HABAKUKU 3
3
Ekanderero lyaHabakuku
1Ekanderero lyomuporofete Habakuku lyeli:
2 Hompa, ame kwa zuvha eyi wa rugana,
yiyo una gwana nge woma.
Rugana hena noposiruwo setu
yirugana yoyinene
eyi wa hwa kurugana.
Tu fira nkenda, mpili ngomu
wa handuka.
3Karunga ta tundu hena koEdomu;
Karunga gokupongoka ta tundu
konondundugona daParani.
Uhompa wendi kwa kudumika eguru;
ano evhu kwa zura efumano lyendi.
4Ta wiza nouzera woruvadi;
ruvadi kuna kuvema mokuwoko kwendi,
omu mwa horama nonkondo dendi.
5Age kutuma ehamba komeho zendi
ta pangere nomfa di mu kwame.
6Nsene a sikama,
evhu tali kankama;
nomuhoko kureremena kosite sendi.
Nondundu danarunye
da haragana po;
nondundugona danarunye
da pwira mo,
nondundogona oku nga gendi
kokakuru kanare.
7Na mwene vantu womoKusani
vana tjira
ano vantu womoMidiyani
kuna kumenga.
8 Hompa, nomukuro yido nye
da ku handukisa ndi?
Efuta yilyo nye
lya ku handukisa unene ndi?
Ngo rondo pomaremo;
eremo lyokusita yiko karukara
koge koyita ka kere,
apa ngo reta efundo kombunga zoge.
9Ngo rundu uta woge,
to pameke yikutji yoge o ponye.
Ruvadi roge kwa gagwire evhu.
10Apa da ku mwene nondundu,
tadi kankama;
mema kuna kupowomoka keguru.
Mema gokonhi zevhu
taga ndunduma,
mankumpi kuna kuyerauka.
11Kokuvema kweswemo lyoyikutji
yoge nekevembero lyegonga lyoge,
ezuva nokwedi tayi sikama.
12Ove kwa tawinine evhumehandu;
mehandu lyoge lyenene
to lyatagura nomuhoko.
13Kwa horokere to parura mbunga zoge,
o parure hompa ogu wa horowora.
Kwa toonene mugendesi govadinikarunga
to hanagura nuunu vakwami vendi.
14Yikutji yoge kwa wurwire
mupitisili gombunga zendi
zovakwayita apa za wizire
ngwendi kakunguru asi zi ya tu
haraganese po,
vana hafa ngwendi vava ava
hepekere vahepwe mokahorehore.
15Ove kwa gendere kefuta
nononkambe doge,
mema gononkondo taga kara ntutu.
16Ame kwa zuvha nayinye eyi,
makura tani kankama;
marungu gange kuna kumenga kowoma.
Rutu rwange runa mi,
ano nompadi dange
kuna kupundauka.
Ame ngani ndindira pore zange
siruwo si wize
apa nga futisa Karunga ava
ava tu rwisa.
17Nampili ngomu ga pira maukuzu
enyango, yindjembere kutupu mandjembere,
nampili ngomu guna pili
muzangu gononzwe
momapya mutupu mahangu,
nampili ngomu dina fu nonzwi
nadinye nohambo donongombe mawoko‐woko,
18Yimo ngorooro ngani hafa
tani pembura,
morwa Hompa Karunga
yige muparuli gwange.
19 Hompa ta pe nge nonkondo.
Ta pameke nompadi dange
ngwendi makondo gomenye,
makura ta yowerere nge konondundu.
Currently Selected:
HABAKUKU 3: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
