Titusa 1

1Mbilive ezi kuna kutunda kwaPaurusa, mukereli gwaKarunga nomupositoli gwaJesus Kristusa. Ame kwa tumina nge vantu ava ga horowora Karunga, ni va kwafe mepuro, ame ni va tware mediwo lyousili ou ali rongo ukerelikarunga wetu, 2ou va tatekera kehuguvaro lyomwenyo gwanarunye. Karunga ogu a dili kutanta yimpempa, yige ga gu tu tumbwidira nare‐nare, 3age hena kwa gu horora posiruwo sosiwa mononkango dendi. Ame eyi kwa yi huguvarera nge, ame yiyo ani udisa moomu ga yi pangera nge Karunga, Muzowoli gwetu.

4Tani ku tjangere ove Titusa, munwange mwene‐mwene gemepuro lyetu natuvenye: Karunga Guhyetu naJesus Kristusa, Muzowoli gwetu va ku fire nkenda oku tava ku pe mbili.

Yirugana yaTitusa moKereta

5Eyi na ku sigira moKereta yeyi asi, o wapaike nayinye eyi ya hupa ko, oku to tura mo vakurona wonombungakriste mwankenye sitata, moomu na ku tantera. 6Diworoka asi, mukurona gombungakriste a pire epuko, a kare mugara gomukadi gumwe tupu, govana wovapuli va hana nompata, awo hena kapi va runda mutwe. 7Mupitisili gombungakriste a pire epuko, moomu lya fira kukara erenga lyaKarunga, kapisi gokulihara mwene gelike, kapisi gomarwanambo, kapisi nkorwe ndi mukorokotji ndi mupapali gemona lyouzuni. 8Nye a pakere mbili vagenda, age hena a hare yoyiwa. A kwate mutjima, a hungame, a pongoke, a lipangere mwene. 9A udise nonkango dokuvhura kuhuguvara, edi da liza nerongo eli va mu ronga, ntani a vhura kukorangeda vakwawo nerongo lyewa oku ta pukurura ava vana kumukondjesa.

10Yeeyi nompote nonzi, edi adi kavauka di pukise vantu, unene vamwe mo ava va rugana yovamba. 11O yi va nyokere, yeeyi awo kupukisa mambo pokuronga va hana nomuga eyi ya dira kuzira mo, asi va gwanene po emona. 12Mukwaawo gumwe, muporofete gwavene, kwa tanta asi, “Vakereta vanayimpempa, awo yikasama yoyidona. Awo ruli, nye awo hena udwa.” 13Undipo ou wosili. O yi va tugumukire unene, tava kara ko nepuro lyewa, 14kapisi va kwama‐kwame nongano doVajuda noyipango yovantu ava va nyenga usili. 15Yininke nayinye kwa kuhukira ava va kuhuka; nye ava va nyata awo va hana epuro, kwawo nayinye kwa nyata, nonondunge dawo deedi nezwi lyawo lyomomutjima nalyo kwa nyata. 16Awo kulikoreka asi va diva Karunga, nye awo kumupatana moyirugana yawo. Yeeyi awo vadona, awo kapi ava zuvhu, kapi ava vhuru kurugana yuma yoyiwa.

Currently Selected:

Titusa 1: KWN

Highlight

Copy