ପେରିତ 5
5
ଅନନିୟ ମାରି ସପିରା
1ମାତର୍ ଅନନିୟ ମାରି ସପିରା ଡ'ସେକ୍ ଇମ୍ବାୟ କୁନୁଇ'ଡାମ୍ ଆତା ଡୁକୁଗା' । ମାଇପାସା ଜମି ଡୁକୁନୁଂ ଇ'କିସୁଗ ସୁଂଅଁ' । 2ସୁଂଅଁ'ସେ'ଗା ମାଇପା କୁନୁଇ'ଡାମ୍ ଏନ୍ତୁକ୍ ଡାବୁ ନାଂବକ୍ ବୁଂନାଂ ଡ' ଅଇଁୟ'ସେକ୍ ଏନ୍ତୁକ୍ ବୁଂଅଁ' । ବୁଂଅଁ'ସେକ୍ ଇମ୍ପର୍ଡେଇଁ ଅନନିୟଲା ଏନ୍ତୁକ୍ ଡାବୁ ଆପେରିତଲେ ରିଂବେଡ' ।
3ସା' ପିତର୍ଲା ସୁନ', “ଅ ଅନନିୟ, ନ ମାସା' ସଇତାନ୍ନା ବୁଦି ସବ'ସେକ୍ ପବିତ୍ର ଆତ୍ମାନ୍ବକ୍ ଡି'କେନ୍ ପଲୁ ସୁନ'ନ ମାରି ମାସା' ନ ସୁଂଅଁ'କୁନୁଂ ଗୁତୁନ୍ ଜମିନା ଡାବୁ ଏନ୍ତୁକ୍ ନିଜର୍ପୁଲେଇ ବୁଂତିଂ ଡ'ସେକ୍ ଏତ୍ନ? 4ଗୁତୁନ୍ ସୁଂସୁଂ ସିଁସେଇଁଉ ନନାଉ ଡୁକୁଗା' । ମାରି ସୁଂଅଁ'ସେକ୍ସା ଗୁତୁନ୍ ଡାବୁବୁରଂ ଆନ ମା ଡିନ୍ଡେମ୍ ମୁନ୍ ଡୁକୁଗା' ଗୁତୁନ୍ ଡିନ୍ଡେମ୍ନା ଅଦିକାର୍ ନନ୍ବକ୍ ଡୁକୁଗା' । ମାସା' ନ ଡି'କେନ୍ ନାଡାଇତିଂ ଡ'ସେକ୍ ଏତ୍ନ? ନ ଆରେମ ନାଡାୟ' ଆଡୁତୁନ ମାତର୍ ଆମାପ୍ରୁଉ ନାଡାୟ'ତୁନ” ଡ'ସେକ୍ ସୁନ' ।
5ଡି'କେନା ଅଇଁୟ'କୁନୁଂ ଅଂଅଁ'ସେକ୍ ଅନନିୟଲା ଲଗ୍ଡାଇ'ସେକ୍ ଗୁଇ'ଉଇଗା' । ସା' ଡି'କେନ୍ ଡେଂଗୁତା ଡ'ସେକ୍ ଅଂଅଁ'କୁନୁଂ ରେମଲେ ଗୁଲାଇର ଅବୁଦି ବୁତୁଂଉଇଗା' । 6ଆତା ଡୁକୁନୁଂ ଏନ୍ତୁକ୍ ଇଂଗେର୍ସେଲା ଇଂଗେରେ ସାକ୍ସେକ୍ ମାଇନା ମଟ୍ ମୁଇ ଇମ୍ପ'ବୁରଂ ଗବ'ସେକ୍ ବାଇରି ଅ'ତୁର'ସେକ୍ ଆତିଲ'ସୁଂଅଁ' ।
7ଆତିଲ'କୁନୁଂ ତିନ୍ ଗନ୍ଟାସୁଗ ତିର୍ଗି' ସପିରାଲା ମାଇନା ଇମ୍ପର୍ ଗୁଇ'କୁନୁଂ ମଉନଂ ପେରିତଲେନ୍ବକ୍ ସା'ଗା' । 8ସା' ପିତର୍ଲା ଆମାଇ “ଆ'ଇକେନ୍ ଡାବୁବକ୍ଉ ଜମି ସୁଂଅଁ'ପା ଇ?” ଡ'ସେକ୍ ଅ'ଗଁସ୍ଲା'ଗା'ସା'
“ଅ'ଅଁ, ଆଇ'ତୁନ୍ଉ” ଡ'ସେକ୍ ମାଇ ସୁନ' ।
9ସା' ପିତର୍ଲା ଆମାଇ ସୁନ' “ମାସା' ପା ଡି'କେନ୍ ଡେମ'ସେକ୍ ପ୍ରବୁନା ଆତ୍ମାବକ୍ ପରିକା ଡେମ୍ନାଂ ଡ'ସେକ୍ ଏତ୍ସେ'ଗା ଅଇଁୟ'ପା? ଜୁ, ଆନମ୍ପର୍ ରିଂଅଁ' ଉଇସେକ୍ ଆତିଲ'କୁନୁଂ ଇଂଗେରେ ଆକେ ଡାନ୍ଡର୍ବକ୍ ଗୁଗାଇ ଡେନ୍ତା । ଆନସା ମା'ଏ ଆତା ରିଂଅଁ' ଉଇତା” ଡ'ସେକ୍ ସୁନ' ।
10ସା' ଆଇ'କୁ ମାଇସା ଆତା ପିତର୍ନା ତିକ୍ସୁଂ ଆଲୁଂ ଲଗ୍ଡାଇ'ସେକ୍ ଗୁଇ'ଉଇଗା' । ଗୁତୁନ୍ ଇଂଗେରେ ବିତ୍ରେ ଗାଇଗା'ସା' ଆମାଇସା ଗୁଇ'କୁନୁଂ ଜୁଲ' । ସା' ମା'ଏ ଆମାଇସା ରିଂଅଁ' ଉଇସେକ୍ ଇମ୍ପର୍ଡେଇଁନା ଉନ୍ତୁ' ଆତିଲ'ସୁଂଅଁ' । 11ସା' ମନ୍ଡଲିନା ରେମଲେ ଗୁଲାଇର ମାରି ଡି'କେନ୍ ଡେଂକୁନୁଂ ଜାଜା ଅଂଅଁ'ତା ଗୁତୁନ୍ ଗୁଲାଇ ରେମଲେ ଅବୁଦି ବୁତୁଂଉଇଆର୍ଗା' ।
ପେରିତଲେ ଅବୁଦି ସିରେମ୍ବକ୍ ବଲ୍ ଡିନ୍ଡେମ୍ଡେନ୍
12ପେରିତଲେ ଅବୁଦି ସିନଲେ ମାରି କାବାକାବା ଡିନ୍ଡେମ୍ବାଇ'ନା କାମ୍ଲେ ରେମଲେନ୍ ବିତ୍ରେ ଡେମ' । ଆଜିସୁ ବିସ୍ବାସ୍ ଡେମ'କୁନୁଂ ରେମଲେ ଗୁଲାଇର ଏକ୍ଜୁଟ୍ ଡେଂସେକ୍ ଇସାଉ ପାର୍ତନା ଡିନ୍ଡେମ୍ପୁଲେଇ ସଲମନ୍ନା ବେଦିବକ୍ ରୁନ୍କୁଗା' । 13ଗୁଲାଇର ଆମା'ଏ ଅବୁଦି ବଲ୍ ରେମଲେ ଡ'ସେକ୍ ସୁନ'ତା ଡ'ନାସା ମା'ଏବୁରଂ ମିସ୍ବାର୍ପୁଲେଇ ରେମଲେ ବୁତୁଂଗା' । 14ଡୁ'ତୁନ୍ ଡ'ନାସା ଅବୁଦି ଇଂଗେରେ ସେଲାନେ ଆପ୍ରବୁ ବିସ୍ବାସ୍ ଡେମ'ସେ'ଗା ମା'ଏବୁରଂ ମିସ୍ବାର୍ ମୁଲାୟ' । 15ସା' ରେମଲେ ଆସିରେମ୍ କୁରୁଂବକ୍ ଡୁନ'ରିଂଅଁ' ସାକ୍ସେ'ଗା କଟ୍ବକ୍ ମାରି ବିନେସାକ୍ବକ୍ ଅଡିରିଗ' ବୁଂତ । ମାସା'ଡ'ନା ପିତର୍ଲା ଆତୁନ୍ କୁରୁଂ ଉଇବେଲା ମାଇନା ଲିଡାକ୍ସା ବାଂସେକ୍ ଏନ୍ତୁକ୍ର ବଲ୍ ଡେମେଇ' ଡ'ସେକ୍ ମା'ଏ ଆସ୍ସେକ୍ ବୁଂଅଁ'କୁଗା' । 16ଜିରୁସାଲମ୍ ମୁନା'ଉଂଗମ୍ ଉନ୍ତୁ'ତ'ନାଂ ଡୁକୁନୁଂ ଅବୁଦି ରେମଲେସା ଆତା ରୁନ୍କୁଗା' । ମା'ଏ ଆସିରେମ୍ ମାରି ଅଲିରାକ୍ବାଇ' ବୁତ୍ ସବ'କୁନୁଂ ଆରେମଲେ ରିଂଅଁ' ସା'ଗା', ସା' ମା'ଏ ଗୁଲାଇର ବଲ୍ ଡେଂଗା' ।
ଆପେରିତଲେ କସ୍ଟ ବିବେ'ଡେନ୍
17ସା' ମୁନା'ପୁଜାରିଲେନ୍ ମୁନା'ପୁଜାରିଲା ମାରି ମାଇବୁରଂ ଡୁକୁନୁଂ ସାଦୁକି ଦଲ୍ନା ରେମଲେ ଗୁଲାଇର ଅବୁଦି ଆଂକାର୍ ଡେଂସେକ୍ 18ଆପେରିତଲେ ସବ'ସେକ୍ ଆଗୁଲାଇର ବୁଂବୁଂନା ଗୁତୁନ୍ ବନ୍ଦିବକ୍ ସୁରୁଂଅଁ' । 19ମାତର୍ ତୁମୁଂଗ ପ୍ରବୁନା ମୁଇ ଦୁତଲା ସାକ୍ସେକ୍ ବନ୍ଦିବକ୍ନା ପାଟା ରୁଗ'ସେ'ଗା ଆମା'ଏ ଆଗୁଲାଇର ବାଇରି ଅ'ତୁର'ସେକ୍ ସୁନ', 20“ପେ ମାପ୍ରୁନା ମନ୍ଦିର୍ବକ୍ ଉଇସେକ୍ ଜିବନ୍ ବିବେ'ନା କେନ୍ ଗୁଲାଇ ବଲ୍କବର୍ ଆଗୁଲାଇର ସୁଁ” ଡ'ସେକ୍ ସୁନ' ।
21ସା' ଆମା'ଏ ସୁନ'କୁନୁଂସୁଗ ମା'ଏ ଗୁଲାଇର ଇନ୍ଜୁର୍ନୁକ୍ ମନ୍ଦିର୍ବକ୍ ଉଇସେ'ଗା ଆଗୁଲାଇର ଅମାକ୍ ମୁଲାୟ' ।
ଆଇ'ତୁନ୍ବେଲା ମୁନା'ପୁଜାରିଲେନ୍ ମୁନା'ପୁଜାରିଲା ମାରି ମାଇନା ରେମଲେ ସାକ୍ସେକ୍ ଇସ୍ରାଏଲ୍ ରେମଲେନା ମୁନା'ରେମ୍ ଗୁଲାଇର ମିସ୍ସେକ୍ ଅଇଁପୁଲେଇ ଲେ'ୟାନେଇ' ଡ'ସେକ୍ ୱାୟ' । ୱାୟ'ସେକ୍ ଆପେରିତଲେ ବନ୍ଦିକୁରୁଂ ଇନ୍ଡ୍ରିଂପୁଲେଇ ୱାଇ ବେନ୍ଟାୟ' । 22ସା' ମାପ୍ରୁନା ମନ୍ଦିର୍ ଜାଗ୍ବାର୍ରେମ୍ ସାକ୍ସେକ୍ ଜୁଲ'ସା' ମା'ଏ ଆତା ଆଡୁତା । ସା' ଆତା ଲେଇ'ସେକ୍ ଅଇଁବକ୍ ସାକ୍ସେକ୍ ମା'ଏ ସୁନ' 23“ନେଇ ଉଇସେ'ଗା ଜୁଲ'ନେଇସା' ଗୁତୁନ୍ ବନ୍ଦି ଡିଂଅଁ ବଲ୍ କୁସିଲ' ବୁଂଅଁ'ତା ମାରି ବନ୍ଦି ଡିଂଅଁନା ଡାନ୍ଡର୍ବକ୍ ଜାଗ୍ବାରେମ୍ ବଲ୍ ଜାଗ୍ଲ'ସେ'ଗା ତଂଗୁତା । ମାତର୍ ନେଇ ରୁଗ'ସେକ୍ ବିତ୍ରେ ଗାଇ ଜୁଲ'ନେଇସା' ଜାଏସା ବିତ୍ରେ ଆଡୁତା” ଡ'ସେକ୍ ସୁନ' । 24ସା' ମାପ୍ରୁନା ମନ୍ଦିର୍ ଜାଗ୍ବାର୍ ରେମଲେନା ମୁନା'ରେମ୍ ମାରି ମୁନା'ପୁଜାରିଲେ ଗୁତୁନ୍ ଅଂଅଁ'ସେକ୍ ଅବୁଦି ବୁତୁଂସେକ୍ କେନା ମି ଡେନ୍ତାବେ ଡ'ସେକ୍ ଏତ୍ଗା' ।
25ଆଇ'ତୁନ୍ବେଲା ମୁଇନ୍ଡା ସାକ୍ସେ'ଗା ସୁନ' “ଜୁ, ପେ ବନ୍ଦିବକ୍ ସୁରୁଂଅଁ'କୁନୁଂ ଗୁତୁନ୍ ରେମଲେ ଆ'ନା ମାପ୍ରୁନା ମନ୍ଦିର୍ବକ୍ ଆରେମଲେ ଅମାକ୍ଡେନ୍ତା” ଡ'ସେକ୍ ସୁନ' । 26ସା' ମାପ୍ରୁନା ମନ୍ଦିର୍ ଜାଗ୍ବାର୍ରେମ୍ନା ମୁନା'ରେମ୍ ଏନ୍ତୁକ୍ ଜାଗ୍ବାର୍ ରେମଲେବୁରଂ ଉଇସେକ୍ ଆପେରିତଲେ ସବ' ରିଂଗା' । ମାତର୍ ଆମା'ଏ ମାଏସା ଆଡେମ୍ତ ମାସା'ଡ'ନା ରେମଲେ ଜୁଲ'ସେକ୍ ଆନେଇ ବୁରେ ତିତ ଡ'ସେକ୍ ମା'ଏ ବୁତୁଂଗା' ।
27 ମା'ଏ ଆପେରିତଲେ ରିଂସେକ୍ ଅଇଁପୁଲେଇ ଲେଇ'କୁନୁଂବକ୍ ଅ'ତନ' । ସା' ଆତା ମୁନା'ପୁଜାରିଲେନ୍ ମୁନା'ପୁଜାରିଲା ଆମା'ଏ ସୁନ', 28#ମାତିଉ 27:25“ଆକେ ଗୁତୁନ୍ ରେମନା ଇମି ସୁନ'ସେକ୍ ଆଜାଏସା ଆ'ମାଗ' ଡ'ସେକ୍ ଆପେ ନେଇ ସୁନ'କୁନେଇ କି ଆରାକ୍ ? ମାତର୍ ପେ ଜିରୁସାଲମ୍ ମୁନା'ଉଂଗମ୍ବକ୍ ଆଗୁଲାଇର ଗୁତୁନ୍ଉ ଅମାଗ'ପେ । ମାରି ଆଜିସୁଲା ଅଗୁୟ'ତା ଡ'ସେକ୍ ଆନେଇ ନିନ୍ଦାଲ'ତୁପେ” ଡ'ସେକ୍ ସୁନ' ।
29ମାତର୍ ପିତର୍ଲା ମାରି ମାଇବୁରଂ ଡୁକୁନୁଂ ପେରିତଲେ ସୁନ': “ନେଇ ଆରେମଲେ ଆରାକ୍ ଆମାପ୍ରୁ ମାନ୍ବାର୍ ଡୁତା । 30ଆମ୍ବ'ନ୍ ଜିସୁଲା ମୁଇ କୁର୍ସବକ୍ ତିତି ତିକ୍ସୁଂ ଟାନ୍ଲ'ସେ'ଗା ଲୁଆବୁରଂ ତାଂଅଁ'ସେ'ଗା ଅ'ତନ' ଅଗୁୟ'ପେ ଆମାଇ ନେ'ନ୍ ୟା'ତୁତାଲେନା ମାପ୍ରୁ ଗୁଇ'କୁନୁଂକୁରୁଂ ବ'ରଲ' । 31ମାରି ନେଇ'ନା ପ୍ରବୁ ଡ'ସେକ୍ ମାରି ଆନେଇ' ରକ୍ୟା ଡିନ୍ଡେମା ଡ'ସେକ୍ ମାପ୍ରୁ ଆମାଇ ମାଇନା ସୁସୁମ୍ତିକୁରୁଂ ଅଲେୟ'ତା । ମାସା'ଡ'ନା ଡୁ'ତୁନ୍ ଡେମ'ନା ନେଇ' ଇସ୍ରାଏଲ୍ ରେମଲେ ପାପ୍କାମ୍ ଅଲିରାକ୍କାମ୍ ଗୁଲାଇ ଅଡକ୍ସୁଂଅଁ'ସେକ୍ ମାପ୍ରୁନ୍ବକ୍ ଆନ୍ଡେଇଁ ସୁସାପ୍ପୁଲେଇ ମାଇ ଆନେଇ' ସାନ୍ଡୁଂତ ମାରି ମାପ୍ରୁ ନେଇ'ନା ଗୁଲାଇ ପାପ୍ କେମା ଡେମ୍ତ । 32କେନ୍ ଗୁଲାଇପୁଲେଇ ନେଇ ସାକି ଡୁତୁନେଇ ମାରି ମାପ୍ରୁନା ତୁମ' ଜାଜା ମାନ୍ଗୁତା ଆମା'ଏ ମାପ୍ରୁ ବେଡ'କୁନୁଂ ପବିତ୍ର ଆତ୍ମାସା ସାକି ଡୁତା” ଡ'ସେକ୍ ସୁନ' ।
33ସା' ଗୁତୁନ୍ ଅଂଅଁ'ସେକ୍ ମା'ଏ ମାରି ଅଦିକ୍ ଗିସେକ୍ସେକ୍ ମିଏସା ଆପେରିତଲେ ଅଗୁଇ'ନେଇ' ଡ'ସେକ୍ ଏତ୍ଗା' । 34ମାତର୍ ଗମାଲିୟେଲ୍ ଡ'ସେକ୍ ମୁଇନ୍ଡା ଆତା ଗୁଲାଇର ଲେଇ'କୁନୁଂବକ୍ ଡୁକୁଗା' । ମାଇ ପାରୁସିଦଲ୍ନା ମୁଇନ୍ଡା ରେମ ମାରି ମସାଲା ବେଡ'କୁନୁଂ ନିୟମ୍ ଅମାକ୍ରେମ୍ ମାରି ରେମଲେ ଆମାଇ ଅବୁଦି ବଲ୍ରେମ୍ ମୁନା'ରେମ୍ ଡ'ସେକ୍ ମାଇନା ତୁମ' ଅଂଅଁ'ତା । ମାଇ ଆତା ଅଇଁପୁଲେଇ ଗୁଲାଇର ଲେଇ'କୁନୁଂବକ୍ ତଂସେକ୍ ଆପେରିତଲେ ପରେକ୍ପୁଲେଇ ବାଇରି ରିଂଅଁ' ଉୟା ଡ'ସେକ୍ ସୁନ' । 35ତିର୍ଗି' ମାଇ ଆମାଇନା ରେମଲେ ସୁନ' “ଅ ଇସ୍ରାଏଲ୍ ରେମଲେ, ଆମା'ଏ ମାମା ଡିନ୍ଡେମ୍ ଡୁତା କି ଆରାକ୍ ଡ'ସେକ୍ ପେ ବଲ୍ ଏତ୍ବାର୍ ଡୁତା । 36ମାସା'ଡ'ନା ଇନ୍ତେ ତିଉଦା ଡ'ସେକ୍ ମୁଇନ୍ଡା ରେମସା ଡି'କେନା ଡୁକୁଗା' । ମାଇ ନିଂ ମୁନା'ରେମ୍ ଡ'ସେକ୍ ଆଗୁଲାଇର ସୁନ'ସା' ସାର୍ସସୁଗ ଇଂଗେରେ ମାଇବୁରଂ ମିସ୍ଗା' । ମାତର୍ ଆମାଇ ଅଗୁୟ'ସୁଂଅଁ' ମାରି ମାଇବୁରଂ ଡୁକୁନୁଂ ଗୁଲାଇ ରେମଲେସା ପାଲ୍ପାଲ୍ ଡେଂଉଇଗା', ସା' ମା'ଏ ମାରି ଆଡୁତା । 37ଆମାଇ ତେଂଗି' ରମିୟ ସର୍କାର୍ ରେମଲେ ଗୁଲାଇରନା ଇମି ଅ'ଲେକ୍ବାର୍ବେଲା ଗାଲିଲି ଜିଲାନା ଜିଉଦା ଡ'ସେକ୍ ମୁଇନ୍ଡା ନିଂ ମୁନା'ରେମ୍ ଡ'ସେକ୍ ତଂଗା' ମାରି ଅବୁଦି ରେମଲେ ମାଇବୁରଂ ମିସ୍ଗା' ମାରି ସର୍କାର୍ବୁରଂ ରିମ'କୁ । ଆମାଇସା ଅଗୁୟ'ସୁଂଅଁ' ମାରି ମାଇବୁରଂ ଡୁକୁନୁଂ ଗୁଲାଇ ରେମଲେସା ପାଲ୍ପାଲ୍ ଡେଂଉଇଗା' । 38ସା' ଆ'ନା ପେ କେନ୍ ରେମଲେନ୍କୁରୁଂ ସୁଲୁଂ ଡୁକୁଲା ଡ'ସେକ୍ ନିଂ ଆପେ ସୁନ'ତିଂ । ମା'ଏ ଉଇଏଇ' । ମାସା'ଡ'ନା ମା'ଏ ରେମଲେନା ତୁମ' ସବ'ସେ'ଗା ଡି'କେନ୍ ଆଗୁଲାଇର ଅମାଗ'ତା ଡ'ନା ଅବୁଦି ଦିନ୍ ମାରି ଆଉଇତା । 39ମାତର୍ ମାପ୍ରୁ ସୁନ'ସା' ମା'ଏ ଡି'କେନ୍ ଅମାଗ'ତା ଡ'ନା ପେ ଆମା'ଏ ପିଟାଇବାର୍ ଆଗଂତୁପେ । ମାସା'ଡ'ନା ପେ ଆମା'ଏ ମାମା ଡେମ'ନା ମାପ୍ରୁବୁରଂ ରିମ'କୁନୁଂସୁଗ ଡେନ୍ତା ଡ'ସେକ୍ ପେ ମାକ୍ତୁପେ” ଡ'ସେକ୍ ସୁନ' ।
40ସା' ଆତା ଲେଇ'କୁନୁଂ ଗୁଲାଇର ଗମାଲିୟେଲ୍ଲା ସୁନ'କୁନୁଂସୁଗ ଡେମ୍ନେଇ' ଡ'ସେକ୍ ରାଜି ଡେଂଗା' । ତିର୍ଗି' ଆପେରିତଲେ ବିତ୍ରେ ରିଂଅଁ' ସାକ୍ସେକ୍ ଅବୁଗ' । ଅବୁଗ'ସେକ୍ ଜିସୁନା ଇମି ସୁନ'ସେକ୍ ଆରେମଲେ ମାରି ଆ'ମାଗ' ଡ' ସୁନ'ସେକ୍ ଆମା'ଏ ଅନ୍ତୁର'ବେଡ' ।
41ସା' ଜିସୁନା ଇମି ସୁନ'ସେକ୍ ଡି'କେନ୍ କସ୍ଟ ବୁମ୍ବାମ୍ପୁଲେଇ ମାପ୍ରୁ ଆନେଇ ସିରେଲ'ତା ଡ'ସେକ୍ ଅବୁଦି ସାର୍ଦା ଡେଂସେକ୍ ପେରିତଲେ ଆତା ଗୁଲାଇର ଅଇଁପୁଲେଇ ଲେଇ'କୁନୁଂକୁରୁଂ ତୁର୍ଗା' । 42ମାରି ଇସାଉ ମା'ଏ ମାପ୍ରୁନା ମନ୍ଦିର୍ବକ୍ ମାରି ଡିଂଅଁ ଡିଂଅଁବକ୍ ଉଇସେକ୍ ଜିସୁନା ବଲ୍କବର୍ ଅମାଗ' ମାରି ଜିସୁଲାଉ ମାପ୍ରୁ ବେନ୍ଟାୟ'କୁନୁଂ କିରିସ୍ଟଲା ଡ'ସେକ୍ ଆରେମଲେ ସୁନ'ସେକ୍ ଡୁକୁ । ମା'ଏ ଡୁ'ତୁନ୍ ଡିନ୍ଡେମ୍ ବନ୍ଦ୍ ଆଡେମ୍ତ ।
Currently Selected:
ପେରିତ 5: BFW
Highlight
Copy
Compare
Share
Want to have your highlights saved across all your devices? Sign up or sign in
CC BY-NC-ND 4.0