Sefaniya 2
2
Elikwambero lyelitezururo
1Muhoko ove wa hana nomuga, ligazara 2ove simpe kapi ono rembuka o kukute ngwendi mbya, simpe alyo ehandu lyaHompa lyokutwera kapi lina kusikama, alyo ezuva lyokumonekesa ehandu lyendi lyenene kapi lina siki. 3Tengureni kwaHompa, namuvenye ava valinunupiki mosirongo, ava omu limburukwa konompangera dendi. Ruganeni yoyiwa, mu linunupike kosipara saHompa. Mpamwe ngomu yoworoka kefutiso mezuva eli nga horora Hompa ehandu lyendi.
Etokoro lyonomuhoko edi da kundurukida Israeli
4Kutupu ogu nga hupa mo mositata saGasa. Asikeroni nga kara mburundu. Vantu womoAsidodo ngava va tjida mo moharufa zezuva, ano womoEkironi ngava va tjida mo mositata sawo. 5Vafilisiti muna pu kumutokora, vantu ava mwa tunga konontere defuta. Hompa ana mana kumupangura. Age nga mu hanagura po, kutupu ogu nga hupa po. 6Sirongo seni sekefuta ngasi kara mazana goyikorogo yovasita noyinyongo yononzwi. 7Vantu womoJuda ava ngava hupa po, yiwo ngava gusa sirongo seni. Yimo ngava lisira yiunda yawo, tava rara mononzugo daAsikeroni. Hompa Karunga gwawo nga kara kumwe nawo, ta va ragopeke hena.
8 Hompa Munankondo nadinye ta tanta asi: “Na zuvha vantu womoMowaba nomoAmoni tava sense oku tava swaura vantu vange, oku hena tava likanganga asi ngava gusa sirongo sawo. 9Yosili nina kugana ame Karunga gwaIsraeli gomwenyo asi, Mowaba naAmoni ngava hanauka po ngwendi Sodoma naGomora. Ngayi kara yitapo yomungwa nezunguruko lyanarunye, tayi hokere wayi. Ava ngava hupa po povantu vange, yiwo ngava yi litwa tava gusa sirongo sawo.”
10Ngoso yimo nye ngava va futisa vantu womoMowaba naAmoni mokulinenepeka nokulitumba kwawo nomokuswaura vantu vaHompa Munankondo nadinye. 11Hompa nga va tjilisa. Vakarunga vepevhu nga va pirura, va kare va hana sikwafa, makura nkenye muhoko ngagu mu tongamene age, nkenye ogu mosirongo sagwene.
12 Hompa nga dipaga hena vantu womoSudani.
13 Hompa nga ruganesa nonkondo dendi a hanagure po Asiliya. Nga zonagura sitata saNinivhe si kare ngwendi mburundu, mburundu za hana mema. 14Alyo ngali kara evega lyokurara yiunda yononzwi nonongombe noyikorama peke‐peke. Vakakuru ngava kara pokatji keyi ya zunguruka, tava dimbire pomakende. Makorova ngaga tembera poyirondero yomavero. Yitji yosedeli yomatungo gendi ngava yi zungurura ko. 15Oyo yiyo ngayi horokera sitata esi sa lifumadekera nonkondo daso, si gazare asi aso kwa kara katjakara. Vantu vaso kugazara asi sitata sawo yiso sinene po mouzuni. Ee, yireru omu ngasi kara wiza‐wiza, evega omu ngayi pwizumukira yikasama! Navenye ava ngava pita po, ngava swaura tava puku konomutwe.
Currently Selected:
Sefaniya 2: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
