ଏପିସିୟ 5

କ୍ରିସ୍ଟତି ଜେଡାଟି ନିମ୍ବନ୍

1ମିରୁ ମୁଲାପେନୁତି ଜେଡାଗାଟି ବଦାଙ୍ଗ୍‌ନାତେରି, ଏଦାକି ତା ଇଚ୍ଚାଟି ତାକାଟୁ । 2କ୍ରିସ୍ଟ ଇନିମିଡି ମାଙ୍ଗେ ଜେଡା କିଆତେଞ୍ଜି, ଆଟେ ମା ବାଗା ଇଞ୍ଜାନ୍ ମୁଲାପେନୁତି ଉଦେସଟି ନେହିଗାନ୍ଦାଗାଟି ନଇବେଦ୍ୟ ଅଟେ ବଲି ଡେହେଙ୍ଗ୍ ତା ଗାଣ୍ଡି ଉଚ୍ଚର୍ଗ କିତେଞ୍ଜି, ଏଚିଡେହେଙ୍ଗ୍ ମିରୁ ୱାଡ଼େ ଜେଡାଟି ତାକାଟୁ ।

3ମତ୍ର ମିରୁ ଦାରିକାମା ଅଟେ ହାବେତ୍ ୱାହୁତି ଅସୁଚି କାମା ଅଟେ ଲୁବୁ ମି ତାୱା ବାସାଆଃଆକାଦି, ଏଦି ପିର୍‌ନି ଦାଲ୍ଲା ବାଗା ନେହାଦ୍ ଆଃଏ, 4ଆଟେ ଇନ୍ନା ଇନ୍ନା ଡ଼ଃଆନ୍ କୁଲା, ଇହିଙ୍ଗିସି ଡ଼ଃଆନ୍ କାତା ଅଟେ ବାଃଏତ୍ କାତା ଅଟେ ଗେରୁ କାତା ମିରୁ ବେବାର୍ କିଅନ୍ ନେହି ଆଃଏ, ମତ୍ର ମିରୁ ହାବେତ୍ କୁଲାତାୱା ମୁଲାପେନୁନିକି ଦନ୍ୟବାଦ ହିଦୁ । 5ଇନାକି ମିରୁ ନିଜ୍ଜାନେଃଏ ପୁଞ୍ଜୁ ଜେ, ଦାରିଗାଟାରି, ଡ଼ଃଆନାରି, ଲୁବୁଗାଟାରି ଇୱାର୍ ଆଇନେରି ପେନ୍‌ଙ୍ଗାନିଣ୍ଡି ଲାକନ୍‌ତାରି ଏୱାର୍ ବାଗା କ୍ରିସ୍ଟ ଅଟେ ମୁଲାପେନୁତି ରାଜିତାୱା ହକତ୍ ହେଃଲ୍ଲେଏ ।

6ମିଙ୍ଗେ ଏମ୍ୱେ ୱାଡ଼େ କଲ କାତାଟି କ୍ରଟ୍‌ପାଦାଃଆକାରି, ଇନାକି ହାବେତ୍ ଡ଼ଃଆନ୍ କାମା ବାଗାଟି ମୁଲାପେନୁତି ତାର୍ରା ହିଟ୍ଟାଗାଟାର୍ କୁଃଏଟି ୱାଇନେ । 7ଏଦାକି ମିରୁ ଏୱାର୍ ଡ଼ାହି ତଡ଼ୁହେଙ୍ଗେଡ଼୍ ଆଃଆଟୁ । 8ଇନାକି ମିରୁ କାହେ ଆନ୍ଦେରିଃଆ ମାଚ୍ଚେରି, ମତ୍ର ହାଦାଡ଼ି ମିରୁ ଦାର୍ମୁତି ଅଲାତାୱା ମାଞ୍ଜେରି; ଏଦାକି ଅଲାତି ବଦାଙ୍ଗ୍ ଲାକା ତାକାଟୁ । 9ଇନାକି ହାବେତ୍ ୱାହୁତି ନିଗ୍ଗା, ଦାର୍ମିକତା ଅଟେ ନିଜ୍ଜା ଆଇନେ ଅଲାତି ପଲ ଡେହେଙ୍ଗ୍ । 10ଦାର୍ମୁ ଇମ୍ୱିନ୍ କାମାତାୱା ରାହାଙ୍ଗ୍ ଆଇନ୍ନେଞ୍ଜି, ଏଦା ପରିକ୍ୟା କିଆନ୍ ଦାହ୍‌ଦୁ । 11ହାବେ ୱେଲା ନେହି କାମା କିଆନ୍, ଆନ୍ଦେରିଃଆ କିନ୍ନି ଡ଼ଃଆନ୍ କାମାତାୱା ଆଡ୍ଡିରୁଡ୍ଡି ଆଃଆଟୁ, ମତ୍ର ଏ ହାବେତ୍ ଦୁସ ପକ୍‌ଚାହିଦୁ । 12ଇନାକି ଏମ୍ୱେନାରି ମ୍ଡାମିଟି ଡ଼ଃଆନ୍ କାମା ହାବେ କିନ୍ନେରି, ଏ ହାବେତ୍ କାମାତି କାତା ୱେସ୍‌ପନ୍ ଏମ୍ବେନାରି ୱାଡ଼େ ଲେଜ୍ଜା ଆନେରି । 13ମତ୍ର ଏଚ୍ଚିକିଃଆ ହାବେତ୍ କୁଲାତିଦି ଅଲାତାୱାଟି ତସ୍‌ପା ଆଇନେ, ଏଚିତୁକାତାୱା ଏୱାତି ନିଜ୍ଜା ୱାହୁ ହାବେ ନେହେନ୍ ତଞ୍ଜିନୁ । 14ଇନାକି ଅଲା ହାବେତ୍ କୁଲାତିଦି ପପ୍‌କନ୍‌ତାଦି, ଏଦାକି ଇଦି ଦର୍ମପୁତିତାୱା ୱେସ୍‌ପା ଆନ୍ନେ,

ଏ ହୁଞ୍ଜାନ୍ନାତାତେରି, ନିଙ୍ଗାଟୁ,

ହାନ୍ନାର୍‌ତାୱାଟି ନିଙ୍ଗାନ୍ ୱାଦୁ,

ଆଟେ ଜିସୁ କ୍ରିସ୍ଟ ମିଙ୍ଗେ ଅଲା ହିଆନେଞ୍ଜି ।

15ଏଦାକି ଇନିମିଡି ପରନ୍‌ତାୱା ତାକେଞ୍ଜେରି, ଏ କୁଲାଟି ନେହେନ୍ ଆନ୍ ମାଞ୍ଜୁ, ମୁର୍କଗାଟାଞ୍ଜି ଡେହେଙ୍ଗ୍ ଆଃଏଟେଃଏ ଗ୍ୟାଁନିଗାଟାଞ୍ଜି ଡେହେଙ୍ଗ୍ ଆଦୁ । 16#କଲ ୪:୫ଇନାକି ହାଦାଡ଼୍‌ତି ଦିନା ଡ଼ଃଆନାଦି, ଏଦାକି ମିରୁ ସୁଜଗତି ନେହି ବେବାର୍ ଡ଼ାହି ତାକାଟୁ । 17ଏଦାକି ମିରୁ ମୁର୍କଗାଟାରି ଡେହେଙ୍ଗ୍ ଆଃଏଟେଃଏ ଦାର୍ମୁତି ଇଚ୍ଚା ଇନାଦି ଏଦା ପୁଞ୍ଜୁ ।

18ଆଟେ ଅଙ୍ଗୁରନିରୁ ଉଣ୍ଡାନ୍ ପାଃଞ୍ଜାଟୁ, ଇନାକି ଏଦି ମିଙ୍ଗେ ନାହେଡ୍ କିଆନେ, ମତ୍ର ଡିଙ୍ଗାଟି ନେଞ୍ଜାଟୁ, 19#କଲ ୩:୧୬,୧୭ଦାର୍ମୁତି ଜୁଙ୍ଗା ଗାଡ଼ି ଡ଼ାହି ମିରୁ ଉଚ୍ଚାହ ହିପ୍‌କି ଆଦୁ, ଆଟେ ମି ହଡାଙ୍ଗ୍‌ତାୱା ଦାର୍ମୁତି ଉଦେସିଆଟି ଗାଡ଼ି ଅଟେ ଆତ୍ମିକ ଗାଡ଼ିହେରୁ କିଦୁ । 20ହାବେ ୱେଲା ହାବେତ୍ କୁଲା ବାଗା ମା ଦାର୍ମୁ ଜିସୁ କ୍ରିସ୍ଟ ପାରୁଟି ଆବା ମୁଲାପେନୁନିକି ଦନ୍ୟବାଦ ହିଦୁ ।

କୁଏଞ୍ଜି ଅଟେ କୁଆଲୁନିକି ପାଉଲତି ଗ୍ରାପନ୍

21ଆଟେ କ୍ରିସ୍ଟନିକି ଆଜ୍ଜାନାହି ରଃଅଞ୍ଜି ଅଟେ ରଃଅଞ୍ଜ୍‌ତି କାତା ମାନି ଆଦୁ ।

22 # କଲ ୩:୧୮; ୧ପି ୩:୧ ଏ କୁୟାସ୍‌କାନାତେରି, ମିରୁ ଇନିସ୍ ଦାର୍ମୁନିକି ମାନି ଆଇଞ୍ଜେରି, ଏଚିଡେହେଙ୍ଗ୍ ମି ମି କୁଇଙ୍ଗ୍‌ନିକି ମାନି ଆଦୁ । 23ଇନାକି କ୍ରିସ୍ଟ ଇନିସ୍ ମଣ୍ଡଲିତି ତ୍ଲାଉ ଡେହେଙ୍ଗ୍, ଏହେଙ୍ଗିସି କୁଏଞ୍ଜି ୱାଡ଼େ କୁଆଲୁତି ତ୍ଲାଉ ଡେହେଙ୍ଗ୍, ଆଟେ କ୍ରିସ୍ଟ ଆଇନ୍ନେଞ୍ଜି ତା ଗାଣ୍ଡି ଡେହେଙ୍ଗ୍ ମଣ୍ଡଲିତି ଜ୍ଡିପାଗାଟାଞ୍ଜି । 24ମଣ୍ଡଲି ଇନିମିଡି କ୍ରିସ୍ଟତି କାତା ମାନି ଆଇନେ, ଏଚିଡେହେଙ୍ଗ୍ ଏ କୁୟାସ୍‌କାନାତେରି ମିରୁ ୱାଡ଼େ ହାବେତ୍ କୁଲାତାୱା ମି ମି କୁଇଙ୍ଗ୍‌ନିକି ମାନି ଆଦୁ ।

25 # କଲ ୩:୧୯; ୧ପି ୩:୭ ଏ କୁଇଙ୍ଗ୍‌ନାତେରି, କ୍ରିସ୍ଟ ଇନିସ୍ ମଣ୍ଡଲିତିଦି ଜେଡା କିତେଞ୍ଜି, ମିରୁ ୱାଡ଼େ ଏଚିଡେହେଙ୍ଗ୍ ମି ମି କୁଆସ୍‌କାନିକି ଜେଡା କିଦୁ । ଏଦାବାଗା କ୍ରିସ୍ଟ ତା ପରନ୍ କ୍ରୁସତାୱା ହିତେଞ୍ଜି । 26ଇନିସ୍‌କି ଜିସୁ କ୍ରିସ୍ଟ ମଣ୍ଡଲିତିଦି ବାକ୍ୟ ଅଟେ ଏଜୁ ଡ଼ାହି ନଗ୍‌ଜାନାହି ମୁଲାପେନୁ ବାଗା ପିର୍ କିନ୍ନେଞ୍ଜି, 27ଆଟେ ମଣ୍ଡଲି ଇନିସ୍ ପିର୍ରି, ଗାଜାହେଃଲ୍ଲାନାଦି ଅଟେ ଇନ୍ନି ଦୁସ ହେଃଲ୍ଲାନାଦି ଆନ୍ ପିର୍‌ନି ଅଟେ ଅଡ୍ଡନ୍ ପାଃନେଏ, ଏହେଙ୍ଗିସି ହାବେତ୍ ୱାହୁତି ଗଉରବ ହିଆନ୍ ତା ବାଗାଟି ଡିଡ୍ଡି କିନ୍ନେଞ୍ଜି । 28ଏଚିଡେହେଙ୍ଗ୍ କୁଇଙ୍ଗ୍ ୱାଡ଼େ ତା ତା କୁଆସ୍‌କାନିକି ତା ତା ଗାଣ୍ଡି ଡେହେଙ୍ଗ୍ ଜେଡା କିଅନ୍ ଉଚିତ୍, ଏମ୍ୱେନାଞ୍ଜି ତା କୁଆଲୁନିକି ଜେଡା କିନ୍ନେଞ୍ଜି, ଏୱାଞ୍ଜି ତା ଗାଣ୍ଡି ଜେଡା କିନ୍ନେଞ୍ଜି, 29ଏମ୍ୱେନାଞ୍ଜି ୱାଡ଼େ ତା ଗାଣ୍ଡିତିଦି ଏଚ୍ଚେକ୍ ସ୍ରିଞ୍ଜେଞ୍ଜି, ମତ୍ର ତା ଗାଣ୍ଡି ବାଗାଟି ତିନ୍‌ବା ଉନ୍‌ବା କିନ୍ନେଞ୍ଜି ଅଟେ ଆଙ୍ଗୁଲ୍ ଆଇନ୍ନେଞ୍ଜି, ଏହେଙ୍ଗିସି କ୍ରିସ୍ଟ ୱାଡ଼େ ମଣ୍ଡଲି ପାଟ୍ଟି ଏହେଙ୍ଗିସି କିନ୍ନେଞ୍ଜି । 30ଇନାକି ମାରୁ ତା ଗାଣ୍ଡିତି କାଜ୍ଜୁ କାଡୁ ଡେହେଙ୍ଗ୍ । 31ଏଦାବାଗା ଦର୍ମପୁତିତାୱା, “କୁଏଞ୍ଜ୍ ଇୟାଆବାନିକି ପିହାନ୍ ତା କୁଆଲୁ ଡ଼ାହି ଆଡ୍ଡାନ୍ ବାସାଆନେଞ୍ଜି, ଏ ରିଃଆରି ର ଗାଣ୍ଡି ଆନେରି ।” 32ଇଦି ରଣ୍ଡି ଲାଃଇତ୍ କାତା, ମତ୍ର ନାନୁ କ୍ରିସ୍ଟ ଅଟେ ମଣ୍ଡଲି କୁଲାଟି ଇଦା ୱେସ୍‌ପିଞ୍ଜା । 33ଇନ୍ନା ୱାଡ଼େ ଆପାକାଦି, ମିରୁ ହାବେତାତେରି ମି କୁଆସ୍‌କାନିକି ମି ଗାଣ୍ଡି ଡେହେଙ୍ଗ୍ ଜେଡା କିଦୁ, ଆଟେ କୁଆଲୁ ୱାଡ଼େ ତା କୁଏଞ୍ଜିକି ସନ୍‌ମାନ୍ ହିପାକାଦି ।

Currently Selected:

ଏପିସିୟ 5: DWK

Highlight

Compare

Copy