RUSUMO 4
4
Mugara:
1Yireru omu wa wapa,
ove muholi zange!
Meho goge yireru omu aga yukuma
keharo konyima zewiwili lyoge.
Nohuki doge kuna kurerauka,
ngwendi siunda soyikombo,
yina kumbarumuka konondundu daGiliyata.
2Mazego goge mazera
ngwendi nonzwi vana kukurura
ntani dina pu kukuhwa.
Nadinye nonsumba dayivali‐yivali;
patupu etjimpe.
3Marungu goge ngwendi urenga wougeha;
ee yireru omu aga wapa
nsene to uyunga.
Matama goge kunkoyima
konyima zewiwili lyoge.
4Nsingo zoge ngwendi ruhungu rwaNdafita,
za liudinga zomusenete,
siranda samo ngwendi yilikandwiso
eyovhi yina zenzerere mo.
5Mavere goge ngwendi vampunza,
nomenye domapange dina kulya
monombya dosanzara.
6Ame kuna hara ni kare
kondundu zomira,
kondundu zoyitutumikidiso
yedumba lyewa,
dogoro ezuva tali parere
nomundema di dongonoke.
7Ee yireru omu wa wapa ove
muholi zange,
ove kwa waperera!
8Toko tu tunde koNondundu
daLibanoni, muvandekerwa gwange;
tu tunde ko koLibanoni.
Tunda ko kondungu zoNdundu zaAmana,
o tunde koNdundu zaSenire
noNdundu zaHeremoni,
oku kwa kara vanyime novangwe.
9Yimoneka yomomeho goge,
sihoro sange nomuvandekerwa
nosiranda esi ono dwara
yina vaka mutjima gwange.
10Eharo lyoge kuwapeka nge,
ove sihoro nomuvandekerwa gwange.
Eharo lyoge lya pitakana vhinyu;
murora goge kunuka nawa
kupitakana yidumba nayinye.
11Utovara wousi kwa kara
momarungu goge,
sihoro sange;
eraka lyoge kwange ame
masini nousi.
Ano rudumba royikoverero yoge
ngwendi rudumba rwaLibanoni.
12Sihoro sange sokomutjima,
muvandekerwa gwange,
sikunino sa horama,
sikunino somakuma,
runone oru va pata
13omu ayi kuyumuka yimeno.
Ayo kukura ngwendi sikunino
soyitji yopomegaranate
ayi yimi enyango lyewa.
Ako kapi kwa pira nombya dohena nonarede
14nosafuroni nokaramusi nosinamoni
ndi nkenye tupu sidumba.
Mire noaroe yiko ayi kuru
yonomurora dene po dedumba lyewa.
15Marunone kutekera sikunino,
nomukuro domema gokupupa,
mema kuna kukonkomoka
konoNdundu daLibanoni.
Mukadi:
16Pinduka, mpepo zokoMuzogo.
Mpepo zokoMbindakano, pepera
mosikunino sange;
zwida mompepo edumba lyewa.
Ninka muholi zange a wize
kosikunino sendi a ya lye
enyango lyamo lyewa po.
Currently Selected:
RUSUMO 4: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
