Sakaliya 10
10
Etumbwidiro lyaHompa lyemangururo
1Omu hundire Hompa mvhura pokurombo. Hompa yige a tumu maremo gomvhura nonomudumbi, ta menesere navenye mapya. 2Vantu kupura vakarunga woyimpempa novapumbi, nye malimbururo aga ava gwana goyimpempa ga hana sirugana. Vamwe kufaturura nonzodi, nye kupukisa ava mu pukisa; ehengagwido eli ava gava, kutupu sikwafa. Makura vantu yiyonye vana kukununuka ngwendi nonzwi dokuzumbana. Awo kuna kara moudigu, morwa kapi va paka mugendesi.
3 Hompa ta tanta asi: “Ame kuna handukire vanayirongo ava ava pangere vantu vange. Awo ntaantani ni va futise. Vantu vaJuda vange, ano ame Hompa Munankondo nadinye ngani va pakera mbili. Awo ngava kara nonkambe dange doyita dononkondo. 4Mokatji kawo yimo ngamu tunda vapangeli novagendesi novapitisili wovakwayita wokupangera vantu vange. 5Vantu vaJuda ngava kara vafundi ngwendi vakwayita ava vana kulyatera nonkore dawo metata lyomononzira. Ngava rwa, morwa Hompa nga kara kumwe nawo. Ano awo ngava funda nononkore dokuronda nonkambe deedi.
6“Ame ngani nkondopeka
vantu vaJuda;
tani yoworora vantu vaIsraeli.
Ngani va zaverera,
tani va tengwida navenye kwawo.
Awo ngava kara ngwendi kapi
na va zumba rumwe.
Ame nyame ni Hompa Karunga gwawo;
ame ngani limburura
makanderero gawo.
7Vantu vaIsraeli ngava nkondopa
ngwendi vakwayita tava hafa
ngwendi vagara ava vana nu vhinyu.
Nontekuru dawo ngadi diworoka
efundo eli
tava hafere eyi ga rugana Hompa.
8“Ngani zigida vantu vange
tani va pongaike kumwe.
Ngani va yoworora
tani va vhukisa moomu mwanare.
9Nampili ngomu na va
haraganesera monomuhoko,
nye ngava diworokera nge kooko
komavega gaure.
Awo novana vawo ngava paruka
tava tengura kumwe kwawo.
10Ngani va gusa koEgipite
naAsiliya tani va twara kwawo
ni va hingidike mosirongo savene.
Ngani va hingidika moGiliyata
nomoLibanoni hena;
sirongo nasinye ngasi zura vantu.
11Apa ngava tavakana efuta lyawo lyoudigu,
ame Hompa ngani toona mankumpi,
ano matondo gaNili ngaga pwira.
Asiliya mulinenepeki, ngava mu nunupika,
Egipite gononkondo, nga
zumbanesa nonkondo dendi.
12Vantu vange ngani va ninka,
va kare vanankondo;
Awo ngava karera nge
tava limburukwa nge.”
Hompa yige ana yi uyunga.
Currently Selected:
Sakaliya 10: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
