Rutu 1
1
Elimereki nepata lyendi tava dirukire ko‐Mowaba
1-2Nare‐nare, age Israeli kapi ana paka simpe hompa, mosirongo mwa kere erumbu. Makura mugara gumwe, edina lyendi Elimereki, ogu ga hamenenene kezimogona lyaEfurata, yiyo ga kere moBeterehema somoJuda, ta zi namukadendi Naomi novana vawo vavali wovagara oMahironi naKiliyoni, va ka kare tanko mosirongo saMowaba. Hava kerera oko, 3Elimereki ta fu, makura ta hupu po Naomi gelike novana vendi vavali wovagara, 4ava va kwere vakadona woVamowaba oOrupa naRutu. Eyi pa pita nomvhura ngwendi murongo ngoso, 5makura oMahironi naKiliyoni nawo tava fu. Naomi ta hupu po nye gelike thi ngonyara, ga hana mugara ndi vana wovagara.
Naomi naRutu tava tengura koBeterehema
6Eyi pwa pita siruwo, Naomi ta zuvhu asi Hompa ana tungike mbunga zendi pokuzipa muzangu gomuwa, makura ta liwapaike a tunde moMowaba kumwe nangumweyi zendi. 7Makura tava katuka kumwe va tengure koJuda, nye sikatji 8gwina ta tantere ongumweyi zendi asi: “Tengureni kweni, mu ka kare nozinyeni. Hompa ngano ta mu rugana momuwa, moomu mwa rugana nge ame nava va fa momuwa. 9Hompa ngano ta yi gendesa, namuvenye ngomu kware hena, ngomu kare nomapata.”
Makura Naomi ta va ncumita, a va rekere. Nye vena tava tende mo va lire, 10tava tanta asi: “Hawe! Ose kuna hara, tu ze noge kombunga zoge.”
11Naomi ta limburura asi: “Tengureni vana vange. Yinke eyi muna harere kuza name? Kuna kugazara asi, ngani vhara hena vana wovagara wokumukwara ndi? 12Tengureni, ame nina kurupa nye, kapi nina fire hena nonkwara. Nampili ni kare simpe noruvharo, ni kware masiku ganaina, ngani hampuruke vana wovagara, 13nye sili ngomu vhura kundindira dogoro noku ngava ka kura? Eyi yiyo nye nayi mu silika kukwara nawopeke ndi? Hawe, vana vange muna yi diva nyamweni asi nokuwapa si. Hompa ga zora nge, ame hena kuna kumuretera nkenda unene.”
14Makura tava tende mo hena va lire. Makura Orupa ta ncumita ongumweyi zendi a va rekere, makura ta tengura kembo, nye Rutu ta va kwama‐kwama ngorooro. 15Makura Naomi ta mu tantere asi: “Rutu, mbusoge ana tengura kombunga zendi nakwakarunga gwendi. Nove tengura, mu ka ze nendi.”
16Nye Rutu ta limburura asi: “Wa ha tantera nge asi ni ku sige! Siga nge ni ze noge. Nkenye oku ngo za, name yiko; ndi koku ngo ka kara, name yiko. Mbunga zoge, name zange ngazi kara, ano Karunga goge, name Karunga gwange nga kara. 17Oku ngo ka fira, name yiko ngani ka fira, ako yiko ngava ka vhumbika nge. Hompa a futise nge tupu momunene nampili nonomfa, nye ntudi nomfa yido ngadi gusa nge koge!”
18Ano Naomi apa ga mwene asi Rutu ana tokora kuza nendi, makura kapi ga uyunga hena.
19Makura tava zi dogoro tava ka sika koBeterehema. Eyi va ya sika ngoso, hawe sitata nasinye hwa, vakadi kuna kuzigira asi: “Enye sili yige Naomi ogu ndi?”
20Gwina ta limburura asi: “Mwa ha tumbura nge Naomi, tumbureni nge Mara, morwaKarunga Munankondo nadinye ga ninka ukaro wange u kare woururu. 21Apa na tundire omu, ame ngawo, nye Hompa ana ka tengwida nge mawoko‐woko. Eyi nomu tumbwira nge Naomi yinke, age Hompa Munankondo nadinye ga tumina nge udigu?”
22Yimo nye ngoso ga ka tengwire ko Naomi koMowaba kumwe nangumweyi zendi goMumowaba. Awo kwa ya sikire moBeterehema pevareko lyokuteza‐teza.
© Egwanekerobibeli Lyanamibia 1987, 2003
© Bible Society of Namibia 1987, 2003