ଗାଲାତିୟ 6
6
ମୁଇନ୍ଡା ଆମୁଇନ୍ଡା ଅ'ସାନ୍ଡୁଂଆଁ
1ଅ ବୁୟାଂଏଁ ତୁନାଲେ! ପେନ୍ ବିତ୍ରେ ଜାଏସା ମୁଇନ୍ଡା ପାପ୍କାମ୍ ଡେମ'ତା ଡ'ସେକ୍ ପେ ମାଗ'ତୁପେ ଡ'ନା, ପେ ପବିତ୍ର ଆତ୍ମାନା ବପୁ ବାଂକୁନୁଂ ରେମଲେ ଆତୁନ୍ ପାପ୍କାମ୍ ଡେମ'କୁନୁଂ ରେମ, ନ ଡୁ'ତୁନ୍ ଡିନ୍ଡେମ୍ନା ବଲ୍ ଆରାକ୍ ଡ'ସେକ୍ ସୁୱାଲ୍ରେ ଅମାକ୍ ଡୁତା । ମାରି ପେନ୍ ଜିବନ୍ବକ୍ସା ଡୁ'ତୁନା ପାପ୍କାମ୍ ଡିନ୍ଡେମ୍ନା ପରିକା ସାକ୍ନା ଡୁ'ତୁନ୍ଉ ମଡିନ୍ଡେମ୍ପୁଲେଇ ସଇଗା ଡେଂସେକ୍ ଡୁକୁଲା । 2ମାରି ପେନ୍ ବିତ୍ରେ ଜାଏସା ଦୁକକସ୍ଟ ବାଂସେକ୍ ଡୁକୁନା ପେ ମୁଇନ୍ଡା ଆମୁଇନ୍ଡା ଅ'ସାନ୍ଡୁଂଆଁ । ପେ ଡି'କେନ୍ ଡେମ'ନା କିରିସ୍ଟନା ନିୟମ୍ ଗୁଲାଇ ବଲ୍ ମାନ୍ତୁପେ । 3ମୁଇନ୍ଡା ରେମ ମୁନା'ରେମ୍ ଆରାକ୍ ଡ'ନାସା ନିଂଉ ଅବୁଦି ମୁନା'ରେମ୍ ଡ'ସେକ୍ ନିଜେ ଏତ୍ତା ଡ'ନା ମାଇ ନିଜେ ନାଡାଇବର୍ଗୁତା । 4ମାତର୍ ମୁଇନ୍ଡା ମୁଇନ୍ଡା ନିଜର୍ନା କାମ୍ ମାରି ଏତ୍ ଗୁଲାଇ ମିବାଇ' ଡୁତା ଡ'ସେକ୍ ନିଜେ ପରିକା ଡେମ' ଜୁଜୁ ଡୁତା । ଡୁ'ତୁନ୍ ଡ'ନା ମାଇ ପାଲ୍ ରେମଲେବୁରଂ ଅ'ସରିକ୍ସେକ୍ ଆରାକ୍ ମାଇ ନିଜେ ଡେମ'କୁନୁଂ କାମ୍ ଜୁଲ'ସେକ୍ ବଡ୍ପୁନ୍ ଡିନ୍ଡେମ୍ ଗଂତା । 5ମାସା'ଡ'ନା ଗୁଲାଇ ରେମଲେ ନିଜର୍ ନିଜର୍ନା ଦାଇତ୍ ନିଜେନିଜେ ଡିନ୍ଡେମ୍ ଡୁତା । 6ଜା ମାପ୍ରୁନା ତୁମ' ସିକ୍ବାର୍ ଡେନ୍ତା ମାଇ ମାଇନ୍ବକ୍ ଡୁକୁନୁଂ ମାଏସା ବଲ୍ବଲ୍ଟାବାଇ' ଆମାଇ ଅମାକ୍ଡେଂକୁନୁଂ ରେମବକ୍ ବିବେ' ଡୁତା ।
7ପେ ନିଜେ ଆନାଡାଇବର୍ଗା' । ମାସା'ଡ'ନା ଆମାପ୍ରୁ ଅ'କିୟାଲି ଡିନ୍ଡେମ୍ ଆଗଂତୁପେ । ମୁଇନ୍ଡା ରେମ ମା ବି'ତ, ଗୁତୁନାଉ ମାଇ ଅଇ'ତ । 8ଜା ନିଜର୍ନା ଞେରିନା ମୁନ୍ସୁଗ ଡୁକୁନୁଂ କାମ୍ ଡେମ୍ତ ଆମାଇ ମାପ୍ରୁ ନାସାଇତ । ମାତର୍ ଜା ପବିତ୍ର ଆତ୍ମା ସାର୍ଦା ଡିନ୍ଡେମ୍ବାଇ' କାମ୍ ଡେମ୍ତ, ଆମାଇ ଗୁତୁନ୍ ପବିତ୍ର ଆତ୍ମା ସାନ୍ଡୁଂତସା' ମଡୁନମ୍ ଜିବନ୍ ବାମ୍ତା । 9ନେଇ' ବାନିବାଇ' କାମ୍ ଡିନ୍ଡେମ୍ବକ୍ ଆଲାକାରାନେଇ' । ମାସା'ଡ'ନା ନେଇ' ବାନିବାଇ' କାମ୍ ଡିନ୍ଡେମ୍ନା ବନ୍ଦ୍ ମଡିନେମ୍ ଡେମ'ସେ'ଗାଉ ଡୁକୁନା ମାପ୍ରୁନା ଟିକ୍ ବେଲାବକ୍ ନେଇ' ପୁରାସ୍ ବାମ୍ତୁନେଇ' । 10ଡୁ'ତୁନ୍ସା' ଆପାଲ୍ ରେମଲେ ସାନ୍ଡୁଂନା ସୁଜଗ ଆନେଇ' ଆ'ଇବେଲା ବାମ୍ତା, ଆଇ'ତୁନ୍ବେଲା ନେଇ' ଆଗୁଲାଇର ବଲ୍ ସାନ୍ଡୁଂଅଁ'ସେକ୍ ଡୁକୁଲାନେଇ' । ମାରି ମୁଇ ଡିଂଅଁନ୍ରେମ୍ସୁଗ ଡୁକୁନୁଂ ବିସ୍ବାସି ରେମଲେବକ୍ ଆଗୁଲାଇର ନେଇ' ଅଦିକ୍ ବଲ୍ ଜୁଜୁ ଡୁତା ।
ପାଉଲଲା ଡୁନଡମ୍ବେଲା ସୁନ'କୁନୁଂ ତୁମ'
11ଜୁ, ନିଂ ନିଜର୍ନା ତିତିବୁରଂ ଆ'ଇ ମୁନା'ମୁନା'ବାଇ' ଅକିୟରବୁରଂ ପେପୁଲେଇ କେନ୍ ସିଟି ଲେକ୍ଲ'ତିଂ ।
12ପାଲ୍ ରେମଲେ ଆନେଇ ନାଉଲେଇ' ଡ'ସେ'ଗାଉ ଏନ୍ତୁକ୍ର ନୁରିଂନା ଇସା ଅଗ'ଡା ଡ'ସେକ୍ ଆପେ ଜବର୍ଦସ୍ ଡେମ'ତା । ମାସା' ମା'ଏ ଡୁ'ତୁନା ଡେମ'ତା ଡ'ନା କିରିସ୍ଟଲା କୁର୍ସବକ୍ ଗୁଇ'କୁନୁଂ ବିସୟ ସୁନ'ନା ଆନେଇ' ଜିଉଦିରେମଲେ ଅବୁଦି କସ୍ଟ ବେ'ତ ଡ'ସେ'ଗାଉ ମା'ଏ ଡୁ'ତୁନା ଡେମ'ତା । 13ମାରି ଜାଜା ନୁରିଂନା ଇସା ଅଗ'ଗୁତା ମା'ଏ ନିଜେସା ମସାଲା ବେଡ'କୁନୁଂ ନିୟମ୍ ମାନ୍ ଆଡୁତା । ମାତର୍ ଆପେ ନୁରିଂନା ଇସା ଅଗ'ପୁଲେଇ ମା'ଏ ମୁନ୍ ଡେଂଗୁତା । ମାସା'ଡ'ନା ନେଇ ଜବର୍ଦସ୍ ଆମା'ଏ ଅ'ଡେମ'ତୁନେଇ ଡ'ସେକ୍ ପାଲ୍ ଜିଉଦିରେମଲେନ୍ବକ୍ ବଡ୍ପୁନ୍ ଡିନ୍ଡେମ୍ପୁଲେଇ ମା'ଏ ଡି'କେନା ଡେମ'ତା । 14ମାତର୍ ନିଂ ଡ'ନା ନେଇ'ନା ପ୍ରବୁ ଜିସୁ କିରିସ୍ଟଲା କୁର୍ସବକ୍ ଗୁଇ'କୁନୁଂ ବିସୟ ବାଗ୍ବକ୍ଉ ବଡ୍ପୁନ୍ ଡେନ୍ତିଂ, ଗୁତୁନ୍କୁରୁଂ ମାରି ଆମ୍ବ'ଏସା ନିଂନା ଜିବନ୍ ବଡ୍ପୁନ୍ ଆଡେମେଇ' । ମାସା'ଡ'ନା ପ୍ରବୁ ଜିସୁ କିରିସ୍ଟଲା ଗୁତୁନ୍ କୁର୍ସବକ୍ ଗୁଇ'କୁନୁଂବେଲା ନିଂସା ମାଇବୁରଂ ଗୁଇ'କୁନୁଂସୁଗ ଡୁତିଂସା' କେନ୍ ଦେସ୍ଦୁନିଆବକ୍ ଡୁକୁନୁଂ ଗୁଲାଇନା ବାଗ୍ବକ୍ ନିଂନା ମୁନ୍ ଆଡୁତା ମାରି ନିଂ ଇମ୍ବ'ନ୍ ବିସୟ ଅବୁଦି ମୁନା'ବାଇ' ଡ'ସେକ୍ ଏତ୍ଗୁତିଂ ଗୁତୁନ୍ ବାଗ୍ବକ୍ କେନ୍ ଦେସ୍ଦୁନିଆନା ରେମଲେ ମୁନ୍ ଆଡେନ୍ତା । 15ମୁଇନ୍ଡା ରେମ ନୁରିଂନା ଇସା ଅଗଗ୍ନା କି ଆ'ଗଗ୍ନା ଗୁତୁନା ମୁନା' ଆରାକ୍ । ମାତର୍ ମୁଇନ୍ଡା ତିମେ ଜିବନ୍ ବୁମ୍ବାମ୍ନାଉ ମୁନା' ବିସୟ । 16ଜାଜା କେନ୍ ନିୟମ୍ ମାନ୍ସେକ୍ ଡୁତା ଆମା'ଏ ମାରି ମାପ୍ରୁ ସିରେଲ'କୁନୁଂ ଆଇସ୍ରାଏଲ୍ରେମଲେ ମାପ୍ରୁନା ସାନ୍ତି ମାରି ଦୟା ବାମେଇ' ।
17ଆ'ନ୍ବାଂସା' କେନ୍ ବିସୟ ବାଗ୍ବକ୍ ଜାଏସା ଆନିଂ କସ୍ଟ ଆବେଡେଇ' । ମାସା'ଡ'ନା ଜିସୁଲାପୁଲେଇ ସେବା ଡେମ'କୁନିଂସା' ନିଂନା ଞେରିବକ୍ ମାଡ୍ ବାଂକୁନୁଂ ସିନ ଡୁତା ।
18ଅ ନିଂନା ବୁୟାଂଏଁ ତୁନାଲେ, ନେଇ'ନା ପ୍ରବୁ ଜିସୁ କିରିସ୍ଟନା ଦୟା ପେନ୍ ଗୁଲାଇରନ୍ ଜିବନ୍ବକ୍ ତିରେ ଡୁକୁଲେଇ' । ଆମେନ୍ ।
Currently Selected:
ଗାଲାତିୟ 6: BFW
Highlight
Share
Compare
Copy
Want to have your highlights saved across all your devices? Sign up or sign in
CC BY-NC-ND 4.0
