ଗାଲାତିୟ 3
3
ମସାଲା ଲେକ୍ଲ'କୁନୁଂ ନିୟମ୍ ମାରି ଆକିରିସ୍ଟଲା ବିସ୍ବାସ୍ ଡିନ୍ଡେମ୍ନା
1ଅ ଗାଲାତିୟନା ରେମଲେ, ପେ ବୁଦି ମଡୁକୁବାଇ' ରେମଲେ! ଆପେ ଜା ଏଲ'ସୁଂଅଁ'ସା' ପେ ଡି'କେନ୍ ଡେଂଗୁତୁପେ? ଆଜିସୁ କିରିସ୍ଟଲା କୁର୍ସବକ୍ ତାଂଅଁ'ସେକ୍ ଅଗୁୟ'କୁନୁଂନା ଅର୍ତ ମା ଡ'ସେକ୍ ମୁଇ ସିତ୍ର ଆପେ ଅସୁୟ'କୁନୁଂସୁଗ ନିଂ ଅବୁଦି ବଲ୍ ସୁନ'ବୁଂଅଁ'ନିଂ । 2ନିଂ ଆପେ କେନା ମୁଇଉ ଅ'ଗଁସ୍ଲାକ୍ତିଂ ପେ ସୁଁ, ମସାଲା ବେଡ'କୁନୁଂ ନିୟମ୍ ପେ ମାନ୍ପେସା' ପେ ପବିତ୍ର ଆତ୍ମା ବାଂପେ ଇ? ଆରାକ୍! ଜୁ, ପେ ବଲ୍କବର୍ ଅଂଅଁ'ସେକ୍ ଗୁତୁନ୍ ବିସ୍ବାସ୍ ଡେମ'ପେସା'ଉ ପବିତ୍ର ଆତ୍ମା ବାଂଗୁତୁପେ । 3ମାସା' ପେ ବୁଦି ମଡୁକୁବାଇ' ରେମଲେସୁଗ ଡେଂଗୁତୁପେ? ପେ ପବିତ୍ର ଆତ୍ମାନା ବପୁବୁରଂ ଆକିରିସ୍ଟଲା ବିସ୍ବାସ୍ ଡିନ୍ଡେମ୍ ମୁଲାୟ'ସେକ୍ ଆ'ନା ନିଜର୍ନା ବପୁବୁରଂ ଗୁତୁନ୍ ଅ'ଡମ୍ତୁନେଇ ଡ'ସେକ୍ ଏତ୍ଗୁତୁପେ ଇ? 4ମାରି ପେ ଆକିରିସ୍ଟଲା ବିସ୍ବାସ୍ ଡେମ'ସେକ୍ କସ୍ଟ ବାଂକୁନୁଂ ଗୁଲାଇ ବେକାର୍ ଡେଂଗା' ଇ? ଗୁତୁନ୍ ଗୁଲାଇ ଇନ୍ଡଇ'ଏସା ବେକାର୍ ଆଡେନ୍ତା! 5ନିଂ ଆପେ ମାରି ଅ'ଗଁସ୍ଲାକ୍ତିଂ ପେ ସୁଁ, ପେ ମସାଲା ବେଡ'କୁନୁଂ ନିୟମ୍ ମାନ୍ଗୁତୁପେସା' ମାପ୍ରୁ ଆପେ ପବିତ୍ର ଆତ୍ମା ବେଡ'ସେକ୍ ପେନ୍ ବିତ୍ରେ ମାମା କାବାକାବା ଡିନ୍ଡେମ୍ବାଇ' କାମ୍ ଡେମ'ତା ଇ? ଇନ୍ଡଇ'ଏସା ଆରାକ୍! ପେ ବଲ୍କବର୍ ଅଂଅଁ'ସେକ୍ ଆକିରିସ୍ଟଲା ବିସ୍ବାସ୍ ଡେମ'ପେସା'ଉ ମାପ୍ରୁ ଡୁ'ତୁନା ଡେମ'ତା । 6#ରମିୟ 4:3ଜୁ, “ଅବ୍ରାଆମ୍ଲା ଆମାପ୍ରୁ ବିସ୍ବାସ୍ ଡେମ'ସା' ମାଇନା ବିସ୍ବାସ୍ ଜୁଲ'ସେକ୍ ମାପ୍ରୁ ଆମାଇ ଦରମ୍ରେମ୍ ଡ'ସେକ୍ ଜୁଲ'” ଡ'ସେକ୍ ମାପ୍ରୁନା ଉଲାକ୍ବକ୍ ଲେକ୍ଲ'ତା ।
7 #
ରମିୟ 4:16
ଡୁ'ତୁନ୍ ଡ'ନା ଜାଜା ବିସ୍ବାସ୍ ଡେମ'ତା ମା'ଏଉ ଅବ୍ରାଆମ୍ନା ଉଁ'ଉଁନେ ଡ'ସେକ୍ ପେ ମାଗ'କୁଲା । 8ମାରି ଜିଉଦି ଆରାକ୍ବାଇ' ରେମଲେ ବିସ୍ବାସ୍ ଡେମ'ନା ମାପ୍ରୁ ମା'ଏନା ପାପ୍ ଗୁଲାଇ ଗୁଇଡାଗ'ସୁଂତ ଡ'ସେକ୍ ମାପ୍ରୁ ଇନ୍ତେକନ୍ଡେ'କାଉ ମାଗ'କୁସା' ଆଅବ୍ରାଆମ୍ଲା ସୁନ'କୁନୁଂ ବାନିକବର୍ ମାପ୍ରୁନା ଉଲାକ୍ବକ୍ ଲେକ୍ଲ'ବୁଂଅଁ'ତା । ମାପ୍ରୁ ଆଅବ୍ରାଆମ୍ଲା ମା ଡ'କୁ ଡ'ନା: “ନନ୍କୁରୁଂ କେନ୍ ଦର୍ତନିବକ୍ ଡୁକୁନୁଂ ଗୁଲାଇ ଜାତିନ୍ ରେମଲେ ଆସିର୍ବାଦ୍ ବାମ୍ତା” ଡ'ସେକ୍ ମାପ୍ରୁ ସୁନ'କୁ । 9ଅବ୍ରାଆମ୍ଲା ଆମାପ୍ରୁ ବିସ୍ବାସ୍ ଡେମ'ସେକ୍ ମି ଆସିର୍ବାଦ୍ ବାଂଗା' ଡୁ'ତୁନ୍ସୁଗ ଜାଜା ବିସ୍ବାସ୍ ଡେମ'ତା ମା'ଏ ଅବ୍ରାଆମ୍ଲାବୁରଂ ଆସିର୍ବାଦ୍ ବାଂଗୁତା ।
ମାପ୍ରୁ ଜୁଲ'ନା ବଲ୍ ଡ'କୁନୁଂ ମୁଇନ୍ଡା ବିସ୍ବାସ୍ବୁରଂ ବୁର'ତା
10ମାସା'ଡ'ନା ମସାଲା ବେଡ'କୁନୁଂ ନିୟମ୍ ମାନ୍ସେକ୍ ଡୁକୁନା ମାପ୍ରୁ ନେଇ'ନା ପାପ୍ ଗୁଲାଇ ଗୁଇଡାଗ'ସୁଂତ ଡ'ସେକ୍ ଏତ୍କୁନୁଂ ରେମଲେବକ୍ ମାପ୍ରୁ ଆନା ବୁଂଅଁ'ତା । ମାସା'ଡ'ନା ମାପ୍ରୁନା ଉଲାକ୍ବକ୍ ମା ଲେକ୍ଲ'ତା ଡ'ନା: “ମସାଲା ଲେକ୍ଲ'କୁନୁଂ ନିୟମ୍ ଗୁଲାଇ ମାନ୍ସେକ୍ ଗୁତୁନ୍ସୁଗ ଜାଜା ଆସାଲ୍ତା ଆମା'ଏ ମାପ୍ରୁ ଆନା ବୁଂତ” ଡ'ସେକ୍ ଲେକ୍ଲ'ତା । 11ମାତର୍ ମସାଲା ଲେକ୍ଲ' ବେଡ'କୁନୁଂ ନିୟମ୍ ମାନ୍ସେକ୍ ଡୁକୁନୁଂ ରେମଲେନା ପାପ୍ ଗୁଲାଇ ମାପ୍ରୁ ଗୁଇଡାଗ' ଆସୁଂତ ଡ'ସେକ୍ ଆ'ନା ବଲ୍ ଜୁଜୁ ଗଂଗୁତା, ମାସା'ଡ'ନା ମାପ୍ରୁନା ଉଲାକ୍ବକ୍ ମା ଡ'ସେକ୍ ଲେକ୍ଲ'ତା ଡ'ନା: “ମାପ୍ରୁ ଜୁଲ'ନା ବଲ୍ ରେମ ଡ'କୁନୁଂ ମୁଇନ୍ଡା ଆମାପ୍ରୁ ବିସ୍ବାସ୍ ଡେମ'ତାସା'ଉ ବୁରଗୁତା” ଡ'ସେକ୍ ଲେକ୍ଲ'ତା । 12ମାତର୍ ମାପ୍ରୁ ନିୟମ୍ ବେଡ'କୁନୁଂବେଲା ଆନିଂ ପେ ବିସ୍ବାସ୍ ଡିନ୍ଡେମ୍ ଡୁତା ଡ'ସେକ୍ ଆସୁନ୍ତ, ମାତର୍ ମାଇ ମା ଡ'କୁ ଡ'ନା “ଜାଜା ମାପ୍ରୁନା ନିୟମ୍ ଗୁଲାଇଉ ବଲ୍ ମାନ୍ସେକ୍ ଡୁତା ମା'ଏ ଜିବନ୍ ବାମ୍ତା” ଡ'ସେକ୍ ସୁନ'କୁ । 13“ଆଜାଆଜା ସୁଲପ୍ବକ୍ ତାଂଅଁ'ସେକ୍ ଅଗୁୟ'ତା ଆମା'ଏ ଆଗୁଲାଇର ମାପ୍ରୁ ଆନା ବୁଂଅଁ'ତା” ଡ'ସେକ୍ ମାପ୍ରୁନା ଉଲାକ୍ବକ୍ ଲେକ୍ଲ'କୁନୁଂସୁଗ ନେଇ' ରେମଲେ ଗୁତୁନ୍ ନିୟମ୍ ଗୁଲାଇ ଇସାଉ ବଲ୍ ମାନ୍ସେକ୍ ଆଡୁତୁନେଇ'ସା' ନେଇ' ବୁମ୍ବାମ୍ନା ଗୁତୁନ୍ ଆନାକୁରୁଂ କିରିସ୍ଟଲା ଆନେଇ' ରକ୍ୟା ଡେମ'ତା । ମାସା'ଡ'ନା ଆନେଇ' ବୁମ୍ବାମ୍ନା ଆନା କିରିସ୍ଟଲା ନିଜର୍ନା ଞେରିବକ୍ ନେଇ'ପୁଲେଇ ରିଂଗା' । 14ମାପ୍ରୁ ଆଅବ୍ରାଆମ୍ଲା ଆସିର୍ବାଦ୍ ଡେମ'କୁନୁଂସୁଗ ଜାଜା ଜିଉଦିରେମଲେ ଆରାକ୍ ମା'ଏ ଆକିରିସ୍ଟ ଜିସୁଲା ବିସ୍ବାସ୍ ଡେମ'ସେକ୍ ଗୁତୁନ୍ ଆସିର୍ବାଦ୍ ବୁମ୍ବାମ୍ପୁଲେଇ ମାଇ ଡୁ'ତୁନା ଡେମ'ତା । ଡୁ'ତୁନ୍ସା' ନେଇ' ଆକିରିସ୍ଟଲା ବିସ୍ବାସ୍ ଡେମ'ତୁନେଇ'ସା' ଆନେଇ' ବେ'ତିଂ ଡ'ସେକ୍ ମାପ୍ରୁ ତିତି ବାଡ'ସେକ୍ ସୁନ'କୁନୁଂ ଗୁତୁନ୍ ପବିତ୍ର ଆତ୍ମା ନେଇ' ବୁମ୍ବାମ୍ ଗଂତୁନେଇ' ।
ମସାଲା ଲେକ୍ଲ' ବେଡ'କୁନୁଂ ନିୟମ୍ ମାରି ମାପ୍ରୁ ତିତି ବାଡ'ସେକ୍ ସୁନ'କୁନୁଂ
15ଅ ବୁୟାଂଏଁ ତୁନାଲେ, ରେମଲେ ଇସାଉ ଡେମ'କୁନୁଂ ମୁଇ ଆପେ ଅସୁୟ'ସେକ୍ ସୁନ୍ତିଂ । ଜୁ, ମୁଇନ୍ଡା ରେମ ପାଲ୍ ମୁଇନ୍ଡା ରେମବୁରଂ ପର୍ମାନ୍ ସବ'ନା ଗୁତୁନ୍ ନିଂ ଆଡେମ୍ତିଂ ଡ'ସେକ୍ ଜାଏସା ସୁଁସୁସା ଆଗଂତା କି ଜାଏସା ଗୁତୁନ୍ବକ୍ ମିସାଇଁବାର୍ସା ଆଗଂତା । 16ଆଅବ୍ରାଆମ୍ଲା ମାରି ଆ'ଉଁଡେଇଁ ମାପ୍ରୁ ତିତିବାଡ'ସେକ୍ ସୁନ'କୁ । ମାପ୍ରୁନା ଉଲାକ୍ବକ୍ ମାଇନା ଉଁ'ଉଁନେ ଅବୁଦିରବକ୍ ଜୁଲ'ସେକ୍ ସୁଁସୁସୁଗ “ଉଁ'ଉଁନେପୁଲେଇ” ଡ'ସେକ୍ ସୁନ' ଆଡୁତା । ମାତର୍ “ନନା ଉଁ'ଉଁପୁଲେଇ” ଡ'ନା ମୁଇନ୍ଡାଉପୁଲେଇ ଡ'ସେକ୍ ଅର୍ତ ଡୁତା, ଗୁତୁନ୍ ମୁଇନ୍ଡା ଜା ଡ'ନା କିରିସ୍ଟଲା । 17ନିଂ ମା ଡ' ସୁନ'ତିଂ ଡ'ନା: ମାପ୍ରୁଲା ଅବ୍ରାଆମ୍ଲାବୁରଂ ତିତିବାଡ' ସୁନ'ସେକ୍ 430 ବରସ୍ ତିର୍ଗି' ମାପ୍ରୁ ଆମସାଲା ନିୟମ୍ ବେଡ'ସା' ଅବ୍ରାଆମ୍ଲାବୁରଂ ମାପ୍ରୁ ଇନ୍ତେ ତିତିବାଡ' ସୁନ'କୁନୁଂ ଗୁତୁନ୍ ନିୟମ୍ ବନ୍ଦ୍ ଆଡେମ୍ତ, ସା' ଡୁ'ତୁନ୍ଉ ମାପ୍ରୁ ପର୍ମାନ୍ ସବ'କୁନୁଂ ସରଉ ଡେଂଆଉଇତା । 18#ରମିୟ 4:14ମାସା'ଡ'ନା ମସାଲା ଲେକ୍ଲ' ବେଡ'କୁନୁଂ ନିୟମ୍ ମାନ୍ଗୁତା ଡ'ସେକ୍ ମାପ୍ରୁ ନିଂ ବେ'ତିଂ ଡ'ସେକ୍ ତିତିବାଡ'କୁନୁଂ ଗୁଲାଇ ବେଡ'ତା ଡ'ନା ମାଇ ବେ'ତିଂ ଡ'ସେକ୍ ପର୍ମାନ୍ ସବ'କୁନୁଂସୁଗ ଆଡେନ୍ତା । ମାତର୍ ମାପ୍ରୁ ଦୟା ଡେଂସେକ୍ ବେ'ତିଂ ଡ'ସେକ୍ ପର୍ମାନ୍ ସବ'କୁସା' ଆଅବ୍ରାଆମ୍ଲା ଗୁତୁନ୍ ବେଡ' ।
19ଡୁ'ତୁନ୍ ଡ'ନା ମାପୁଲେଇ ମାପ୍ରୁ ଆମସାଲା ଗୁତୁନ୍ ନିୟମ୍ ବେଡ'? ଗୁତୁନ୍ ନିୟମ୍ ମାପୁଲେଇ ବେଡ' ଡ'ନା ରେମଲେ ଆ'ଇ ପାପ୍ବାଇ' ଡ'ସେକ୍ ଆରେମଲେ ଅସୁଇ'ପୁଲେଇ ବେଡ'କୁ । ମାତର୍ ଆଅବ୍ରାଆମ୍ଲା ପର୍ମାନ୍ ସବ'କୁନୁଂ ଗୁତୁନ୍ ଗୁଲା ସୁସାପ୍ପନ୍ତେ'କା ଗୁତୁନ୍ ନିୟମ୍ ଡୁକୁ । ଗୁତୁନ୍ ନିୟମ୍ ସରଗ୍ନା ଦୁତଲେ ଆମସାଲା ବେଡ'କୁ, ମାରି ମାଇ ଗୁତୁନ୍ ନିୟମ୍ ଆରେମଲେ ସୁଁସୁପୁଲେଇ ମନ୍ଜା ତଂକୁ । 20ଇମ୍ବାୟ ଆରା'ଗେ ଗୁତୁନ୍କୁରୁଂ ଅଦିକ୍ ରେମଲେ ଡୁକୁନାଉ ମନ୍ଜା ଡୁକୁପୁଲେଇ ପାଲ୍ ମୁଇନ୍ଡା ରେମ ଦର୍କାର୍ ପଡ୍ତା । ମାତର୍ ମାପ୍ରୁ ମୁଇନ୍ଡାଉ ଡୁତା, ମାଇ ସିଦା ଆଅବ୍ରାଆମ୍ଲା ତିତିବାଡ'କୁ ।
ନିୟମ୍ ମାପୁଲେଇ ବେଡ'?
21ଡୁ'ତୁନ୍ ଡ'ନା ମାପ୍ରୁ ଆମସାଲା ବେଡ'କୁନୁଂ ଗୁତୁନ୍ ନିୟମ୍ ମାରି ମାଇ ସିଁସେଇଁଉ ତିତି ବାଡ'ସେକ୍ ସୁନ'କୁନୁଂବୁରଂ ମିସ୍ସେକ୍ ଆଉଇତା ଇ? ଆରାକ୍, ତିରେ ମିସ୍ସେକ୍ ଉଇତା! ମାସା'ଡ'ନା ଆରେମଲେ ଗୁତୁନ୍ ନିୟମ୍ ତିମେ ଜିବନ୍ ବେଡ'ନାଏ, ରେମଲେ ଗୁତୁନ୍ ନିୟମ୍ ମାନ୍ସେକ୍ ଡୁକୁନୁଂ ମାପ୍ରୁ ଜୁଲ'ସେକ୍ ସତଇସା ଆରେମଲେ ବଲ୍ରେମ୍ ଡ'ସେକ୍ ଜୁନା । 22ମାତର୍ ମାପ୍ରୁନା ଉଲାକ୍ବକ୍ ମା ଲେକ୍ଲ'ତା ଡ'ନା: କେନ୍ ଦର୍ତନିନା ଗୁଲାଇ ରେମଲେ ବନ୍ଦିବକ୍ ଡୁକୁନୁଂ ରେମଲେ ବାଇରି ତୁତୁର୍ ମଗୁନଂ ଡୁକୁନୁଂସୁଗ ପାପ୍ ଡେମ'ସେକ୍ ଡୁତା । ସା' ଆଜିସୁ କିରିସ୍ଟଲା ବିସ୍ବାସ୍ ଡେମ'କୁନୁଂ ରେମଲେବକ୍ ବେ'ତିଂ ଡ'ସେକ୍ ମାପ୍ରୁ ତିତିବାଡ'କୁନୁଂ ଗୁତୁନ୍ ଗୁଲାଇ ବିସ୍ବାସ୍ ଡେମ'କୁନୁଂ ରେମଲେବକ୍ ମାଇ ବେ'ତ ।
ମାପ୍ରୁନା ଉଁ'ଉଁନେ
23ଆକିରିସ୍ଟଲା ବିସ୍ବାସ୍ ଡିନ୍ଡେମ୍ନା ବିସୟ ସୁସାପ୍ ସିଁସେଇଁଉ ମସାଲା ଲେକ୍ଲ' ବେଡ'କୁନୁଂ ଗୁତୁନ୍ ନିୟମ୍ ଆନେଇ' ବନ୍ଦି ଡେମ'ସେକ୍ ବୁଂଅଁ'କୁ । କେନ୍ ବିସ୍ବାସ୍ ଡିନ୍ଡେମ୍ନା ବିସୟ ଆନେଇ' ଅସୁଇ'ପନ୍ତେ'କା ନେଇ' ଗୁତୁନ୍ ନିୟମ୍ବକ୍ ଲେକ୍ଲ'କୁନୁଂସୁଗଉ ଇସାଉ ଡେମ'ସେକ୍ ଡୁକୁ ପଡ୍କୁ । 24କିରିସ୍ଟଲା ସୁସାପ୍ପନ୍ତେକ୍ ମସାଲା ଲେକ୍ଲ' ବେଡ'କୁନୁଂ ନିୟମ୍ ଆନେଇ' ବଲ୍ ଜୁଜୁରେମ୍ସୁଗ ଡୁକୁ । ମାସା'ଡ'ନା ନେଇ' ଆକିରିସ୍ଟଲା ବିସ୍ବାସ୍ ଡେମ'ତୁନେଇ'ସା' ମାପ୍ରୁ ଜୁଲ'ନା ନେଇ' ବଲ୍ରେମ୍ ଏପୁଲେଇ ମାଇ ଡୁ'ତୁନ୍ଉ ଡେମ' । 25ମାତର୍ ଆ'ନା ଆକିରିସ୍ଟଲା ବିସ୍ବାସ୍ ଡିନ୍ଡେମ୍ନା ବିସୟ ମାପ୍ରୁ ଆନେଇ' ଅସୁୟ'ସା' ମସାଲା ଲେକ୍ଲ' ବେଡ'କୁନୁଂ ଗୁତୁନ୍ ନିୟମ୍ ଆନେଇ' ବଲ୍ ଜୁଜୁରେମ୍ସୁଗ ଡୁକୁ ଦର୍କାର୍ ଆରାକ୍ ।
26ମାସା'ଡ'ନା ପେ ଗୁଲାଇର ଆକିରିସ୍ଟ ଜିସୁଲା ବିସ୍ବାସ୍ ଡେମ'ତୁପେସା' ମାପ୍ରୁନା ଉଁ'ଉଁନେ ଡେଂଗୁତୁପେ । 27ପେ ଜାଜା ବାପ୍ତିସ୍ମା ରିଂସେକ୍ କିରିସ୍ଟଲାବୁରଂ ମିସ୍ସେକ୍ ଡୁତୁପେ, ପେ ଗୁଲାଇର ତିମେ ସକା ମୁଇନ୍ଡା ଅଲୁ'କୁନୁଂସୁଗ ଆ'ନା କିରିସ୍ଟଲାସୁଗ ଡେଂଗୁତୁପେ । 28ଜିଉଦି ଡେମେଇ' କି ଜିଉଦି ଆରାକ୍ବାଇ' ଡେମେଇ', ଗତିରେମ୍ ଡେମେଇ' କି ଗତି ଆରାକ୍ବାଇ' ଡେମେଇ', ଇଂଗେରେ ଡେମେଇ' କି ସେଲାନେ ଡେମେଇ', ପେନ୍ ବିତ୍ରେ ଡୁ'ତୁନ୍ଉ ପାଲ୍ପାଲ୍ ମାଏସା ଆଡୁତା । ମାସା'ଡ'ନା ପେ ଗୁଲାଇର କିରିସ୍ଟ ଜିସୁଲାବୁରଂ ଡୁତୁପେସା' ଗୁଲାଇର ସମାନ୍ ଡୁତୁପେ । 29#ରମିୟ 4:13ପେ କିରିସ୍ଟଲାବୁରଂ ଡୁତୁପେ ଡ'ନା ପେ ଅବ୍ରାଆମ୍ନା ଉଁ'ଉଁନେସୁଗ ଡୁତୁପେ । ମାରି ମାପ୍ରୁ ବେ'ତିଂ ଡ'ସେକ୍ ତିତିବାଡ'କୁନୁଂ ଗୁତୁନ୍ ଅଦିକାର୍ ଗୁଲାଇ ପେ ବାମ୍ତୁପେ ।
Currently Selected:
ଗାଲାତିୟ 3: BFW
Highlight
Share
Compare
Copy
Want to have your highlights saved across all your devices? Sign up or sign in
CC BY-NC-ND 4.0
