JESAYA 1

1Mobuke ezi kwa kara mo nombudi dokuhamena Juda naJerusarema edi ga horwerere Karunga Jesaya zaAmosa poruveze romapangero gohompa womoJuda, oUsiya naJotamu naAhasi naHisikiya.

Karunga ta sigi mbunga zendi

2 Hompa kwa tente asi: “Evhu neguru, purakena eyi nina kuuyunga! Vana ava na rera, kuna di vyuka nge. 3Nongombe da diva hekurwado ogu ga di weka. Ano yindongili ya diva oku a yi lisire hekurwayo. Nye ayo kwa pitakana mbunga zangeIsraeli. Awo kapi ava zuvhu ko nampili nakauke.”

4One kuna mu fingi one muhoko gononzo, one mbunga zondona zezonauko! Nonzo deni kuna kumupurututa tadi mu gandanga! One kwa zumba Hompa, Karunga Mupongoki gwaIsraeli pokumupa nyima. 5Yinke muna rundire simpe ngoso nomutwe? Kuna hara va mu futise ko nye unene ndi? Mutwe goge ove Israeli, nare vana gu kudumike yironda, ano mutjima goge nomagazaro goge kuna kuvera. 6Kutunda komutwe dogoro konompadi, kutupu ko nampili sipute simwe sina veruka korutu roge. Ove kuna zura yimburwa nomasina noyironda yokuzahamana. Yironda yoge kapi va yi tumba ndi asi va yi mange. Kapi va gwaveka po mugwawo nampili nakauke.

7Sirongo seni sina kara mburundu, ano yitata yeni nayo vana yi swakerere po nuunu. Vanayirongo kugusa sirongo seni tava zonagura nkenye aka, one kuna kutara. 8Jerusarema selike sina hupu po, esi za kundurukida nkore — za hana epopero ngwendi ndunda zomunomeni mosikunino soyindjembere ndi ngwendi ntara mepya lyomarupotera. 9Hompa Munankondo ngano asi kapi ga parura mo vamwe mombunga, ngano Jerusarema kwa mu haraganesa po nuunu, moomu moSodoma naGomora.

10Jerusarema, vapangeli novantu woge kwa lifana novantu womoSodoma naGomora. Purakena eyi ana kukutantera Hompa. Pakera mbili kweyi ana kukuronga Karunga gwetu. 11Age ta tanta asi: “Ove kuna kugazara asi ame kuna hara nonzambo nadinye edi ono kuzambera‐zambera nge ndi? Ame nina kuta nye nonzambo deswakerero dononzwi edi o zambere nge, nomagadi goyimuna yoge yoyiwa mo. Ame nina roroka kohonde zonontwedu nononzwi noyikombo. 12Ogu ga mu tantera mu retere nge nayinye eyi apa omu wiza mu ya kerere nge hena yilye? Nogu ga mu tantera mu rugane nayinye eyi mu lyatange montembeli zange hena yilye? 13Nonzambo deni edi muna kuretera nge mulyo mwato. Nonzambo dedumba lyewa edi muna kuzambera nge, kwange yihuna pokudifumbwira. Kapi tani vhuru kulididimikira yipito yeni yoKwedi koKupe noMasabata geni noyigongi yeni youkerelikarunga; nayinye yina di zonagura nonzo deni. 14Ame kwa nyenga yipito yeni yoKwedi koKupe nomazuva geni gokupongoka; ayo mudigo kwange, na roroka kugusimba.

15“Nampili mu zerure mawoko geni mu kanderere, ame neho si. Nampili mu kanderere makanderero gomanzi, ame nokumupurakena si, yeeyi asi mawoko geni kuna zura honde. 16Likuhweni mu likuhure. Hagekeni udona naunye ou nina kumona muna kurugana 17mu lironge kurugana uwa. Tareni asi uhungami va u sikise mo — kukwafa ava vana kuhepeka kupopera nonsigwe novafisavayavawo.”

18 Hompa kuna kutanta asi: “Wizeni tu ya wapaikeni nonkango. Nonzo deni nampili di gehe ngwendi honde, ngadi zera ngwendi yiterengenze. Ado mpili kwa geha ngwendi purupuli ngadi, zera ngwendi nohuki dononzwi. 19Nsene ngomu limburukwa kwange, ngano ngomu ka lya yoyiwa yomosirongo. 20Nye nsene mu nyoka nge mu runde mutwe, ngava mu finga mu fe. Ame Hompa nyame nina kuyiuyunga.”

Sitata sononzo

21Nane vakwetu, sitata esi ngasi limburukwa, yiso sina kara ngwendi hondedi. Sa kere kwa zulire vantu wovahungami, nye ntaantani kuna zura mo tupu vadipagi velike. 22Jerusarema, ove kwa fene ngwendi sisiliveli nye ntaantani kutupu mulyo; ove kwa fene vhinyu zongwa, nye ntaantani kuna hauka mema. 23Vapangeli woge vana rundu mutwe, yiyo vana kara vakwawo wovawidi. Awo narunye kutambura mauhwi nonomfuto domoufutunkume. Awo hena kapi ava popere nonsigwe moyipangura nokupurakena nonkango dovafisavayavawo.

24Ano nye ntaantani purakeneni omu ana kuuyunga Hompa Munankondo nadinye, Karunga gononkondo gwaIsraeli asi: “Ame ngani tengwida kuwoko nonkore dange, makura ngomu dire kuretera nge upyakadi wokufa nokutara. 25Ame ngani di ku vyuka, tani ku kuhura nawa‐nawa moomu ava hemuna sivera, tani gusa po nyata zoge nazinye. 26Ame ngani ku pa vapangeli novapukuruli ngwendi woporuveze rwina rwanare. Jerusarema ngava si tumbura asi sitata sosihungami sokulimburukwa.”

27 Hompa muhungami, yipo nye nga parwira Jerusarema nankenye ogu ga kara mo, ogu ana kulitezurura. 28Age nga handukira nkenye ogu nga zona ta mu rundire mutwe, ta dipaga nkenye ogu nga dira kumutambura.

29One ngomu fa nomuga pokukanderera yitji noyitapekwa moyipata yokupongoka. 30One ngomu fa ngwendi sitji sounyandi sa kukuta mosipata esi ava dili kutekera mema. 31Moomu tupu aru hwama rwenge kohanze, yimo ngorooro ngava hanauka po vagara wononkondo koyirugana yawo yoyidona. Nye nagumwe si ogu nga vhura kukandana po ezonaguro lyangoso.

Currently Selected:

JESAYA 1: KWN

Highlight

Compare

Copy