Sakaliya 11
11
Etekopo lyovakenya
1Zegurura mavero goge Libanoni,
mundiro gu wape kuveveka po
yitji yoge yosedeli!
2Yitji yosiperesi, lireni oku tomu
kwenauka — nosedeli dina gu;
yitji eyi ya fumana vana yi
hanagura po!
Lireni oku tomu kwenauka,
manyandi gaBasani —
wiza ou wa pata vana u
zungurura po!
3Vapangeli kuna kusivana keguwo;
unene wawo una va zunguruka!
Purakeneni kenungo lyovanyime;
embo lyawo lyomusitu
koJorodana lina zunguruka po!
Vasita wononzwi vavali
4 Hompa Karunga gwange kwa tanterere nge asi: “Kara musita gosiunda sononzwi edi vana kukatoma. 5Venyado kudidipaga va hana kuvapa usima. Awo kurandesa nyama tava tanta asi: ‘Tangeni Hompa! Ose nongawo!’ Awo nye vasita vawo wononzwi kapi ava di retere nkenda.”
6(Hompa ta tanta asi: “Kutupu hena ogu ngani retera nkenda pevhu. Ame ko nyaamwange ngani tura vantu navenye mepangero lyovapangeli vawo. Vapangeli owo ngava zonagura evhu, ano ame kapi ngani li popera kononkondo dawo.”)
7Owo ava randa oku tava randesa nonzwi edi va fisa nge, makura ame tani kara musita gononzwi dokukadipaga. Kwa gusire nompango mbali; zimwe tani zi ruku “Nkenda,” ano nkwawo “Ugumwe.” Makura tani takamesa siunda sononzwi. 8Ame kwa rorokere kulididimikira vasita vamwe vatatu, ava va nyengere nge, makura tani va tjida po navenye mokwedi kumwe tupu. 9Makura tani tantere siunda sononzwi asi: “Kapi ngani kara hena musita gweni gononzwi. Edi dina kufa, di fe tupu. Edi dina kuzumbana, di zumbane tupu. Edi dina kuhupa po, di lizonagure dene nadene.” 10Makura tani gusa mpango ezi na rukire “Nkenda”, tani zi teza ni zungurure po egwanekero eli ga peke po Hompa nonomuhoko nadinye. 11Makura egwankero tali zunguruka po ezuva olyo. Ava ngava randa oku tava randesa nonzwi, awo kuna kutara nge, makura tava diva asi Hompa kuna kuuyungira mwange mweyi na rugene. 12Makura tani va tantere asi: “Nsene muna hara, peni nge mfuto zange. Nye nsene kapi muna hara, yi kare tupu.” Makura tava futu nge mfuto zange yimaliva yoyitenda yosisiliveli nomurongo ntatu.
13 Hompa ta tantere nge asi: “Yi tura memona lyontembeli.” Makura tani gusa oyo yimaliva yoyitenda yosisiliveli nomurongo ntatu — sivaro sosinene esi va gazarere asi yiso na fira kugwana — makura tani yi tura memona lyontembeli. 14Makura tani teza mpango zauvali, ezi na rukire asi “Ugumwe,” ano ugumwe waJuda naIsraeli makura tau zunguruka po.
15Makura Hompa ta tanta asi: “Kara hena musita gononzwi, apa ngesi gokuzaruka. 16Ame kwa tura po musita gosiunda sange sononzwi, nye age kapi a kwafa nonzwi edi lina kuhara kugwana ezonauko; kapi a papara dokuzumbana, ndi asi a hakure dokuremana, ndi a lise edi dina hupu po. Nye age kulya nyama zononzwi dokuneta unene, ta hukagura ko makondo gado. 17Musita ogo ga hana sirugana ga pwa kumupangura! Ga zumba siunda sendi. Yita ngayi hanagura po nuunu nonkondo dendi. Kuwoko kwendi ngaku kukuta, ano eho lyendi lyokorulyo ngali twika.”
Currently Selected:
Sakaliya 11: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
