ଏପିସିୟ 1

ଜୁହାରି

1 # ପେରି ୧୮:୧୯–୨୧; ୧୯:୧ ନାନୁ ମୁଲାପେନୁତି ଇଚ୍ଚାଟି ଜିସୁ କ୍ରିସ୍ଟତି ପେରିତ ପାଉଲତାନୁ, ଏପିସିତାୱା ମାନ୍ନି ପିର୍‌ନି ଦାଲ୍ଲାନିକି ଅଟେ ଜିସୁ କ୍ରିସ୍ଟନିକି ମାଞ୍ଜାଡ଼ି କିନ୍ନି ଦାଲ୍ଲା ଟାକ୍କେ ୱ୍ରିଗେମାଃଇ । 2ମା ଆବା ମୁଲାପେନୁ ଅଟେ ଦାର୍ମୁ ଜିସୁ କ୍ରିସ୍ଟତାୱାଟି ମିରୁ ଅନୁଗ୍ରହ ଅଟେ ଲତୁ ପାଁଣ୍ତୁ ।

ଜିସୁ କ୍ରିସ୍ଟଟିଆଟି ଆତ୍ମିକ ମେଲା

3ମା ଦାର୍ମୁ ଜିସୁ କ୍ରିସ୍ଟତି ଆବା ମୁଲାପେନୁ ଦନ୍ୟ ଆପାକାଞ୍ଜି । ଇନାକି ଏୱାଞ୍ଜି ମାଙ୍ଗେ ଜିସୁ କ୍ରିସ୍ଟ ଡ଼ାହି ଆଟ୍‌ଚାନ୍ ସର୍ଗତାୱା ମାନ୍ନି ହାବେତ୍ ଆତ୍ମିକ ମେଲା କିଆଞ୍ଜାନେଞ୍ଜି । 4ଇ ପୁର୍ତି ପ୍ଲିଃଏଟେଃଏ ମୁଲାପେନୁ ମାଙ୍ଗେ ତା ଜେଡାଟି ତା ନକେସି ପିର୍‌ନି ଅଟେ ଦୁସି ଆଃଏଟେଃଏ ତଞ୍ଜନ୍ ବାଗା ଜିସୁ କ୍ରିସ୍ଟ ଡ଼ାହି ଆଚି କିଆଞ୍ଜାନେଞ୍ଜି । 5ମୁଲାପେନୁ ମାଙ୍ଗେ ଜିସୁ କ୍ରିସ୍ଟ ତାୱାଟି ତା ଲପ୍‌କା ମ୍ରିକା କିଅନ୍ ବାଗା ତା ଇଚ୍ଚାଟି ମାଙ୍ଗେ ଜେଡାଟି ନକିଟେଃଏ ଆଚି କିଆଞ୍ଜାନେଞ୍ଜି । 6ଇଦି ତା ଅନୁଗ୍ରହତି ଗଉରବ ଡ଼ାହି ତାଙ୍ଗେ ଜୁଙ୍ଗନ୍ ବାଗା ଆନ୍ନେ । ଏ ଅନୁଗ୍ରହ ତା ଜେଡାଗାଟି ମ୍ରିଃଏଞ୍ଜି ଜିସୁ କ୍ରିସ୍ଟ ତାୱାଟି ମାଙ୍ଗେ ଦାନ କିଆଞ୍ଜାନ୍ନେଞ୍ଜି । 7#କଲ ୧:୧୪ମାରୁ ଏ ଜିସୁ କ୍ରିସ୍ଟତି ରାକ୍କାଟି ମା ପାପୁତାୱାଟି କୁଲ୍‌ପା ପାଁଣ୍ଡାନ୍ନା ଇଚ୍ଚେସି, ମୁଲାପେନୁତି ଗାପ୍‌ଚି ଅନୁଗ୍ରହ ଡ଼ାହି ମାରୁ ମା ହାବେତ୍ ପାପତାୱାଟି ମାକ୍‌ସାଡ଼ି ପାଁଣ୍ଡାନ୍ନା । 8ମୁଲାପେନୁ ମାଙ୍ଗେ ଗ୍ୟାଁନ ଅଟେ ବୁଦ୍ଦି ଡ଼ାହି ହାବେତ୍ କୁଲା ପୁନ୍‌ବନ୍ ବାଗା ଇ ଅନୁଗ୍ରହ ଗାପ୍‌ଚି ହିଆଞ୍ଜାନେଞ୍ଜି । 9ନକିଟେଃଏ ମୁଲାପେନୁ ଜିସୁ କ୍ରିସ୍ଟତାୱାଟି ତା ନିଗ୍ଗା ଇଚ୍ଚାଟି କିଆନ୍ନି ଜୁଜନାତି ଲାଃଇତ୍ କାତା ମାଙ୍ଗେ ପୁନ୍‌ବି କିଆଞ୍ଜାନେଞ୍ଜି । 10ଆଟେ ମୁଲାପେନୁ ଟିକ୍ ତୁକାତାୱା ତା ଜୁଜନାତିଦି ସପଲ କିଅନ୍ ବାଗା ପୁର୍ତି ଅଟେ ଇ ସର୍ଗତାୱା ମାନ୍ନି ହାବେତ୍ କୁଲା କୁଃଏଟି କ୍ରିସ୍ଟନିକି ଗାମିନାଞ୍ଜି କିନେଞ୍ଜି ଅଟେ ତା ବାଗା ହାବେତ୍ କୁଲା ରପାଟ୍ଟେ କିଆନ୍ ତା ହକତ୍‌ତାୱା କିଟ୍ଟିନେଞ୍ଜି । 11ଏଦାକି ମୁଲାପେନୁ ତା ଜୁଜନା ଅଟେ ଇଚ୍ଚାଟି ହାବେତ୍ କାମା କିନ୍ନେଞ୍ଜି, ଇନାକି ମାରୁ ଜିସୁ କ୍ରିସ୍ଟନିକି ମାଞ୍ଜାଡ଼ି କିଆନ୍ନି ବାଗାଟି ତାନୁ ମାଙ୍ଗେ ତା ଦାଲ୍ଲା ଆଅନ୍ ବାଗା ନକିଟେଃଏ ଆଚି କିଆଞ୍ଜାନେଞ୍ଜି । ଆଟେ ଇ କାତା ତା ଜୁଜନା ଡେହେଙ୍ଗ୍ ଲେର୍ କିଆନ୍ନେଞ୍ଜି । 12ଏଦାକି ୱାଦୁ, ମାରୁ ଜେ ଜିହୁଦିଙ୍ଗ୍‌ନାସୁ ୱେଲେଟେଃଏ କ୍ରିସ୍ଟ ପାଟ୍ଟି ନାର୍ରା କିଟ୍ଟାନ୍ନି ଗାଟାସୁ, ମୁଲାପେନୁତି ଗଉରବତି କାମା ବାଗାଟି ଜୁଙ୍ଗିନା । 13ହାଦାଡ଼ି ଏୱାଞ୍ଜ୍‌ଟିଆଟି ମିରୁ ଜେ ଅନଜିହୁଦିଙ୍ଗ୍‌ନାତେରି ନିଜ୍ଜା ବାକ୍ୟ ଇଚ୍ଚେସି ମି ଜ୍ଡିପାତି ସୁସମାଚାର ୱେଞ୍ଜାନ୍ ମାଞ୍ଜାଡ଼ି କିତାୱିଃଆଟି, ମୁଲାପେନୁ ଦିବ୍ବା କିଆଚ୍ଚି ପିର୍‌ନି ଡିଙ୍ଗା ତାୱାଟି ମିରୁ ମୁଦ୍ରାଙ୍କିତ#୧:୧୩ ମୁଦ୍ରାଙ୍କିତ ଇଚ୍ଚେ ସିଲ୍ କିୱା ଆଞ୍ଜେରି । 14ଏଦାକି ମୁଲାପେନୁ ଗଉରବତି ଜୁଙ୍ଗନ୍ ପାଁନ୍‌ବନ୍ ବାଗା ତା କୁଲ୍‌ପା ଉଦେସିଆଟି ଏୱାଞ୍ଜି ମା ହକତ୍‌ତି ଜାମିନ୍‍ଗାଟାଞ୍ଜି ଡେହେଙ୍ଗ୍ ଆତେଞ୍ଜି ।

ମାଞ୍ଜାଡ଼ିଗାଟାର୍ ବାଗାଟି ପାଉଲତି ପ୍ରାତ୍‌ନା

15ଏଦାବାଗା ନାନୁ ଏଚ୍ଚିକିଃଆ ଦାର୍ମୁ ଜିସୁ କ୍ରିସ୍ଟ ପାଟ୍ଟି ମି ମାଞ୍ଜାଡ଼ି ଅଟେ ମୁଲାପେନୁତି ହାବେତ୍ ପିର୍‌ନି ଦାଲ୍ଲା ପାଟ୍ଟି ମି ଜେଡା ମାନ୍ନେ, 16ଏ କାତା ପୁଞ୍ଜାନ୍ ନାନୁ ୱାଡ଼େ ନା ପ୍ରାତ୍‌ନାତାୱା ମି ବାଗାଟି ମୁଲାପେନୁନିକି ଦନ୍ୟବାଦ ହିଅନି ୱାହେହେଃଲ୍ଲାନୁ । 17ମହିମାଗାଟି ଆବା, ମା ଦାର୍ମୁ ଜିସୁ କ୍ରିସ୍ଟତି ମୁଲାପେନୁନିକି ନାନୁ ହାବେ ୱେଲା ପ୍ରାତ୍‌ନା କିମାଃଇ ଜେ, ଏୱାଞ୍ଜି ମିଙ୍ଗେ ପିର୍‌ନି ଡିଙ୍ଗା ହିଆକାଞ୍ଜି । ଆଟେ ଇନିସ୍‌କି ମିରୁ ତାଙ୍ଗେ ପୁନ୍‌ବନ୍ ମୁଦେରି; ଏଦାକି ଏ ପିର୍‌ନି ଡିଙ୍ଗା ମିଙ୍ଗେ ଗ୍ୟାଁନ ହିଆନେ ଆଟେ ମୁଲାପେନୁତି ହାବେତ୍ କୁଲା ନେହେନ୍ ପୁନ୍‌ବି କିଆନେ । 18ଏମ୍ୱାଟି ଏଚ୍ଚିକିଃଆ ମି ହଡାଙ୍ଗ୍ ଲାଃଇତି କାଡ଼୍‌କା ହୁଡ଼ନ୍ ମୁନୁ, ତା ଆର୍‌ଚ୍ଚାଞ୍ଜାନି ନାର୍ରା ଅଟେ ପିର୍‌ନିଗାଟାର୍ ମାଦ୍ଦି ତା ହକତ୍‌ତି ଗଉରବ ଲାକ୍କାଟ୍‌ତି ଦନ ଇନ୍ନାଦି, 19ଆଟେ ମାରୁ ମାଞ୍ଜାଡ଼ିଗାଟାସୁ, ମାରୁ ମା ବାଗା ଇନିସ୍ ତା ଗାମିନ୍ ବଲ ଡ଼ାହି କାମାତି ଉଦେସ ହାବେ ପୁନ୍‌ବନ୍ ମୁନା, 20ଏ ବଲ ଡ଼ାହି ତାନୁ ଜିସୁ କ୍ରିସ୍ଟନିକି ହାଅନ୍‌ତାୱାଟି ନିକ୍‌ଚାନ୍ ସର୍ଗତାୱା ଆକୁଡ଼୍ କିନ୍ନି ହାବେତ୍ କୁଲା, ହକତ୍, ବଲ, ହକତ୍‌ତାୱାଟି ତାନୁ ବେର୍ରାନାଞ୍ଜି, ଆଟେ ଇ କାଲାତାୱା ଅଟେ ୱାଇନି କାଲାତାୱା ୱାଡ଼େ ହାବେତ୍ କୁଃଏଟି ସର୍ଗତାୱା ଗାମିନ୍ ପଦ ହିଆନ୍ନେଞ୍ଜି । 21ଏୱାଞ୍ଜି ପୁର୍ତିତି ହାବେତ୍ ଗାମିନ୍ ପଦଙ୍ଗ୍ କୁଃଏଟ୍ ଜିସୁ କ୍ରିସ୍ଟନିକି ଆକୁଡ଼୍‌ଗାଟାଞ୍ଜି କିଆନାହି ମୁଲାପେନୁ ସର୍ଗତାୱା ତା ତିନ୍ନି କାଜ୍ଜୁ ଇନ୍ଦେଟି କକ୍କି କିତେଞ୍ଜି । 22#କଲ ୧:୧୮ଆଟେ ହାବେତ୍ କୁଲା ଜିସୁତି କାଟ୍‌କା ନେତେ ସର୍ପି କିଆନ୍, ତାଙ୍ଗେ ହାବେତ୍ କୁଲା କୁଃଏଟି ତ୍ଲାଉ ଡେହେଙ୍ଗ୍ କିଆନ୍ ମଣ୍ଡଲିତିଦି ହିତେଞ୍ଜି । 23ଏ ମଣ୍ତଲି ଜିସୁ କ୍ରିସ୍ଟତି ଗାଣ୍ଡି ଆଟେ ଏ ମଣ୍ତଲି ହାବେତ୍ ୱାହୁଟି ଜିସୁ କ୍ରିସ୍ଟ ଡ଼ାହି ନେଞ୍ଜାନ୍ନେ ।

Currently Selected:

ଏପିସିୟ 1: DWK

Highlight

Compare

Copy