ଗାଲାତିୟ 1
1
1ନିଂ ପାଉଲଲା, ନିଂ ଜିସୁ କିରିସ୍ଟନା ମୁଇନ୍ଡା ପେରିତ, କେନ୍ ସିଟି ଲେକ୍ଲ'ତିଂ । ରେମଲେନା ମୁଇ ଦଲ୍ ଆରା'ଗେ ଜାଏସା ମୁଇନ୍ଡା ରେମ ଆନିଂ ନ ପେରିତ ଏଲା ଡ'ସେକ୍ ସିରେଲ'ଆଡୁତା, ମାତର୍ ଜିସୁ କିରିସ୍ଟଲା ମାରି ଆମାଇ ଗୁଇ'କୁନୁଂକୁରୁଂ ଜା ବ'ରଲ' ଗୁତୁନ୍ ନେଇ'ନା ବା ମାପ୍ରୁଲାଉ ଆନିଂ ପେରିତ ଡ'ସେକ୍ ସିରେଲ'ତା । 2ମାରି ଗାଲାତିୟ ଦେସ୍ବକ୍ ଆଜିସୁ ବିସ୍ବାସ୍ ଡେମ'ସେକ୍ ଡୁକୁନୁଂ ଗୁଲାଇ ରେମଲେପୁଲେଇ
ଆଜିସୁ ବିସ୍ବାସ୍ ଡେମ'ସେକ୍ ଆକେ ଡୁକୁନୁଂ ଗୁଲାଇ ତୁନୁନାବୁନ'ରେବୁରଂ ମିସ୍ସେକ୍ ନିଂ କେନ୍ ସିଟି ଲେକ୍ଲ' ବେନ୍ଟାୟ'ତିଂ ।
3ନେଇ'ନା ବା ମାପ୍ରୁ ମାରି ପ୍ରବୁ ଜିସୁ କିରିସ୍ଟଲା ଆପେ ଦୟା ଡେମେଇ' ମାରି ପେନ୍ ଜିବନ୍ବକ୍ ସାନ୍ତିସାର୍ଦା ବେଡେଇ' । 4ଆନ୍ଦିନ୍ଆନ୍କାଲ୍ନା ରେମଲେ ଡେମ'ସେକ୍ ଡୁକୁନୁଂ ଗୁଲାଇ ଅଲିରାକ୍ବାଇ' କାମ୍କୁରୁଂ ଆନେଇ' ରକ୍ୟା ଡିନ୍ଡେମ୍ପୁଲେଇ, ଜିସୁ କିରିସ୍ଟଲା ନିଜର୍ନା ଜିବନ୍ ନେଇ'ନା ପାପ୍ପୁଲେଇ ବେଡ' । ମାସା'ଡ'ନା ମାଇ ଡୁ'ତୁନ୍ ଡିନ୍ଡେମ୍ ଡୁତା ଡ'ସେକ୍ ନେଇ'ନା ବା ମାପ୍ରୁନା ମୁନ୍ ଡୁକୁଗା'ସା' ଜିସୁ କିରିସ୍ଟଲା ଡୁ'ତୁନା ଡେମ' । 5ମାପ୍ରୁ ଇସାଉ ଅଦିକ୍ ଅଦିକ୍ ମଇମା ବାମେଇ' । ଆମେନ୍ ।
ବାନିକବର୍ ମୁଇଉ ଡୁତା
6କିରିସ୍ଟଲା ଆପେ ଦୟା ଡେମ'ତାସା' ମାପ୍ରୁ ଆପେ ମାଇବୁରଂ ଡୁକୁପୁଲେଇ ୱାୟ'ତା, ମାତର୍ ପେ ଆମାଇ ଆ'ଇକୁ ଅଡକ୍ସୁଂଅଁ'ସେକ୍ ପାଲ୍ ବାନିକବର୍ ସବ' ଉଇଗୁତୁପେସା' ନିଂ କାବାକାବା ଡେଂଗୁତିଂ । 7ସତଇସା ଗୁତୁନା ବଲ୍କବର୍ ଆରାକ୍ । ମାତର୍ ଏନ୍ତୁକ୍ର ଆପେ କସ୍ଟ ବେଡ'ତା ମାରି କିରିସ୍ଟନା ବାନିକବର୍ ବାଦ୍ଲି ଡିନ୍ଡେମ୍ପୁଲେଇ ସେସ୍ଟା ଡେମ'ତା । 8ନେଇ ଆପେ ସିଁସେଇଁଉ ସୁନ'କୁନୁଂ ବଲ୍କବର୍କୁରୁଂ ପାଲ୍ ବଲ୍କବର୍ ନେଇ ସୁନ'ନାସା ଆରା'ଗେ ସରଗ୍ନା ଦୁତ ଜର୍ସେକ୍ ଆପେ ସୁନ'ନାସା ଆମା'ଏ ଆଗୁଲାଇର ମାପ୍ରୁ ଆନା ବୁଂଏଁଇ' ଡ'ସେକ୍ ନିଂ ସୁନ'ତିଂ । 9ନିଂ ଆପେ ସିଁସେଇଁଉ ସୁନ'କୁନୁଂସୁଗ ଆ'ନା ମାରି ମା ସୁନ'ତିଂ ଡ'ନା: ପେ ବିସ୍ବାସ୍ ଡେମ'କୁନୁଂ ଗୁତୁନ୍ ବଲ୍କବର୍କୁରୁଂ ପାଲ୍ ବଲ୍କବର୍ ଜାଏସା ଆପେ ସୁନ'ନା ମାପ୍ରୁ ଆମାଇ ଆନା ବୁଂଏଁଇ' ଡ'ସେକ୍ ନିଂ ସୁନ'ତିଂ ।
10ଜୁ, ରେମଲେ ଆନିଂ ନାଉଲେଇ' ଡ'ସେକ୍ ନିଂ ସେସ୍ଟା ଡେମ'ତିଂ ଇ? ଆରାକ୍, ମାପ୍ରୁଲାଉ ଆନିଂ ନାଉଲେଇ' ଡ'ସେକ୍ ନିଂ ମୁନ୍ ଡେଂଗୁତିଂ । ମାରି ଆରେମଲେ ଅ'ସାର୍ଦାପୁଲେଇ ନିଂ ଗୁଲାଇ ଡେମ'ତିଂ ଇ? ନିଂ ଆରେମଲେ ଅ'ସାର୍ଦାପୁଲେଇ ଆ'ନାସା ସେସ୍ଟା ଡେମ'ସେକ୍ ଡୁକୁନାଏ ନିଂ କିରିସ୍ଟନା ମୁଇନ୍ଡା ଗୁପାମ୍ରେମ୍ ଏ ଆଗଂଆଁନିଂ ।
ପାଉଲଲା ମାପ୍ରୁନା ପେରିତ ମି ଏଗା'
11ଅ ବୁୟାଂଏଁ ତୁନାଲେ, ପେ କେନା ମାଗ'ନା ଡେନ୍ତା ଡ'ସେକ୍ ନିଂ ମୁନ୍ ଡେଂଗୁତିଂ, ଗୁତୁନ୍ ମା ଡ'ନା: ନିଂ ସୁନ'କୁନୁଂ ବଲ୍କବର୍ ଜାଏସା ମୁଇନ୍ଡା ରେମ ମାମା ସରଉ ଏତ୍ସେକ୍ ସୁନ'କୁନୁଂ ଆରାକ୍ । 12ଗୁତୁନ୍ ଜାନ୍କୁରୁଂସା ନିଂ ବାଂକୁନୁଂ ଆରାକ୍, ମାରି ଜାଏସା ଆନିଂ ଅମାଗ'କୁନୁଂସା ଆରାକ୍ । ମାତର୍ ଜିସୁ କିରିସ୍ଟଲାଉ ନିଜେ ଆନିଂ ଅସୁୟ'ବେଡ'ତାସା' ନିଂ ବାଂଗୁତିଂ ।
13 #
ପେରିତ 8:3; 22:4,5; 26:9–11 ମାସା'ଡ'ନା ଜିଉଦିରେମଲେନା ନିୟମ୍ସୁଗ ଗୁଲାଇ ନିଂ ଡେମ'ସେକ୍ ଇନ୍ତେ ମି ଡୁକୁନିଂ, ମାରି ମାପ୍ରୁନା ମନ୍ଡଲିନା ରେମଲେବକ୍ ନିଂ ମି ଅବୁଦି କସ୍ଟ ବେଡ'କୁନିଂ ମାରି ଆମା'ଏ ନସ୍ଟ ଡିନ୍ଡେମ୍ପୁଲେଇ ନିଂ ମି ସେସ୍ଟା ଡେମ'କୁନିଂ ଡ'ସେକ୍ ଗୁଲାଇ ପେ ଅଂଅଁ'ତୁପେ । 14#ପେରିତ 22:3ନିଂନା ଜୁଲିନା ଜିଉଦିରେମଲେବୁରଂ ଆନିଂ ଅ'ସରିଲ'ନା ଜିଉଦିରେମଲେନା ନିୟମ୍କାନମ୍ ମାନ୍ବାର୍ବକ୍ ନିଂ ମା'ଏନ୍କୁରୁଂ ଅଦିକ୍ ବଲ୍ ଗୁଲାଇ ଡେମ'କୁନିଂ । ମାରି ନେଇ'ନା ୟା'ତୁତାଲେନା ନିୟମ୍ ଗୁଲାଇର ବଲ୍ ମାନ୍ସେକ୍ ଡୁକୁଡୁତା ଡ'ସେକ୍ ନିଂ ଅବୁଦି ମୁରୁସ୍ଲ'ସେକ୍ ଡୁକୁନିଂ । 15#ପେରିତ 9:3–6; 22:6–10; 26:13–18ମାତର୍ ନିଂନା ୟଂନା ସୁଲଇ'ବକ୍ ନିଂ ଡୁକୁନୁଂବାଂସା' ମାପ୍ରୁ ଆନିଂ ଅବୁଦି ଦୟା ଡେମ'ସେକ୍ ଆନିଂ ସିରେଲ'ସେକ୍ ୱାୟ'ବୁଂଅଁ' । 16ମାରି ଜାଜା ଜିଉଦିରେମଲେ ଆରାକ୍ ଡୁ'ତୁନ୍ବାଇ' ରେମଲେବକ୍ ମାଇନା ଉଁ'ଉଁ ଜିସୁ କିରିସ୍ଟନା ବଲ୍କବର୍ ସୁଁସୁପୁଲେଇ ମାଇ ଆନିଂ ଆଜିସୁଲା ଅ'ସମ'ଡ' ବିବେ' ମୁନ୍ଡେଂକୁସା' ଗୁତୁନ୍ ମା ଡ'ସେକ୍ ମାଗ୍ମାକ୍ପୁଲେଇ ନିଂ ଜାନ୍ବକ୍ସା ସୁରୁଇ' ଉଇ ଆଡୁତିଂ । 17ମାରି ନିଂନା ସିଁସେଇଁଉ ପେରିତଲେ ଏଗ୍ସେକ୍ ଜିରୁସାଲମ୍ ମୁନା'ଉଂଗମ୍ବକ୍ ଡୁକୁନୁଂ ରେମଲେନ୍ବକ୍ ମଉନୁଇ ନିଂ ଆରବ୍ ଡ'ସେକ୍ ଇମି ଡୁକୁନୁଂ ମୁଇ ଦେସ୍ବକ୍ ସିଦା ଉଇସେକ୍ ଉନ୍ତ୍କୁରୁଂ ତିର୍ଗି' ଦମେସକ ମୁନା'ଉଂଗମ୍ବକ୍ ଆନ୍ଡେଇଁ ସାକ୍ନିଂ ।
18 #
ପେରିତ 9:26–30
ଉନ୍ତ୍କୁରୁଂ ତିନ୍ବରସ୍ ତିର୍ଗି' ନିଂ ଆପିତର୍ଲା ଜୁଜୁପୁଲେଇ ଜିରୁସାଲମ୍ ମୁନା'ଉଂଗମ୍ବକ୍ ଉଇସେକ୍ ମାଇବୁରଂ ପନ୍ଦର ଦିନ୍ ଆତା ଡୁକୁନିଂ । 19ମାଇବୁରଂ ପ୍ରବୁନା ବୁୟାଂ ଆଜାକୁବ୍ଲାଉ ଆତା ଜୁଲ'କୁନିଂ, ଆପାଲ୍ ପେରିତଲେ ଆଜାଏସା ଆଜୁତିଂ । 20ନିଂ ଆକେ ମାମା ଲେକ୍ଲ'ତିଂ ଗୁତୁନ୍ ପଲୁ ଆରାକ୍; ନିଂ ସତ୍ ସୁନ'ତିଂ ଡ'ସେକ୍ ମାପ୍ରୁ ମାଗ'ତା ।
21ତିର୍ଗି' ଜିରୁସାଲମ୍ ଉଂଗମ୍କୁରୁଂ ତୁର୍ସେକ୍ ସୁରିଆ ମାରି କିଲିକିଆ ଡ'କୁନୁଂ ଇମ୍ବାରୁ ରାଜିବକ୍ ଉଇକୁନିଂ। 22ଉନ୍ତ୍ବେଲା ଜିଉଦା ଦେସ୍ବକ୍ ଡୁକୁନୁଂ ମନ୍ଡଲିଲେବକ୍ ଆକିରିସ୍ଟଲା ବିସ୍ବାସ୍ ଡେମ'କୁନୁଂ ରେମଲେ ଆନିଂ ସମ' ଅରଇ' ଡେଂକୁ । 23ମାତର୍ “ଜା ମୁଲ୍ ଆନେଇ' କସ୍ଟ ବେଡ'କୁ, ମାରି ଆମ୍ବ'ନ୍ ବିସ୍ବାସ୍ ନିଂ ନାସାଇତିଂ ଡ'କୁ, ଗୁତୁନ୍ ବିସ୍ବାସ୍ ମାଇ ନିଜେ ଆ'ନା ଆପାଲ୍ ରେମଲେ ଅମାକ୍ଡେନ୍ତା” ଡ'ସେ'ଗାଉ ମା'ଏ ଅଂଅଁ'କୁଗା' । 24ସା' ମା'ଏ ନିଂନା ବିସୟ ଅଂଅଁ'ସେକ୍ ଆମାପ୍ରୁ ସୁନ୍ଡ୍ରଗା' ।
Currently Selected:
ଗାଲାତିୟ 1: BFW
Highlight
Share
Compare
Copy
Want to have your highlights saved across all your devices? Sign up or sign in
CC BY-NC-ND 4.0
