RUSUMO 7
7
Mugara:
1Ee, yitetugona ove mukadona ove!
Nompadi doge moyicamakaku
kapisi yiwo uwa womu.
Nontumba dopombunda zoge
kwa fana yirugana younkurungu.
2Pokeli kavaza aka ka hana
kupwa nampili rumwe
vhinyu zokuvhonga‐vhonga.
Ndambo zomahangu pozili, ezi da
kundurukida nombya domalyanga.
3Mavere goge ngwendi nomenye domapange,
ngwendi vampunza vavali.
4Nsingo zoge ngwendi ruhungu
romazego ganzovhu.
Meho goge ngwendi madiva
mositata saHesiboni,
pepi nerungavero lyositata oso sosinene.
Ezuru lyoge ewa ngwendi
ruhungu rwaLibanoni
oru rwa livyuka naDamasikusi.
5Mutwe goge kwa vyuka
ngwendi Ndundu zaKarumeli.
Nohuki doge domankumpi
kupaima ngwendi purupuli;
uwa wado kuvhura u toge hompa.
6Ee, mutarogona, uwagona;
ee, ruhafogona rwa zulilira
rweharo lyoge.
7Ove muwa mokutara
ngwendi ngone,
ano mavere goge ngwendi
yisokombwa yomandjembere.
8Ame kuna hara ni ronde kongone
ni nyange ko yiyimwa yako.
Kwange mavere goge ngwendi
yisokombwa yomandjembere,
munku goge ngwendi edumba lyoyiapere,
9ano kana koge ngwendi vhinyu zene‐zene.
Mukadi:
Siga nye vhinyu zi vyukilire
kupupira kwamuholi zange,
zi pupe komarungu nokomazego gendi.
10Ame gwamuholi zange, ano age
kudiworoka nge.
11Wiza muholi zange, tu pwage tu
ze mosanzara
tu ka rare monomukunda.
12Ngatu meneka tu tare yindjembere
tu yi tare nsene asi tayi kuru,
nsene nombya dina temuna,
ano yitji yopomegaranate
nsene tayi pumine.
Oko yiko nani ka ku pera eharo lyange.
13Ove kuvhura kufumbwira
yiyimwa yeharo,
ano yiyimwa nayinye yokuhafesa
poyili popepi nevero lyetu.
Muholi, ame kwa yi ku
pungwira yanare neyi yoyipe.
Currently Selected:
RUSUMO 7: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
