ପେରିତ 4
4
ଆପିତର୍ଲା ମାରି ଆଜଅନ୍ଲା ଜିଉଦିରେମଲେନା ମୁନା'ରେମେନ୍ବକ୍ ଇନ୍ଡ୍ରିଂଡେନ୍
1ପିତର୍ଲା ମାରି ଜଅନ୍ଲା ରେମଲେବୁରଂ ଡି'କେନା ଅଇଁୟ'କୁନୁଂବେଲା ମୁନା'ପୁଜାରିଲେ ମାରି ମନ୍ଦିର୍ ଜାଗ୍ବାରେନା ମୁନା' ରେମ ମାରି ସାଦୁକି ଦଲ୍ନା ରେମଲେ ମାଇପାନ୍ବକ୍ ସା'ଗା' । 2ସା'ଗା'ସା' ଜିସୁଲା ଗୁଇ'ସେ'ଗା ବୁରଗୁତାସା' ରେମଲେସା ଗୁଇ'ସେ'ଗା ମାରି ବୁରତା ଡ'ସେକ୍ ମାଇପା ଇମ୍ବାୟ ଆରେମଲେ ଅମାଗ'କୁନୁଂ ମା'ଏ ଅଂଅଁ'ସେକ୍ ଅବୁଦି ଗିସେ'ଗା' । 3ସା' ଆମାଇପା ସବ'ସେ'ଗା ବନ୍ଦିବକ୍ ସୁରୁଂଅଁ' । ଆଇ'ତୁନ୍ବେଲା ମୁନ୍ଡିପ୍କୁସା' ଇନ୍ଜୁର୍ପନ୍ତେକ୍ ଆମାଇପା ମା'ଏ ବନ୍ଦିବକ୍ଉ ବୁଂଅଁ'କୁ । 4ମାତର୍ ମାପ୍ରୁନା ତୁମ' ଅଂଅଁ'କୁନୁଂ ରେମଲେ ଅବୁଦିର ଆଜିସୁ ବିସ୍ବାସ୍ ଡେମ' । ସା' ବିସ୍ବାସ୍ ଡେମ'କୁନୁଂ ଅବୁଦି ରେମଲେବକ୍ ଆଇଂଗେରେଉ ଏଜାଲ'ନା ପାଁନ୍ସ୍ ଅଜାର୍ସୁଗ ଡୁକୁଗା' ।
5ବେରା ଇନ୍ଜୁର୍ ଜିଉଦିରେମଲେନା ଗୁଲାଇ ମୁନା'ରେମଲେ ମାରି ମସାଲା ବେଡ'କୁନୁଂ ନିୟମ୍ ଅମାକ୍ରେମେସା ଗୁଲାଇର ଜିରୁସାଲମ୍ ମୁନା'ଉଂଗମ୍ବକ୍ ରୁନ୍ଗା' । 6ମୁଲ୍ନା ମୁନା'ପୁଜାରି ଆନାନଲା ମାରି ତିମେ ମୁନା'ପୁଜାରି କୟାପାଲା ମାଇପା ଇମ୍ବାୟ ଆତା ଡୁକୁ, ମାରି ଜଅନ୍ଲା ମାରି ଆଲେକ୍ଜାନ୍ଡର୍ଲା ମାରି ମୁନା'ପୁଜାରିନା ଡିଂଅଁନ୍ରେମ୍ ଗୁଲାଇରସା ଆତା ଡୁକୁଗା' । 7ମା'ଏ ଗୁଲାଇର ରୁନ୍ସେକ୍ ଲେଇ'କୁନୁଂବକ୍ ଆପିତର୍ଲା ମାରି ଆଜଅନ୍ଲା ଇମ୍ବାୟବକ୍ ଆତା ଅ'ତନ'ସେ'ଗା' “ଆପା ଜା ଡି'କେନ୍ ଡେମ୍ ଡ'ସେକ୍ ଅଦିକାର୍ ବେଡ'? ମାରି ଜାନା ଇମିବକ୍ କେନା ଗୁଲାଇ ଡେମ'ପା?” ଡ'ସେକ୍ ଅ'ଗଁସ୍ଲା'ଗା' ।
8ସା' ପବିତ୍ର ଆତ୍ମା ଆପିତର୍ଲା ବପୁ ବେଡ'ସା' ଆମା'ଏ ସୁନ' “ଅ ରେମଲେନ୍ ମୁନା'ପୁଜାରିଲେ ମାରି ମୁନା'ରେମେ! 9ମୁଇନ୍ଡା ସଟାବାଇ'ବକ୍ ନାଂ ମୁଇ ବଲ୍କାମ୍ ଡେମ'ନାଂସା' ମାଇ ମି ବଲ୍ ଡେଂଗା' ଡ'ସେକ୍ ଆନାଂ ଅ'ଗଁସ୍ଲାକ୍ପୁଲେଇ ପେ ଆନାଂ ଆକେ ଅ'ତନ'ତୁପେ ଡ'ନା, 10ପେ ମାରି ଇସ୍ରାଏଲ୍ ରେମଲେ ଗୁଲାଇର କେନା ବଲ୍ ମାଗ'କୁଲା । ନାଜରିତ୍ ଉଂଗମ୍ନା ଆମ୍ବ'ନ୍ ଜିସୁ କିରିସ୍ଟଲା ପେ କୁର୍ସବକ୍ ତାଂଅଁ'ସେକ୍ ଅଗୁୟ'ପେ ଆମାଇ ମାପ୍ରୁ ଗୁଇ'କୁନୁଂକୁରୁଂ ଅମୁରାଗ' । ମାଇନା ଇମିବକ୍ଉ କେନ୍ ରେମ ଆ'ନା ବଲ୍ ଡେଂସେକ୍ ପେନ୍ବକ୍ ତଂଗୁତା ।
11ସା' ‘ବ'ସିଂରେମ୍ ଇମ୍ବ'ନା ବୁରେ ଅଲିରାକ୍ବାଇ' ଡ'ସେକ୍ ଅଡକ୍ସୁଂଅଁ'କୁ,
ଗୁତୁନ୍ ବୁରେଉ ଆ'ନା ବ'ସିଂବେଲା ଗଡିକ୍ବକ୍ ବୁଂବୁଂପୁଲେଇ ଅବୁଦି ବଲ୍ବାଇ' ବୁରେ ଡ'ସେକ୍ ବୁଂଅଁ'ତା' ।’
ଜୁ, ଜିସୁଲାଉ ଗୁତୁନ୍ ବୁରେ ।
12ଆନେଇ' ରକ୍ୟା ଡିନ୍ଡେମ୍ପୁଲେଇ ପାଲ୍ ଜାଏସା ଆଡୁତା, ମାଇଉ ଡୁତା । ମାସା'ଡ'ନା ନେଇ'ନା ପାପ୍ କେମା ଡେମ'ସେକ୍ ଆନେଇ' ଡନ୍ଡ୍କୁରୁଂ ରକ୍ୟା ଡିନ୍ଡେମ୍ପୁଲେଇ କି'ତୁଂ ଆଲୁଂ ମାରି ରେମଲେନ୍ ବିତ୍ରେ ପାଲ୍ ଜାଏସାନା ଇମି ବେଡ'ଆଡୁତା” ଡ'ସେକ୍ ପିତର୍ଲା ସୁନ' ।
13ସା' ପିତର୍ଲା ମାରି ଜଅନ୍ଲା ବପୁ ବାଂସେକ୍ ମବୁତୁଂ ଅଇଁୟ'କୁନୁଂ ମା'ଏ ଜୁଲ'ସେକ୍ ମାଇପା ଡ'ନା ମପଡ୍ବାର୍ରେମ୍ ମାରି ପାଲ୍ ରେମଲେସୁଗଉ ଡୁତା ଡ' ମାଗ'ସେକ୍ ମା'ଏ ଗୁଲାଇର କାବା ଡେଂଉଇଗା' । ମାଇପା ଇମ୍ବାୟ ଜିସୁଲାବୁରଂ ଡୁକୁଗା' ଡ'ସେକ୍ସା ମା'ଏ ମାଗ' । 14ମାତର୍ ଗୁତୁନ୍ ବାନି ଡେଂକୁନୁଂ ରେମ ମାଇପାବୁରଂ ଡୁକୁନୁଂ ଜୁଲ'ସେକ୍ ମା'ଏ ଆମାଇପା ମାଏସା ସୁଁସୁ ଆଗଂତା । 15ସା' ମା'ଏ ଗୁଲାଇର ଲେଇ'ସେକ୍ ବିସାର୍ନା ଡିନ୍ଡେମ୍ନା ଡିଂଅଁକୁରୁଂ ଆମାଇପା ବାଇରି ଉୟା ଡ'ସେକ୍ ସୁନ' ମାରି ମା'ଏ ମା'ଏନ୍ ବିତ୍ରେଉ ଅଇଁୟ' । 16ମା'ଏ ସୁନ', “ଆମାଇପା ନେଇ' ମା ଡେମ୍ନେଇ'? ମାସା'ଡ'ନା ମାଇପା ଡେମ'କୁନୁଂ କେନ୍ କାବାକାବା ଡିନ୍ଡେମ୍ବାଇ' କାମ୍ ଜିରୁସାଲମ୍ ମୁନା'ଉଂଗମ୍ରେମ୍ ଗୁଲାଇର ମାଗ'ତା । ସା' ମାଇପା ଆମାଇ ବଲ୍ ଆଡେମ୍ତ ଡ'ସେକ୍ ନେଇ' ସୁଁସୁ ଆଗଂତୁନେଇ' । 17ସା' ଡି'କେନ୍ବାଇ' କାମ୍ ପାଲ୍ପାଲ୍ ଉଂଗମ୍ବକ୍ସା ଆଡେମେଇ' ମାରି ରେମଲେ ଆଅଂଏଁଇ' । ଗୁତୁନ୍ପୁଲେଇ ଆଜାଏସା ଜିସୁନା ଇମି ସବ'ସେକ୍ ଡି'କେନ୍ ମାରି ଆସୁନ' ଡ'ସେକ୍ ଆମାଇପା ଡରାୟ'ସେକ୍ ସୁଁନେଇ' ” ଡ'ସେକ୍ ଅଇଁୟ' ।
18ସା' ମା'ଏ ଆମାଇପା ବିତ୍ରେ ମାରି ୱାୟ' ଅ'ଗାୟ'ସେକ୍ ଆମ୍ବ'ଏସା ଇନ୍ଡଇ'ଏସା ଜିସୁନା ଇମି ସବ'ସେକ୍ ଡି'କେନ୍ ଆଜାଏସା ଆସୁନ' ମାରି ଆ'ମାଗ' ଡ' ଡରାୟ'ସେକ୍ ସୁନ' । 19ମାତର୍ ପିତର୍ଲା ମାରି ଜଅନ୍ଲା ଆମା'ଏ ସୁନ': “ନାଂ ମାପ୍ରୁନା ତୁମ' ମସୁନପ୍ ପେନା ତୁମ' ସବ'ନା ବଲ୍ ଇ? ମାପ୍ରୁ ଜୁଲ'ନା ଇମ୍ବ'ନା ବଲ୍ ଡ'ସେକ୍ ପେ ସୁଁ । 20ନାଂ ଜୁଲ'କୁନୁଂ ମାରି ଅଂଅଁ'କୁନୁଂ ଆଜାଏସା ମସୁନୁ ଡୁକୁ ଆଗଂତୁନାଂ” ଡ'ସେକ୍ ସୁନ' ।
21ମା'ଏ ଆମାଇପା ମାଏସା ଡିନ୍ଡେମ୍ ଆଗଂତାସା' ଆମାଇପା ଅବୁଦି ଡରାୟ'ସେକ୍ ବେନ୍ଟାୟ' ବେଡ' । ମାସା'ଡ'ନା ଆତୁନ୍ ରେମ ବଲ୍ ଡେମ'କୁନୁଂ ଜୁଲ'ସେକ୍ ଗୁଲାଇର ଆମାପ୍ରୁ ସୁନ୍ଡ୍ରକ୍ସେ'ଗା ଡୁକୁ । 22ମାରି ଗୁତୁନ୍ ଇମ୍ବ'ନ୍ ରେମନା ଜିବନ୍ବକ୍ କାବାକାବା ଡିନ୍ଡେମ୍ବାଇ' କାମ୍ ଡେମ'ସେକ୍ ବଲ୍ ଡେମ' ଗୁତୁନ୍ ରେମନା ବୟସ୍ ଡ'ନା ସାଲିସ୍ ବରସ୍ ବାଗ୍ବକ୍ ଡୁକୁ ।
ଆଜିସୁଲା ବିସ୍ବାସ୍ ଡେମ'କୁନୁଂ ରେମଲେ ପାର୍ତନା ଡିନ୍ଡେମ୍ଡେନ୍
23ମା'ଏ ଆମାଇପା ବେନ୍ଟାୟ'ସା' ଉନ୍ତ୍କୁରୁଂ ମାଇପା ମା'ଏନ୍ ରେମଲେନ୍ବକ୍ ସୁରୁଇ' ଉଇସେକ୍ ମୁନା'ପୁଜାରିଲେ ମାରି ମୁନା'ରେମେ ସୁନ'କୁନୁଂ ଗୁଲାଇ ଆମା'ଏ ବାର୍ସୁନ' । 24ସା' ଗୁତୁନ୍ ଅଂଅଁ'ସେ'ଗା ମା'ଏ ଗୁଲାଇର ମିସ୍ସେ'ଗା ଅବୁଦି ଡକ୍ତି'ତା ପାର୍ତନା ଡେମ'ସେକ୍ ଆମାପ୍ରୁ ସୁନ' “ଅ ପ୍ରବୁ, କେନ୍ କି'ତୁଂ, ଦର୍ତନି, ସମ୍ଦର୍କିନ୍ଡାକ୍ ମାରି ଗୁତୁନ୍ ଗୁଲାଇବକ୍ ମାମା ଡୁତା ଗୁତୁନ୍ ଗୁଲାଇ ନଉ ଅ'ରଇଁୟ'ନ । 25ଇନ୍ତେକନ୍ଡେକ୍ ଆନ ସେବା ଡେମ'ସେକ୍ ଡୁକୁନୁଂ ନେଇନା ବୁସାଁ ଦାଉଦ୍ଲାବୁରଂ ନ ଅଇଁୟ'କୁନ । ଆମାଇ ପବିତ୍ର ଆତ୍ମା ସାନ୍ଡୁଂଅଁସା' ମାଇ ସୁନ'ତା:
‘ଜାଜା ଜିଉଦିରେମଲେ ଆରାକ୍, ଡୁ'ତୁନ୍ବାଇ' ରେମଲେ ମାସା' ଅବୁଦି ଗିସେ'ଗୁତା?
ମାରି ପାଲ୍ ଜାତିନ୍ ରେମଲେ ମାସା' ଅର୍ତ ମଡୁକୁ ବିସୟ ସରଉ ଏତ୍ସେକ୍ ଡୁତା?
26ପ୍ରବୁନା ବିରୁଦ୍ରେ ମାରି ମାଇନା କିରିସ୍ଟନା ବିରୁଦ୍ରେ
କେନ୍ ଦର୍ତନିନା ରାଜାଲେ ତୁର୍ଗୁତା
ମାରି ମୁନା'ରେମେ ଗୁଲାଇର ରୁନ୍ଗୁତା’ ଡ'ସେକ୍ ସୁନ'ତା ।
27 #
ଲୁକ 23:7–11;
ମାତିଉ 27:1,2; ମାର୍କ 15:1; ଲୁକ 23:1; ଜଅନ୍ 18:28,29 ସତଇସା ଏରଦ୍ ରାଜାଲା ମାରି ପନ୍ତିୟ ପିଲାତଲା ଜାଜା ଜିଉଦିରେମଲେ ଆରାକ୍ ଡୁ'ତୁନ୍ବାଇ' ରେମଲେବୁରଂ ମାରି ଇସ୍ରାଏଲ୍ ରେମଲେବୁରଂ କେନ୍ ମୁନା'ଉଂଗମ୍ବକ୍ ମିସ୍ସେକ୍ କିରିସ୍ଟ ଡ'ସେକ୍ ନ ସିରେଲ'କୁନୁଂ ଆନ ସେବା ଡିନ୍ଡେମା ପବିତ୍ରବାଇ' ଜିସୁନା ବିରୁଦ୍ରେ ଅଇଁୟ'ତା । 28ନ ଅବୁଦି ବପୁବାଇ'ସା' ଆଜିସୁଲା ମା ଡେନ୍ତା ଡ'ସେକ୍ ନ ମୁଲ୍ମୁଲ୍ ଏତ୍କୁନୁଂସୁଗଉ ଆ'ନା ମା'ଏ ଆମାଇ ଡେମ'ତା । 29ଅ ପ୍ରବୁ, ଆ'ନା ମା'ଏ ଆନେଇ ମି ଡରାୟ'ତା ଗୁତୁନା ନ ଅଂ । ମାରି ନେଇ ନନା କାମ୍ରେମ୍ସା' ନ ସୁନ'କୁନୁଂ ତୁମ' ବପୁ ବାଂସେକ୍ ସୁଁସୁପୁଲେଇ ନ ଆନେଇ ସାନ୍ଡୁଂ । 30ଆନ ସେବା ଡେମ'କୁନୁଂ ପବିତ୍ରବାଇ' ଜିସୁନା ଇମିବକ୍ ସିବାଇ' ରେମଲେବକ୍ ବାନି ଡେମ'ସେକ୍ ନନା ସିନଲେ ମାରି ଅବୁଦି କାବାକାବା ଡିନ୍ଡେମ୍ବାଇ'ନା କାମ୍ ନେଇ ଡିନ୍ଡେମ୍ବେଲା ନନା ବପୁ ନ ଅସୁଇ'” ଡ'ସେକ୍ ସୁନ' ।
31ମା'ଏ ଡି'କେନ୍ ପାର୍ତନା ଡେମ'ସା' ମା'ଏ ଗୁଲାଇର ଲେଇ'କୁନୁଂ ଡିଂଅଁ ଲୁନ୍ଡୁର୍ଗା' । ମାରି ମା'ଏ ଗୁଲାଇର ପବିତ୍ର ଆତ୍ମାନା ବପୁ ବାଂସେକ୍ ମବୁତୁଂ ମାପ୍ରୁନା ତୁମ' ଆଗୁଲାଇର ସୁନ' ।
ଆଜିସୁ ବିସ୍ବାସ୍ ଡେମ'କୁନୁଂ ରେମଲେ ମା'ଏନା ଦନ୍ସମ୍ପତି ବାନ୍ଟାଡେନ୍
32 #
ପେରିତ 2:44,45 ଆଜିସୁ ବିସ୍ବାସ୍ ଡେମ'କୁନୁଂ ଗୁଲାଇ ରେମଲେ ମୁଇ ଏତ୍ ମୁଇ ଜିବନ୍ ଡେଂସେକ୍ ଡୁକୁ । ମା'ଏନ୍ବକ୍ ଡୁକୁନୁଂ ଦନ୍ସମ୍ପତି ଗୁଲାଇ ଜାଏସା କେନା ନିଂନା ଡ'ସେକ୍ ଆସୁନ୍ତ । ମାତର୍ ମା'ଏନ୍ବକ୍ ମାମା ଡୁକୁ ଗୁତୁନ୍ ଗୁଲାଇ ମା'ଏ ଅ'ବିନେକ୍ସେକ୍ ଡୁକୁ । 33ପେରିତଲେ ଗୁଲାଇର ପ୍ରବୁ ଜିସୁଲା ଗୁଇ'ସେକ୍ ବୁରଗା' ଡ' ଅବୁଦି ଅ'ବପୁକ୍ସେକ୍ ଆଗୁଲାଇର ସାକି ସୁନ' । ମାପ୍ରୁ ଆମା'ଏ ଆଗୁଲାଇର ଅବୁଦି ଆସିର୍ବାଦ୍ ଡେମ' । 34ସା' ମା'ଏନ୍ ବିତ୍ରେ ଜାଏସା ମବୁନାମ୍ବାଇ'ରେମ ଆଡୁତା । ମାସା'ଡ'ନା ଜାଜାନ୍ବକ୍ ଡିଂଅଁସାରୁ ଲି'ୟୁଂବୁରଂ ଡୁକୁ ଗୁତୁନ୍ ଗୁଲାଇ ସୁଂଅଁ'ସେକ୍ 35ଡାବୁ ଆପାଲ୍ ରେମଲେ ବାନ୍ଟାଲ' ବିବେ'ପୁଲେଇ ପେରିତଲେନ୍ ତିତିବକ୍ ବେଡ'କୁ । ଗୁତୁନ୍ ଡାବୁବୁରଂ ପେରିତଲେ ଆମୁଇନ୍ଡା ଆମୁଇନ୍ଡା ମାମା ଦର୍କାର୍ ଡ' ମାଗ'ସେକ୍ ଆ'ଇ ଦର୍କାର୍ ଆ'ଇତୁନ୍ ବେଡ'କୁ ।
36ଆତା କୁପ୍ରିୟ ଦିପନା ମୁଇନ୍ଡା ଜସେପ୍ ଡ'ସେକ୍ ଡୁକୁଗା' । ମାଇ ଲେବିୟ କୁଲ୍ନା ରେମ । ଆମାଇ ପେରିତଲେ ବର୍ନବା ଡ'ସେକ୍ ଅ'ଇମିଲ' । ବର୍ନବା ଡ'ନା ଆରେମଲେ ଅ'ସୁଗୁର୍ରେମ୍ । 37ମାଇନା ଜମି ମୁଇ ଡୁକୁନୁଂ ମାଇ ସୁଂଅଁ'ସେକ୍ ଗୁତୁନ୍ ଡାବୁ ଆଜାଆଜା ଦର୍କାର୍ ଆମା'ଏ ବେ' ଡ'ସେକ୍ ମାଇ ପେରିତଲେନ୍ବକ୍ ରିଂଅଁ' ବେଡ' ।
Currently Selected:
ପେରିତ 4: BFW
Highlight
Copy
Compare
Share
Want to have your highlights saved across all your devices? Sign up or sign in
CC BY-NC-ND 4.0