Sefaniya 1
1
1Ezi yizo mbudi ezi ga gavere Hompa kwaSefaniya posiruwo esi ga kere Josiya zaAmosa mouhompa waJuda.
(Sefaniya zaKusi, Kusi zaGedaliya, Gedaliya zaAmaliya, Amaliya zaHisikiya. Sefaniya kwa kere ntekuru zokononkokona zahompa Hisikiya.)
Ezuva lyepanguro lyaHompa
2 Hompa ta tanta asi: “Ngani hanagura po yininke nayinye yepevhu, 3vantu navenye noyikorama noyidira nonomfi nadinye. Ngani komba po vadinikarunga. Ngani hanagura po vantu navenye, kutupu ogu nga hupa po. Ame Hompa, nyame na yi uyunga.
4“Ngani futisa vantu vaJerusarema nava womoJuda navenye. Ngani hanagura evega lyokuhulilira lyaBara, kutupu hena ogu nga diworoka vapristeli wosipagani ava ngava mu kerere. 5Ngani hanagura navenye ava ava rondo konondundu va tongamene ezuva nokwedi nonombungururu. Ngani hanagura po hena ava ava tongamene nge, tava gana nawa‐nawa kwange, makura tava gana hena nomugano medina lyakarunga Milikomu. 6Ngani hanagura ava va tengura monyima, ava vana kudira hena kukwama nge, ava ava dili kuwiza kwange va ya hundire nge asi ni va pitisire.”
7Ezuva lyaHompa pepi, ezuva eli nga rugana Karunga; ano kareni muna mwena kosipara sendi. Hompa kuna kuliwapaikira kudipaga mbunga zendi ngwendi moomu ava dipaga nzambo. 8Hompa ta tanta asi: “Mezuva olyo lyedipago, ngani futisa marenga novana vahompa wovagara nanavenye ava ava ruganesa nompo dosinayirongo. 9Ngani futisa navenye ava ava tongamene ngwendi vapagani nava ava vaka oku tava dipaga mokuninkira asi va zwide mambo gohekurwawo neyi yokukwata.”
10 Hompa ta tanta asi: “Mezuva olyo ngomu zuvha ezwi lyonkugo pErungavero lyoNomfi moJerusarema. Ngomu zuvha siliro moruha rorupe rositata nehagaro lyehanauko lyenene konondundugona. 11Ngomu kwenauka oku tomu kugu pokuzuvha eyi, one ava mwa kara poruha roponhi rositata, morwa varandesi navenye ngava fa!
12“Posiruwo oso ame ngani gusa ramba, ni fungure Jerusarema. Ngani futisa vantu ava ava litara va lihuguvara vene, ava ava lipura asi: ‘Hompa nokanunu si asi a rugane yuma yoyiwa ndi yoyidona.’ 13Emona lyawo ngava li kwata, ano mambo gawo ngava ga hanagura po. Kutupu, kapi ngava kara momambo aga vana kutunga ndi asi ngava nwe vhinyu zoyikunino yomandjembere eyi vana kutapeka.”
14Ezuva lyaHompa lyenene pepi lina kara, pepi‐pepi kuna kugenderera kuwiza! Ngali kara ezuva lyedigu, morwa novakwayita wovaradi vaava ngava takuma mokuzumbanesa ekwafo! 15Ngali kara ezuva lyehandu lyenene, ezuva lyoudigu noruhodi, ezuva lyesovagani nomaremo, 16ezuva lyokukugana mazwi gonombendo doyita nonkugo zoyita zovakwayita vana kurwisa yitata yomakuma nomaruhungu gomare.
17 Hompa ta tanta asi: “Ngani reta ehudi lyangoso kovantu asi nkenye ogu nga puputire ngwendi mutwiku. Awo kwa zona kwange, ano ngesi honde zawo ngava zi tjisa ngwendi mema, ano yimpu yawo ngayi kunguvara tayi worere pevhu.”
18Ezuva eli nga horora Hompa ehandu lyendi lyenene, sisiliveli sawo nongorodo zawo, nayo si kapi ngayi va parura. Evhu nalinye ngali hanauka komundiro gwehandu lyendi. Age nga hagesesa — ehageso lyohararasi — nkenye ogu ga kara pevhu.
Currently Selected:
Sefaniya 1: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
