Titusa 2

Erongo lya hungama

1Nye ove ko, o ronge eyi ya liza nerongo lya hungama. 2Tantera vakuronagara va dire yikorwesa, va kwate nomutjima, va kare vakuruki, va kore mepuro nemeharo nemedidimiko. 3Va kare vakuronakadi, nawo o va tantere asi va kare vakadizuni, moomu ya wapera vapongoki. Va ha kara vazazauki ndi womakurunwa, nani nye va kare varongi veyi yoyiwa, 4mokuninka asi vakadi wovasesu va lirongere ko kuhara vagara vawo novana vawo. 5Vakadi wovasesu ava pangere marutu gawo, va kare vakuhuki, va kare vagolikadizuni. Awo ava zuvhe yovagara vawo, nonkango daKarunga neisi va di swaura.

6Vagaramati nawo o va korangede, tava pangere marutu gawo. 7Ove ko nyamoge, moyininke nayinye kara sihonena soyirugana yoyiwa. Erongo lyoge li zere, alyo li hungame. 8Nonkango doge adi hungame tadi tu vantu konomutjima, nonkore doge di fe nomuga, yi va limbe kutuvyuka.

9Korangeda vakareli asi ava zuvhe ohekurwawo, ava va hafese mwanayinye, kapisi va kare mutomonono, 10ndi asi ava vaka‐vake. Nye ava moneke nkenye apa asi awo vawa kuvahuguvara tupu, va fumbure mwanayinye erongo lyaKarunga, Muzowoli gwetu.

Ufenkenda waKarunga kuparura navenye

11Ufenkenda waKarunga kwa u horwera u rete eparu kovantu navenye. 12Awo kuronga asi tu zumbe udinikarunga nomadowo gopauzuni ou, ose hena tu pangere marutu getu, tu hungame, ose tu kerere Karunga mouzuni ou, 13siruwo esi tuna kara mendindiro nemehuguvaro lyeparu nehoroko lyouyerere waKarunga gwetu gomunene noMuzowoli gwetu Jesus Kristusa, eli twa huguvara. 14Age kwa ligava morwetu, a tu parure mo mouturanzo wetu, a tu kuhwe tu kare muhoko gwamwene, gomupampi mokurugana yoyiwa. 15O ronge yininke eyi, to va korangeda oku to va tugumukire mononkondo doupitisili woge. Nokuvatarerera si asi va ku dine.

Currently Selected:

Titusa 2: KWN

Highlight

Copy