RUSUMO 8
8
1Ngano asi o mpanzange tupu wa
kere, ogu va zamweka onane.
Ngano nsene na gwanekere noge monzira,
ngano kuvhura ni ku ncumite,
nye nagumwe si gokuyipakera mbili.
2Ngano ngani ku twara kembo lyonane,
oku no ka rongera nge eharo.
Ngano tani ka ku pa vhinyu zontovara,
vhinyu zange zontovara o nwe.
3Kuwoko koge korumoho
taku kara konhi zomutwe gwange,
ano kokorulyo taku firura nge.
4Tumbwidireni nge, one vakadi vaJerusarema,
asi kapi ngomu tanganesa eharo lyetu.
Rusumo rwautano‐narumwe
Vakadi:
5Ogu ana kuwiza, age kuna
likwaterere namuholi zendi, yilye?
Mukadi:
Mositji soapere na ku pindura,
mevega eli va ku hampurukira.
6Wa ha hamesera mutjima goge
kwankenye eharo, nye kwange;
nokukwaterera si nagepeke, nye nyame.
Eharo kwa kara nononkondo
ngwendi nomfa;
uradi weharo nomfa dene‐dene
da lipwira.
Alyo kuhwama tali twera
ngwendi mundiro.
7Mema nokuvhura si kulidimisa;
ru kare ruhanzo nokulidivida si.
Nsene pweli ogu ana kuranda
eharo nemona lyendi,
ta liswawisa tupu mwene.
Vampanza womukadi:
8Ose kwa kara nampanzetu gomunona,
mavere gendi yipo gana kutumba.
Ngapi omu ngatu mu rugana, nsene
nga wiza mumati a ya mu hehe?
9Ngano asi age ekuma,
ngano ngatu mu tungira
ruhungu rosisiliveli.
Ndi ngano asi age erungavero,
ngano ngatu mu popera
noyipirangi yosedeli.
Mukadi:
10Ame nyame ekuma,
ano mavere gange
yigo maruhungu galyo.
Muholi zange ga diva asi
pwendi ame mutjima gwange
tagu zi mo, tani gwana mbili.
Mugara:
11Saromo kwa kere nosikunino
soyindjembere pevega Bara‐Hamoni.
Amo kwa kara mo varugani ava
ga si hehedere;
nkenye ogu nga futu yimaliva
yoyisisiliveli eyovhi.
12Saromo kugwana yimaliva
yoyitenda eyovhi,
ano varugani awo kugwana
mafere gavali;
ame kwa kara nosikunino sanyamwange!
13Siga ni zuvhe ezwi lyoge
tali tundu mosikunino, muholi;
vakwetu kuna kundindira
va ku zuvhe to uyunga.
Mukadi:
14Wiza kwange, muholi,
ngwendi mpunza,
ngwendi horongogona konondundu
oku aku kuru yitoveseso.
Currently Selected:
RUSUMO 8: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
