Sakaliya 12
12
Emangururo lyaJerusarema lyokomeho
1Ezi yizo mbudi zokuhamena kwaIsraeli ezi za tundire kwaHompa, Hompa ogu ga zanzumuna eguru, ga sita uzuni, yiyo ga pa muntu mwenyo. Age ta tanta asi: 2“Jerusarema ngani mu ninka a kare ngwendi nkinda zovhinyu; nomuhoko edi da mu kundurukida ngadi nwa mo, tadi pundauka ngwendi vantu wokukorwa. Apa ngava umbilikida Jerusarema, yitata yikwawo yomoJuda nayo ngava yi umbilikida. 3Ano apa ngasi sika mo siruwo, ngani ninka Jerusarema a kare ngwendi emanya lyedigu — nkenye muhoko ogu ngagu kambadara kuliyera po tagu remana. Nomuhoko nadinye domouzuni ngadi pakerera vakwayita di mu rwise. 4Posiruwo oso ame ngani tukukisa nonkambe dawo nadinye, ano varondi vado navenye tani va purumukisa. Ngani takamesa vantu vaJuda, nye nonkambe dononkore dawo ngani di twiza. 5Ano mazimogona gaJuda ngaga litantera gene nagene asi: ‘Hompa Karunga Munankondo nadinye ta pe nonkondo vantu vendi ava va kara moJerusarema.’
6“Posiruwo oso ame ngani ninka mazimogona gaJuda ga kare ngwendi mundiro momusitu ndi mepya eli lina kukuta nombuto — ngava hanagura nomuhoko nadinye edi da va kundurukida. Vantu womoJerusarema ngava kara katjakara kawo mositata.
7“Ame Hompa ngani gava efundo kovakwayita womoJuda pomuhowo, asi efumano eli ngadi gwana nontekuru daNdafita novantu womoJerusarema, ngali dire kupitakana pweli lyoVajuda peke. 8Posiruwo oso Hompa nga popera ava va kara moJerusarema, novarupirankondo vaava womokatji kawo, ngava nkondopa ngwendi Ndafita damu. Nontekuru daNdafita yido ngadi va gendesa ngwendi muengeli gwaHompa, ngwendi karunga mwene. 9Posiruwo oso ngani hanagura nkenye muhoko guna kukambadara asi gu rwise Jerusarema.
10“Nontekuru daNdafita novantu peke womoJerusarema ngani va zwida mpepo zonkenda nompepo zekanderero. Ngava tara ogu va digapa negonga, tava mu lili ngwendi vava vana kulira empogwe lyawo. Ngava lira unene, ngwendi vava vana kulira mbeli zawo gomugara ana pili. 11Posiruwo oso siliro moJerusarema ngasi kara sosinene ngwendi siliro saHadadilimoni mezana lyaMegido. 12-14Nkenye epata mosirongo ngali lira pwalyene: epata lya tundilira kwaNdafita, epata lya tundilira kwaNatani, epata lya tundilira kwaRevhi, epata lya tundilira kwaSimeyi, nomapata hena gamwe nagenye. Nkenye epata ngali lira pwalyene, ano vagara vankenye epata ngava lililira velike, vakadi velike.”
Currently Selected:
Sakaliya 12: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
