Rutu 2
2
Rutu ta rugana mepya lyaBowasa
1Naomi kwa kere nekoro lyendi Bowasa ogu ga hamenene kepata lyamugara gwendi Elimereki. Age kwa kere mugara gononkondo gongawo. 2Ezuva limwe Rutu ta tantere Naomi asi: “Pulisira nge ni ze mepya ni ka pupure nomutwe domahangu edi vana kusiga mo wokuteza. Na huguvara asi nani ka gwana ogu ngani rugana nendi.”
Naomi ta mu limburura asi: “Zende tupu munwange.”
3Rutu makura ta zi komapya ta pupura konyima zovatezi, a toragure mahangu aga vana kusiga mo. Mokupupura kwendi ngoso, ta zi mepya lyaBowasa.
4Ano Bowasa apa ga ka tengwire ko koBeterehema, kwa morwere vatezi vendi ta tanta asi: “Hompa a kare neni!”
Vatezi tava mu limburura asi: “Hompa a ku swere!”
5Bowasa ta pura mukurona goyirugana asi: “Ogo mukadi gomudinkantu hena yilye?” 6Ogo mugara ta mu limburura asi: “Mukadona ogu munayirongo, ogu ga wiza naNaomi va tunde kosirongo saMowaba. 7Age kwa hundira nge asi a gende varugani konyima a toragure mahangu. Haga menekera kurugana, ntaantani tupu ana kupwizumuka po nakauke.”
8Bowasa ta tantere Rutu asi: “Siga ni ku pe ko evyukiso limwe, walye o pupura hena momapya gopeke mwa hana asi momu. Kara paapa o rugane novakareli vange ava wovakadi, 9tara nkenye oku vana kuteza mahangu mepya, ove o kare nawo. Ame na tantere vakareli vange asi va ha ku sindagura. Ano nsene ono fu enota, zende tupu o ka nwe mema mokavaza kamwe aka vana zwida.”
10Rutu makura ta nyongama, a twe sipara sendi pevhu, ta pura Bowasa asi: “Yinke yokufililira nge nkenda ngoso, ame nye munayirongo?”
11Bowasa ta mu limburura asi: “Ame kwa sansekera nge nkenye aka wa ruganena ongumweyi zoge kutunda apa ga fire mugara goge. Ame hena na diva asi ove kwa siga oguho nonyoko nosirongo seni, o wize o ya tunge novantu ava wa dira kudiva nare nampili nakauke. 12Hompa ngano ta ku futu kweyi wa rugana. Ngano to gwana mfuto zokuzulilira kwaHompa Karunga gwaIsraeli, ogu wa wizira a ya ku gamene!”
13Rutu ta mu tantere asi: “Munekuto, ove ono fire nge nkenda unene ono pe nge mukumo pokuuyunga nonkango dokutendeka nge ame mukareli goge, nampili ame kapi na hetakana nagumwe gomovakareli woge.”
14Poruveze rokulya Bowasa ta tantere Rutu asi: “Wiza oku o ya tambure sintau somboroto o ya si verede momuhoka.” Age makura ta hingire kumwe novakareli. Ano Bowasa ta mu pe rukokotwa rokukanga, ta li ta kuta, taru hupu po rumwe. 15-16Age eyi ana pinduka a ka pupure mahangu, Bowasa ta tantere vakareli vendi asi: “Mu sigeni a pupure mahangu nampili moyitungu eyi yina rara, mwa ha mu tugumukira. Kupita opo, tomu pweza mahangu gamwe poyitungu, mu ga mu sigire a ga tore.”
17Rutu ta pongaike nomutwe domahangu dogoro ngurova, ano eyi ana ga hwaga, ta gwana mo mahangu gokusika pepi nonokilogarama murongo ngoso. 18Age makura ta damuna mahangu a tengure kodoropa, ta ka likida ko ongumweyi zendi unzi wago. Age kwa pitwire hena nondya edi da hupire po, ta di gava nado kongumweyi zendi. 19Naomi ta mu pura asi: “Oku ono ka ga pupura nagenye aga kupi ko? Mepya lyalye ono ka rugana? Muntu ogu ana ku fire nkenda ngesi, Karunga ngano a mu swere!”
Rutu ta tantere Naomi asi, mepya lyaBowasa ana ka rugana.
20Naomi ta tanta asi: “Hompa ogu a sikisa mo narunye matumbwidiro gendi kovanamwenyo novafe, ngano ta swere Bowasa.” Age ta twikire ko hena asi: “Mugara ogo ekoro lyetu lyene‐lyene, gumwe gwava ya tumbukira yokutupakera mbili.”
21Rutu ta tanta hena asi: “Yoyinene po pweyi ana tantere nge yeyi asi, ni twikire ngorooro kupupura dogoro vakareli vendi ngava mane kuteza.”
22Naomi ta tantere Rutu asi: “Nhi, munwange, ngoso nawa, nsene to rugana novakareli vendi mepya, ntani o dira kuza mepya lyomuntu gwapeke o dire kugwana udigu.” 23Rutu makura ta rugana kumwe novakareli vaBowasa, ta pupura mahangu dogoro kooku va mana kuteza mahangu nagenye. Age ta twikire simpe kutunga nongumweyi zendi.
© Egwanekerobibeli Lyanamibia 1987, 2003
© Bible Society of Namibia 1987, 2003