ଗାଲାତିୟ 2
2
ପାଉଲଲା ମାରି ପାଲ୍ ପେରିତଲେ
1 #
ପେରିତ 11:30; 15:2 ସଉଦ ବରସ୍ ତିର୍ଗି' ଜିରୁସାଲମ୍ ମୁନା'ଉଂଗମ୍ବକ୍ ମାରି ନିଂ ଉଇନିଂ । ଆଇ'ତୁନ୍ବେଲା ବର୍ନବାଲାବୁରଂ ଉଇନିଂ ମାରି ଆତିତସ୍ଲାସା ୱାୟ' ଉଇନିଂ । 2ଆତା ଉଇ ଡୁତା ଡ'ସେକ୍ ମାପ୍ରୁ ଆନିଂ ଅସୁୟ'ବେଡ'ସା'ଉ ନିଂ ଆତା ଉଇନିଂ । ସା' ନିଂ ଆତା ଉଇସେକ୍ ମୁନା'ରେମଲେବୁରଂ ପାଲ୍ ଜାଏସା ମଡୁକୁବକ୍ ଅଇଁୟ'କୁନିଂ । ଜାଜା ଜିଉଦିରେମଲେ ଆରାକ୍ ମା'ଏନ୍ବକ୍ ଉଇସେକ୍ ନିଂ ଇମ୍ବ'ନ୍ ବଲ୍କବର୍ ସୁନ'କୁନିଂ ଗୁତୁନ୍ ଗୁଲାଇ ଆମା'ଏ ଆଗୁଲାଇର ସୁନ'ନିଂ । ମାସା'ଡ'ନା ନିଂ ସିଁସେଇଁଉ ମାମା ଡେମ'କୁନିଂ ମାରି ଆ'ନା ମାମା ଡିନ୍ଡେମ୍ ଡେନ୍ତିଂ ଗୁତୁନ୍ ଗୁଲାଇ ସରଉ ଆବୁଡେଇ' ଡ'ସେକ୍ ମୁନ୍ ଡେଂସେଗା'ଉ ନିଂ ଡୁ'ତୁନା ଡେମ'ନିଂ । 3ନିଂବୁରଂ ଡୁକୁନୁଂ ତିତସ୍ଲା ମୁଇନ୍ଡା ଗିରିକ୍ ରେମ ଡ'ନାସା, ଆମାଇ ସୁନତ୍ ଅ'ଡେମ୍ ଡୁତା ଡ'ସେକ୍ ମା'ଏ ଜବର୍ଦସ୍ ଡେମ' ଆଡୁତା । 4କେନ୍ ସୁନତ୍ ଡିନ୍ଡେମ୍ନା ବିସୟ ମାସା' ଅଇଁ ଡୁକୁଗା' ଡ'ନା ଏନ୍ତୁକ୍ର ନେଇ ଆଜିସୁ ବିସ୍ବାସ୍ ଡେମ'ତୁନେଇ ଡ'ସେକ୍ ପଲୁ ସୁଁସୁବାଇ' ରେମଲେ ଆତା ସତଇସା ଆଜିସୁ ବିସ୍ବାସ୍ ଡେମ'କୁନୁଂ ରେମଲେନ୍ବକ୍ ଗାଇଗୁତା । ମାସା'ଡ'ନା ନେଇ' କିରିସ୍ଟ ଜିସୁଲାବୁରଂ ଡୁତୁନେଇ'ସା' ଜିଉଦିରେମଲେନା ଗୁଲାଇ ନିୟମ୍ ମାନ୍ସେକ୍ ଡୁକୁନୁଂସୁଗ ଆ'ନା ଡୁକୁ ଦର୍କାର୍ ଆରାକ୍; ସା' ନେଇ' ମି ଗୁଲାଇ ଡେମ'ତୁନେଇ' ଡ'ସେକ୍ ଜୁଜୁପୁଲେଇ ମାରି ନେଇ' ଡୁ'ତୁନ୍ଉ ଡେମ' ଆଡୁତୁନେଇ' ଡ'ନା ଗୁତୁନ୍ ନିୟମ୍ ମାନ୍ସେକ୍ ଡୁକୁଡୁତା ଡ'ସେକ୍ ଆନେଇ' ଜବର୍ଦସ୍ ଅ'ଡେମ୍ପୁଲେଇ ମା'ଏ ଗାଇଗୁତା । 5ମାତର୍ ମା'ଏ ସୁନ'କୁନୁଂସୁଗ ନେଇ ଇ'କିସା ଆଡେମ୍ତୁନେଇ । ମାସା'ଡ'ନା ଇମ୍ବ'ନା ସତ୍ବାଇ' ବଲ୍କବର୍ ନେଇ ଆପେ ଅମାଗ'ନେଇ ଗୁତୁନ୍ ବଲ୍କବର୍ ପେ ବଲ୍ ବିସ୍ବାସ୍ ଡେମ'ସେକ୍ ଡୁକୁଡୁତା ଡ'ସେକ୍ ନେଇ ଏତ୍କୁନେଇ ।
6ମାରି ଆତା ମୁନା'ରେମେ ଡୁକୁନୁଂଏଁ; ମା'ଏ ମୁନା'ରେମ୍ ଆରା'ଗେ ଡାଉରେମ୍ ଡୁକୁଲେଇ', ନିଂ ଗୁତୁନା ଆଜୁତିଂ, ମାସା'ଡ'ନା ମାପ୍ରୁ ଆରେମଲେ ପାଲ୍ପାଲ୍ ଆଜୁତ । ମା'ଏ ଜାଏସା ନିଂ ସୁନ'କୁନୁଂ ବଲ୍କବର୍ବକ୍ ମାଏସା ତୁମ' ଆମିସାଇଁତ । 7ମାତର୍ ମା'ଏ ମା ମାଗ' ଡ'ନା; ମାପ୍ରୁ ଆପିତର୍ଲା ଜିଉଦିରେମଲେନ୍ବକ୍ ଉଇସେକ୍ ବଲ୍କବର୍ ସୁଁସୁପୁଲେଇ ବପୁ ବେଡ'କୁନୁଂସୁଗ ଜାଜା ଜିଉଦିରେମଲେ ଆରାକ୍ ମା'ଏନ୍ବକ୍ ଉଇସେକ୍ ବଲ୍କବର୍ ସୁଁସୁପୁଲେଇ ଆନିଂସା ମାପ୍ରୁ ବପୁ ବେଡ'ତା ଡ'ସେକ୍ ମା'ଏ ମାଗ' । 8ମାସା'ଡ'ନା ଜିଉଦିରେମଲେନ୍ବକ୍ ଉଇସେକ୍ ପେରିତଲେନ୍ କାମ୍ ଡିନ୍ଡେମ୍ପୁଲେଇ ଜା ଆପିତର୍ଲା ବପୁ ବେଡ' ଗୁତୁନ୍ ମାପ୍ରୁ ଜାଜା ଜିଉଦି ଆରାକ୍ ଡୁ'ତୁନ୍ବାଇ' ରେମଲେନ୍ବକ୍ ଉଇସେକ୍ ପେରିତଲେନ୍ କାମ୍ ଡିନ୍ଡେମ୍ପୁଲେଇ ଆନିଂସା ବପୁ ବେଡ'ତା । 9ମାପ୍ରୁ ଆନିଂ ଦୟା ଡେମ'ସେକ୍ କେନ୍ କାମ୍ ଡିନ୍ଡେମ୍ପୁଲେଇ ବପୁ ବେଡ'ତା ଡ'ସେକ୍ ମା'ଏ ମୁନା'ରେମେ ଜାକୁବ୍ଲା, ପିତର୍ଲା ମାରି ଜଅନ୍ଲା ମାଗ'ସା' ମା'ଏବୁରଂ ମିସ୍ସେ'ଗା' କାମ୍ ଡିନ୍ଡେମ୍ପୁଲେଇ ଆବର୍ନବାନା ମାରି ଆନିଂନା ତିତି ସବ'ସେକ୍ ମା'ଏବୁରଂ ଆନାଂ ମିସାୟ' । ସା' ଜାଜା ଜିଉଦିରେମ ଆରାକ୍ ମା'ଏନ୍ବକ୍ ଉଇସେକ୍ କାମ୍ ଡିନ୍ଡେମ୍ପୁଲେଇ ଆନାଂ ମା'ଏ ସୁନ' ମାରି ଜିଉଦିରେମଲେନ୍ବକ୍ ଉଇସେକ୍ କାମ୍ ଡିନ୍ଡେମ୍ପୁଲେଇ ମା'ଏ ରାଜି ଡେଂଗା' । 10ପା ଆଗରିବ୍ରେମେ ଏତ୍ସେକ୍ ସାନ୍ଡୁଂ ଡୁତା ଡ'ସେ'ଗାଉ ମା'ଏ ଆନାଂ ସୁନ'କୁ । ଗୁତୁନ୍ କାମ୍ ଡିନ୍ଡେମ୍ପୁଲେଇ ନିଂସା ଅବୁଦି ମୁନ୍ ଡେଂକୁନିଂ ।
ଆନ୍ତିୟକିଆବକ୍ ପାଉଲଲା ଆପିତର୍ଲା ସୁନ'କୁନୁଂ
11ମାତର୍ ପିତର୍ଲା ଆନ୍ତିୟକିଆ ମୁନା'ଉଂଗମ୍ବକ୍ ସା'ଗା'ସା' ମାଇ ମା ବୁଲ୍କାମ୍ ଡିନ୍ଡେମ୍ ଡେନ୍ତା ଡ'ସେକ୍ ନିଂ ଆମାଇ ସିଦାସିଦା ସୁନ'ବେଡ'ନିଂ । 12ମାସା'ଡ'ନା ପିତର୍ଲା ଆନ୍ତିୟକିଆବକ୍ ଉଇସେକ୍ ଜିଉଦି ଆରାକ୍ବାଇ' ରେମଲେବୁରଂ ସିଁସେଇଁଉ ସୁମ'ଇଡ' ଡୁକୁଗା' । ମାତର୍ ଆଜିସୁ ବିସ୍ବାସ୍ ଡେମ'କୁନୁଂ ଜିଉଦିରେମଲେ ଏନ୍ତୁକ୍ର ଜାକୁବ୍ଲା ବେନ୍ଟାୟ'ସା' ଆତା ସା'ଗା' । ଉନ୍ତା ପିତର୍ଲା ଆମା'ଏ ବୁତୁଂସେକ୍ ଗୁତୁନ୍ ଜିଉଦି ଆରାକ୍ବାଇ' ରେମଲେବୁରଂ ସୁସୁମ୍ଇ'ନା ବନ୍ଦ୍ ଡେମ'ସେକ୍ ମା'ଏନ୍କୁରୁଂ ସୁଲୁଂ ଡୁକୁ । 13ସା' ଆତା ଆଜିସୁ ବିସ୍ବାସ୍ ଡେମ'ସେକ୍ ଡୁକୁନୁଂ ପାଲ୍ ଜିଉଦିରେମଲେସା ଡୁ'ତୁନ୍ ଡିନ୍ଡେମ୍ ବଲ୍ ଆରାକ୍ ଡ'ସେକ୍ ମାଗ'ସେକ୍ସା ପିତର୍ଲା ଡେମ'କୁନୁଂସୁଗଉ ଡେମ'; ସା' ମା ଡେଂଗା' ଡ'ନା ବର୍ନବାଲାସା ମା'ଏ ଡେମ'କୁନୁଂ ଗୁତୁନ୍ ବୁଲ୍କାମ୍ ଡିନ୍ଡେମ୍ନା ଜୁଲ'ସେକ୍ ଡୁ'ତୁନାଉ ଡେମ' ।
14ନିଂ ସୁନ'କୁନୁଂ ଗୁତୁନ୍ ସତ୍ବାଇ' ବଲ୍କବର୍ସୁଗ ମା'ଏ ଆସାଲ୍ତା ଡ'ସେକ୍ ମାଗ'ନିଂସା' ନିଂ ଆପିତର୍ଲା ଗୁଲାଇ ରେମଲେ ଡୁକୁନୁଂବକ୍ ମା ସୁନ'ନିଂ ଡ'ନା: “ନ ଜିଉଦିରେମ ଡ'ନାସା ଜିଉଦିରେମଲେନା ନିୟମ୍ ମମାନ୍ବାର୍ ଜିଉଦି ଆରାକ୍ବାଇ' ରେମଲେସୁଗ ଡୁତୁନ । ଡୁ'ତୁନ୍ ଡ'ନା ନ ମାସା' ଜିଉଦିରେମଲେନା ନିୟମ୍ ଜିଉଦି ଆରାକ୍ବାଇ' ରେମଲେବକ୍ ପେ ମାନ୍ବାର୍ ଡୁତା ଡ'ସେକ୍ ଜବର୍ଦସ୍ ଡେମ'ତୁନ?
15ନେଇ' ଜନମ୍ବାଂସା'ଉ ଜିଉଦିରେମଲେ, ପାପ୍ବାଇ' ରେମଲେ ଡ'ସେକ୍ ନେଇ' ସୁନ'କୁନୁଂ ଗୁତୁନ୍ ଜିଉଦି ଆରାକ୍ବାଇ' ରେମଲେସୁଗ ନେଇ' ଆରାକ୍ । 16#ରମିୟ 3:20; ରମିୟ 3:22ଜାଏସା ମୁଇନ୍ଡା ରେମ ମସାଲା ବେଡ'କୁନୁଂ ନିୟମ୍ ଗୁଲାଇ ମାନ୍ସେକ୍ ଡୁତା ଡ'ସେକ୍ ମାପ୍ରୁ ମାଇନା ପାପ୍ ଗୁଲାଇ ଗୁଇଡାଗ' ଆସୁଂତ । ମାତର୍ ଆକିରିସ୍ଟ ଜିସୁଲା ବିସ୍ବାସ୍ ଡେମ'ନାଉ ମାପ୍ରୁ ମାଇନା ପାପ୍ ଗୁଲାଇ ଗୁଇଡାଗ'ସୁଂତ ଡ'ସେକ୍ ନେଇ' ମାଗ'ତୁନେଇ' । ଡୁ'ତୁନ୍ସା' ନେଇ' ମସାଲା ବେଡ'କୁନୁଂ ନିୟମ୍ ଗୁଲାଇ ମାନ୍ସେକ୍ ଡୁକୁନା ନେଇ'ନା ପାପ୍ ଗୁଲାଇ ମାପ୍ରୁ ଗୁଇଡାଗ'ସୁଂତ ଡ'ସେକ୍ ଆରାକ୍ ମାତର୍ ନେଇ' ଆଜିସୁ କିରିସ୍ଟଲା ବିସ୍ବାସ୍ ଡେମ'ତୁନେଇ'ସା' ମାପ୍ରୁ ନେଇ'ନା ପାପ୍ ଗୁଲାଇ ଗୁଇଡାଗ'ସୁଂତ ଡ'ସେକ୍ ଆକିରିସ୍ଟ ଜିସୁଲା ବିସ୍ବାସ୍ ଡେମ'ତୁନେଇ' । ମାସା'ଡ'ନା ମସାଲା ବେଡ'କୁନୁଂ ନିୟମ୍ ମୁଇନ୍ଡା ମାନ୍ଗୁତା ଡ'ସେକ୍ ମାପ୍ରୁ ମାଇନା ପାପ୍ ଗୁଲାଇ ଗୁଇଡାଗ' ଆସୁଂତ ।
17ମାତର୍ ମାପ୍ରୁ ନେଇ'ନା ପାପ୍ ଗୁଲାଇ ଗୁଇଡାଗ'ସୁଂସୁଂପୁଲେଇ ନେଇ' ଆଜିସୁ କିରିସ୍ଟଲା ବିସ୍ବାସ୍ ଡେମ'ତୁନେଇ'ସା' ଜିଉଦିରେମଲେନା ନିୟମ୍ସୁଗ ଆଡୁତୁନେଇ'ସା' ଜିଉଦି ଆରାକ୍ବାଇ' ରେମଲେସୁଗ ପାପ୍ରେମ୍ ଡ'ନା କିରିସ୍ଟଲା ଆନେଇ' ଡୁ'ତୁନ୍ଉ ପାପ୍ ଅ'ଡେମ'ତା ଇ? ଆରାକ୍ , କିରିସ୍ଟଲା ଡୁ'ତୁନା ଇନ୍ଡଇ'ଏସା ଆଡେମ୍ତ । 18ମାତର୍ ନିଂ ଆଡେମ୍ତିଂ ଡ'ସେକ୍ ଅଡକ୍ସୁଂଅଁ'କୁନୁଂ ଗୁତୁନ୍ ଗୁଲାଇ ନିୟମ୍ ମାରି ଡେମ୍ତିଂ ଡ'ସେକ୍ ମୁଲାୟ'ନା ନିଂ ମୁଇନ୍ଡା ନିୟମ୍ ମମାନ୍ବାର୍ବାଇ' ରେମ ।
19ମାସା'ଡ'ନା ନିୟମ୍ବକ୍ ଲେକ୍ଲ'କୁନୁଂସୁଗ ନିଂ ଆ'ନା ଡେମ'ସେକ୍ ଆଡୁତିଂ , ଡ'ନା ମୁଇନ୍ଡା ଗୁଇ'କୁନୁଂ ରେମ ମାଏସା ମଡିନେମ୍ ଡୁକୁନୁଂସୁଗ ନିଂ ଗୁତୁନ୍ ନିୟମ୍ ମୁଇଉସା ମଡିନେମ୍ ଡୁତିଂ । ଡୁ'ତୁନ୍ଉ ଡୁକୁନା ଜିବନ୍ ଡୁକୁନୁଂ ମୁଇନ୍ଡା ରେମସୁଗ ମାପ୍ରୁପୁଲେଇ ବୁରକ୍ସେକ୍ ଡୁକୁ ଗଂତିଂ । 20ସା' ଜୁଲ'ନା କିରିସ୍ଟଲା କୁର୍ସବକ୍ ଗୁଇ'କୁନୁଂବେଲା ନିଂସା ମାଇବୁରଂ କୁର୍ସବକ୍ ଗୁଇ'କୁନୁଂସୁଗ ଆ'ନା ଡୁତିଂ । ଆ'ନା ନିଂନା ମୁନ୍ସୁଗ ଡୁକୁନୁଂ ନିଂନା ବାୟୁର୍ନା ଜିବନ୍ ନିଂବକ୍ ଆଡୁତା, ମାତର୍ କିରିସ୍ଟଲାଉ ନିଂବକ୍ ବୁର'ଗୁତା । ନିଂ ଆ'ନା କେନ୍ ଞେରିବକ୍ ଡୁକୁନୁଂବେଲା ମାପ୍ରୁନା ଉଁ'ଉଁନ୍ବକ୍ ବିସ୍ବାସ୍ ଡେମ'ସେକ୍ ଡୁତିଂ, ମାଇଉ ଆନିଂ ଆଲାତ୍ ଡେମ'ସେକ୍ ନିଜର୍ନା ଜିବନ୍ ନିଂପୁଲେଇ ଗେବର୍ଗା' । 21ମାପ୍ରୁ ଆନିଂ ଦୟା ଡେମ'କୁନୁଂ ସରଉନା ଡ'ସେକ୍ ଆଏତ୍ତିଂ । ମାସା'ଡ'ନା ମସାନା ନିୟମ୍ ମାନ୍ସେକ୍ ଡୁତାସା' ମାପ୍ରୁ ଜୁଲ'ନା ରେମଲେ ବଲ୍ରେମ୍ ଡ'ସେକ୍ ଡୁକୁନାଏ, ଜିସୁ କିରିସ୍ଟଲା ଗୁଇ'କୁନୁଂ ବେକାରେ ଡେଂଉୟାନା ।”
Currently Selected:
ଗାଲାତିୟ 2: BFW
Highlight
Share
Compare
Copy
Want to have your highlights saved across all your devices? Sign up or sign in
CC BY-NC-ND 4.0
