ଡେଚାନ୍ ଏ ହାବେତ୍ କାମ୍ୱାରାଙ୍ଗା ଆଅନ୍ ବାଗା ଇଚ୍ଚା କିଞ୍ଜେରି ? 10ମିରୁ ଇମ୍ୱିନ୍ ଇମ୍ୱିନ୍ ଦିନା, ଡାଁଞ୍ଜୁ, ରେହାଙ୍ଗ୍ ଅଟେ ଅଁଣ୍ଡୁତିଦି ଗାପ୍ଚି ନିଗ୍ଗା ଇଞ୍ଜାନ୍ ପାଲ୍ନି ଆଇଞ୍ଜେରି । 11ନାନୁ ମି ବାଗାଟି ଇମ୍ୱିନ୍ କାମା କିଆମାଃଇ, ଏଦି ବାଃଏ ଆନେ ଇଞ୍ଜାନ୍, ଏ କୁଲାଟି ନାନୁ ଆଜ୍ଜେମାଃଇ । 12ଏ ଆମ୍ୱେସାଙ୍ଗା ଅଟେ ଆଙ୍ଗିସ୍କାନାତେରି, ନାନୁ ମିଙ୍ଗେ ଜିଗେଞ୍ଜା, ମିରୁ ନା ଲାକ୍କାଟି ଆଦୁ, ଇନାକି ନାନୁ ମି ଡେହେଙ୍ଗ୍ ଆମାଃଇ । ମିରୁ ନାଙ୍ଗେ ଇନ୍ନି ଅନିୟେ କିଆହେଲ୍ଲାଦାଃଏରି । 13ନାନୁ ରେଡ଼ମ୍ ମାଚ୍ଚି ବାଗା କାହେ ମି ରେଃଏସ୍ ସୁସମାଚାର ପ୍ରଚାର କିଆଞ୍ଜାତେଃଏ, ଏଦା ମିରୁ ପୁଞ୍ଜାଞ୍ଜେରି । 14ମତ୍ର ମି ପରିକ୍ୟା ଡେହେଙ୍ଗ୍ ନା ଗାଣ୍ଡିତି ରେଡ଼ମ୍ତାୱା ୱାଡ଼େ ମିରୁ ନାଙ୍ଗେ ହିନି ହୁଡ଼ାଦାଃଆତେରି କି ପିହ୍ତାଦାଃଆତେରି, ମତ୍ର ମିରୁ ନାଙ୍ଗେ ମୁଲାପେନୁତି ସର୍ଗ ଦୁତ ଡେହେଙ୍ଗ୍ ଆଙ୍ଗୁଲ୍ ଆଦାତେରି ଅଟେ ଇହିଙ୍ଗିସିକି ମିରୁ ନାଙ୍ଗେ ଜିସୁ କ୍ରିସ୍ଟ ଡେହେଙ୍ଗ୍ ଗ୍ରହନ କିଆତେରି । 15ଏହେଙ୍ଗ୍ ଆତେସି ମି ଏ ରାହାଙ୍ଗ୍ ଇମ୍ୱିନାଦି ? ନାନୁ ମି କୁଲାଟି ସାକ୍ୟ ହିଆନ୍ ୱେସ୍ପିମାଃଇ ଜେ, ଜଦି ନାନୁ ମିଙ୍ଗେ କାଡ଼୍କା ୱ୍ରିହାଞ୍ଜାତେସି ୱାଡ଼େ ମିରୁ ୱେଚାନ୍ ହିଅନ୍ ମୁତାତେରିମା । 16ମତ୍ର ନାନୁ ମିଙ୍ଗେ ନିଜ୍ଜା ୱେସ୍ତାତ୍ ବାଗା ଇନ୍ନା ମି ସତ୍ରୁ ଆମାଃଇମା ? 17ଏୱାରି ମିଙ୍ଗେ ରାହାଙ୍ଗ୍ କିଅନ୍ ବାଗାଟି ଗାପ୍ଚି ଉଜଗ ଆଇନ୍ନେରି, ଏଦି ମି ନେହି କୁଲା ବାଗାଟି ଆଃଏ, ମତ୍ର ଏୱାର୍ତି ଇଚ୍ଚା, ଇନିସ୍କି ମିରୁ ନାଙ୍ଗେ ପିହାନ୍ ତା ଦାଲ୍ଲା ଆଦେରି । 18ୱାର୍ରି ନାନୁ ମି ଡ଼ାହି ମାନ୍ନି ତୁକାତାୱା ଆଃଏ, ମତ୍ର ହାବେ ୱେଲା ନିଗ୍ଗା କୁଲାଟି ଉଜଗ ଆଅନ୍ ନେହି । 19ଏ ନା ବଦାଙ୍ଗ୍ନାତେରି, ଏଚ୍ଚେକ୍ ଟିକ୍ନା ମିରୁ କ୍ରିସ୍ଟ ଡେହେଙ୍ଗ୍ ବେବାର୍ କିଆହେଃଲ୍ଲେରି, ଏ ଟିକ୍ନା ନାନୁ ମି ବାଗାଟି ଆଟେ ରଲି ମାରନ୍ତି ବିହାତାୱା ରାହାପାହା ଆଇମାଃଇ । 20ନାନୁ ହାଦାଡ଼ି ମି ଡ଼ାହି ମାଞ୍ଜାନ୍ ମି ଡ଼ାହି ନେହେନ୍ କାତା ଆଅନ୍ ମୁତାମା, ଇଦି ନା ଇଚ୍ଚା; ଇନାକି ନାନୁ ମି ବାଗାଟି ଗାପ୍ଚି ଏଲୁ କିମାଃଇ ।
ହାଗାର ଅଟେ ସାରାତି ଉଦାରନ
21ଏମ୍ବେନାତେରି ମସାତି ହାଜୁତାୱା ମାନ୍ବନ୍ ବାଗା ଇଚ୍ଚା କିଞ୍ଜେରି, ନାଙ୍ଗେ ୱେସ୍ତାଟୁ, ମସାତି ହାଜୁତାୱା ୱ୍ରିଗାନ୍ନି କାତା ମିରୁ ଇନ୍ନା ପୁଞ୍ଜାହେଃଲ୍ଲେରି ? 22ଇନାକି ଦର୍ମପୁତିତାୱା ୱ୍ରିଗାଆନ୍ନେ, ଅବ୍ରାହାମନିକି ରିଃଆରି ମ୍ରିକା ମାଚ୍ଚେରି, ରଃଅଞ୍ଜି କାମ୍ୱାରାଲୁଟି ଅଟେ ଆଟେ ରଃଅଞ୍ଜି ତା କୁଆଲୁ ସାରାଟିଆଟି ପ୍ଲିଆଚ୍ଚେଞ୍ଜି, ଏମ୍ବେନାଦିକି କାମ୍ବାରାଲୁ ଆଃଏ । 23କାମ୍ୱାରାଲୁତି ମ୍ରିଃଏଞ୍ଜି ଗାଣ୍ଡିତି ଇଚ୍ଚାଟି ପ୍ଲିତେଞ୍ଜି, ମତ୍ର ମୁଲାପେନୁ ହିଆଚ୍ଚି ଦିବ୍ବାଟି ପ୍ଲିତି ମ୍ରିଃଏଞ୍ଜି ତା କୁଆଲୁ ସାରାଟିଆଟି ପ୍ଲିତେଞ୍ଜି, ଏ କୁଆଲୁ କାମ୍ବାରାଲୁ ଆଃଏ । 24ଇ ହାବେତ୍ କାତାତି ଅର୍ତ ଆଇନେ, ଇ ରିଣ୍ଡି କୁଆସ୍କା ରିଣ୍ଡି ଚୁକ୍ତି ଡେହେଙ୍ଗ୍; ରଣ୍ଡି ଆଇନେ ସିନୟ ହରୁତାୱାଟି, ଇନ୍ଦାର୍ ମ୍ରିଃଏଞ୍ଜି କାମ୍ୱାର୍ କାମା କିଅନ୍ ବାଗା ପ୍ଲିତେଞ୍ଜି, ଏଦି ଆଇନେ ହାଗାର, ଏ ହାଗାର ସିୟନ ହରୁତାୱାଟି ହିୱାଆନ୍ନି ଚୁକ୍ତିତିଦି ବୁଜ୍ଜେ କିନ୍ନେ । 25ହାଗାର ଆଇନେ ଆରବ ଦେସାତାୱା ମାନ୍ନି ସିନୟ ହରୁ ଡେହେଙ୍ଗ୍, ଇମ୍ୱିନାଦିକି ହାଦାଡ଼୍ତି ଜିରୁସାଲମ ଗାଡ଼ାନାଜୁ ସମାନ୍, ଇନାକି ଏଦି ତା ବଦାଙ୍ଗ୍ ଡ଼ାହି କାମ୍ୱାରି କାମାତାୱା ମାନ୍ନେ । 26ମତ୍ର ସର୍ଗତି ଜିରୁସାଲମ ମା ଇୟା ଡେହେଙ୍ଗ୍, ଏଦି କାମ୍ବାରାଲୁ ଆଃଏ;
27ଇନାକି ପୁତିତାୱା ୱ୍ରିଗାଆନ୍ନେ,
“ଏ ୱାଞ୍ଜାଗାଟାତି, ନିନୁ ବଦା ପାଁଣ୍ଡାହେଃଲ୍ଲାତେସି ୱାଡ଼େ ରାହାଙ୍ଗ୍ ଆମୁ,
ଏଚ୍ଚେକ୍ୱାଡ଼େ ବଦା ମାରନ୍ତି ବିହା ପୁଞ୍ଜାହେଃଲ୍ଲାନାତି, ନିନୁ ଗାପ୍ଚି ରାହାଙ୍ଗ୍ ଆମୁ;
ଇନାକି କୁଏଞ୍ଜି ମାନ୍ନି କୁଆଲୁତି ବଦାଙ୍ଗ୍ତାୱାଟି କୁଏଞ୍ଜି ହେଃଲ୍ଲାନ୍ କୁଆଲୁତି ବଦାଙ୍ଗ୍ ଏଗେଲ୍ ।”
28ଏ ଆମ୍ୱେସ୍ଆଙ୍ଗିସ୍କାନାତେରି, ମିରୁ ଇସାକ ଡେହେଙ୍ଗ୍ ଦିବ୍ବାତି ବଦାଙ୍ଗ୍ନାତେରି । 29ମତ୍ର ଗାଣ୍ଡିତି ଇଚ୍ଚା ଡେହେଙ୍ଗ୍ ଏମ୍ୱେନାଞ୍ଜି ପ୍ଲିଆନ୍ନେଞ୍ଜି, ଏୱାଞ୍ଜି ଡିଙ୍ଗାତି ଦିବ୍ବାଟି ପ୍ଲିଆନ୍ନାଞ୍ଜିକି ବିହାନପୁ ହିଚ୍ଚେଞ୍ଜି, ଏଚିଡେହେଙ୍ଗ୍ ହାଦାଡ଼ି ୱାଡ଼େ ଗଟି ଆଇନେ । 30ମତ୍ର ଦର୍ମପୁତି ଇନ୍ନା ୱେସ୍ପିନ୍ନେ ? କାମ୍ବାରାଲୁ ଅଟେ ଏଦାଡ଼୍ତି ମ୍ରିଃଏଞ୍ଜିକି ହପ୍ଦୁ; ଇନାକି କାମ୍ୱାରାଲୁତି ମ୍ରିଃଏଞ୍ଜି ଉଦ୍ଦାଗାଟି କୁଆଲୁତି ମ୍ରିଃଏଞ୍ଜି ଡ଼ାହି ହକଗାଟାଞ୍ଜି ଆଃଏଞ୍ଜି । 31ଏଦାକି ଆମ୍ୱେସ୍ଆଙ୍ଗିସ୍କାନାତେରି, ମାରୁ କାମ୍ବାରାଲୁତି ବଦାଙ୍ଗ୍ନାସୁ ଆଃଏ, ମତ୍ର ଉଦ୍ଦାଗାଟି କୁଆଲୁତି ବଦାଙ୍ଗ୍ନାସୁ ।
Currently Selected:
ଗାଲାତିୟ 4: DWK
Highlight
Share
Compare
Copy
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
