ଏପିସିୟ 2

ମୁଲାପେନୁତି ଅନୁଗ୍ରହ ଟିଆଟି ଜ୍ଡିପା

1 # କଲ ୨:୧୩ ନକି ମି ପାପ ବାଗାଟି ମୁଲାପେନୁନିକି ମାନି ଆଃଏଟେଃଏ ମିରୁ ଡିଙ୍ଗାଟି ହାଚେରି । 2ଇଚ୍ଚେସି, ଇମ୍ୱିନ୍ ପୁର୍ତିତି ଆକୁଡ଼୍ କିଅନ୍‌ତାଦି ହାଦାଡ଼ି ୱାଡ଼େ ପୁର୍ତିତି ହିଟ୍ଟାଗାଟାର୍ ଟାକ୍କେ କାମା କିନ୍ନେ, ଏ ଡିଙ୍ଗାତି ଇଚ୍ଚା ଡେହେଙ୍ଗ୍ ମିରୁ ୱାଡ଼େ ନକି ଏହେଙ୍ଗିସି ତାକାନ୍ ପାପ ଅଟେ ଡ଼ଃଆନ୍ କାମାତାୱା ହାଚେରି । 3ଏ ହିଟ୍ଟାଗାଟି ଦାଲ୍ଲା ଡ଼ାହି ମାରୁ ହାବେତାସୁ ରଲି ମା ପାପ ଗାଣ୍ଡିତି ଇଚ୍ଚାଟି ନିମ୍ବାନ୍ନି ମା ମନ ଅଟେ ଗାଣ୍ଡିତି ଡ଼ଃଆନ୍ ଇଚ୍ଚାଟି ବେବାର୍ କିଚ୍ଚାସୁ, ଆଟେ ବିହି ଦାଲ୍ଲା ଡେହେଙ୍ଗ୍ ଦଣ୍ଡ ପାଁନ୍‌ବନ୍ ବାଗାଟି ଜୁଗ୍ୟ ଆଚ୍ଚାସୁ । 4ମତ୍ର ମୁଲାପେନୁତି ପାପୁଅଲ୍‌ପନ୍ ଇଚ୍ଚେ ବେର୍ରାନାଦି ଜେ, ଏୱାଞ୍ଜି ମାଙ୍ଗେ ଗାପ୍‌ଚି ଜେଡା କିଆତେଞ୍ଜି, 5ଏଦାବାଗା ପାପ କିଆନ୍ ଡିଙ୍ଗାଟି ହାଚ୍ଚେସ୍ ୱାଡ଼େ ମାଙ୍ଗେ କ୍ରିସ୍ଟ ଡ଼ାହି ନିପ୍‌ଚାଞ୍ଜାନେଞ୍ଜି, ଆଟେ ମୁଲାପେନୁତି ଅନୁଗ୍ରହଟି ମିରୁ ଜ୍ଡିପା ପାଁଣ୍ଡାଞ୍ଜେରି । 6ମୁଲାପେନୁ ମାଙ୍ଗେ କ୍ରିସ୍ଟ ଜିସୁ ଡ଼ାହି ନିକ୍‌ଚାନ୍ ତା ଡ଼ାହି ସର୍ଗତାୱା କକ୍କି କିଆଞ୍ଜାନେଞ୍ଜି । 7ୱାଇନି କାଲାତାୱା ତା ପାପୁଅଲ୍‌ପନ୍‌ତି ବେର୍ ଦନ ମାଙ୍ଗେ ତସ୍‌ପନ୍ ବାଗା ମୁଲାପେନୁ କ୍ରିସ୍ଟ ଜିସୁତାୱା ମା ବାଗା ତା ଅନୁଗ୍ରହ ପକ୍‌ତେଞ୍ଜି । 8ଇନାକି ଅନୁଗ୍ରହତାୱା ମାଞ୍ଜାଡ଼ି କିଆନ୍ ମିରୁ ଜ୍ଡିପା ପାଁଣ୍ଡାଞ୍ଜେରି; ଏଦି ମି ତାୱାଟି ଆହେଃଲ୍ଲେଏ, ଏଦି ମୁଲାପେନୁ ହିଆଞ୍ଜାନ୍ନି ଦାନ । 9ଏମ୍ୱେ ୱାଡ଼େ ତା କାମାତାୱାଟି ଜ୍ଡିପା ପାଁଣ୍ଡାହେଃଲ୍ଲେରି, ଏଦାକି ଏମ୍ୱେନାଞ୍ଜି ୱାଡ଼େ ତା କାମାଟି ଜ୍ଡିପା ପାଁଣ୍ଡାମାଃଇ ଇଞ୍ଜାନ୍ ଗର୍ବ କିଃଆକାଞ୍ଜି । 10ଇନାକି ମାଙ୍ଗେ ତାନୁ କ୍ଲେହାଞ୍ଜାନେଞ୍ଜି । ମାରୁ ଇମ୍ୱିନ୍ ନେହି କାମା କିନା ଇଞ୍ଜାନ୍ ମୁଲାପେନୁ ନକିଟେଃଏ ଏଲୁ କିଆଚ୍ଚେଞ୍ଜି, ଏ ନେହି କାମାଟି ତାକନ୍‌ତିକି ମୁଲାପେନୁ ମାଙ୍ଗେ କ୍ରିସ୍ଟ ଜିସୁତାୱା କ୍ଲେହାଞ୍ଜାନେଞ୍ଜି ।

ଜିସୁ କ୍ରିସ୍ଟ ପାଟ୍ଟି ରଣ୍ଡା ଆଅନ୍

11ମିରୁ ନକି ଏଚ୍ଚିକିଃଆ ଗାଣ୍ଡିତି କୁଲାଟି ଅନଜିହୁଦି ମାଚ୍ଚେରି ଅଟେ ଜିହୁଦିଙ୍ଗ୍‌ତି ରିତିନିତି ଡ଼ାହି ସୁନତି ଆନ୍ନି ଦାଲ୍ଲା ନକେସି ସୁନତି ଆହେଃଲ୍ଲେରି ଇଞ୍ଜାନ୍ ପଙ୍ଗେଚ୍ଚେରି, 12ଏଚିତୁକାତାୱା ମିରୁ କ୍ରିସ୍ଟଟିଆଟି ରେମ୍ବାଚ୍ଚେରି, ଆଟେ ମିରୁ ଇସ୍ରାଏଲ ଦାଲ୍ଲାତାୱା ଆଡ୍ଡାହେଃଲ୍ଲାତେରି, ଏଦାକି ମୁଲାପେନୁ ତା ଦାଲ୍ଲା ବାଗା କିଆନ୍ନି ଦିବ୍ବାତି ଚୁକ୍ତିତାୱା ମିଙ୍ଗେ ଇନ୍ନି ବାଗା ପାଁନ୍‌ବନ୍ ହେଃଲ୍ଲାତେ, ଆଟେ ମି ବାଗା ପୁର୍ତିତାୱା ନାର୍ରା ହେଃଲ୍ଲାତେ ଅଟେ ମିରୁ ମୁଲାପେନୁ ହେଃଲ୍ଲାନ୍ ଡେହେଙ୍ଗ୍ ମାଚ୍ଚେରି, ଏଦା ମିରୁ ଏଲୁ କିଦୁ । 13ମତ୍ର ମିରୁ କାହେ ଦେହା ମାଚ୍ଚେରି, ହାଦାଡ଼ି ମିରୁ କ୍ରିସ୍ଟ ଜିସୁ ପାଟ୍ଟି ତା ରାକ୍କା ତାୱାଟି ଟାକ୍କେ ଆଞ୍ଜେରି । 14ଇନାକି ଏୱାଞ୍ଜି ତ ମା ଲତୁ, ଏୱାଞ୍ଜି ତା ଗାଣ୍ଡି ଡ଼ାହି ବେରୁ ଡେହେଙ୍ଗ୍‌ତି ଆଙ୍ଗା ଗୁଡ୍ଡାତିଦି ଲେକ୍‌ଚ୍ଚାନାହି ମାଙ୍ଗେ ରପାଟ୍ଟେ କିଆଞ୍ଜାନେଞ୍ଜି । 15#କଲ ୨:୧୪ଆଟେ ଏୱାଞ୍ଜି ମସାତି ହାଜୁ ଅଟେ ଜିହୁଦିଙ୍ଗ୍‌ତି ରିତିନିତି ହାବେ ତା ଗାଣ୍ଡିତାୱା ରଦୁ କିଆନ୍, ଇହିଙ୍ଗିସି ଏୱାଞ୍ଜି ଜିହୁଦି ଅଟେ ଅନଜିହୁଦିଙ୍ଗ୍ ଦାଲ୍ଲା ମାଦ୍ଦି ଲତୁ ତାଚ୍ଚାନାହି ତା ତାୱା ରଃଅଞ୍ଜି ପୁନି କୁଏଞ୍ଜି ଡେହେଙ୍ଗ୍ କ୍ଲେହାନ୍ନେଞ୍ଜି । 16#କଲ ୧:୨୦ଆଟେ ଏୱାଞ୍ଜି କ୍ରୁସତାୱା ବେରୁତିଦି ନାହେଡ୍ କିଆନ୍ ଏ ରି ଦଲତିଦି ରଣ୍ଡା ଗାଣ୍ଡି ଡେହେଙ୍ଗ୍ କିଆନାହି ମୁଲାପେନୁ ଡ଼ାହି ରିହିକ୍ ଆଟ୍‌ତେଞ୍ଜି । 17ଇନାକି ମିରୁ ଦେହା ମାଚ୍ଚେରି, ଆଟେ ଏୱାରି ଟାକ୍କେ ମାଚ୍ଚେରି, ଏୱାଞ୍ଜି ମି ମାଦ୍ଦେ ୱାନାହି ଲତୁତି ସୁସମାଚାର ପକ୍‌ତେଞ୍ଜି; 18ଇନାକି ଏୱାଞ୍ଜ୍ ବାଗା ମାରୁ ରି ଦାଲ୍ଲାତାସୁ ରଣ୍ଡା ଡିଙ୍ଗା ଡ଼ାହି ଆବା ରେଃଏସ୍ ହାଲ୍‌ବନ୍ ବାଗାଟି ପାହେର୍ ପାଁଣ୍ଡାନ୍ନା । 19ଏଦାକି ମିରୁ ହାଦାଡ଼ି ବିହି ଦେସାତାତେରି ଆଃଏ କି ଆଙ୍ଗେତାତେରି ଆଃଏ, ମତ୍ର ମିରୁ ମୁଲାପେନୁତି ପିର୍‌ନି ଦାଲ୍ଲା ଡ଼ାହି ତା ଦାଲ୍ଲା ଆଞ୍ଜେରି ଅଟେ ମୁଲାପେନୁତି କୁଟ୍ଟୁମ୍ ଆଞ୍ଜେରି । 20ମିରୁ ପେରିତ ଅଟେ ବାବବାଦିଙ୍ଗ୍‌ତି ପୁନ୍ନାଦି କୁଃଏଟି କ୍ଲେହାନ୍ନି ଇଡ୍ଡୁ ଡେହେଙ୍ଗ୍, ଆଟେ ଜିସୁ କ୍ରିସ୍ଟ ଆଇନ୍ନେଞ୍ଜି ଏ ପୁନ୍ନାଦି କନ୍ନତି ଗାମିନ୍ ୱାଲ୍ଲି । 21ଏ ଜିସୁ କ୍ରିସ୍ଟତାୱା ମୁକ୍କେଲ୍ ଇଡ୍ଡୁ ରପାଟ୍ଟେ ଆଡ୍ଡାନାହି ଦାର୍ମୁତାୱା ରଣ୍ଡା ପିର୍‌ନି ମନ୍ଦିର ଡେହେଙ୍ଗ୍ ଗାମେନ୍ନେ । 22ଆଟେ ମିରୁ ୱାଡ଼େ ତା ତାୱା ମୁଲାପେନୁତି ଆତ୍ମିକ ଇଡ୍ଡୁ ବାଗା ରପାଟ୍ଟେ କ୍ଲେହା ଆଇଞ୍ଜେରି ।

Currently Selected:

ଏପିସିୟ 2: DWK

Highlight

Compare

Copy