ପେରିତ 6
6
ସେବାକାମ୍ ଡିନ୍ଡେମ୍ପୁଲେଇ ସାତ୍ଲକ୍ବକ୍ ସିରେଡେନ୍
1ଉନ୍ତା ଆଜିସୁଲା ବିସ୍ବାସ୍ ଡେମ'କୁନୁଂ ରେମଲେ ଅବୁଦି ଅବୁଦି ଡେଂକୁ । ସା' ସୁସୁମ୍ପୁଲେଇ ଇସାଉ ବାନ୍ଟାଲ' ବିବେ'ବେଲା ଆନେଇନା ରାନ୍ଡିଲେ ପେ ବଲ୍ ଆବେ'ତୁପେ ଡ'ସେକ୍ ଗିରିକ୍ସାମ୍ ଅଇଁନା ଜିଉଦିରେମଲେ ଏବ୍ରିସାମ୍ ଅଇଁନା ଜିଉଦିରେମଲେବକ୍ ସୁନ' । 2ସା' ବାରଲକ୍ ପେରିତଲେ ଆତା ଆଜିସୁ ବିସ୍ବାସ୍ ଡେମ'ସେକ୍ ଡୁକୁନୁଂ ଆଗୁଲାଇ ସିସ୍ୟଲେ ନେଇ' ଲେଇ'ସେକ୍ ଅଇଁନେଇ' ଡ'ସେକ୍ ୱାୟ' । ୱାୟ'ସେକ୍ ପେରିତଲେ ଆମା'ଏ ଆଗୁଲାଇର ସୁନ' “ନେଇ ମାପ୍ରୁନା ତୁମ' ସୁଁସୁ ବନ୍ଦ୍ ଡେମ'ସେକ୍ ସୁସୁମ୍ନା ବାନ୍ଟାଲ' ବେ'ତୁନେଇ ଡ'ସେକ୍ ଡୁକୁନା ବଲ୍ ଆରାକ୍ । 3ସା' ବାଇଲ'ଗେ ପେ ଅଂ, ପେନ୍ ବିତ୍ରେ ଆଜାଏସା ସାତ୍ଲକ୍ବକ୍ ସିରେ । ମା'ଏ ମିବାଇ' ରେମ ଡୁକୁଡୁତା ଡ'ନା, ମାପ୍ରୁନା ପବିତ୍ର ଆତ୍ମା ବାଂକୁନୁଂ ରେମବକ୍ ମାରି ବଲ୍ ବୁଦିବାଇ' ରେମ ଡ'ସେକ୍ ପେ ମାଗ'କୁନୁଂ ରେମବକ୍ ମାରି ଗୁଲାଇର ଆମା'ଏ ବଲ୍ରେମ୍ ଡ'ସେକ୍ ସାକି ସୁନ'କୁନୁଂ ରେମବକ୍ ସିରେତୁପେ । ଆମା'ଏ କେନ୍ ଗୁଲାଇ ବାନ୍ଟାଲ' ବିବେ'ନା କାମ୍ବକ୍ ନେଇ' ବୁଂନେଇ' । 4ଡୁ'ତୁନ୍ ଡ'ନା ନେଇ ଇସାଉ ପାର୍ତନା ଡିନ୍ଡେମ୍ ଗଂତୁନେଇ ମାରି ମାପ୍ରୁନା ତୁମ' ସୁନ'ସୁନ'ସେକ୍ ଆରେମଲେ ଅମାକ୍ ଗଂତୁନେଇ” ଡ'ସେକ୍ ସୁନ' ।
5ସା' ଆତା ଡୁକୁନୁଂ ଗୁଲାଇର ଗୁତୁନ୍ ଅଂଅଁ'ସେକ୍ ସାର୍ଦାକ୍ସେକ୍ ରାଜି ଡେଂଗା' । ସା' ମା'ଏ ଆସ୍ତିପାନ୍ଲା ସିରେଲ' । ମାଇ ଆମାପ୍ରୁ ଅବୁଦି ବଲ୍ ବିସ୍ବାସ୍ ଡେମ'ସେକ୍ ଡୁକୁ ମାରି ପବିତ୍ର ଆତ୍ମା ସୁନ'କୁନୁଂସୁଗ ମାଇ ଗୁଲାଇ ଡେମ' ଡୁକୁ । ମାରି ମା'ଏ ଆପିଲିପ୍ଲା, ଆପର୍କରଲା, ଆନିକାନରଲା, ଆତିମନଲା, ଆପାର୍ମନାଲା, ମାରି ଜିଉଦିରେମ ଏଗ୍ସେକ୍ ଡୁକୁନୁଂ ଆନ୍ତିୟକିଆ ମୁନା'ଉଂଗମ୍ନା ଆନିକଲାୟଲା ଡି'ତା ସିରେଲ' । 6ସିରେଲ'ସେକ୍ ମା'ଏ ଆତୁନ୍ ସାତ୍ଲକ୍ ରେମଲେ ପେରିତଲେନ୍ବକ୍ ରିଂଗା' । ସା' ପେରିତଲେ ମା'ଏନା ବାଗ୍ବକ୍ ତିତି ବୁଂଅଁ'ସେକ୍ ମାପ୍ରୁ ଆମା'ଏ ଗୁତୁନ୍ କାମ୍ବକ୍ ସାନ୍ଡୁଂ ଡ'ସେକ୍ ପାର୍ତନା ଡେମ' ।
7ସା' ମାପ୍ରୁନା ବଲ୍କବର୍ ଗୁଲାଇ କୁନ୍ଡା ସୁଁସୁ ମୁଲାୟ' । ସା' ଜିରୁସାଲମ୍ ମୁନା'ଉଂଗମ୍ବକ୍ ଆଜିସୁଲା ବିସ୍ବାସ୍ ଡେମ'କୁନୁଂ ରେମଲେ ଅବୁଦି ଅବୁଦି ଡେଂଗା' । ମାରି ଜିଉଦିରେମଲେନା ପୁଜାରିଲେସା ଅବୁଦିର ଆଜିସୁ ବିସ୍ବାସ୍ ଡେମ'ସେକ୍ ଆମାପ୍ରୁ ମାନ୍ଗା' ।
ଆସ୍ତିପାନ୍ଲା ସୁସପ୍ଡେନ୍
8ମାପ୍ରୁ ଆସ୍ତିପାନ୍ଲା ଅବୁଦି ବପୁବାଇ' କାମ୍ ଡିନ୍ଡେମ୍ପୁଲେଇ ସାନ୍ଡୁଂଅଁ'ସା' ମାଇ ଅବୁଦି କାବାକାବା ଡିନ୍ଡେମ୍ବାଇ' କାମ୍ ମାରି ସିନଲେସା ଅସୁୟ' । 9ମାତର୍ ଲିବର୍ତିନ ଡ'ସେକ୍ ଇମିକୁନୁଂ ଜିଉଦା ରେମଲେନା ପାର୍ତନା ଡିଂଅଁବକ୍ ସାକୁନୁଂଏଁ ଏନ୍ତୁକ୍ର ସ୍ତିପାନ୍ଲାବୁରଂ ଗିସେକ୍ସେକ୍ ଅଇଁ ମୁଲାୟ' । ମା'ଏ ଡ'ନା ଏନ୍ତୁକ୍ର କୁରିନିୟ ଉଂଗମ୍ନା, ଆଲେକ୍ଜାନ୍ଡ୍ରିଆ ଉଂଗମ୍ନା ମାରି ଏନ୍ତୁକ୍ର କିଲିକିଆ ମାରି ଆସିଆ ଦେସ୍ନାସା ରେମଲେ ଡୁକୁଗା' । 10ମାତର୍ ପବିତ୍ର ଆତ୍ମା ଆସ୍ତିପାନ୍ଲା ବଲ୍ ବୁଦି ବେଡ'ସା' ମାଇ ମା'ଏବୁରଂ ବଲ୍ ଅଇଁ ଗଂଗା' । ସା' ମା'ଏନ୍ ତୁମ' ଜାନ୍ସା ଆମାଇ ଜିନ୍ବାର୍ ଆଗଂତା ।
11ସା' ମା'ଏ ଆଏନ୍ତୁକ୍ର କଲେ ୱାୟ'ସେକ୍ ସୁନ' “ସ୍ତିପାନ୍ଲା ଆମାପ୍ରୁ ମାରି ଆମସାଲା ଅଲିରାକ୍ବାଇ' ସୁନ'କୁନୁଂ ନେଇ ଅଂଅଁ'ତୁନେଇ” ଡ'ସେକ୍ ପେ ସୁଁ ଡ' ସୁତ୍ରାୟ'ସେକ୍ ଆମା'ଏ ଅ'ସୁନ' ।
12ସା' ମା'ଏ ଆଜିଉଦିରେମଲେ ମାରି ଆମୁନା'ରେମେ ମାରି ମସାଲା ବେଡ'କୁନୁଂ ନିୟମ୍ ଅମାକ୍ରେମେବକ୍ ଆଗୁଲାଇର ସ୍ତିପାନ୍ନା ବାଗ୍ବକ୍ ଅଗିସେଡ' । ସା' ମା'ଏ ସାକ୍ସେକ୍ ଆସ୍ତିପାନ୍ଲା ସବ'ସେକ୍ ବିସାର୍ନାପୁଲେଇ ଲେଇ'କୁନୁଂ ଜିଉଦିରେମଲେନା ମୁନା'ରେମ୍ବକ୍ ରିଂଗା' । 13ମାରି ମା'ଏ ଆଏନ୍ତୁକ୍ର ପଲୁ ସାକି ସୁଁସୁରେମ୍ବକ୍ ରିଂଗା'ସା' ମା'ଏ ସୁନ' “ମାଇ ମାପ୍ରୁନା ପବିତ୍ର ମନ୍ଦିର୍ନା ମାରି ମସାଲା ବେଡ'କୁନୁଂ ନିୟମ୍ ବାଗ୍ବକ୍ ଇସାଉ ଅଲିରାକ୍ବାଇ' ସୁନ'ତା । 14ମାସା'ଡ'ନା ନାଜରିତ୍ ଉଂଗମ୍ନା ଜିସୁଲା କେନ୍ ଜାଗା ବିଲାୟ'ସୁଂତ ମାରି ମସାଲା ଆନେଇ' ଡେମ୍ ଡ'ସେକ୍ ବେଡ'କୁନୁଂ ନେଇ'ନା ଗୁଲାଇ ନିୟମ୍ ବାଦ୍ଲାଇତ ଡ'ସେକ୍ ମାଇ ସୁନ'କୁନୁଂ ନେଇ ଅଂଅଁ'ତୁନେଇ” ଡ'ସେକ୍ ମା'ଏ ପଲୁସାକି ସୁନ' ।
15ସା' ଆତା ବିସାର୍ନା ଡିନ୍ଡେମ୍ପୁଲେଇ ଲେଇ'କୁନୁଂଏଁ ଗୁଲାଇର ଆମାଇଉ ବଲ୍ବଲ୍ ଜୁଲ'କୁ । ମାରି ମାଇନା ସାର୍ମ' ମାପ୍ରୁନା ଦୁତନା ସାର୍ମ'ସୁଗ ଡୁକୁନୁଂ ମା'ଏ ଜୁଲ' ।
Currently Selected:
ପେରିତ 6: BFW
Highlight
Copy
Compare
Share
Want to have your highlights saved across all your devices? Sign up or sign in
CC BY-NC-ND 4.0