ଏପିସିୟ 3
3
ଅନଜିହୁଦିଙ୍ଗ୍ ବାଗା ପାଉଲତି କାମା
1ଇଦାବାଗା ଅନଜିହୁଦିଙ୍ଗ୍ନାତେରି, ମି ବାଗା ନାନୁ ପାଉଲତାନୁ, କ୍ରିସ୍ଟ ଜିସୁତି ଆଙ୍ଗୁଲ୍ କାମା ବାଗାଟି ବନ୍ଦି ଆମାଃଇ । 2ମିରୁ ନିଜ୍ଜାନେଃଏ ୱେଞ୍ଜାଞ୍ଜେରି, ଇନିସ୍କି ନାନୁ ମି ବାଗା ନେହି କାମା କିଅନ୍ ମୁଃଇ, ଏଦାବାଗା ମୁଲାପେନୁ ତା ବେର୍ ଅନୁଗ୍ରହଟି ନାଙ୍ଗେ ଇ କାମା ହିଆଞ୍ଜାନେଞ୍ଜି । 3ମୁଲାପେନୁ ନାଙ୍ଗେ ତା ଲାଃଇତ୍ କାତା ପୁନ୍ବି କିଆଞ୍ଜାନେଞ୍ଜି, ଏ କୁଲାଟି ନାନୁ କାହେନେଃଏ ହିତେ ୱ୍ରିଗାମାଃଇ । 4#କଲ ୧:୨୬,୨୭ଏଦା ଜଦି ମିରୁ ପଡ଼ିଆଦେରି, ଏହେଙ୍ଗ୍ ଆତେସି କ୍ରିସ୍ଟତି ଲାଃଇତ୍ କାତାତି ନିଜ୍ଜା କୁଲାଟି ନାନୁ ଏଚ୍ଚେ ପୁଞ୍ଜାମାଃଇ, ଏଦା ମିରୁ ନେହେନ୍ ପୁଞ୍ଜେରି । 5ଏ ଲାଃଇତ୍ କାତା ହାଦାଡ଼ି ପିର୍ନି ଡିଙ୍ଗା ଡ଼ାହି ତା ପିର୍ନି ପେରିତ ଅଟେ ବାବବାଦିଙ୍ଗ୍ ଟାକ୍କେ ଇନିସ୍ ପଙ୍ଗାନ୍ନେ, ନକିତି ଦାଲ୍ଲା ରେଃଏସ୍ ଏହେଙ୍ଗିସି ପଙ୍ଗାହେଃଲ୍ଲାତେ, 6ଇଚ୍ଚେସି ସୁସମାଚାରଟିଆଟି ଜିସୁ କ୍ରିସ୍ଟତାୱା ଅନଜିହୁଦିଙ୍ଗ୍ ୱାଡ଼େ ବାଗା ପାଟେରି, ଆଟେ ର ଗାଣ୍ଡିତି ଗାଣ୍ଡିକାଜୁ ଡେହେଙ୍ଗ୍ ଆତେରି ଅଟେ ଦିବ୍ବାତି ସମାନ୍ ବାଗା ପାଟେରି । 7ମୁଲାପେନୁ ତା ବେର୍ ବଲଟି ଇମ୍ୱିନ୍ ଅନୁଗ୍ରହତି ଦାନ ହିଆଞ୍ଜାନେଞ୍ଜି, ଏଦାବାଗା ନାନୁ ରଃଅଞ୍ଜି ସୁସମାଚାରତି ଆଙ୍ଗୁଲ୍ଗାଟାନ୍ ଆମାଃଇ । 8ମୁଲାପେନୁତି ହାବେତ୍ ପିର୍ନି ଦାଲ୍ଲା ତାୱାଟି ନାନୁ ଡଟିଗାଟାନୁ, ଆତେସ୍ୱାଡ଼େ, ନାଙ୍ଗେ ଅନୁଗ୍ରହ କିଆନ୍ ଅନଜିହୁଦିଙ୍ଗ୍ ରେଃଏସ୍ ଜିସୁ କ୍ରିସ୍ଟ ପାଟ୍ଟି ମାନ୍ନି ଏଚ୍ଚେକ୍ ୱିଃହାନ୍ ଦନତିଦି ପପ୍କନ୍ ବାଗା, 9ଆଟେ ହାବେ କ୍ଲେହାନ୍ନି ଗାମିନ୍ ମୁଲାପେନୁତାୱା ନକିଟେଃଏ ହୁଟ୍ଟାନ୍ ମାଚ୍ଚି ଲାଃଇତ୍ କାତା କୁଲାତାୱା ତା ଜୁଜନା ଇନାଦି, ଏଦା ହାବେତାରିନିକି ୱେସ୍ପନ୍ ବାଗା ହିୱା ଆଞ୍ଜାନ୍ନେ। 10ଇନିସ୍କି ହାଦାଡ଼୍ତି ତୁକାତାୱା ମଣ୍ଡଲିତି କାମାତାୱାଟି ସର୍ଗତି ଆକୁଡ଼୍ଗାଟାରି ଅଟେ ହକତ୍ଗାଟାରି ମୁଲାପେନୁତି ଗାପ୍ଚି ଗ୍ୟାଁନ କୁଲାଟି ନେହେନ୍ ବୁଜ୍ଜି ଆନେରି । 11ଏଦାବାଗା ମୁଲାପେନୁ ନକି ତା କିଆଚ୍ଚି ଜୁଜନା ଡେହେଙ୍ଗ୍ ମା ଦାର୍ମୁ ଜିସୁ କ୍ରିସ୍ଟ ରେଃଏସ୍ ଏୱା ହାବେ ସପଲ କିତେଞ୍ଜି । 12ଏ ଦାର୍ମୁନିକି ମାଞ୍ଜାଡ଼ି କିନ୍ନି ବାଗାଟି ମାରୁ ବରେସ୍ ଅଟେ ଆଜ୍ଜେଟେଃଏ ମୁଲାପେନୁ ରେଃଏସ୍ ହାଲ୍ବନ୍ ବାଗା ପାହେର୍ ପାଁଣ୍ଡାନ୍ନା । 13ଏଦାକି ନାନୁ ଜିଗେଞ୍ଜା, ମି ବାଗାଟି ନାନୁ ଇମ୍ୱିନ୍ ଦୁଃକ ପାଁଣ୍ଡିମାଃଇ, ଏଦାବାଗା ମିରୁ ହତାସ୍ ଆଃଆଟୁ, ଇନାକି ଇ ହାବେ ମି ଗଉରବ ବାଗାଟି ଆନ୍ନେ ।
ଆତ୍ମିକ ବଲ ବାଗାଟି ପ୍ରାତ୍ନା
14ଇଦାବାଗା ନାନୁ ମା ଆବା ମୁଲାପେନୁ ନକେସି ମେଣ୍ଡାଙ୍ଗୁତାନ୍ ପ୍ରାତ୍ନା କିମାଃଇ । 15ମୁଲାପେନୁ ଆଇନ୍ନେଞ୍ଜି ସର୍ଗ ଅଟେ ପୁର୍ତିତାୱା ମାନ୍ନି ହାବେତ୍ ମାଞ୍ଜାଡ଼ିଗାଟାର୍ତି ଆବା । 16ମୁଲାପେନୁ ତା ଗଉରବତି ଦନଟି, ଇନିସ୍କି ମିରୁ ପିର୍ନି ଡିଙ୍ଗାଟି ଆଣ୍ଟ ଆଅନ୍ ମୁଦେରି, ଏଦାବାଗା ତା ବଲ ପାଁଣ୍ଡୁ ଇଞ୍ଜାନ୍ ନାନୁ ମୁଲାପେନୁ ରେଃଏସ୍ ପ୍ରାତ୍ନା କିମାଃଇ, 17ଆଟେ ମି ମାଞ୍ଜାଡ଼ି ବାଗାଟି ଜିସୁ କ୍ରିସ୍ଟ ମି ହଡାଙ୍ଗିଃଆ ବାସାଆନେଞ୍ଜି, ଇନିସ୍କି ମି ପୁନ୍ନାଦି ଜେଡାଟି କ୍ଲେହାଆନେ ଅଟେ ମାଞ୍ଜା ଆନ୍ ବାସାଆନେ । 18ଏହେଙ୍ଗ୍ ଆତେସି, ଜିସୁ କ୍ରିସ୍ଟତି ଜେଡା ଏଚେ ଲାମ୍ୱା ଅଟେ ଅହେର୍, ଏଚ୍ଚେ ପ୍ଡିପନ୍ ଅଟେ କୁଟ୍ଟି, ଏଦା ମିରୁ ମୁଲାପେନୁତି ପିର୍ନି ଦାଲ୍ଲା ଡ଼ାହି ପୁନ୍ବନ୍ ବାଗାଟି ବଲ ପାଁଣ୍ଡେରି । 19ଇନାକି ଜିସୁ କ୍ରିସ୍ଟତି ଜେଡା କୁଇଙ୍ଗ୍ତି ଗ୍ୟାଁନ ତାୱାଟି ଏଗେଲ୍ ବେର୍ରାନାଦି, ମତ୍ର ମିରୁ ଏ ଜେଡା କୁଲାଟି ଡ଼ାଙ୍ଗ୍ନା ପୁଃନ୍ନାତେସି ୱାଡ଼େ, ମିରୁ ମୁଲାପେନୁତି ହାବେତ୍ କୁଲା ପୁଞ୍ଜୁ ଇଞ୍ଜାନ୍ ପ୍ରାତ୍ନା କିମାଃଇ । 20ଇମ୍ୱିନ୍ ମୁଲାପେନୁ ତା ବଲ ଡ଼ାହି ମା ହଡାଙ୍ଗିଃଆ କାମା କିନ୍ନେଞ୍ଜି, ଏୱାଞ୍ଜି ମା ୱ୍ରିହ୍ପନ୍ ଅଟେ ଏଲୁ କିଅନ୍ତାୱାଟି ୱାଡ଼େ ଗାପ୍ଚି ବଲତି କାମା କିଅନ୍ ମୁନେଞ୍ଜି, 21ମଣ୍ଡଲି ଅଟେ ଜିସୁ କ୍ରିସ୍ଟ ତାୱାଟି କାଲେଙ୍ଗ୍କାଲା ଟିକ୍ନା ତା ମହିମା ଆପାକାଦି । ଆମେନ୍ ।
Currently Selected:
ଏପିସିୟ 3: DWK
Highlight
Share
Compare
Copy
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
