Rutu 3
3
Rutu ta gwana mugara
1Eyi pwa pita siruwo, Naomi ta tantere Rutu asi: “Munwange, tani ku paparere ko mugara, nkumwe ngo kare nembo lyaamoge. 2Diva asi ogu mugara Bowasa, govakareli o rugana nawo, ekoro lyetu. Purakena! Ngurova zanaina ta hwaga mahangu. 3Ano likuhwa, o gwave murora, makura o dware yikoverero yoge yoyiwa po. Makura nkumwe o ze oku na hwagera, nye ga ha ku mona dogoro noku na mana kulya nokunwa. 4To tarere nawa o divilise apa ana kukarara, ano apa na ponyoka, to mu kudumuna nguwo, makura to rara komaguru gendi. Na ka ku tantera tupu asi ngapi omu no rugana.”
5Rutu ta limburura asi: “Nayinye eyi ono tanta, yiyo nani rugana.”
6Rutu makura ta zi korupare, ta ka rugana moomu ka mu tantere ngumweyi zendi. 7Bowasa eyi ga mana kulya nokunwa, ta hafa. Makura ta zi pondambo zomahangu, ta rara ta ponyoka. Rutu ta hondjavere a ze ko, ta mu kudumuna nguwo, ta rara komaguru gendi. 8Masiku ogo mugara ta hasumuka, eyi ga setuka, ta mono mukadi ana rara po. 9Ta mu pura asi: “Nyove yilye?”
Gwina ta limburura asi: “Nyame Rutu, tate. Morwa ove nyove gekoro nawa‐nawa, yipo nye yina ku hamenene yokupakera nge mbili. Na kanderere, kwara nge po.”
10Gwina ta limburura asi: “Hompa a ku tungike. Ngesi ove kuna kulikida unekoro wounene mweyi ono kurugana, kupitakana eyi wa ruganena ongumweyi zoge. Ngano nyove gumwe ngano wa papara mugara gomusesu, a kare ngawo ndi muhepwe, nye ove kapi wa yi rugana. 11Ano ntaantani neisi tupu no kerera nosinka, Rutu. Ngani rugana nkenye eyi ono hara; morwa navenye womositata va ku diva asi ove omukadizuni. 12Hawe, yosili nyame gekoro, ame hena nyame yina hamene yakoge, nye pweli mugara gumwe gekoro nawa‐nawa kupitakana ame. 13Kara paapa masiku aga, mungura ntani ngatu yi diva nsene nga gusa yokukupakera mbili. Nsene ngayi kara po, ngano nawa; ano nsene yimo sa, tani gana kwaKarunga goMunamwenyo asi, ngani gusa ame yokukupakera mbili. Rara tupu paapa dogoro komungura.”
14Gwina ta rara komaguru gendi, makura ta pinduka ako simpe kapi kuna zererere, va dire kumumona, morwa Bowasa kapi ga here vantu va yi dive asi yipo ka kara. 15Bowasa ta mu tantere asi: “Gusa ko sikoverero soge sokontunda, o si zare apa.” Gwina ta yi rugana, makura ta mu tjilire po mahangu gonokilogarama nomurongo mbali ngoso, makura ta yi mu twike. Makura ta ka za kositata. 16Eyi ga ya sika kembo, ngumweyi zendi ta mu pura asi: “Ee, ngapi omu yina ka ku genda, munwange?”
Rutu ta mu tantere nayinye eyi ana mu ruganene Bowasa. 17Ta twikire ko asi: “Age kuna tantere nge asi na ha wiza koge mawoko‐woko, makura yipo ana pe nge mahangu nagenye.”
18Naomi ta mu tantere asi: “Ntaantani mwena tupu Rutu, o tare asi ngapi omu nayi genda. Bowasa kapi nagu mu dama naina, age ga hana kuwapeka sininke esi.”
© Egwanekerobibeli Lyanamibia 1987, 2003
© Bible Society of Namibia 1987, 2003