ପେରିତ 3
3
ପିତର୍ଲା ସଟାବାଇ' ରେମବକ୍ ବଲ୍ ଡିନ୍ଡେମ୍ଡେନ୍
1ମୁସିଂ ସିମି'ଇ ତିନ୍ଟାବେଲା ପାର୍ତନା ଡିନ୍ଡେମ୍ବେଲା ପିତର୍ଲା ମାରି ଜଅନ୍ଲା ମାପ୍ରୁନା ମନ୍ଦିର୍ବକ୍ ଉଇଡେଂକୁ । 2ଆଇ'ତୁନ୍ବେଲା ଜନମ୍ବାଂସା'ଉ ସଟାବାଇ' ଡୁକୁନୁଂ ଆମୁଇନ୍ଡା ରେମ ଆ'ଇରସୁଗ ଡୁନ'ରିଂଅଁ' ସା'ଗା' । ମାସା'ଡ'ନା ମନ୍ଦିର୍ବକ୍ ଜାଜା ଗାଇତା ଆମା'ଏ ମାଂନି ଲୁଲୁ'ପୁଲେଇ ଆମାଇ ଇସାଉ ଡୁନ' ରିଂଅଁ'ସେକ୍ ମନ୍ଦିର୍ନା ମଇନାବାଇ' ଡ'ସେକ୍ ଇମିକୁନୁଂ ମୁଇ ଡାନ୍ଡର୍ବକ୍ ଅଲେୟ' ବେଡ'କୁ । 3ପିତର୍ଲା ମାରି ଜଅନ୍ଲା ମନ୍ଦିର୍ବକ୍ ଗୁଗାଇବେଲା ମାଇ ଜୁଲ'ସେ'ଗା ଆମାଇପା ମାଂନି ଲୁଡ' । 4ଲୁଡ'ସା' ପିତର୍ଲା ଜଅନ୍ଲାବୁରଂ ଆମାଇ ବଲ୍ ଜୁଲ' ମାରି ପିତର୍ଲା ଆମାଇ ସୁନ', “ଆନାଂ ନ ବଲ୍ ଜୁ” ଡ'ସେକ୍ ସୁନ' । 5ସୁନ'ସା' ଗୁତୁନ୍ ସଟାଲା ମାଇପା ଆନିଂ ମାମା ବେ'ତ ଡେ ମାଡେ ଡ' ଆସ୍ସେ'ଗା ମାଇ ଆମାଇପା ବଲ୍ ଜୁଲ' ।
6ମାତର୍ ପିତର୍ଲା ଆମାଇ ସୁନ' “ସୁନାରୁପା ନିଂବକ୍ ଆଡୁତା ମାତର୍ ନିଂବକ୍ ମା ଡୁତା ଗୁତୁନା ନିଂ ଆନ ବେ'ତିଂ । ନାଜରିତ୍ ଉଂଗମ୍ନା ଜିସୁ କିରିସ୍ଟନା ଇମିବକ୍ ନ ତଂସେକ୍ ଉରିଂ” ଡ' ସୁନ' । 7ସୁନ'ସେକ୍ ମାଇ ମାଇନା ସୁସୁମ୍ତିବୁରଂ ଆମାଇ ସବ'ସେକ୍ ଲେନ' ଅତଗ୍ଡାଗ' । ସା' ମାଇନା ତିକ୍ସୁଂ ମାରି ଗୁତାସୁଂ ଗୁଲାଇ ସେଟ୍ଟ' ବପୁ ବାଂସେକ୍ ବଲ୍ ଡେଂଗା' । 8ସା' ମାଇ ତଂସେକ୍ ଉରିଂପୁଲେଇ ମୁଲାୟ' ମାରି ଅବୁଦି ସାର୍ଦାକ୍ସେକ୍ ଉରିଂଅଁ' ଉରିଂଅଁ'ସେକ୍ ବାଗ୍ବକ୍ ବାଗ୍ବକ୍ ଅବୁଦି ପାଲି କେଲଂକେଡାଇ' ମେକ୍ସେକ୍ ଆମାପ୍ରୁ ସୁନ୍ଡ୍ରକ୍ ସୁନ୍ଡ୍ରକ୍ସେ'ଗା ମାଇପାବୁରଂ ମାପ୍ରୁନା ମନ୍ଦିର୍ବକ୍ ଗାଇଗା' । 9ସା' ଆତା ଡୁକୁନୁଂ ଗୁଲାଇ ରେମଲେ ମାଇ ଉରିଂଅଁ' ସୁସାପ୍ଡେଂକୁନୁଂ ମାରି ଆମାପ୍ରୁ ସୁନ୍ଡ୍ରକୁନୁଂ ଜୁଲ' । 10ଜୁଲ'ସେକ୍ ଆତା ମନ୍ଦିର୍ନା ମଇନାବାଇ' ଡ'କୁନୁଂ ଗୁତୁନ୍ ଡାନ୍ଡର୍ବକ୍ ଲେଇ'ସେ'ଗା ମାଂନି ଲୁଡ'କୁନୁଂଆଁ କୁନା ଡ'ସେକ୍ ମା'ଏ ଗୁଲାଇର ମାଗ' । ମାରି ଆମାଇ ଡେଂକୁନୁଂ ଗୁଲାଇ ଜୁଲ'ସେକ୍ ମା'ଏ ଗୁଲାଇର କେନା ମିଞାଂ ଡେଂଗା' ଡ'ସେକ୍ ଅବୁଦି କାବାକାବା ଡେଂଉଇଗା' ।
ଜୁଲ'ତଂକୁନୁଂ ରେମଲେବକ୍ ପିତର୍ଲା ସୁଁସୁଡେନ୍
11ଗୁତୁନ୍ ରେମ ଅବୁଦି ସାର୍ଦାକ୍ସେକ୍ ଆପିତର୍ଲା ମାରି ଆଜଅନ୍ଲା ସବ'ସେକ୍ ତିରେ ଡୁକୁନୁଂବେଲା ଆତା ଡୁକୁନୁଂ ରେମଲେ ଗୁଲାଇର ଅବୁଦି କାବା ଡେଂସେକ୍ ସଲମନ୍ନା ବେଦି ଡୁକୁନୁଂ ଜାଗାବକ୍ ମା'ଏନ୍ବକ୍ ଉର' ସା'ଗା' । 12ପିତର୍ଲା ଗୁତୁନ୍ ଜୁଲ'ସେକ୍ ଆଗୁଲାଇର ସୁନ' “ଅ ଇସ୍ରାଏଲ୍ ରେମଲେ, ଡି'କେନା ଡେଂକୁନୁଂ ଗୁଲାଇ ଜୁଲ'ସେକ୍ ମାସା' ପେ କାବା ଡେଂସେକ୍ ଡୁତୁପେ? ନାଂ ନିଜର୍ନା ବପୁବୁରଂ ଆରା'ଗେ ନାଂ ଅବୁଦି ଦରମ୍ବାଇ' ରେମସା' ଡି'କେନା ଆମାଇ ବଲ୍ ଡେମ'ନାଂସା' ମାଇ ଉରିଂ ଗଂଗା' ଡ'ସେକ୍ ପେ ଆନାଂ ଡି'କେନା ଜୁଲ'ତୁପେ ଇ? 13ନେଇ'ନା ୟା'ତୁତାଲେ ଅବ୍ରାଆମ୍ଲା, ଇସାକ୍ଲା ମାରି ଜାକୁବ୍ଲା ସୁନ୍ଡ୍ରକୁନୁଂ ମାପ୍ରୁ ଆମାଇ ସେବା ଡେମ'କୁନୁଂ ଆଜିସୁଲା ମୁନା'ରେମ୍ ଡ'ସେକ୍ ଅସୁୟ'ତା#3:13 ମୁନା'ରେମ୍ ଡ'ସେକ୍ ଅସୁୟ'ତା ମଇମା ବେ'ଡ' । ଆଜିସୁଲା ବିସାର୍ନା ଡେମ'ସେକ୍ ଅଗୁଇ'ପୁଲେଇ ପେ ଆମାଇ ସବ'ସେ'ଗା ପିଲାତନା ତିତିବକ୍ ବେଡ'ପେ ମାରି ମାଇ ଅଲିରାକ୍ବାଇ' ରେମ ଡ'ସେକ୍ ସୁନ'ପେ । ପିଲାତଲା ଆମାଇ ଅନ୍ତୁର'ବେ'ତିଂ ଡ' ସୁନ'ସା'ଏସା ପେ ଆରାକ୍ ଆଅନ୍ତୁର' ଡ'ସେକ୍ ସୁନ'ପେ । 14#ମାତିଉ 27:15–23; ମାର୍କ 15:6–14; ଲୁକ 23:13–23; ଜଅନ୍ 19:12–15ପେ ଆମୁଇନ୍ଡା ପବିତ୍ରବାଇ'ବକ୍ ମାରି ମାପ୍ରୁ ଜୁଲ'ନା ବଲ୍ବାଇ' ରେମ ଡ'କୁନୁଂବକ୍ ଦର୍କାର୍ ଆରାକ୍ ଡ'ସେକ୍ ସୁନ'ପେ । ଅଡାପ୍ରେମ୍ବାଇ'ବକ୍ ପେପୁଲେଇ ଅ'ତୁର' ବେ' ଡ'ସେକ୍ ସୁନ'ପେ । 15ମାରି ଆରେମଲେ ଜା ମଡୁନମ୍ ଜିବନ୍ ବେ'ତ ଆମାଇ ପେ ଅଗୁୟ'ପେ । ମାତର୍ ଗୁଇ'କୁନୁଂ ରେମଲେନ୍ ବିତ୍ରେ ଆମାଇ ମାପ୍ରୁ ବ'ରଲ' ଡ'ସେକ୍ ନେଇ ସାକି ଡୁତୁନେଇ । 16ଜିସୁନା ଇମିବକ୍ ବିସ୍ବାସ୍ ଡେମ'ସା'ଉ କେନ୍ ରେମନା ତିକ୍ସୁଂ ଜିସୁଲା ବଲ୍ ଡେମ' । ଆମାଇ ପେ ଆ'ନା ଜୁଲ'ତୁପେ ମାରି ସିଁସେଇଁନୁକ୍ ମାଇ ମି ଡୁକୁଗା' ଡ'ସେକ୍ସା ପେ ଗୁଲାଇର ମାଗ'ତୁପେ । ସତଇସା ନାଂ ଆଜିସୁ ବିସ୍ବାସ୍ ଡେମ'ନାଂସା'ଉ କୁନା ବଲ୍ଡେଂଗା'; ଜୁ, ଗୁତୁନା ପେ ଗୁଲାଇର ଆ'ନା ଜୁଲ'ତୁପେ ।
17ଅ ବୁୟାଂଏଁ, ପେ ମାରି ପେନ୍ ମୁନା'ରେମେ ଗୁଲାଇର ମମୁନାକ୍ ଡୁ'ତୁନା ଡେମ'ତା ଡ'ସେକ୍ ନିଂ ମାଗ'ତିଂ । 18ମାତର୍ କିରିସ୍ଟଲା ଡି'କେନ୍ ଅବୁଦି କସ୍ଟ ବାଂସେକ୍ ଗୁଇ'ତା ଡ'ସେକ୍ ଇନ୍ତେକନ୍ଡେ'କା ମାପ୍ରୁ ଆଗୁଲାଇ ବାବବାଦିଲେ ସୁନ'ସା' ମା'ଏ ସୁନ'କୁନୁଂ ଆ'ନା ସତଇସା ଡୁ'ତୁନା ଡେମ'ତା । 19ଡୁ'ତୁନ୍ସା' ପେନା ପାପ୍ ଗୁଲାଇ କେମା ଡିନ୍ଡେମ୍ପୁଲେଇ ପେ ପେନା ପାପ୍ ଗୁଲାଇ ଅଡକ୍ସୁଂଅଁ'ସେକ୍ ମାପ୍ରୁନ୍ବକ୍ ଆନ୍ଡେଇଁସେକ୍ ସା'ବା । 20ଡୁ'ତୁନ୍ ଡେମ'ନା ପ୍ରବୁ ଆପେ ସାନ୍ତିସାର୍ଦା ଅ'ଡେମ୍ନା ବେଲା ପେନ୍ବକ୍ ସାପ୍ତା । ମାରି ପେନ୍ବକ୍ ବେନ୍ଟାଇବାର୍ପୁଲେଇ ସିରେଲ' ବୁଂଅଁ'କୁନୁଂ କିରିସ୍ଟ ଡ'କୁନୁଂ ଆଜିସୁଲା ପେନ୍ବକ୍ ମାଇ ମାରି ବେନ୍ଟାୟ' ବେ'ତ । 21ମାରି ମାପ୍ରୁ ଇନ୍ତେକନ୍ଡେ'କା ମାଇନା ପବିତ୍ରବାଇ' ବାବବାଦିଲେବକ୍ ସୁନ'ବୁଂଅଁ'କୁନୁଂସୁଗ ମାପ୍ରୁ ଗୁଲାଇ ମାରି ତିମେ ଅ'ଡମ୍ପନ୍ତେ'କା ଜିସୁଲା ସରଗ୍ବକ୍ଉ ଡୁକୁଡୁତା । 22ଇନ୍ତେକନ୍ଡେ'କା ମସାଲା ସୁନ'କୁ ‘ନିଂସୁଗବାଇ' ଆମୁଇନ୍ଡା ବାବବାଦିଲା ପେନ୍ ନିଜର୍ ରେମଲେନ୍କୁରୁଂ ପ୍ରବୁ ମାପ୍ରୁଲା ପେପୁଲେଇ ଅ'ତନ୍ତ । ମାଇ ଆପେ ମାମା ସୁନ୍ତ ଗୁତୁନା ଗୁଲାଇ ପେ ଅଂ ଡୁତା । 23ମାତର୍ ଜା ଗୁତୁନ୍ ବାବବାଦିନା ତୁମ' ଆମାନ୍ତା ଆମାଇ ମାପ୍ରୁନା ରେମଲେନ୍କୁରୁଂ ନାସାୟ'ସୁଂତ ।’
24ସତଇସା ଇନ୍ତେକନ୍ଡେକ୍ ଡୁକୁନୁଂ ସାମୁଏଲ୍ ଡ'ସେକ୍ ଇମିକୁନୁଂ ବାବବାଦିନାକୁରୁଂ ମୁଲାୟ'ସେକ୍ ମାଇନା ତିର୍ଗି' ସା'କୁନୁଂ ଗୁଲାଇ ବାବବାଦିଲେସା ଆ'ନ୍ଦିନ୍ ଆ'ନ୍କାଲ୍ବକ୍ ମାମା ଡେଂଗୁତା ଗୁତୁନ୍ ବିସୟରେ ସୁନ'କୁ । 25ଜୁ, ପେଉ ଗୁତୁନ୍ ବାବବାଦିଲେନା ଉଁ'ଉଁନେ । ମାପ୍ରୁ ଆଅବ୍ରାଆମ୍ଲା ସୁନ' ‘ନନା ଉଁ'ଉଁନେନ୍ ଇ'ଗ୍ଲେଇଁଏନ୍କୁରୁଂ କେନ୍ ଦର୍ତନିନା ଗୁଲାଇ ରେମଲେ ଆସିର୍ବାଦ୍ ବାମ୍ତା’ ଡ'ସେକ୍ ସୁନ'ବୁଂଅଁ'କୁ । ସା' ପେନ୍ ୟା'ତୁତାଲେବୁରଂ ମାପ୍ରୁ ପର୍ମାନ୍ ସବ'କୁନୁଂ ଗୁତୁନ୍ ପେବୁରଂସା ପର୍ମାନ୍ ସବ'କୁନୁଂସୁଗ ଡୁତା । 26ପେନା ଗୁଲାଇ ଅଲିରାକ୍ବାଇ' କୁରୁଂକୁରୁଂ ଆପେ ମାପ୍ରୁନ୍ବକ୍ ଅ'ଆନ୍ଡେଇଁୟ' ରିଂଅଁ'ସେକ୍ ମାପ୍ରୁ ଆପେ ଆସିର୍ବାଦ୍ ଡିନ୍ଡେମ୍ପୁଲେଇଉ ଆମାଇ ସେବା ଡେମ'କୁନୁଂ ଆରେମ ସିରେଲ'ସେକ୍ ପେନ୍ବକ୍ ସିଁସେଇଁଉ ବେନ୍ଟାୟ' ।”
Currently Selected:
ପେରିତ 3: BFW
Highlight
Copy
Compare
Share
Want to have your highlights saved across all your devices? Sign up or sign in
CC BY-NC-ND 4.0