ଏପିସିୟ 4

କ୍ରିସ୍ଟତାୱା ରଣ୍ଡା ଆଅନ୍

1ନାନୁ ଦାର୍ମୁ ବାଗାଟି ବନ୍ଦି ଆନ୍ ୱାଡ଼େ ମିଙ୍ଗେ ଜିଗେଞ୍ଜା, ମିରୁ ଇମ୍ୱିନ୍ କାମା ବାଗା ଆର୍‌ପା ପାଁଣ୍ଡାଞ୍ଜେରି, ଏଚିଡେହେଙ୍ଗ୍ ତାକାଟୁ । 2#କଲ ୩:୧୨,୧୩ଆଟେ ହାବେ ୱେଲା ଲୁଙ୍ଗୁର୍, ବଦ୍ରତା ଅଟେ ଗାପ୍‌ଚି ଦର୍ଜ୍ୟ ଅଟେ ଜେଡାଟି ରଃଅଞ୍ଜି ଅଟେ ରଃଅଞ୍ଜିକି ପାପୁଅଲ୍‌ଦୁ । 3ଆଟେ ପିର୍‌ନି ଡିଙ୍ଗାଟି ପାଁଣ୍ଡାନ୍ନି ଲତୁ ମିଙ୍ଗେ ରପାଟ୍ଟେ ଗାସାନ୍ ଇଟ୍ଟାଦାପାକାଦି, ଇହିଙ୍ଗିସି ମାନ୍‌ବନ୍ ବାଗା ହାବେ ୱେଲା ସେସ୍ଟା କିଦୁ । 4ଇନାକି ମିରୁ ରଣ୍ଡା ଗାଣ୍ଡି ଅଟେ ରଣ୍ଡା ପିର୍‌ନି ଡିଙ୍ଗା, ଅଟେ ରଣ୍ଡା ନାର୍ରାତାୱା ମୁଲାପେନୁତି ଆର୍‌ପା ପାଁଣ୍ଡାଞ୍ଜେରି । 5ରଃଅଞ୍ଜେଃଏ ଦାର୍ମୁ, ରଣ୍ଡେ ମାଞ୍ଜାଡ଼ି, ରଣ୍ଡେ ଡୁବନ୍, ରଃଅଞ୍ଜେଃଏ ହାବେତାରିତି ମୁଲାପେନୁ ଅଟେ ଆବା; 6ଏ ମୁଲାପେନୁ ହାବେତାରି କୁଃଏଟି, ହାବେତାରିତାୱା ଅଟେ ହାବେତାରିତି ହଡାଙ୍ଗ୍‌ତାୱା ମାନ୍ନେଞ୍ଜି ।

7ମତ୍ର କ୍ରିସ୍ଟତି ଅନୁଗ୍ରହଟି ହାବେତାସୁ ରଣ୍ଡା ରଣ୍ଡା ବିହି ବିହି ଦାନ ପାଁଣ୍ଡାନ୍ନା । 8ଏଦାବାଗା ଇହିଙ୍ଗିସି ପିର୍‌ନି ପୁତିତାୱା ୱ୍ରିଗାଆନ୍ନେ,

“ଏୱାଞ୍ଜି ୱାନ୍ଦା ହାଚ୍ଚି ତୁକାତାୱା

ତା ଡ଼ାହି ଗାପ୍‌ଚି ବନ୍ଦିଗାଟାରିକି ଆହାନ୍ ଅତେଞ୍ଜି,

ଆଟେ କୁଇଙ୍ଗ୍‌ନିକି ବିହି ବିହି କୁଲାତି ଦାନ ହିତେଞ୍ଜି ।”

9ଏୱାଞ୍ଜି ୱାନ୍ଦା ହାଚ୍ଚେଞ୍ଜି ଇନ୍‌ବନ୍‌ତି ଅର୍ତ ଇନାଦି ? ଇନାକି ଏୱାଞ୍ଜି ପୁର୍ତିତାୱା ଜାଚାଞ୍ଜାତେଞ୍ଜି । 10ଏମ୍ବେନାଞ୍ଜିକି ପୁର୍ତିତାୱା ଜାଚାଞ୍ଜାତେଞ୍ଜି, ଏୱାଞ୍ଜି ଇନିସ୍‌କି ପୁର୍ତିତାୱା ତା ବଲତି ହାବେତ୍ କାମା ସପଲ କିଅନ୍ ମୁନେଞ୍ଜି, ଏଦାବାଗା ସର୍ଗୱାନ୍ଦା#୪:୧୦ ସର୍ଗୱାନ୍ଦା ଇଚ୍ଚେସି, ଇମ୍ୱିନାୱାକି ମୁଲାପେନୁ ବାସାଆଇନେଞ୍ଜି ଏ ଗର୍ରି ଟିକ୍‌ନା ହାଚ୍ଚେଞ୍ଜି ହାଚ୍ଚେଞ୍ଜି । 11ଏୱାଞ୍ଜି ଇନ୍ଦା ଇନ୍ଦାରିକି ପେରିତ, ଇନ୍ଦା ଇନ୍ଦାରିକି ବାବବାଦି, ଇନ୍ଦା ଇନ୍ଦାରିକି ସୁସମାଚାରତି ପ୍ରଚାରକ, ଆଟେ ଇନ୍ଦା ଇନ୍ଦାରିକି ତ ପାସ୍ଟ୍ର ଅଟେ ଇନ୍ଦା ଇନ୍ଦାରିକି ଗ୍ରାପାଗାଟାଞ୍ଜିତି ଦାନ ହିଆନ୍ନେଞ୍ଜି; 12ମୁଲାପେନୁତି ପିର୍‌ନି ଦାଲ୍ଲା ତା ଆଙ୍ଗୁଲ୍ କାମା ବାଗା ଅଟେ କ୍ରିସ୍ଟତି ଗାଣ୍ଡିତିଦି ଇଚ୍ଚେସି ତା ମଣ୍ଡଲିତିଦି ମାଞ୍ଜାଟି ନେହେନ୍ କ୍ଲେହନ୍ ବାଗାଟି ଇଞ୍ଜାନ୍ କ୍ରିସ୍ଟ ଇ ଅନୁଗ୍ରହ ଦାନ ଏୱାରିକି ହିତେଞ୍ଜି । 13ଏଦାବାଗା ମାରୁ ହାବେତାସୁ ମାଞ୍ଜାଡ଼ିଟି ଅଟେ ମୁଲାପେନୁ ମ୍ରିଃଏଞ୍ଜି କୁଲାତି ଗ୍ୟାଁନତାୱା ରଣ୍ଡା ଆଅନ୍ ମୁନା, ଇଚ୍ଚେସି କ୍ରିସ୍ଟତାୱା ମାଞ୍ଜାନ୍ ମାଞ୍ଜାଡ଼ିତାୱା ରିହିନା, 14ଏହେଙ୍ଗ୍ ଆତେସି ମାରୁ ଆଟେ ବଦାଙ୍ଗ୍ ଡେହେଙ୍ଗ୍ ଆଃଏଟେଃଏ, କୁଇଙ୍ଗ୍‌ତି ଟକ ଅଟେ କଲ ଗ୍ରାପାତି ଜୁଜନା ଡେହେଙ୍ଗ୍ ୱ୍ଲିକାତାୱା ଇନେଆନେ ଆଃଆକାସୁ । 15ମତ୍ର ଜେଡାଟି ନିଜ୍ଜା ୱେସାନ୍ ହାବେତ୍ କୁଲାଟ୍‌ତାୱା ଗାମାନାହି ମଣ୍ଡଲିତି ତ୍ଲାଉ ଡେହେଙ୍ଗ୍‌ତି କ୍ରିସ୍ଟ ଲାକ୍କା ଆନା । 16#କଲ ୨:୧୯ଏୱାଞ୍ଜି ଗାଣ୍ଡିତି ହାବେତ୍ ହାନ୍ଦିଙ୍ଗ୍ ଡ଼ାହି କାସ୍‌କା କାଟ୍‌କାତିଦି ରପାଟ୍ଟେ ଡ୍ରାପ୍‌କା ଡ଼ାହି ନେହେନ୍ ଚୁହାନ୍ନେଞ୍ଜି ଅଟେ ଏୱା ହାବେ ଜେଡାଟି ତା ତା କାମା କିନ୍ନି ବାଗା ଗାଣ୍ଡି ନେହେନ୍ ଗାମେନ୍ନେ ।

କ୍ରିସ୍ଟତାୱା ପୁନି ପରନ୍

17ଏଦାକି ନାନୁ ଦାର୍ମୁ ପାରୁଟି ଜାଗ୍ରତ କିଆନ୍ ୱେସ୍‌ପିଞ୍ଜା, ମିରୁ ଅନଜିହୁଦିଙ୍ଗ୍ ଡେହେଙ୍ଗ୍ ତାଃକାଟୁ, ଇନାକି ଏୱାରି ତା ତା ମନତି ଡ଼ଃଆନ୍ ବୁଦ୍ଦିଟି ତାକେନ୍ନେରି, 18ଅଟେ ଏୱାରି ତା ହଡାଙ୍ଗ୍‌ତାୱା ବୁଦ୍ଦି ହେଃଲ୍ଲାନ୍ ବାଗା ବୁଜ୍ଜି ଆଃଏଟେଃଏ ଆନ୍ଦେରିଃଆ ତାକେନ୍ନେରି, ଏଦାକି ଏୱାରି ମୁଲାପେନୁ ହିଆନ୍ନି ପୁନି ପରନ୍ ତାୱାଟି ରେମ୍ବାନ୍ନେରି । 19ଆଟେ ଏୱାରି ଲେଜ୍ଜା ଆଃଏଟେଃଏ ଗାପ୍‌ଚି ଦନ ଲୁବୁ ଆନାହି ହାବେତ୍ ୱାହୁତି ଅସୁଚି କାମା କିଅନ୍ ବାଗାଟି ତା ଗାଣ୍ଡିତିଦି ଡ଼ଃଆନ୍ କାମାତାୱା ସର୍ପି କିଆନ୍ନେରି । 20ମତ୍ର ମିରୁ କ୍ରିସ୍ଟ କୁଲାଟି ଏହେଙ୍ଗିସି ଗ୍ରାମ୍ବାହେଃଲ୍ଲେରି; 21ମତ୍ର ମିରୁ ନିଜ୍ଜାନେଃଏ ତା କୁଲାଟି ୱେଞ୍ଜାଞ୍ଜେରି, ଆଟେ ଜିସୁ ଡ଼ାହି ଆଡ୍ଡିରୁଡ୍ଡି ଆନ୍ ତା ନିଜ୍ଜା କୁଲା ହାବେ ଗ୍ରାମ୍ବାଞ୍ଜେରି, 22#କଲ ୩:୯ଏଦାକି ମିରୁ ମି ପ୍ଡାଃଇ ବେବାର୍ ପିହ୍‌ଦୁ, ଇନାକି ଏ ପ୍ଡାଃଇ, ବେବାର୍ ବାଗାଟି ମି ଡିଙ୍ଗା ନାହେଡ୍ ଆଇଚ୍ଚେ, 23ଆଟେ ମି ଆତ୍ମିକ ହଡାଙ୍ଗ୍ ଅଟେ ମନ ପୁନି ଆପାକାଃଆ, 24#କଲ ୩:୧୦ମି ଇମ୍ୱିନ୍ ପୁନି ପରନ୍ ମୁଲାପେନୁତି ୱାନ୍ନାରୁଃଉତାୱା ଦାର୍ମିକତା ଅଟେ ନିଜ୍ଜାତି ପିର୍‌ନିତାୱା ପ୍ଲିଆନ୍ନେ, ଏଚିଡେହେଙ୍ଗ୍ ନିମ୍ବନ୍ ବାଗାଟି ଗ୍ରାମ୍ବାଞ୍ଜେରି । 25ଏଦାକି ମିରୁ କଲ ୱେଃସାଟୁ, ଆଟେ ମିରୁ ହାବେତାତେରି ରଃଅଞ୍ଜି ଅଟେ ରଃଅଞ୍ଜିକି ନିଜ୍ଜାନେଃଏ ୱେସ୍‌ଦୁ, ଇନାକି ମାରୁ ହାବେ କ୍ରିସ୍ଟତି ଗାଣ୍ଡିକାଜ୍ଜୁ । 26ମିରୁ ରାଗା ଆଦୁ, ମତ୍ର ପାପ କିଃଆଟୁ । ୱେଲା ମେଦ୍ଦେଟେଃଏ ଏ ରାଗାତିଦି ବ୍ଡୁଜାଟୁ। 27ଆଟେ ସଇତାନତିଦି ଗର୍ରି ହିଃଆଟୁ । 28ମ୍ଡାମେଞ୍ଜି ଆଟେ ମ୍ଡାମି କିଃଆକାଞ୍ଜି, ଏୱାଞ୍ଜି ହାକିଗାଟାର୍‌ନିକି ଇନିସ୍‌କି ସାହାଜ୍ୟ କିଅନ୍ ମୁନେଞ୍ଜି, ଏଦାକି ତାନୁ ନେହି କାମା କିପାକାଞ୍ଜି । 29ମି ଗୁତିତାୱାଟି ଡ଼ଃଆନ୍ କାତା ହଃଆକାଦି, ମତ୍ର ମି ତାୱାଟି ଦାଲ୍ଲା ବାଗା ଆବସକ ଡେହେଙ୍ଗ୍ ନେହି କାତା ହପାକାଦି, ଇନିସ୍‌କି ୱେନ୍‌ବନ୍‌ତାରି ବାଗା ଏଦି ମେଲା ଆନେ । 30ଆଟେ ମୁଲାପେନୁତି ଇମ୍ୱିନ୍ ପିର୍‌ନି ଡିଙ୍ଗା ତାୱାଟି ମିରୁ କୁଲ୍‌ପା ପାଁନ୍‌ବନ୍ ବାଗାଟି ସିଲ୍ କିୱା ଆଞ୍ଜେରି, ଏୱାଞ୍ଜିକି ଦୁଃକ ହିଃଆଟୁ । 31ଆଟେ ହାବେତ୍ ୱାହୁତି କୁଟୁ, ରାଗା, ତାର୍ରା, ହିଲାବାଦେର୍ ଅଟେ ଅଡ୍ଡନ୍, ଆଟେ ହାବେତ୍ ୱାହୁତି ହେଃଏସ୍ ମି ତାୱାଟି ଦେହା ଆପାକାଦି; 32#କଲ ୩:୧୩ଆଟେ ମିରୁ ରଃଅଞ୍ଜି ଆଟେ ରଃଅଞ୍ଜିକି ଲୁଙ୍ଗୁର୍ ହଡାଙ୍ଗିଃଆଟି ପାପୁଅଲ୍‌ଦୁ, ଆଟେ ମୁଲାପେନୁ କ୍ରିସ୍ଟ ତାୱାଟି ମିଙ୍ଗେ ଇନିସ୍ ମାକ୍‌ସାଡ଼ି କିଆତେଞ୍ଜି, ଏହେଙ୍ଗିସି ମିରୁ ରଃଅଞ୍ଜି ଆଟେ ରଃଅଞ୍ଜିକି ମାକ୍‌ସାଡ଼ି କିଦୁ ।

Currently Selected:

ଏପିସିୟ 4: DWK

Highlight

Compare

Copy