ଗାଲାତିୟ 4
4
1ନିଂ ମା ଡ'ସେକ୍ ସୁନ'ତିଂ ଡ'ନା: ଜୁ, ବାଡେଇଁନା ଗୁଲାଇ ଦନ୍ସମ୍ପତିନା ବାଗ୍ବକ୍ ଉଁ'ଉଁନ୍ଡେଇଁନା ଅଦିକାର୍ ଡୁତା ଡ'ନାସା ମାଇ ଡାଉବାଇ' ମୁଇନ୍ଡା ଗୁଲା ଡ'ନା, ମାଇ ମୁଇ ଗତିରେମ୍ସୁଗଉ ଡୁତା । 2ବାଡେଇଁ ବୁଂଅଁ'କୁନୁଂ ବେଲା ସୁସାପ୍ପନ୍ତେ'କା ଗୁତୁନ୍ ଉଁ'ଉଁନ୍ଡେଇଁ ଆମାଇ ଜାଗ୍ବାର୍ପୁଲେଇ ବୁଂଅଁ'କୁନୁଂ ରେମଲେନା ମାରି ବାଡେଇଁନା ଦନ୍ସମ୍ପତି ଜୁଜୁପୁଲେଇ ଡୁକୁନୁଂ ରେମଲେନା ତୁମ' ମାନ୍ସେକ୍ ଡୁକୁଡୁତା । 3ନେଇ'ସା ଡୁ'ତୁନ୍ଉ ଗୁବୁଲେସୁଗ ସିଁସେଇଁଉ ଡୁକୁନେଇ', ଆଇ'ତୁନ୍ବେଲା କେନ୍ ଦେସ୍ଦୁନିଆବକ୍ ନେଇ'ନା ନିୟମ୍ସୁଗ ଗୁଲାଇ ଡେମ'ସେକ୍ ଗୁତୁନ୍ ନିୟମ୍ନା ମୁଇ ଗତିରେମ୍ସୁଗ ଡୁକୁନେଇ' । 4ମାତର୍ ଟିକ୍ ବେଲା ଡେଂକୁନୁଂବକ୍ ମାପ୍ରୁ ଆନିଜର୍ନା ଉଁ'ଉଁ ଆଇଂଗେର୍ଗୁ ବେନ୍ଟାୟ' , ମାଇ ମୁଇ ସେଲାନ୍କୁରୁଂ ଜନମ୍ ଡେଂସେକ୍ ମସାଲା ବେଡ'କୁନୁଂ ଗୁଲାଇ ନିୟମ୍ ମାନ୍ସେକ୍ ଡୁକୁ ପଡ୍ଗା' । 5#ରମିୟ 8:15–17ମାସା'ଡ'ନା, ମସାନା ନିୟମ୍ ମାନ୍ସେକ୍ ଗୁତୁନ୍ ନିୟମ୍ନା ଗତିରେମ୍ସୁଗ ଡୁକୁନୁଂକୁରୁଂ ଆନେଇ' ଅ'ତୁର୍ପୁଲେଇ ମାରି ମାପ୍ରୁନା ଉଁ'ଉଁ ଏନା ଅଦିକାର୍ ଆନେଇ' ବୁମ୍ବାମ୍ପୁଲେଇ ମାଇ ଡୁ'ତୁନା ଡେମ' । 6ମାରି ନେଇ' ମାପ୍ରୁନା ଉଁ'ଉଁନେସା' ମାଇ ମାଇନା ଇଂଗେର୍ଗୁନା ଆତ୍ମା ନେଇ'ନା ଜିବନ୍ବକ୍ ବେନ୍ଟାୟ'; ସା' ଗୁତୁନ୍ ଆତ୍ମା “ଆବା!” ଡ'ନା “ଅ ନିଂନା ବା!” ଡ'ସେକ୍ ୱାଇପୁଲେଇ ଆନେଇ' ସାନ୍ଡୁଂଅଁ'ତା । 7ଡୁ'ତୁନ୍ସା', ପେ ଜୁ, ପେ ଆ'ନା ଗତିରେମ୍ ଆରାକ୍, ମାତର୍ ପେ ମାପ୍ରୁନା ଉଁ'ଉଁ ଡେଂଗୁତୁପେ । ପେ ମାଇନା ଉଁ'ଉଁ ଡେଂପେସା' ମାଇନା ଗୁଲାଇ ବିସୟନା ବାଗ୍ବକ୍ ମାଇ ଆପେ ଅଦିକାର୍ସା ବେଡ'ତା ।
ଗାଲାତିୟ ମୁନା'ଉଂଗମ୍ବକ୍ ଡୁକୁନୁଂ ରେମଲେନା ବାଗ୍ବକ୍ ପାଉଲଲା ଏତ୍ସେକ୍ ଡୁକୁନୁଂ
8ପେ ମୁଲ୍ ଆମାପ୍ରୁ ମମୁନାକ୍ ଡୁକୁନୁଂବେଲା ଇମ୍ବ'ନା ସତଇସା ମାପ୍ରୁଲେ ଆରାକ୍ ଡୁ'ତୁନ୍ବାଇ'ନା ଗତିରେମ୍ ଡେଂକୁପେ । 9ମାତର୍ ଆ'ନା ପେ ଆମାପ୍ରୁ ମାଗ'ତୁପେ, ଆରା'ଗେ ଜୁ, ଆ'ନା ମାପ୍ରୁ ଆପେ ମାଗ'ତା । ଡୁ'ତୁନ୍ ଡ'ନା ପେ ମାସା' ଇମ୍ବ'ନ୍ ନିୟମ୍ ଅବୁଦି ଦୁର୍ବଲ୍ବାଇ' ମାରି ବାସ୍ ମାସା କାମ୍ ମବିନେ'ବାଇ' ଡୁତା ଗୁତୁନ୍ ନିୟମ୍ନା ଗତିରେମେ ଏତୁନେଇ ଡ'ତୁପେ? ମାରି ଗୁତୁନ୍ ନିୟମ୍ବକ୍ ମାରି ଆନ୍ଡେଇଁସେକ୍ ଉଇପୁଲେଇ ମୁନ୍ ଡେଂଗୁତୁପେ? 10ପେ ଆ'ନାସା ଇମ୍ବ'ନ୍ ଦିନ୍ବକ୍ ମାମା ଡିନ୍ଡେମ୍ ଡୁତା ମାରି ମାସ୍କେ ମାସ୍ ମାମା ଡିନ୍ଡେମ୍ ଡୁତା ମାରି ବେଲା ଜୁଲ'ସେକ୍ ମାମା ଡିନ୍ଡେମ୍ ଡୁତା ମାରି ବରସ୍କେ ବରସ୍ ମାମା ଡିନ୍ଡେମ୍ ଡୁତା ଗୁତୁନ୍ ଗୁଲାଇ ବଲ୍ ଜୁଲ'ସେକ୍ ଡେମ'ଡେମ' ଡୁତୁପେ । 11ଜୁ, ପେନ୍ବକ୍ ନିଂ ମାମା କସ୍ଟ କାମ୍ ଡେମ'ତିଂ ଗୁତୁନ୍ ଗୁଲାଇ ସରଉ ଡେଂଉଇତାବେ ମାନ୍ଡେ ଡ'ସେକ୍ ନିଂ ଅବୁଦି ବୁତୁଂଗୁତିଂ ।
12ଅ ବୁୟାଂଏଁ ତୁନାଲେ, ନିଂ ପେସୁଗ ଡୁତିଂସା' ପେସା ନିଂସୁଗ ଡେମା । ନିଂ ପେନ୍ବକ୍ ଡୁକୁନୁଂବେଲା ପେ ଆନିଂ ମାଏସା କସ୍ଟ ଆବେ'ତୁପେ । 13ନିଂନା ଞେରିବକ୍ ଦୁକା ଡେଂସେକ୍ ଡୁକୁନିଂସା'ଉ ପେନ୍ବକ୍ ସାକ୍ସେକ୍ ନିଂ ମାପ୍ରୁନା ବଲ୍କବର୍ ଆପେ ମୁଲ୍ ସୁନ'ବୁଂଅଁ'ନିଂ ଡ'ସେକ୍ ପେ ମାଗ'ତୁପେ । 14ନିଂନା ଞେରିବକ୍ ଦୁକା ଡେଂସେକ୍ ଡୁକୁନିଂସା' ଆପେ ଅବୁଦି କସ୍ଟ ବାଂଗା' ଡ'ନାସା ପେ ଆନିଂ ଆଗୁମୁଇତୁପେ କି ଅନ୍ତୁର'ସେକ୍ସା ଆଡୁଂତୁପେ । ମାତର୍ ମାପ୍ରୁନ୍କୁରୁଂ ସା'କୁନୁଂ ମୁଇନ୍ଡା ଦୁତସୁଗ ମାରି ଆକିରିସ୍ଟ ଜିସୁଲା ଜୁଜୁସୁଗ ପେ ଆନିଂ ପେନ୍ବକ୍ ବଲ୍ ୱାୟ' ରିଂପେ । 15ପେ ଆଇ'ତୁନ୍ବେଲା ଅବୁଦି ସାର୍ଦା ଡେଂସେକ୍ ଡୁକୁପେ, ମାତର୍ ଆ'ନା ଗୁତୁନ୍ ସାର୍ଦା ଆମ୍ବ'ଲେଇ ? ଉନ୍ତା ପେ ଡ'ନା ନିଜର୍ନା ମ' ତକ୍ତକ୍ ଗଂନାଏ ତଗ'ସେକ୍ ଆନିଂ ବିବେ'ପୁଲେଇସା ମୁନ୍ ଡେଂସେକ୍ ଡୁକୁପେ ଡ'ସେକ୍ ନିଂ ସାକି ସୁଁସୁ ଗଂତିଂ। 16ଆ'ନା ନିଂ ଆପେ ସତ୍ ସୁନ'ନିଂସା', ନିଂ ପେନା ଦାଇରେମ୍ ଏଗ୍ନିଂ ଇ?
17ଗୁତୁନ୍ ନିୟମ୍ ଅମାକ୍ରେମେ ଆପେ ଅବୁଦି ସାର୍ଦା ଡିନ୍ଡେମ୍ବାଇ'ନା ତୁମ'ଡେ ସୁନ'ତା ମାତର୍ ଗୁତୁନା ପେନ୍ ବଲ୍ପୁଲେଇ ଡ'ସେକ୍ ଆରାକ୍ । ମା'ଏ ଆପେ ନେନ୍କୁରୁଂ ସୁଲୁଂ ଅ'ଡେମ'ସେକ୍ ପେ ମା'ଏନା ତୁମ' ଅଂଏଇ' ଡ'ସେକ୍ ମୁନ୍ ଡେଂସେକ୍ ଡି'କେନା ମା'ଏ ଡେମ'ତା । 18ମୁଇନ୍ଡା ପେନ୍ ବଲ୍ପୁଲେଇ ମାମା କାମ୍ ଡିନ୍ଡେମ୍ ମୁନ୍ ଡେଂଗୁତା ଡ'ନା ଗୁତୁନା ବଲ୍ ଡୁତା; ମାତର୍ ନିଂ ପେବୁରଂ ଡୁକୁନୁଂବେଲାଉ ଡୁ'ତୁନ୍ ଡିନ୍ଡେମ୍ନା ଆରାକ୍, ନିଂ ମଡୁକୁବେଲାସା ଇସାଉ ବଲ୍କାମ୍ ଡିନ୍ଡେମ୍ ଡୁତା । 19ଅ ରେମଲେ, ପେ ନିଂନା ଉଁ'ଉଁନେସୁଗ ଡୁତୁପେ! ମୁଇନ୍ଡା ୟଂଆଁ ଜନମ୍ସି ମୁଲାୟ'ସେକ୍ କସ୍ଟ ବାଂକୁନୁଂସୁଗ ନିଂ ଆପେ ଏତ୍ସେକ୍ ମାରି କସ୍ଟ ବାଂଗୁତିଂ । ପେନ୍ ଜିବନ୍ କିରିସ୍ଟଲାସୁଗ ଡେଂଉଇପନ୍ତେ'କା ନିଂ ଡି'କେନାଉ କସ୍ଟ ବାଂସେକ୍ ଡୁତିଂ । 20ଆ'ନା ନିଂ ପେନ୍ବକ୍ ଡୁକୁନାଏ ପେବୁରଂ ବଲ୍ ଅଇଁ ଗଂଆଁନିଂ ଡ'ସେକ୍ ମୁନ୍ ଡେଂଗୁତିଂ । ମାସା'ଡ'ନା ପେନା ବିସୟରେ ମା ଡେମ'ନା ଡେନ୍ତା ଡ'ସେକ୍ ନିଂ ସିନ୍ତାଲ'ସେକ୍ ଡୁତିଂ ।
ଆଗାର୍ଲା ମାରି ସାରାଲା
21ପେନ୍ ବିତ୍ରେ ଆ'ଇରସୁଗ ମସାନା ନିୟମ୍ ମାନ୍ସେକ୍ ଡୁକୁପୁଲେଇ ମୁନ୍ ଡେଂଗୁତୁପେ । ମାତର୍ ଗୁତୁନ୍ ନିୟମ୍ ମା ସୁନ'ତା ଡ'ସେକ୍ ସତଇସା ପେ ମାଗ' ଆଡୁତୁପେ ଇ? 22ମାସା'ଡ'ନା ଅବ୍ରାଆମ୍ନା ଇମ୍ବାୟ ଇଂଗେର୍ଗୁ ଡୁକୁଗା'; ମୁଇନ୍ଡା ଗତିବୁଇ'ନା ଉଁ'ଉଁ ମାରି ମୁଇନ୍ଡା ଗତିବୁଇ' ଆରାକ୍ବାଇ'ନା ଉଁ'ଉଁ ଡ'ସେକ୍ ମାପ୍ରୁନା ଉଲାକ୍ବକ୍ ଲେକ୍ଲ'ତା । 23ଗତିବୁଇ'ନା ସୁଲ'ଇ'କୁରୁଂ ଜନମ୍ ଡେଂକୁନୁଂ ଗୁତୁନ୍ ଇଂଗେର୍ଗୁ ଡ'ନା ରେମନା ମୁନ୍ସୁଗ ଜନମ୍ ଡେଂକୁନୁଂ; ମାତର୍ ଇମ୍ବ'ନ୍ ସେଲାନ୍ଲା ଗତିବୁଇ' ଆରାକ୍, ମାଇନା ସୁଲ'ଇ'କୁରୁଂ ଜନମ୍ ଡେଂକୁନୁଂ ଗୁତୁନ୍ ଇଂଗେର୍ଗୁ ଡ'ନା, ମାପ୍ରୁ ତିତି ବାଡ'ସେକ୍ ସୁନ'କୁଗା'ସା' ଜନମ୍ ଡେଂଗା' ।
24କେନ୍ ଉ'ସୁରାମ୍ ଆପେ ଅସୁୟ'ସେକ୍ ଅମାକ୍ପୁଲେଇ ନିଂ ସୁନ'ତିଂ । କେନ୍ ସେଲାନ୍ପା ମା ଡ'ନା ମାପ୍ରୁ ସବ'କୁନୁଂ ଇମ୍ବାରୁ ପର୍ମାନ୍। ମୁଇ ପର୍ମାନ୍ ମାପ୍ରୁ ସିନୟ ଡ'କୁନୁଂ କୁନ୍ଡା ବାଗ୍ବକ୍ ଡୁକୁନୁଂବେଲା ଆମସାଲା ବେଡ' । ଗୁତୁନ୍ ପର୍ମାନ୍ ଇସାପ୍ରେ ରେମଲେ ଗୁତୁନ୍ ପର୍ମାନ୍ ଗୁଲାଇ ଇସାଉ ମାନ୍ସେକ୍ ଡୁକୁନାଉ ଡେନ୍ତା । ଆଗାର୍ଲା ଗୁତୁନ୍ ପର୍ମାନ୍ନା ମୁଇ ସିନସୁଗ ଡୁତା । 25ଆଗାର୍ଲା ମା ଡ'ନା ଆରବ୍ ଦେସ୍ବକ୍ ଡୁକୁନୁଂ ସିନୟ ଡ'କୁନୁଂ କୁନ୍ଡା । ଆ'ନା ମାଇସୁଗ ଜିରୁସାଲମ୍ ମୁନା'ଉଂଗମ୍ ଡୁତା, ଗୁତୁନ୍ ଜିରୁସାଲମ୍ ମୁଇ ଗତିବୁଇ' ୟଂଆଁସୁଗ ଡୁତା ମାରି ଆତା ଡୁକୁନୁଂ ରେମଲେ ଗୁଲାଇର ଗତିବୁଇ'ନା ଉଁ'ଉଁନେସୁଗ ଗତିରେମ୍ ଡେଂଗୁତା । 26ମାତର୍ ବାଗ୍ବକ୍ ଡୁକୁନୁଂ ଗୁତୁନ୍ ଜିରୁସାଲମ୍ ଡ'ନା ମୁଇ ଗତିବୁଇ' ଆରାକ୍; ଆମାଇ ନେଇ' ନେଇ'ନା ୟଂସୁଗ ଜୁଲ'ତୁନେଇ'। 27ମାସା'ଡ'ନା ମାପ୍ରୁନା ଉଲାକ୍ବକ୍ ଡି'କେନା ଲେକ୍ଲ'ତା:
“ଅ ବାନ୍ଜିଲିବାଇ' ସେଲାନ୍, ନ ଆଜାଏସା ଇନ୍ଡ'ଇଏସା ଜନମ୍ ମଡିନେମ୍ ଡୁତୁନସା',
ନ ସାର୍ଦା ଡେମା;
ମାରି ଇନ୍ଡଇ'ଏସା ଜନମ୍ସି କସ୍ଟ ମବୁନାମ୍ବାଇ' ଡୁକୁନୁଂ ସେଲାନ୍ଲା,
ନ ଅବୁଦି ସାର୍ଦାକୁସି ଡେଂସେକ୍ ଅବୁଦି ଡକ୍ତି'ତା କିରଲା ;
ମାସା'ଡ'ନା ଇମ୍ପର୍ ଡୁକୁନୁଂ ସେଲାନ୍କୁରୁଂ
ଇମ୍ପର୍ ମଡୁକୁବାଇ' ଡୁକୁନୁଂ ସେଲାନ୍ବକ୍ ଅବୁଦି ଉଁ'ଉଁନେ ବାଂଗୁତା” ଡ'ସେକ୍ ଲେକ୍ଲ'ତା ।
28ଅ ବୁୟାଂଏଁ ତୁନାଲେ, ପେ ଡ'ନା ଅବ୍ରାଆମ୍ଲାବୁରଂ ମାପ୍ରୁ ତିତିବାଡ'ସା' ଜନମ୍ ଡେଂକୁନୁଂ ଇସାକ୍ଲାସୁଗ ମାପ୍ରୁ ତିତିବାଡ'ସେକ୍ ସୁନ'କୁନୁଂ ବିସ୍ବାସ୍ ଡେମ'ସା' ଜନମ୍ ଡେଂକୁନୁଂ ମାପ୍ରୁନା ଉଁ'ଉଁନେ । 29ଆଇ'ତୁନ୍ବେଲା ରେମନା ମୁନ୍ସୁଗ ଜନମ୍ ଡେଂକୁନୁଂଆଁ ପବିତ୍ର ଆତ୍ମାନା ବପୁବୁରଂ ଜନମ୍ ଡେଂକୁନୁଂଆଁବକ୍ ମି କସ୍ଟ ବେଡ'କୁଗା', ଡୁ'ତୁନ୍ସୁଗ ଆ'ନାସା ଡିନ୍ଡେମ୍ଡେନ୍ । 30ମାତର୍ ଗୁତୁନ୍ ବିସୟ ବାଗ୍ବକ୍ ମାପ୍ରୁନା ଉଲାକ୍ବକ୍ ମା ଡ'ସେକ୍ ଲେକ୍ଲ'ତା? “ଆତୁନ୍ ଗତିବୁଇ' ମାରି ଆମାଇନା ଉଁ'ଉଁ ଞନ'ସୁଂ । ମାସା'ଡ'ନା ଗତିବୁଇ' ଆରାକ୍ବାଇ'ନା ଉଁ'ଉଁବୁରଂ ଗତିବୁଇ'ନା ଉଁ'ଉଁ ଅଦିକାର୍ ଆବାମ୍ତା” ଡ'ସେକ୍ ଲେକ୍ଲ'ତା । 31ଡୁ'ତୁନ୍ସା', ଅ ବୁୟାଂଏଁ ତୁନାଲେ, ନେଇ' ଗତିବୁଇ'ନା ଉଁ'ଉଁନେ ଆରାକ୍, ମାତର୍ ନେଇ' ଜା ଗତିବୁଇ' ଆରାକ୍ ମାଇନା ଉଁ'ଉଁନେ ।
Currently Selected:
ଗାଲାତିୟ 4: BFW
Highlight
Share
Compare
Copy
Want to have your highlights saved across all your devices? Sign up or sign in
CC BY-NC-ND 4.0
