Rutu 4
4
Bowasa ta kwara Rutu
1Bowasa kwa zire kevega lyosigongi perungavero lyositata, makura ta ka hingira. Makura gezimo lyaElimereki mwene‐mwene, mugara ogu ga sewekere Bowasa, ta wiza po, makura Bowasa ta mu zigida asi: “Hewa, wiza oku yo hingire apa.” Gwina makura ta wiza ta ya hingire. 2Makura Bowasa ta gusa vagendesi murongo wositata ta va ninki va ya kare po nawo. Eyi va ya hingira ngoso, 3gwina ta tantere ogo gezimo lyendi asi: “Naomi ogu ka tundire koMowaba, kuna hara a randese epya eli lya kere lyagwetu Elimereki, 4ano ame kuna kugazara asi ove wa fira kuyidiva. Ano nsene ono li hara, li randa paapa komeho zovagara ava. Nye nsene kapi ono li hara, tanta, morwa muhoverera nyove ya hamena yokuliranda, moruhura nyame nye.”
Ogo mugara ta tanta asi: “Tani li randa po.”
5Bowasa ta tanta asi: “Nawa unene. Nye nsene to li randa ko olyo epya kwaNaomi, nomufisayendi goMumowaba Rutu, nage to mu randa, makura olyo epya ngali kare lyalyoolyo epata lyogo mugara ga fa.”
6Ogo mugara ta limburura asi: “Ngoso tani zumbanesa eyi ya tumbukira nge mokuranda olyo epya, morwa asi novana si vaamwange vaava kapi ngava li weka. Nyove no li randa, kapisi nyame.”
7Ano nkendi ezi za kere moVaisraeli mokutokora emona eli va randa ndi kwa lisinta zezi asi, murandesi ta hutura ko yicamakaku yendi, makura ta yi gava komurandi. Nkedi zangesi ngazi likida asi sininke sina tokokwa nye nawa‐nawa.
8Ogo apa ga tanterere Bowasa asi: “Nyove no li randa,” makura ta hutura ko sicamakaku sendi ta si pe Bowasa. 9Makura Bowasa ta tantere vagendesi nanavenye ava va kere po asi: “Namuvenye one nyone nombangi naina deyi asi ame na randa kwaNaomi nkenye kaninke aka ga wekere Elimereki novana vendi wovagara oKiliyoni naMahironi. 10Hena asi Rutu goMumowaba, mukadanakufa Mahironi, nage ta kara mukadange. Eyi ngayi pakesa mo emona mezimo lyanakufa, ezimo lyendi ngali twikire ngorooro mombunga zendi nomositata sendi. One nyone nombangi naina.”
11Vagendesi navamwe hena tava tanta asi: “Hawe, nyose nombangi. Hompa ngano ta ninki mukadoge a kare ngwendi oRakera naReya, ava va reterere Jakopo vana wovanzi. Ngano to kara ngawo mezimogona lyaEfurata o fumane moBeterehema. 12Vana ava nga ku pera Hompa momukadi ogu gomunona ngano ngava ninkise ezimo lyoge ngali fane ezimo lyaPeresi, muna gomugara gwaJuda naTamara.”
Bowasa noruvharo rwendi
13Makura Bowasa ta ka hwilida Rutu membo lyendi, ta mu kwara. Hompa ta mu tungike, ta kara nezimo, makura ta hampuruka munona gomugara. 14Vakadi tava tantere Naomi asi: “Hompa va mu pande! Ana ku pe ntekuru zongara zokukupakera mbili. Mumati ngano ta fumana moIsraeli! 15Ngumweyi zoge kwa ku hara, age kwa ku ruganena yoyinene kupitakana vana wovagara vatano-navali. Ntaantani ana ku retere ko ntekuru zongara, ogu nga ku retera ukaro woupe, nga ku gamena moukurupe woge.” 16Naomi ta gusa munona, ta mu hukata, makura ta mu rere.
17Vakadi womaparambo tava ruku ogo munona Obedi. Awo kwa tanterere nkenye ogu asi: “Naomi vana mu hampurukire munona gomugara!”
Obedi yige ga kere guhyaJese, ano Jese guhyaNdafita.
18-22Elikwamo lyezimo kutundilira kwaPeresi dogoro kwaNdafita lyeli: Peresi kwa retere Hesironi, ano Hesironi Rama, Rama Aminadaba, Aminadaba Nasoni, Nasoni Salimoni, Salimoni Bowasa, Bowasa Obedi, Obedi Jese, Jese Ndafita nye.
© Egwanekerobibeli Lyanamibia 1987, 2003
© Bible Society of Namibia 1987, 2003