ଗାଲାତିୟ 5
5
କିରିସ୍ଟନା ଲାଗିରେ ନେଇ' ସାଦିନତା ବାଂଗୁତୁନେଇ'
1ସା' ନେଇ' ସାଦିନତା ବାଂସେକ୍ ଡୁକୁପୁଲେଇଉ କିରିସ୍ଟଲା ଆନେଇ' ଡୁ'ତୁନ୍ଉ ଗତି ଡେଂସେକ୍ ଡୁକୁନୁଂକୁରୁଂ ସତଇସା ବାଇରି ଅ'ତୁର'ତା । ସା' ନେଇ' ସଇଗା ଡେଂସେକ୍ ଡୁକୁଲାନେଇ', ଗୁତୁନ୍ ନିୟମ୍ନା ଗତି ଏପୁଲେଇ ନେଇ' ନେଇ'ନା ଜିବନ୍ ମାରି ଆବେ'ନେଇ' ।
2ଆ'ନା ନିଂ ପାଉଲଲା ମା ଡ'ସେକ୍ ସୁନ'ତିଂ ଗୁତୁନା ପେ ବଲ୍ ଅଂ: ନୁରିଂନା ଇସା ଅଗଗ୍ନା ବଲ୍ ଡ'ସେକ୍ ପେ ଏତ୍ତୁପେ ଡ'ନା, କିରିସ୍ଟଲା ପେପୁଲେଇ ମା ଡେମ'ତା ଗୁତୁନ୍ ବେକାରେ ଡେଂଉଇତା । 3ଜାଜା ନୁରିଂନା ଇସା ଅଗ'ତା ମା'ଏ ମସାଲା ବେଡ'କୁନୁଂ ନିୟମ୍ ଗୁଲାଇ ମାନ୍ସେକ୍ ଡୁକୁଡୁତା ଡ'ସେକ୍ ନିଂ ଆମା'ଏ ମାରି ସୁନ'ତିଂ । 4ମସାଲା ବେଡ'କୁନୁଂ ନିୟମ୍ ମାନ୍ଗୁତୁନେଇସା' ମାପ୍ରୁ ଜୁଲ'ନା ବଲ୍ ରେମ ଡ'ସେକ୍ ଆନେଇ ଜୁଲେଇ' ଡ'ସେକ୍ ପେ ସେସ୍ଟା ଡେମ'ତୁପେ ଡ'ନା ପେ କିରିସ୍ଟନ୍କୁରୁଂ ପାଲ୍ ଡେଂଉଇଗୁତୁପେ । ମାରି ପେ ମାପ୍ରୁନା ଦୟାକୁରୁଂ ସୁଲୁଂ ଡେଂଉଇଗୁତୁପେ। 5ମାତର୍ ନେଇ' ଡ'ନା ଆକିରିସ୍ଟଲା ବିସ୍ବାସ୍ ଡେମ'ତୁନେଇ'ସା' ମାପ୍ରୁ ଆନେଇ' ବଲ୍ରେମ୍ ଡ'ସେକ୍ ଜୁତ ଡ'ସେକ୍ ପବିତ୍ର ଆତ୍ମାନା ବପୁବୁରଂ ବଲ୍ ଆସ୍ସେକ୍ ଜାଗ୍ଲ' ଡୁ'ତୁନେଇ' । 6ମାସା'ଡ'ନା କିରିସ୍ଟ ଜିସୁଲାବୁରଂ ନେଇ' ବଲ୍ ମିସ୍ସେକ୍ ଡୁକୁନୁଂବେଲା ମୁଇନ୍ଡା ମାଇନା ନୁରିଂନା ଇସା ଅଗ'ତାକି ଆ'ଗ'ତା ଡ'ସେକ୍ ଆଜୁତ । ମାତର୍ ମା ମୁନା' ବିସୟ ଡ'ନା ମୁଇନ୍ଡା ଆକିରିସ୍ଟଲା ବିସ୍ବାସ୍ ଡେମ'ତାସା' ଆପାଲ୍ ରେମଲେ ଆଲାତ୍ ଡେମ'କୁନୁଂଉ ମାପ୍ରୁ ଜୁତ ।
7ପେ ତ ବଲ୍ ଉର'କୁପେ, ଆ'ନା ଗୁତୁନ୍ ସତ୍ବାଇ' ତୁମ' ବିସ୍ବାସ୍ ଡିନ୍ଡେମ୍ବକ୍ ଆପେ ଜା ବିଡ୍କାୟ' ବେଡ'? 8ଆପେ ଜା ୱାୟ'ତା ମାଇ ଡୁ'ତୁନ୍ବାଇ' ଆଡେମ୍ତ । 9#1 କରି 5:6 ଇ'କିସୁଗ କମିର ଆଗୁଲାଇ ତର୍ଲା' ଅ'ପୁଲ'ବେ'ତ । 10ପେ ମାଏସା ପାଲ୍ ତୁମ' ଆସପ୍ତୁପେ ଡ'ସେକ୍ ନିଂ ଆପେ ଏତ୍ସେକ୍ ପ୍ରବୁନ୍ବକ୍ ଅବୁଦି ବିସ୍ବାସ୍ ଡେମ'ତିଂ । ମାତର୍ ଜୁ, ଡୁ'ତୁନ୍ବାଇ' ପାଲ୍ପାଲ୍ ତୁମ' ଜା ପେନ୍ବକ୍ ରିଂଅଁ' ସାକ୍ସେକ୍ ଆପେ କସ୍ଟ ବେଡ'ତା ମାଇ ଜା ଡ'ନାସା ଆମାଇ ମାପ୍ରୁ ଡନ୍ଡ୍ ବେ'ତ । 11ଅ ନିଂନା ବୁୟାଂଏଁ ତୁନାଲେ, ନୁରିଂନା ଇସା ଅଗ' ଡୁତା ଡ'ସେକ୍ ନିଂ ଅମାଗ'କୁନାଏ ଜିଉଦିରେମଲେ ଆନିଂ କସ୍ଟ ଆବେ'ନା । ଡୁ'ତୁନାଉ ନିଂ ଅମାଗ'ସେକ୍ କିରିସ୍ଟଲା କୁର୍ସବକ୍ ଗୁଇ'କୁନୁଂ ବିସୟ ଆସୁନ'ନାଏ ମା'ଏ ଆନିଂ କସ୍ଟ ଆବେ'ନା । 12ଜାଜା ଆପେ ଡୁ'ତୁନା ଅମାଗ'ସେକ୍ କସ୍ଟ ବେଡ'ତା ଡୁ'ତୁନ୍ବାଇ' ରେମଲେ #5:12 ଆକେ ନିଜେ ନୁରିଂନା ଇସା ଅଗଗ୍ସୁଂଅଁ'ନା ବଲ୍ ଡେମାନା ଡ'ସେକ୍ ଲେକ୍ଲ'ତାନିଜେ ଅ'ରଇଁସୁଂଅଁ'ନା ବଲ୍ ଡେମାନା ଡ'ସେକ୍ ନିଂ ଆସ୍ଗୁତିଂ ।
13ଅ ବୁୟାଂଏଁ ତୁନାଲେ! ମାପ୍ରୁ ଆପେ ସାଦିନତା ବାଂସେକ୍ ଡୁକୁପୁଲେଇ ସିରେଲ'ତା । ମାତର୍ ଆ'ନା ନେଇ ସାଦିନତା ବାଂଗୁତୁନେଇସା ନେଇ ମାଏସା ଡିନ୍ଡେମ୍ ଗଂତୁନେଇ ଡ'ସେକ୍ ନିଜର୍ନା ଞେରିନା ମୁନ୍ସୁଗ ଗୁଲାଇ ପାପ୍କାମ୍ ଡେମ'ସେକ୍ ଡୁକୁପୁଲେଇ ପେ ଆଏତ୍ଗା' । ମାତର୍ ପେ ମୁଇନ୍ଡା ଆମୁଇନ୍ଡା ଆଲାତ୍ ଅ'ଡିନେଂସେକ୍ ସେବା ଡେମ୍ । 14ମାସା'ଡ'ନା “ପେ ନିଜେ ଆଲାତ୍ ଡେମ୍ବର୍କୁନୁଂସୁଗ ଆପାଲ୍ ରେମଲେସା ଆଲାତ୍ ଡିନ୍ଡେମ୍ ଡୁତା” ଡ'ସେକ୍ ଲେକ୍ଲ' ବେଡ'କୁନୁଂ କେନ୍ ମୁଇ ନିୟମ୍ ଜୁଲ'ନା ମସାଲା ବେଡ'କୁନୁଂ ପାଲ୍ ଗୁଲାଇ ନିୟମେ କେନ୍ ମୁଇ ନିୟମ୍ବକ୍ ଡୁତା । 15ପେ ପେନ୍ ବିତ୍ରେ ରିମ'ସେକ୍ ଅବୁନୁକ୍ ଅ'ତିନିତୁପେ ଡ'ନା, ପେ ପେନ୍ ବିତ୍ରେ ମୁଇନ୍ଡା ଆମୁଇନ୍ଡା ନସ୍ଟ ଡେମ୍ତୁପେ, ଗୁତୁନ୍ପୁଲେଇ ସଇଗା ଡେଂସେକ୍ ଡୁକୁଲା ।
ପବିତ୍ର ଆତ୍ମାନା ମୁନ୍ସୁଗ ଡୁକୁଲା
16ପବିତ୍ର ଆତ୍ମାନା ମୁନ୍ସୁଗ ପେ ଡୁକୁଲା । ଡୁ'ତୁନ୍ ଡୁକୁନା ପେ ପେନା ଞେରିନା ମୁନ୍ସୁଗ ମାସା ଅଲିରାକ୍କାମ୍ ଆଡେମ୍ତୁପେ ଡ'ସେକ୍ ନିଂ ଆପେ ସୁନ'ତିଂ । 17#ରମିୟ 7:15–23ନେଇ'ନା ଞେରିନା ମୁନ୍ ଇସାଉ ପାପ୍କାମ୍ ଡିନ୍ଡେମ୍ପୁଲେଇଉ ଡୁତା, ମାତର୍ ପବିତ୍ର ଆତ୍ମାନା ମୁନ୍ ଡ'ନା ଡୁ'ତୁନା ଆରାକ୍ । ପବିତ୍ର ଆତ୍ମାନା ମୁନ୍ ଡ'ନା ଞେରିନା ମୁନ୍କୁରୁଂ ପାଲ୍ ଡୁତା । ଗୁତୁନ୍ ଇମ୍ବାର୍ ମିସ୍ସେକ୍ ଆଉଇତା, ଇସାଉ ରିମ'ସେ'ଗାଉ ଡୁତାସା' ନେଇ' ମାମା ବଲ୍କାମ୍ ଡିନ୍ଡେମ୍ପୁଲେଇ ମୁନ୍ ଡେଂଗୁତୁନେଇ' ଗୁତୁନ୍ ଡିନ୍ଡେମ୍ ଆଗଂତୁନେଇ' । 18ମାତର୍ ପବିତ୍ର ଆତ୍ମାନା ମୁନ୍ସୁଗ ପେ ସାଲ୍ଗୁତୁପେ ଡ'ନା ମସାଲା ଲେକ୍ଲ' ବେଡ'କୁନୁଂ ନିୟମ୍ସୁଗ ଡୁକୁ ଦର୍କାର୍ ଆରାକ୍ ।
19ଞେରିନା ମୁନ୍ସୁଗ ପାପ୍କାମ୍ ଡେମ'ସେକ୍ ଡୁକୁନୁଂ ରେମଲେ ମି ଡୁତା ଡ'ସେକ୍ ନେଇ' ମାଗ'ତୁନେଇ'। ମା'ଏ ମାମା ଡେମ'ତା ଡ'ନା: ଜାଲିବାଇ' କାମ୍ ଡେମ'ତା, ଅଲିରାକ୍ବାଇ'ନା ଗୁଲାଇ ଡେମ'ତା, ଗିୟାସୁପ୍ବାଇ' କାମ୍ ଡେମ'ତା, 20ଆମୁର୍ତି ପୁଜା ଡେମ'ତା, ଏବାଇ' କାମ୍ ଡେମ'ତା, ମୁଇନ୍ଡା ଆମୁଇନ୍ଡା ଦାଇରେମ୍ ଡେଂସେକ୍ ରିମ୍ତ, ଆଂକାର୍ ଡେନ୍ତା, ଗିସେ'ତା, ମାରି ରେମଲେ ଆନିଂ ନାଉଲେଇ' ଡ'ସେକ୍ ଏତ୍ତା, ପାଲ୍ ରେମଲେବୁରଂ ଆମିସ୍ତା, ମା'ଏନା ତୁମ' ସବ'କୁନୁଂ ରେମଲେବୁରଂଉ ମିସ୍ତା , 21ମାରି କେମ'ବାଇ' ଡେନ୍ତା, ବିବିବାଇ' ଡେନ୍ତା, ସାର୍ଦା ଡିନ୍ଡେମ୍ପୁଲେଇ ଗୁଲାଇନା ଅଲିରାକ୍ବାଇ' ଡେମ'ତା; ଡି'କେନା ମା'ଏ ଅବୁଦି ପାଲ୍ପାଲ୍ ଡେମ'ତା । ନିଂ ମୁଲ୍ ଆପେ ମି ସୁନ'କୁନିଂ, ଆ'ନାସା ଡୁ'ତୁନାଉ ଆପେ ସଇଗା ଅ'ଡେମ୍ ଡେନ୍ତିଂ । ଜୁ, ଜାଜା ଡି'କେନ୍ବାଇ' ଗୁଲାଇ କାମ୍ ଡେମ'ସେକ୍ ଡୁତା ମା'ଏ ମାପ୍ରୁନ୍ ରାଜିବକ୍ ଗୁଗାଇପୁଲେଇ ଅଦିକାର୍ ଆବାମ୍ତା ।
22ମାତର୍ ପବିତ୍ର ଆତ୍ମାନା ବପୁବୁରଂ ନେଇ'ନା ଜିବନ୍ ମି ଡୁତା ଡ'ନା: ଆଲାତ୍, ସାର୍ଦା, ସାନ୍ତି, ଆଇଁଲ'ସେକ୍ ଡୁତା, ଦୟା ଡିନ୍ଡେମ୍, ବଲ୍କାମ୍ ଡିନ୍ଡେମ୍, ପାଲ୍ ରେମଲେ ଆନେଇ' ବିସ୍ବାସ୍ ଡିନ୍ଡେମ୍ ଗଂତା, 23ନିଂ ମୁଇନ୍ଡା ଡାଉରେମ୍ ଡ'ସେକ୍ ଏତ୍ବାର୍, ମାରି ମାମା ଅଲିରାକ୍ବାଇ' ଡିନ୍ଡେମ୍ନା ମୁନ୍ ସାକ୍ନାସା ଗୁତୁନ୍ ମଡିନେମ୍ ଆଇଁଲ'ସେକ୍ ଡୁତା । କେନ୍ ଗୁଲାଇ ଆଡେମ' ଆରା'ଗେ ଆଏତ୍ଗା' ଡ'ସେକ୍ ମସାଲା ବେଡ'କୁନୁଂ ଇମ୍ବ'ନ୍ ନିୟମ୍ବକ୍ସା ଆଡୁତା । 24ଜାଜା କିରିସ୍ଟ ଜିସୁଲାବୁରଂ ଡୁତା ମା'ଏ ନିଜର୍ନା ଞେରିନା ମୁନ୍ଇସା ମାରି ପାପ୍ବାଇ'ନା ଏତ୍ଗୁନ୍ ଗୁଲାଇ ଅଡକ୍ସୁଂଅଁ'ତା, ଗୁତୁନା ନେଇ' କୁର୍ସବକ୍ ତାଂଅଁ' ଅଗୁୟ'କୁନୁଂସୁଗ ଡେନ୍ତା । 25ନେଇ' ପବିତ୍ର ଆତ୍ମାନା ବପୁବୁରଂ ଜିବନ୍ ବାଂଗୁତୁନେଇ'ସା', ପବିତ୍ର ଆତ୍ମାନା ମୁନ୍ସୁଗ ନେଇ' ଡୁକୁଡୁତା । 26ନେଇ' ସରଉ ବଡ୍ପୁନ୍ ଆଡେମାନେଇ', ମୁଇନ୍ଡା ଆମୁଇନ୍ଡା ବିଜାର୍ ଆ'ଅଡେମାନେଇ' ମାରି ମୁଇନ୍ଡା ଆମୁଇନ୍ଡା ଆଂକାର୍ ଆ'ଅଡେମାନେଇ' ।
Currently Selected:
ଗାଲାତିୟ 5: BFW
Highlight
Share
Compare
Copy
Want to have your highlights saved across all your devices? Sign up or sign in
CC BY-NC-ND 4.0
