2 Timoteusa 4
4
1Tani ku ganesa kosipara saKarunga nesi saJesus Kristusa, ogu nga pangura vanamwenyo novafe, morwewizo lyendi noUntungi wendi asi: 2O udise nonkango, o kovekede kuuyunga posiruwo sosiwa nesi sosidona. O va tugumukire nokuvakorangeda oku to va rongo noudidimiki. 3Yeeyi siruwo ngasi wiza, esi ngava dira kuhara kupurakena vantu erongo lyosili, nye ngava gusa po yeeyi va hara. Ngava lipongaikira varongi wovanzi wokuvatantera eyi yina kuvatovarera. 4Awo ngava nyoka kupurakena yosili, tava hara kupurakena nongano domawoko‐woko. 5Nye ove ko, o lipangere mwanayinye, o nyande tupu ngorooro, to rugana sirugana somuudisi goMbudi zoNgwa, to sikisa mo sirugana soge.
6Ame popepi‐pepi na kara asi va zambe nge nzambo, siruwo sange sokuza sina siki mo nye. 7Ame kwa rwa yita yoyiwa, na mana nye kuduka, epuro hana kerera nalyo. 8Ame hena kwa pungwira nge nkata zefundo zouhungami, ezi nga ka pa nge Hompa, Mupanguli gomuhungami mEzuva olyo. Kapisi nyamelike tupu ngava zi pa, nye nava navenye va diworoka unene kumona ehoroko lyendi.
Makorangedo gamwe hena
9Genderera kuwiza usimbu kwange. 10Yeeyi Demasa ga zumba nge, morwa ana dowokere unene uzuni wantani, makura yiyo ga za koTesaronika. Keresikesi ga za koGaratiya, ano ogu Titusa nage ga za koDalimatiya. 11Rukasa gelike na kara nendi. Ngo ka rete Marukusa, ngomu wize nendi, yeeyi age nga vhura kukwafa nge unene moyirugana. 12Tikikusi na mu tuma koEfeso. 13Ano apa ngo wiza, ngo piture erwakani eli na sigire kwaKarupusi moTorowa, nonobuke hena, unene dodo doyipapa.
14Arekisandeli, muhambuli gongoporo, ga rugana nge yoyidona unene. Nye Hompa ngano ta mu rugwidire kuwoko yi lize noyirugana yendi. 15O mu rungararare nove, yeeyi age kwa kondjesa unene nonkango detu.
16Apa na lipoperere romuhowo, nagumwe si ga heme kwange, navenye kwa yi tarerere nge. Eyi Karunga ngano ga ha yi va konenekera. 17Nye Hompa kwa kere pwange, ta pe nge nonkondo ni udise nawa‐nawa, vapagani navenye va yi zuvhe; ano ame kwa parwire nge mokana kanyime. 18Hompa nga yoworora nge mo moudona naunye, nga parura nge, ngani hwilire moUntungi wendi weguru. Age ava mu fumadeke narunye‐narunye! Amen.
Makundo gokuhulilira
19Kundisira po oPilisika naAkura nembo lyoOnesifura. 20Erasitusa mweli moKolinte. Torofimusi na mu siga moMirete, yeeyi asi age ta vere. 21Genderera kuwiza, ako kufu simpe kapi kuna siki.
Euburusi naPudenesi naLinusi naKeraudiya novakweni navenye tava ku kundire po.
22Hompa a kare noge. Karunga a mu fire nkenda namuvenye.
Currently Selected:
2 Timoteusa 4: KWN
Highlight
Share
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
